1 เฆ ดูอี อายูดา บอกาเฆลียด วี กาโพรม ดี ร็อห อาอูฌียา อี มูห ฆอน อามาฌียา ตึอน แตห อัน วี แบน คูนดีคัม อี ปลูะ ฆูณ อัน. ดอ อัน ตี อาซาก อัน แฮะ โนะ ฆึร ดี เดา ซีนัม. 2 วาย แฮะ ฮอต ยัม ฆูณ อัน อี จืร อามาฌียา ตี, อาอูฌียา บอ วี กาโฆห ปึอน มืง เอลาด. อัน บอ วี อึณปราย มืง ตี.

3 ดอ แบน อาอูฌียา คูนดีคัม ตี, อาซาก อัน ฆึร ดี เดา ซีนัม. อัน บอ อึบ มาน มืง ยูดา, กอย แคง มืง เยรูซาแลม อาดา พัน ฆึร ดี อา ซีนัม. มา อัน จืร นาง เยคอลี อี ดึอม กอย แคง มืง เยรูซาแลม เซเซ. 4 อาอูฌียา บอ โบง นา บอด นา หมึอม ปี อึง เฌาพรา. อัน โบง โดบ ปี ปาย ฆูณ อัน อี จืร อามาฌียา ตึอน. 5 อึณ บอ มูห โจว อาจาคารียา อี มาโนว อาอูฌียา, แตห อัน นับ ดี โรวเซ เฌาพรา. เฌาพรา มืร ม็องการา ดัว นา บอด นา หมึอม ดี อัน.

6 อาอูฌียา บอ แยต ดา ซึก อัน โฮะ กาโฆห ดี เฆ ดูอี พีลีที. อัน บอ ปยาต แวน แรง มืง อาฆัะทัะ, มืง ยาปานี บอ มืง อาจูด. อัน วี แด มืง กามาย มัง มืง อี กอย โคบ มืง อาจูด บอ แคง มืง พีลีที แบน โปละ แบน โปละ. 7 เฌาพรา มืร จอย อัน, แตห อัน กาโฆห แป ดูอี พีลีที, ดูอี อาโมยว อาราบ อี กอย แคง มืง ฆูรัะบาลัะ บอ ดูอี อาโมยว มอนี. 8 เฆ ดูอี อัมโมน มืร กาดูห ดี ฮับ จึง ดี อาอูฌียา. อาพูง ดังโคว อัน มืร แกร ดี ตาง บอ ลึห ฮาว กอ ฌัม มืง แอฆึบ.

9 แดง ตี, อาอูฌียา วี ซัม โฮว จา ดี โดง จืร ดี มาโลห กาโตะ, บอ ดี มาโลห อี กอย โดบ ดีลัยะ บอ ดี โฆะ แรง มืง เยรูซาแลม. อัน บอ โบง แตห อึณ มัน ซีคยา, แกวะ แตห รันซู ปึอน ดี ลึบ. 10 แคง แปร กาฮ็อห มืร, อัน บอ ซัม โฮว จา. อัน บอ ฆึห อูน อึม คึม กืน. โคว, อัน มึห พึง มาบู เฆ พึง มามัก กืน กาเซา อี กอย ดี ดัง นอน บอ แคง ฆลัง. อัน มืร โวว ลอง ปี ปีด ปี ซัม บอ ฌาง อี รัณ มาน เฆ โดง นา อัน, ยอด แมน บอ เฮ มางูน อี กอย ดี นอน บอ แคง มาน แคง นา โดง มูห กาดาย บอด.

11 อาอูฌียา บอ มึห พึง ดา ซึก อี แฮะ ฮอต พึก, แฮะ ฮอต แหลว ดี กาโฆห. อาฮานานียา อี มูห ดา โบว อี อึบ ดา ซึก คูนดีคัม, อัน บอ แยต ดา จาเร อัน อี จืร อาเยยีลา บอ อามาอาเซยา อี แฮะ ดึห ฌาราง ดา ซึก เฆ ตี, แตห เฆ ดา ซึก พึง เหมา พึง อัน ครึง ดี กาโฆห. 12 เฆ ดา ตาง อี อึบ อี แยต ดูอี แคง อึณโฮม เฆ มึห ดา ซึก อา แหรณ ดี เดา มาย็อห วี. 13 เฆ บอ อึบ ดา ซึก อาดา โอย แซน ดี บู แหรณ ดี พัน มาย็อห วี. เฆ บอกาเฆลียด แฮะ ฮอต พึก, แฮะ ฮอต แหลว ดี กาโฆห. เฆ บอ ปึอน จอย คูนดีคัม กาโฆห ดี รันซู อัน. 14 อาอูฌียา บอ โบง มัง ฆ็อง, โบง บลา เลียห, มาฆีณ ฮีน, ซีโตว ฮีน บอ อัะ เฆ วัน วึณ มาว, ดัว ดี ดา ซึก อัน ดอน อี. 15 แคง มืง เยรูซาแลม เฆ ดูอี อัน อี มึห อางยาน, เฆ อี นับ ดี โบง อาโมยว อี กามาย, เฆ มืร โบง จาก อี นับ ดี วึณ อี เฮา บอ จาก อี นับ ดี ดึห มาว ตาง วึณ. เฆ วี อูน แดง กาโช็ง จา, อูน บอ ดี กาโตะ แรง มืง, แตห เฆ ฆ็อง แร มืง. ปาย ตี อาพูง เฆ ซาเร อาอูฌียา บอ ลึห ฮาว ดอน นา ดอน โปละ. โคว, เฌาพรา อี จอย อัน, อัน มึห ปวน มึห บอ อาพูง ดังโคว ตาง.

16 อาอูฌียา แฮะ มึห ปวน, มึห อาพูง ดังโคว ตาง ปาย ตี อัน วี ปีคึก น็อห อัน โบง แตห อัน ลึร ชึม. อัน โบง ลูต เฌาพรา อี มูห เฌาพรา ปี กรึบ อัน. อัน แฮะ ลึบ แคง โฮว เฌาพรา, ต็อห ดี โดะ หลู ซีนัม อูห หงูน ดี กาโช็ง หลู ซีนัม อูห หงูน. 17 ดูอี อี บยาน โฆรห เฌาพรา อี จืร อาฌารียา บอ เฆ ดูอี อี บยาน โฆรห เฌาพรา อี มึห แฮณ, มึห น็อห ยัะ, เฆ ดา ฆึร วี ฮาว โดบ คูนดีคัม. 18 เฆ มืร แคร อัน ต็อห, “อึย แม คูนดีคัม อาอูฌียา, แม ตู ปึอน โดะ หลู ซีนัม อูห หงูน ดี เฌาพรา. อึณ มึห มี เฆ ดา อี หลู ดี เฌาพรา อี มูห หลูกหลาน อาโรน, เฆ อี ปึอน โดะ หลู ซีนัม อูห หงูน. หมาณ, แตห แม เลห แคง โดง ซีงา บอด นี. โคว, แม แฮะ ลูต เฌาพรา อี มูห เฌาพรา ปี กรึบ เอ, อัน เฌา ตู แตห แม วี มึห ซาเร.”

19 อาอูฌียา ตึอน ยี ซี จ็อง แคง โฮว เฌาพรา โคบ กาโช็ง หลู ซีนัม อูห หงูน, อัน มืร แฮะ โฆ็ง บอ ซีลัยะ เงา โดง ดี โดะ อัน ซีนัม อูห หงูน ตี. อัน มืร แฮะ รู กาเซา ดี เฆ ดา อี หลู ดี เฌาพรา ตึอน. ดอ อัน ตี เซา ดูะ บอ โบว เลห ดี กาต็อห อัน อู เฌณ. 20 อาฌารียา บอ เฆ ดา อี หลู ดี เฌาพรา, เฆ วี ยึร เซา ดูะ ดี กาต็อห คูนดีคัม, เฆ วี ฌูน เลห คูนดีคัม แคง โฮว เฌาพรา อู เฌณ. อัน มืร วี ปีครัน อัน ดี เลห โคว, เฌาพรา แฮะ ดัว ดูก ดี อัน.

21 ปาย ตี คูนดีคัม อาอูฌียา อาว ฮู ซีงา บอด โกบ เซา ดูะ ตี. อัน บอ กาดูห ดี กอย แคง โฮว อู โปละ ราง อัน กอ ฌัม ยัม อัน. อัน มืร อาว ฮู ปึอน วี ลึบ แคง โฮว เฌาพรา ดอ เหมา. ฆอน อีมาย อัน อี จืร อาโยวทาม บอ วี กาดาง อัน, วี อึบ มาน มืง บอ กอย แคง โฮว คูนดีคัม.

22 แคะ กอย ลอง อาอูฌียา อี หณัม ดึอม กาลาง บอ มูห ลอง อึบ อัน มาน มืง, ดา อี บยาน โฆรห เฌาพรา อี จืร อาอีซียา อี มูห ฆอน อาโมด แฮะ แดม อูน. 23 อาอูฌียา ตี บอ ยัม ฮาว โดบ ดา ดา อัน. เฆ ยี ตู ดีบ รึม อัน โดบ ดา ดา อัน. เฆ ดีบ อัน มี โดง มูห กาดาย บาเรว ปี จึห คูนดีคัม. โคว, เฆ ต็อห อัน มึห เซา ดูะ. ฆอน อีมาย อัน อี จืร อาโยวทาม บอ วี แบน คูนดีคัม, วี ปลูะ อัน.