1 ดอ อาซาก อาโยวอาด แฮะ โนะ บู ซีนัม, อัน แฮะ แบน คูนดีคัม อี อึบ กาดาย มืง ยูดา. อัน บอ อึบ กอย แคง มืง เยรูซาแลม อาดา พวน ฆึร ซีนัม. มา อัน จืร นาง ซีบียา อี ตัห มืง บีราเซบา. 2 อาโยวอาด มืร โบง นา บอด นา หมึอม ปี อึง เฌาพรา ดอ มูห โจว ดา อี หลู ดี เฌาพรา อี จืร อาเยฮอยาดา. 3 อาเยฮอยาดา บอ ร็อห อีบึณ อา วี, ดัว ดี อาโยวอาด, แตห ฆาย แบน อีบึณ อัน. อาโยวอาด บอ มึห ฆอน อีบึณ บอ ฆอน อีมาย.

4 วาย แฮะ แบน อาโยวอาด คูนดีคัม, อาว บอ เหลณ อัน วี คราม ดี อึณปราย โฮว เฌาพรา. 5 อัน วี จัร เฆ ดา อี หลู ดี เฌาพรา บอ เฆ ดูอี อาโมยว อาเลวี, แตห เฆ ฮาว วีน ดีแล ดอน มืง แคง กาดาย มืง ยูดา, แตห เฆ ฮาว แฆบ รึอน ปี โลว ดัว เฆ ดอน ซีนัม ดอน ซีนัม, แตห เฆ ปึอน ดี อึณปราย โฮว เฌาพรา. มาแล, เฆ ดูอี อาโมยว อาเลวี ยี ตู โบง โดบ อู เฌณ.

6 โคว, อัน วี แดะ ตัห อาเยฮอยาดา อี มูห ดา ตาง เฆ ดูอี อี หลู ดี เฌาพรา. อัน วี ต็อห ดี อาเยฮอยาดา, “เหมา อึณ ปาย ปี ตู ยอด แมน แม เฆ ดูอี อาโมยว อาเลวี อี โลว แฆบ รึอน จึง ดี ดูอี อายูดา บอ ดี เฆ ดูอี แคง มืง เยรูซาแลม, แตห อึณ ปี อาโมวแซ อี มูห แดเจณ เฌาพรา บอ เฆ ดูอี อีซาเรลัะ แฮะ ดึอม แฆบ ดี ดูอี เฆ ตี. อึณ บอ มูห รึอน ปี ดึอม ฮับ เฆ, แตห เฆ ปึอน ดี โบง ทึบ บีก บอด.”

7 เฆ ฆอน นาง เอทาลี อี มูห อีบึณ อี มืก กาเซา ตึอน, เฆ แฮะ ปรา ดี ลึบ แคง โฮว เฌาพรา, แฮะ ดึห ฮาว โกรว อี ซีงา บอด กืน กาเซา อี กอย แคง โฮว เฌาพรา. เฆ วี ดึห ตา ดอ หลู เฆ ดี เฌา บาลัะ.

8 คูนดีคัม วี เบลห อามีง, แตห เฆ ดูอี อาโมยว อาเลวี โบง ฌีดืก รึอน หลู, วี เบลห อูน ดี บาง มาโลห โฮว เฌาพรา. 9 เฆ มืร แดะ กาลาง แคง มืง เยรูซาแลม บอ แคง มืง ยูดา บอ มืง, แตห ดูอี ดอน อี ดึห รึอน จึง ปี โลว ฮับ เฆ ดี เฌาพรา. อึณ มูห รึอน แปะ แฮะ ดึอม แฆบ อาโมวแซ อี มูห แดเจณ เฌาพรา ดอ กอย เฆ แคง แปร กาฮ็อห ตึอน. 10 เฆ ดา กาณา อี อึบ มืง บอ เฆ ดูอี เรา ดูอี กาง เฆ บอกาเฆลียด บอ มึห น็อห โคย ดาคึย, กาโพรม ดี ตัห ฮับ รึอน หลู ตี แคง ฌีดืก, แตห อึณ กอ โนะ. 11 เฆ ดูอี ครึร อาเลวี มืร ดึห ตัห ฌีดืก รึอน หลู ตี, โดง กอย ดา กาณา อี อึบ รึอน หลู. ดอ แฮะ โนะ รึอน แคง ฌีดืก ตี ดอน เฌณ, ดา จาเร คูนดีคัม บอ ดา จาเร ดา อี หลู ดี เฌาพรา มืร ฮูห เลห รึอน ตี. ฌีดืก ตี เฆ ปี วี อูน โดง กอย บรีม อัน ตึอน. เฆ โบง ปาย ตี แบน เฌณ แบน เฌณ บอ กาฌูะ อูน รึอน กืน กาเซา. 12 คูนดีคัม ฆาย อาเยฮอยาดา บอ ดึห รึอน ตี, วี อาบ ดัว ดี เฆ ดูอี อี โบง ฆาน อี อึณปราย โฮว เฌาพรา. เฆ มืร วี ฌาง ดา ลาก อี นับ ดี โฆว มาว, อี นับ ดี ตา เฮ บอ ฮีน เฆ บ็อง, แตห เฆ วี อึณปราย โฮว เฌาพรา.

13 เฆ ดูอี อี โบง ฆาน ตี มืร โฆยวฆยา ดี โบง แตห อึณ เจว ฮอต บอ แตห อึณ มัน ซีคยา ปี บรีม. 14 ดอ แฮะ ฮอต อึณปราย เฆ โฮว เฌาพรา, แฮะ ซีคยา โตต ดอน โมยว, รึอน อี กาโลย เฆ วี อาบ วีว ดี คูนดีคัม ฆาย อาเยฮอยาดา. เฆ มืร โบง ครึง ตา ดอ หลู เฆ ปี ดี หลู อี โดะ ดี เงา. เฆ มืร ดึห รึอน เฆ ครีว, โบง ซีลัยะ เฆ ก็อก ปี ดี ตา แคง โฮว เฌาพรา. โจว กอย อาเยฮอยาดา, เฆ หลู ปี ดี หลู อี โดะ ดี เงา แคง โฮว เฌาพรา เซเซ.

15 ดอ แฮะ กัด กาเซา อาเยฮอยาดา, ดอ อาซาก อัน แฮะ โนะ อู มาย็อห ดี โอย ฆึร ซีนัม, อัน บอ ยัม. 16 โกบ แฮะ โบง อัน นา บอด นา หมึอม, เฆ บอ ดีบ โดว ยัม อัน แคง มืง คูนดีคัม อาดาวีด โดง ดีบ เฆ คูนดีคัม. อัน แฮะ โบง นา บอด นา หมึอม แคง มืง อีซาเรลัะ อาดา เฌาพรา บอ อาดา กาง เฌาพรา.

17 มาแล, วาย ยัม อาเยฮอยาดา, เฆ ดา ตาง ยูดา บอ วี ตัห โฆม, ตัห กรึบ คูนดีคัม อาโยวอาด. อัน มืร โทม โฆรห เฆ. 18 เฆ ดูอี กืน บอ แวน โฮว เฌาพรา, อาว ฮู มึห อี ตัห กรึบ, ตัห ซาคึร ดี เฌาพรา อี มูห เฌาพรา ปี กรึบ ฆูณ ดัง เฆ. เฆ บอ วี กรึบ ร็อง นาง กานัม อี จืร เอซูรา. โกบ หมาบ ปี โบง เฆ ตี, เฌาพรา มืร รู กาเซา ดี เฆ ดูอี อายูดา บอ เฆ ดูอี แคง มืง เยรูซาแลม. 19 เฌาพรา วี จัร เฆ ดูอี อี บยาน โฆรห เฌาพรา ฮาว กาลาง, ฮาว ดัม ซาดีก ดี เฆ, แตห เฆ วี โหลห เฌาพรา. เฆ มืร วี แวน โฆรห ปี กาลาง ดูอี อี บยาน โฆรห เฌาพรา เฆ ตี.

20 ปาย ตี น็อห พึอม เฌาพรา แฮะ อึบ อาซาคารา อี มูห ฆอน ดา อี หลู ดี เฌาพรา อี จืร อาเยฮอยาดา ตึอน. อัน มืร จ็อง โดง จา กาแต เฆ ดูอี กืน บอ กาลาง ดี เฆ ต็อห, “เฌาพรา อี มูห เฌาพรา ปี กรึบ เอ แฮะ ต็อห, ‘เหมา อึณ ปาย ปี ตู โทม เบ โฆรห เฌาพรา? ปี ดี โบง เบ แตห เบ ลึร ชึม, ตู แตห อึณ แบน อาฆยึร ดี เบ. โกบ แฮะ แวน เบ เฌาพรา, เฌาพรา มืร แฮะ แวน เบ.’”

21 ปาย ตี เฆ วี ซี โบง นา ตู หมึอม ดี อัน. เฆ วี โบง โดบ โฆรห ปี จัร คูนดีคัม ดี เฆ. เฆ วี กาโพรม ดี ดึห มาว, วึณ ยัม อัน แคง แวง โฮว เฌาพรา ตึอน. 22 คูนดีคัม อาโยวอาด แฮะ ปีว ปี เฆฌู อาเยฮอยาดา ดี อัน อี มูห ฆูณ อาซาคารา ตี. โคว, อัน แตห เฆ ง็อห ยัม อาซาคารา. ดอ พึอม อาซาคารา แฮะ รีน ดี โตต, อัน วี ต็อห, “แตห เฌาพรา ยึร ลอง ปี โบง เบ นี. แตห อัน เฌา ซูงพยาด อามู ตี.”

23 บอ วี ฌัม ปัน ดี โตต ซีนัม ตี, ดา ซึก อาโมยว อาราม, เฆ บอ ตัห กาโฆห ดี มืง ยูดา. เฆ บอ ปึอน มืง ยูดา บอ มืง เยรูซาแลม. เฆ มืร ง็อห แวน โตต อามู อามาด เฆ ดา กาณา อี อึบ มืง. เฆ มืร พาด ดึห โกรวกราม เฆ กืน กาเซา, วี ดึห ฮาว ดี มืง ดามาคู. 24 ดา ซึก อาราม ปี บอ เปรต มืร, เฌาพรา ยี แตห เฆ แป ดูอี อายูดา อี แฮะ กืน หลึอม เฆ. โคว, เฆ ดูอี บอกาเฆลียด แฮะ แวน อัน เฌา อี มูห เฌาพรา ปี กรึบ ฆูณ ดัง เฆ. ปาย ตี คูนดีคัม อาโยวอาด มืร โลว คัม หมาบ อัน. 25 อัน มืร แฮะ ปาะ, แฮะ มึห ดีม ตาง. ดอ แฮะ ฮอต วี เวณ รันซู เฆ ตึอน, ดา โบว อี อึบ ดา ซึก อัน อา วี วี โบง กาบัห ดี อัน. ฆาย วี ง็อห ยัม อัน แดง กาโช็ง อีด อัน. ฆาย วี โบง เวียะ แปะ แฮะ โบง อัน ดี ฆอน อาเยฮอยาดา อี มูห ดา อี หลู ดี เฌาพรา ตึอน. เฆ มืร ดีบ อัน แคง มืง อาดาวีด. มาแล, อาว ดีบ แคง บาเรว คูนดีคัม.

26 ฆาย อี ง็อห อาโยวอาด ตี บอ มูห อาฌาบาด อี มูห ฆอน นาง ซีมาด อี มูห ดูอี อาโมยว อัมโมน บอ อาเยโฮวฌาบาด อี มูห ฆอน นาง โซวเมรา อี มูห ดูอี อาโมยว โมวอาบ. 27 ลอง เฆ ฆอน คูนดีคัม ตี บอ ลอง ปี กาลาง อี เฮา ลอง อัน บอ ลอง แปะ แฮะ โฆยวฆยา อัน ดี อึณปราย โฮว เฌาพรา, อึณ แฮะ แดม อูน แคง บับ แปะ ลอง บืน คูนดีคัม. ฆอน อีมาย อัน อี จืร อามาฌียา บอ วี ปลูะ อัน, วี แบน คูนดีคัม.