1 วาย ตี อาว บอ เหลณ ดูอี โมวอาบ, ดูอี อัมโมน บอ ดูอี มอนี มัง อี, เฆ วี ฮาว กาโฆห ดี อายอซาพาด.

2 อึณ มึห เฆ ดูอี มัง อี ตัห กาลาง ดี คูนดีคัม อายอซาพาด ต็อห, “แฮะ มึห ดา ซึก อี กืน กาเซา แฮะ ตัห นา มืง เอโดม. เฆ ดี ตัห กาโฆห ดี แม. เฆ มืร แฮะ ฮอต ตัห ฌัม โคบ บาง อึม นัมมูกซารา บลาก นา ดอย. เฆ มืร แฮะ ฮอต ตัห กอย แคง มืง ฮาโซนทามา.” มืง ตี จืร บอ เอนเกดี.

3 ปาย ตี อายอซาพาด แฮะ โยว กาเซา. อัน มืร ต็อห ดี ดีหมอด เฌาพรา บอ จัร เฆ ดูอี บอ มืง ยืน ปี ดี โฮม. 4 เฆ ดูอี อายูดา มืร เลห แคง มืง เฆ, วี ฮาว มืง เยรูซาแลม, แตห เฆ ปึอน ดี ดีหมอด เฌาพรา, แตห เฆ นับ เฌาพรา ดี ปาย เหมา ดี จอย เฆ.

5 เฆ ดูอี อายูดา บอ เฆ ดูอี แคง มืง เยรูซาแลม เฆ บอ ตัห กาฌูะ โตต แคง โฮว เฌาพรา. เฆ กอย ดี อาต แวง กามาย. คูนดีคัม อายอซาพาด มืร จ็อง กาแต เฆ ดูอี กืน ตี, วี ซาคึร ดี เฌาพรา. 6 อัน ต็อห, “อึย แม เฌาพรา อี มูห เฌาพรา ปี กรึบ เฆ ฆูณ ดัง เย, แม มูห เฌาพรา อี กอย แคง ฆางหราว. แม บอ อึบ มาน มืง ดูอี ดอน ฌึร ดอน ครึร แดง กาดาย. แม เฌา มืร มึห อาพูง ดังโคว ตาง. อึณ มืร ตู มึห อาเซ อี ปึอน กาแคณ ดี แม เฌา. 7 แม บอ มูห เฌาพรา ปี กรึบ เย. ดอ ดึห ตัห แม เฆ ดูอี อีซาเรลัะ, แตห เฆ ตัห กอย แคง มืง นี, แม เฌา มืร แฮะ โฮว เตา เฆ ดูอี อี กอย แคง มืง นี, ดึห กาดาย เฆ ตี, วี อาบ ดัว ดี เฆ หลูกหลาน อาบราฮัม อี มูห ฆึก แม เฌา, แตห อึณ แบน โดง กอย เฆ เซเซ. 8 เฆ แฮะ ฮอต กอย แคง มืง ตี. เฆ มืร วี ซัม โฮว แม เฌาพรา, แตห อึณ แบน โดง ดี กรึบ เฆ ดี แม เฌาพรา. 9 เฆ มืร แฮะ กาลาง อูน ต็อห, ‘เซ อึณ มึห อาเพ อาเร ตัห ดี เย, บอ มูห ดา ซึก ตัห กาโฆห ดี เย, บอ มูห ดูก เอต ปี ดี โฮม, เย ดี กอย นา อาต โฮว เฌาพรา อี มูห โดง ดี กรึบ เย ดี แม เฌาพรา. เย ดี ซาคึร กาลาง ลอง ดูก หณาบ เย ตี. แม เฌา มืร ดี บอ โทม โฆรห ปี ซาคึร เย บอ วี จอย แตห เย ลอด.’

10 ดอ ตี นี เฆ ดูอี อัมโมน, ดูอี โมวอาบ บอ ดูอี อี กอย ดี นอน เซอี, เฆ แฮะ ตัห, ต็อห ดี กาโฆห ดี เย. ดอ มูห โจว เฆ ฆูณ ดัง เย, ดอ เลห เฆ แคง มืง แอฆึบ ตึอน, แม เฌา ตู แตห เฆ ลึบ แคง มืง เฆ ตี. แม เฌา แฮะ แตห เฆ ฆูณ ดัง เย วัห มืง เฆ ตี, ตู แตห เฆ ปยาต ดูอี เฆ ตี. 11 แตห แม วี ยอด ปี วี โบง เวียะ เฆ ดี เย ดอ ตี นี. อึณ มูห เฆ วี ตัห ต็อห ดี ณอน เลห เย แคง มืง แปะ แฮะ อาบ แม เฌา, แตห อึณ แบน คาฆูน ดี เย. 12 แม เฌาพรา อี มูห เฌาพรา ปี กรึบ เย, เย หมาณ แตห แม ซูงพยาด ดัม หมาบ ดี เฆ. โคว, เซ อึณ มูห มี แคะ เย, เย ตู นับ ดี แป ดี แคร, แป ดี แร ดา ซึก อี แฮะ กืน กาเซา อี ต็อห ดี ตัห กาโฆห ดี เย ตี. เย อาว ฮู นับ ปี ดี ปาย, เย หน็อะ อึณด็อะ มี แม เฌาพรา ดี จอย เย.”

13 ดอ อัน ตี แคะ กอย เฆ ดูอี อายูดา บอกาเฆลียด บอ อีบึณ เฆ ฆอน, เฆ กอย โตต นา อาต เฌาพรา.

14 ปาย ตี อึณ บอ มึห น็อห พึอม เฌาพรา ตัห โลง ดี อายาฮาเฌลา. อัน บอ มูห ฆอน อาซาคารา. อาซาคารา บอ มูห ฆอน อาบีนายา. อาบีนายา บอ มูห ฆอน อาเยยีลา. อาเยยีลา บอ มูห ฆอน อามาทานี. อามาทานี บอ มูห ครึร อาเลวี อี มูห หลูกหลาน อาซาบ. อายาฮาเฌลา ตี บอ จ็อง กาแต เฆ ดูอี กืน.

15 อัน ต็อห, “อึย แม คูนดีคัม ตาง บอ เบ ดูอี อายูดา บอ เบ ดูอี แคง มืง เยรูซาแลม บอกาเฆลียด, แตห เบ โทม. เฌาพรา แฮะ ต็อห, ‘อาว โลว โยว, อาว โลว น็อห เตียะ โกบ พึง ดา ซึก อี กืน เฆ ตี. อาว มูห เบ อี ดี ลาย กาโฆห ดี เฆ. อึณ มูห เฌาพรา. 16 แคหณา แตห เบ เลห ฮาว โดง กอย เฆ. เฆ ดี บอ ตัห โฮะ โดบ อึณเตณ ดี งอด โดง จืร ฌีฌา. เบ ดี บอ กาตูณ เฆ ดี กาแต งอด อี ฮาว ซืร แคง แปร กาฮ็อห โดง จืร เยรูลา. 17 เบ ตู โลว กาโฆห ดี เฆ. แตห เบ ดอน อี กอย โดง กอย เบ บอ บัร ดี ยอด. เบ ดูอี อายูดา บอ ดูอี แคง มืง เยรูซาแลม, เบ ดี บอ ยึร ปี ปาย เฌาพรา ดี แป ดี ออง ดูอี เฆ ตี. ปาย ตี แกวะ แตห เบ โยว. แกวะ แตห น็อห เบ ลึร. แคหณา แตห เบ ฮาว กาตูณ เฆ. เฌาพรา มืร ดี กอย รึม โดบ เบ.’”

18 แฮะ ฮอต ปาย ตี คูนดีคัม อายอซาพาด มืร ครึบเครา มูด ฆึบ ดี กาดาย, กรึบ เฌาพรา. เฆ ดูอี กืน มืร วี มูด ฆึบ ดี กาดาย ปี อัน. 19 ดูอี อาโมยว อาโควฮาด บอ ดูอี อาโมยว อาโควรา อี มูห ดูอี ครึร อาเลวี, เฆ มืร กาโพรม ดี ยีต จ็อง, ดัด ตาง, อืบ มยูก เฌาพรา อี มูห เฌาพรา ปี กรึบ ดูอี อีซาเรลัะ.

20 ปา แคหณา ซีณ ซีณวัห เจว, เฆ มืร ยีต ฮาว แคง แปร กาฮ็อห โดง จืร เดกอ. ดอ กาจูห เฆ ดี ฮาว, คูนดีคัม อายอซาพาด มืร วี ต็อห, “อึย เบ ดูอี อายูดา บอ ดูอี มืง เยรูซาแลม, แตห เบ หณึม บึง เฌาพรา ปี กรึบ เบ. เบ ดี บอ ปึอน ดี กอย มัน ซีคยา. แตห เบ หณึม โฆรห ปี กาลาง ดา อี บยาน โฆรห เฌาพรา ดี เบ. อึณ ดี แตห เบ ออง.” 21 วาย แฮะ ฮอต กามวน ซังคยาง คูนดีคัม อายอซาพาด ดี เฆ ดูอี กืน ตี, อัน วี กาลาง ดี เฆ ดูอี อี ต็อห โหมว มัง อี, แตห เฆ อืบ มยูก เฌาพรา, กาลาง บอ แคะ ตาง อาพูง ดังโคว เฌาพรา บอ แคะ ซีงา บอด อัน เฌา. ดอ แยต เฆ ดา ซึก, เฆ บอ ต็อห, “แตห เอ ดาง ฆูง เฆฌู ดี เฌาพรา. โคว, น็อห ร็อก กาเว อัน เฌา กอย เซเซ.”

22 ดอ ต็อห เฆ โหมว บอ อืบ บอ กาลาง ฆูง เฆฌู ดี เฌาพรา ตี, เฌาพรา มืร โบง แตห ดา ซึก ปอ อู พึง วี ตัห นา ปัน, วี กาโฆห ดี ดูอี อัมโมน, ดูอี โมวอาบ บอ เฆ ดูอี อี กอย ดี นอน เซอี, อี แฮะ ต็อห ดี ตัห กาโฆห ดี ดูอี อายูดา. ปาย ตี เฌาพรา มืร โบง แตห เฆ ชึม โตต. 23 ดา ซึก ดูอี อัมโมน บอ ดา ซึก ดูอี โมวอาบ, เฆ แฮะ วี กาโพรม ดี กาโฆห ดี ดา ซึก อี ตัห ดี นอน เซอี, แตห เฆ กอ ยัม โตต. วาย แฮะ ฮอต ง็อห ยัม โตต เฆ ดูอี อาโมยว เซอี ตี, เฆ ปี วี ลาย กาโฆห ลาย กาง็อห ราง เฆ, แตห เฆ กอ ยัม โตต ดอน อี.

24 ดอ วี ตัห ฌัม เฆ ดูอี อายูดา โดง ปึอน วี ยอด โลง นา แปร กาฮ็อห ตึอน, เฆ วี ยอด รันซู เฆ ตี, วี ยึร มี โดว ยัม แฮะ กืน กาเซา. อาว มึห อี ลอด ยัม คอ อู วี. 25 อายอซาพาด เฆ ดา ซึก อัน, เฆ มืร วี ฮาว ดึห โกรวกราม เฆ. เฆ บอ ยึร บอ โดว ซัดดาวา แฮะ กืน กาเซา. แฮะ มึห บอ ปี ดี โฮม ปี ดี ตา, มึห บอ โกรวกราม อี มึห ดีง็อห ดีคัน อี กืน กาเซา. เฆ กอ ฮู แป ดี ฆอด ฮาว โตต. เฆ มืร ดึห อูน, แฆบ อูน โกรวกราม เฆ ตี, อึณ กอ โนะ โอย ซีแง. 26 อึณ บอ ฌัม ซีแง อึณพวน, เฆ มืร วี ตัห กอย กาฌูะ แคง ดีลัยะ บีราคา, วี อืบ มยูก เฌาพรา โกบ แปะ แฮะ โบง อัน. โคว อัน ตี, ดีลัยะ ตี เฆ บอ ดาง แตห อึณ จืร ดีลัยะ บีราคา กอ ฌัม อาตึร นี.^a

27 โกบ แฮะ แตห เฌาพรา เฆ ออง รันซู เฆ ตี, อายอซาพาด มืร วี แยต เวณ เฆ ดา ซึก อัน ดี มืง เยรูซาแลม. เฆ บอ โคย ดาคึย กาเซา. 28 ดอ ตัห ฌัม เฆ แคง มืง ตี, เฆ มืร บูด เวา, บัห ดีง ดีเรา บอ ดอย อี ฮัม ดาคึย แบน โมยว แบน โมยว, ฮาว ดี โฮว เฌาพรา.

29 ดูอี อาโมยว เฮา ดอน มาน ดอน มืง อี แฮะ ยึร ลอง เฌาพรา แฮะ ปยาต แวน รันซู ดูอี อีซาเรลัะ เฆ ตี, เฆ บอ โยว กาเซา เฌาพรา. 30 ปาย ตี อายอซาพาด บอ ปึอน ดี อึบ ดาคึย ดาคึย มาน มืง อัน. โคว, เฌาพรา แฮะ โบง แตห อึณ เยน โตต ดอน บลาก.

31 ดอ แฮะ โนะ อาซาก อายอซาพาด โอย ฆึร ดี พัน ซีนัม, อัน แฮะ แบน คูนดีคัม อึบ มืง ยูดา. อัน กอย แคง มืง เยรูซาแลม, อึบ มาน มืง อาดา อา ฆึร ดี พัน ซีนัม. มา อัน จืร นาง เอจูพัะ บอ มูห ฆอน อีบึณ อาซีลัะวี. 32 อัน มืร โบง ดอน โมยว แตห อึณ ปี ปี โบง ฆูณ อัน อี จืร อาซา ตึอน. อัน มืร โบง อี บอด อี หมึอม, แตห อึณ ล็อะ น็อห เฌาพรา. 33 มาแล, อัน ยี ตู ปยาต แวน โดง กรึบ เฆ โดง จา ดอน โปละ. เฆ ดูอี ปี อึบ อัน ตู มึห น็อห ซี หณึม ซีคยา เฌาพรา ปี กรึบ ฆูณ ดัง เฆ.

34 ลอง แปะ แฮะ โบง อายอซาพาด จูห ซีณ ดอ โฆว กอ ฌัม กาแดะ แฮะ แดม อูน แคง บับ ปี แดม อาเยฮู อี มูห ฆอน อาฮานานี. อึณ แฮะ แดม อูน บอ แคง บับ คูนดีคัม อี อึบ มืง อีซาเรลัะ.

35 วาย อัน ตี อายอซาพาด บอ วี ลาย แบน ฆึก กาล็อะ ดี คูนดีคัม อาฮาฌียา อี อึบ มืง อีซาเรลัะ อี โบง นา ฮาย นา มืก. 36 ฆาย บอ ลาย โพรม ดี โบง รึร ซังโพว, แตห เฆ ปึอน ดี กาโลห อึม นัมมูกซารา. เฆ โบง รึร ซังโพว ตี ดี โดง จืร เอจาโยนกาบา. 37 มาแล, อาเอลีเอฌา อี มูห ฆอน อาตอตาวาฮู อี ตัห มืง มาเรซา, อัน บยาน โฆรห เฌาพรา. อัน วี กาลาง ดี อายอซาพาด ต็อห, “โกบ แฮะ วี ลาย กาฆึก แม ดี อาฮาฌียา, เฌาพรา ดี ปยาต แวน โตต แปะ แฮะ โบง แม ดอน โมยว.” โคว อัน ตี, รึร ซังโพว แปะ แฮะ โบง เฆ บอ กาปยาต ลึร โตต, อาว ฮู ปึอน ป็อะ ฮาว นา เหมา.