1 อายอซาพาด วี แบน คูนดีคัม อี อึบ มืง ยูดา, ปลูะ อาซา อี มูห ฆูณ อัน. อัน มืร โบง แตห มาน มืง อัน มึห โปลม มึห แฮณ, แตห เฆ แป ดี แร ดา ซึก ดูอี อีซาเรลัะ. 2 อัน มืร ดึห ดา ซึก อัน, อูน แคง มืง อี มัน ซีคยา อี มึห แรง, อี กอย แคง กาดาย มืง ยูดา ตึอน. อัน มืร แตห เฆ ดา ซึก อัน บัร มืง เฆ อี กอย แคง กาดาย มืง อาเอพารีม อี มูห มืง แปะ แฮะ ตึก ปึอน อาซา อี มูห ฆูณ อัน.

3 เฌาพรา มืร กอย รึม โดบ อายอซาพาด. โคว, ดอ ซี หนึม อัน, อัน แฮะ โบง ปี ปี โบง อาดาวีด อี มูห ดา ดา อัน. อัน มืร ตู กรึบ เฌา บาลัะ. 4 อัน กรึบ มี เฌาพรา ปี กรึบ ฆูณ อัน บอ โบง โดบ ดารา เฌาพรา. อัน มืร ตู โบง ปี ปี โบง เฆ ดูอี อาโมยว อีซาเรลัะ. 5 โคว อัน ตี เฌาพรา ม็องการา ดัว มาน มืง ปี อึบ อัน แตห อึณ มัน ซีคยา. เฆ ดูอี อายูดา มืร อาบ ดัว คอซอง ดี อัน. ปาย ตี อัน กอ ครัม กาเซา. อาพูง ซาเร อัน มืร แกร ดี ตาง. 6 อัน มึห น็อห อี กาดึก กาด็อะ ดี เฌาพรา บอ ปยาต แวน โดง จา บอ ร็อง นาง กานัม อี จืร เอซูรา บอกาเฆลียด อี กอย แคง กาดาย มืง ยูดา.

7 อัน แฮะ อึบ มาน มืง อาดา โอย ซีนัม. ดอ มูห ซีนัม ฮาโอย ตี, อัน วี จัร เฆ อามู อามาด อัน อี จืร อาเบนเฮลา, อาออบาดี, อาซาคารา, อาเนทาเนลา บอ อามีคายา, แตห เฆ ฮาว กาลาง, ฮาว มาโนว ดูอี ดอน เรา ดอน มืง. 8 เฆ ดูอี ครึร อาเลวี อี จืร อาเซมายา, อาเนทานี, อาเฌบาดี, อาซาเฮลัะ, อาเซมีราโมด, อาโยวนาทาน, อาตอนียา, อาตอพียา บอ อาตอบาโทวนียา. เฆ บอ ฮาว โดบ อามู อามาด คูนดีคัม เฆ ตึอน. บอ ดา อี หลู ดี เฌาพรา อี จืร อาเอลีซามา บอ อาเยโยวรัม มืร ฮาว โดบ. 9 เฆ มืร โฆ็ง ฮาว บอ บับ ดารา เฌาพรา, ฮาว มาโนว ดูอี แคง เรา แคง มืง ยูดา, แตห อึณ กอ กาลัต โตต ดอน โปละ.

10 เฌาพรา มืร โบง ดี ดูอี อาโมยว เฮา อี กอย แคง เรา แคง มืง อี กอย โรบ กาดาย มืง ดูอี อายูดา, แตห เฆ โยว กาเซา. โคว, เฆ ตู ยัะ ตัห กาโฆห ดี คูนดีคัม อายอซาพาด. 11 เฆ ดูอี พีลีที มัง อี บอ ดึห คอซอง บอ รึอน จึง, วี อาบ ดัว ดี อายอซาพาด. ดูอี อาโมยว อาราบ มืร ดึห มาบู บู แหรณ ดี บู มาย็อห โดว บอ มาแป บู แหรณ ดี บู มาย็อห โดว, วี อาบ ดัว ดี อัน.

12 โกบ อึณ ปาย ตี อายอซาพาด มืร แฮะ แกร ดี มึห ปวน เฆ แฮณ กาปัว. อัน วี โบง โดง ดี กอย ดา ซึก อี มัน ซีคยา. อัน บอ แด มืง แตห อัน เบลห อูน โกรวกราม อัน. 13 บอ แคง มืง แบน มืง แบน มืง อี กอย แคง กาดาย มืง ยูดา อัน แฮะ ปึอน ดี อูน โกรวกราม บอ ปี ดี โฮม ปี ดี ตา แบน โมยว แบน โมยว อี กืน กาเซา. อัน บอ แดะ ดา ซึก อี กยัะ ดี กาโฆห, แตห เฆ กอย แคง มืง เยรูซาแลม.

14 ฌาราง เฆ แฮะ แดม อูน ปาย นี. ดา ตาง อี อึบ แบน พึง แบน พึง ดา ซึก อี มูห อู พึง อู แหรณ วี, แคง ครึร อายูดา บอ มูห อาตานาฮา. ดา ซึก ปี อึบ อัน กอย โอย แซน วี. 15 อี ดาม อัน ตี บอ มูห อาเยโฮวนัน. อัน แยต ดา ซึก อา แซน ดี ดา หมึณ วี. 16 อี ดาม ปอ อู วี บอ มูห อามาซี อี มูห ฆอน อาฌีคารี. ดา ซึก ปี อึบ อัน กอย อา แซน วี. อามาซี ตี แฮะ อูน น็อห ดี โบง มี ฆาน เฌาพรา.

17 แคง ครึร อาเบนยาม ดา ตาง อี อึบ ดา ซึก บอ มูห อาเลดัะ. อัน บอ มูห ดา โบว อี กยัะ ดี กาโฆห บอ แยต ดา ซึก อา แซน วี อี โฆ็ง อัะ บอ มัง ฆ็อง. 18 อี ดาม อัน ตี บอ มูห อาเยโฮวฌาบาด. อัน บอ อึบ ดา ซึก อู แซน ดี ดา หมึณ วี อี แฮะ โพรม ดี กาโฆห.

19 ดูอี เฆ ตี เฆ โบง ฆาน คูนดีคัม. โคว อัน ตี คูนดีคัม ปี วี แตห เฆ กอย แคง มืง อี มึห แรง, อี กอย แคง กาดาย มืง ยูดา ดอน นา ดอน โปละ.