1 วาย อัน ตี เฌาพรา วี ต็อห ดี อาโมวแซ, “แม โลว วี ฮาว ฌัม โดง กอย คูนดีคัม พาโรว. โอว แฮะ แตห น็อห อัน บอ น็อห เฆ อามู อามาด อัน ตู บยอง มาเซ. ปาย ตี โอว ดี ปึอน ดี โบง นา หมึอม อาม กาเซา ดี อาต เฆ. 2 ปัน ตี เบ ดี บอ นับ ดี กาลาง ดี ฆอน บอ หลูกหลาน เบ ลอง ปี ดัว โอว ดูก ดี เฆ ดูอี แอฆึบ บอ ลอง นา หมึอม อาม กาเซา แบน โมยว แบน โมยว แปะ แฮะ โบง โอว. เบ ดี บอ นับ, โอว มูห เฌาพรา.”

3 อาโมวแซ ฆาย อาโรน วี ฮาว ฌัม โดง กอย คูนดีคัม พาโรว บอ ต็อห ดี อัน, “เฌาพรา ปี กรึบ เย ดูอี แฮแบร ต็อห ดี แม, ‘ปอ แคะ เหมา อึณ ดี เหลณ, แม ดี บยอง น็อห แม, แตห อึณ แบน น็อห โฆม ดี อาต โอว? แตห แม เบลห ดูอี อาโมยว โอว, แตห เฆ ปึอน ดี ฮาว กรึบ โอว. 4 เซ แม ตู แตห เฆ ฮาว, แคหณา โอว ดี แตห มา อาโฌ็ง ตัห ฌัม แคง มืง แม. 5 เฆ ดี ตัห แบน พึง แบน พึง, แกวะ ฮู แตห เบ ปึอน ดี ยึร กาดาย. เฆ ดี โฮม โตต ดอน โมยว แคะ ปี ซี มึห วาย แฮะ โจห เบรีย ตึอน. เฆ ดี บอ โฮม ดอน โมยว อี ปูะ เลห แคง มาน แคง มืง. 6 มา อาโฌ็ง ตี, เฆ ดี บอ ลึบ กอ โนะ แคง กาง แม บอ แคง กาง เฆ อามู อามาด แม บอ แคง กาง เฆ ดูอี กืน แคง มืง แม. อู ซีณ ดอ กอย ฆูณ ดัง เบ อี ตัห กอย แคง มืง นี, กอ ฌัม อาตึร, อาว มึห ดูอี อี แฮะ ดึอม ยึร ดูก ฌึร นี.’” วาย แฮะ ฮอต กาลาง อาโมวแซ ปาย ตี อัน วี เลห โดง กอย คูนดีคัม พาโรว ตึอน.

7 ปัน ตี เฆ อามู อามาด คูนดีคัม พาโรว ต็อห ดี อัน, “อึณ แฮะ เหลณ, ดูอี ตี แฮะ แตห เอ กาดูห ดูก ตาง กาเซา. เย หมาณ, แตห แม ควาง เฆ อีมาย เลห ฮาว, แตห เฆ ฮาว กรึบ เฌาพรา เฆ. แตห แม ยอด, มืง แอฆึบ บอ มืง แฮะ ชึม โตต ดอน โมยว. โคว อัน ตี, แตห แม ควาง เฆ เลห ฮาว.”

8 ปัน ตี ดูอี มัง อี วี ฮาว แดะ อาโมวแซ ฆาย อาโรน, แตห ฆาย วี ตัห ฌัม โดง กอย คูนดีคัม. คูนดีคัม วี ต็อห ดี ฆาย, “ฮาว หลู ดี เฌาพรา ปี กรึบ เบ. มาแล โอว ดี กาลาง อาเซ ดี ปึอน ฮาว.”

9 อาโมวแซ ตึอน วี ต็อห ดี อัน, “เย บอกาเฆลียด โลว ฮาว. บอ ดูอี ตาง, บอ ดูอี เตียะ, บอ ฆอน อีมาย บอ ฆอน อีบึณ, บอ มามัก, บอ มาบู เฆ มาแป, แคะ ปี มึห เย, เย ดี โลว ดึห ฮาว โตต. โคว, เย โลว โบง บลอย เฌาพรา.”

10 คูนดีคัม พาโรว วี ต็อห ดี อัน, “อึร, แฮะ หมาน, แฮะ มูห, โอว ตู แตห อีบึณ เฆ ฆอน เบ ฮาว. โอว ตู แตห เบ บอกาเฆลียด ฮาว ดอ เหมา. อึณ แฮะ ลึห ซีคยา ดี โอว. ปี หมาณ เบ อาว อัห, อาว หมึอม. 11 โอว ตู แตห บอ อีบึณ เฆ ฆอน ฮาว. แตห มี เบ อีมาย ฮาว หลู ดี เฌาพรา ปี กรึบ เบ. อาตี เบ แฮะ หมาณ, แตห โอว ควาง อู ซีณ ดอ โฆว อัน.” คูนดีคัม พาโรว แฮะ ฮอต ต็อห ปาย ตี อัน วี จัร ฆาย ฮาว, วี ซูต เลห ฆาย โดง กอย อัน.

12 วาย อัน ตี เฌาพรา ต็อห ดี อาโมวแซ, “แม โลว โจะ แด แม แดง มืง แอฆึบ, แตห มา อาโฌ็ง ตัห กาดึม มืง แอฆึบ นี, แตห เฆ โฮม ดอน โมยว อี มึห อี กอย แคง มาน แคง มืง บอ แคง กาปึม. แตห เฆ โฮม โตต อี ซี ฆีด วาย โจห เบรีย ตาง ตึอน.”

13 อาโมวแซ วี โจะ อึณกรวน อัน. แฮะ ฮอต, เฌาพรา แตห คูน ตัห นา เลห ซีแง, แตห อัน บูด อาดา อู ซีแง ดี อู หมึร. วาย อัน ตี แปร วี บลาง, คูน แฮะ บูด, แฮะ วี ตึย มา อาโฌ็ง ตัห. 14 มา อาโฌ็ง ตึอน บอ ตัห ฌัม แคง มืง แอฆึบ บอ มืง, กอย ดอน นา ดอน โปละ. อู ซีณ ดอ โฆว อัน, อึณ ตู ดึอม มึห มา อาโฌ็ง กืน แคะ นี ตัห. บอ นา อาต นี ฮาว อึณ ตู วี แบน ดูก ตาง ดี มา อาโฌ็ง ปาย ตี ดอ เหมา. 15 มา อาโฌ็ง ตึอน แบน พึง แบน พึง กอ โนะ แดง กาดาย กอ อับ ว็อง. เฆ บอ โฮม โตต ดอน โมยว อี ซี ฆีด แคง มาน แคง มืง. อี ตู ชึม คา อาต ดอ โจห เบรีย, มา อาโฌ็ง วี โฮม ดอ ตี นี, แกวะ ฮู แตห อึณ ฆีด มาเซ. บอ ปี ซัม เฆ แคง นา, บอ เบล อี กอย แดง เฮ, เฆ โฮม. บอ หลา เฮ อี เงียน บอ เบล แดง เฮ, อึณ อาว ฮู ฆีด มาเซ แคง มืง แอฆึบ บอ มืง.

16 ดอ อัน ตี คูนดีคัม พาโรว ปีครัน อัน, แดะ อาโมวแซ ฆาย อาโรน ตัห ฌัม โดง กอย อัน. อัน วี ต็อห ดี ฆาย, “โอว แฮะ โบง หมาบ ดี อาต เฌาพรา. โอว มืร แฮะ โบง นา ตู หมึอม ดี บาย. 17 โอว หมาณ, แตห บาย บลัวะ แวน หมาบ โอว คา นี. แฮะ ฮอต, แตห บาย ซาคึร ดี เฌาพรา ปี กรึบ เบ, แตห อัน แวน ดูก ตาง นี, ดูก อี แตห ดูอี ยัม.”

18 แฮะ ฮอต กาลาง ปาย ตี อาโมวแซ วี เลห โดง กอย คูนดีคัม พาโรว, ฮาว ซาคึร ดาง อัน. 19 เฌาพรา วี แตห คูน วี บูต วีว นา เฆต ซีแง, แตห มา อาโฌ็ง ฮาว โจห แคง อึม ดีโหนง อี จืร ดีโหนง เรณ. ปัน ตี แคง มืง แอฆึบ ตึอน อาว ฮู มึห มา อาโฌ็ง. อู โดว มืร อาว ฮู มึห. 20 เฌาพรา ยี แตห น็อห คูนดีคัม พาโรว วี ปี บรีม. อัน ตู วี ควาง เฆ ฮาว.

21 ดอ อัน ตี เฌาพรา ต็อห ดี อาโมวแซ, “แตห แม โจะ แด แม, ซีกู ฆางหราว. แฮะ ฮอต, อึณ ดี อับ ว็อง แคง มืง แอฆึบ บอ มืง. อับ ว็อง ฌึร ตี ดี ดึร น็อห ดูอี, แตห อึณ อาว ดาคึย ดี เฆ.” 22 อาโมวแซ วี โจะ แด อัน, ซีกู ฆางหราว. อู เฌณ มืง แอฆึบ บอ อับ ว็อง อาดา โอย ซีแง ดี โอย หมึร. 23 โอย ซีแง ตี, อาว มึห ดูอี ปึอน ลาย ยึร. เฆ ดูอี มืร ตู ปึอน เลห แคง กาง เฆ. โดง กอย เฆ ดูอี อีซาเรลัะ ยี บลาง ดาคึย ปี บรีม.

24 ดอ อัน ตี คูนดีคัม พาโรว วี แดะ อาโมวแซ ฮาว ฌัม โดง กอย อัน. อัน วี ต็อห, “เลห ฮาว. ฮาว หลู ดี เฌาพรา ปี กรึบ เบ. แตห เบ แดะ บอ เฆ อีบึณ บอ ฆอน เบ. มี โดว ซัดดาวา ปี เฮียง เบ, เบ ยี โลว เบลห อูน, เบ ตู ปึอน ดึห ฮาว.”

25 อาโมวแซ วี ต็อห, “แม โลว แตห เย ปึอน ดึห บอ โดว ซัดดาวา เย, แตห เย ปึอน ดี ง็อห, แตห เย วี หลู ดี เฌาพรา. 26 บอ โดว ซัดดาวา ดอน โดว โลว เลห ฮาว รึม โดบ เย. อาดา อู โดว มืร อาว ปึอน อูน แคง มืง นี. เย ดี โลว ร็อห มัง โดว, แตห เฆ แบน ปี หลู ดี เฌาพรา. อาต ตัห ฌัม เย โดง ปี โลว หลู เย, เย หณัม นับ โดว เหมา ปี ดี โลว หลู เย. เฌาพรา ตู กาลาง ดี เย ดี อาต ลอง อัน ตี.”

27 เฌาพรา ยี แตห น็อห คูนดีคัม พาโรว ตู บยอง, แตห อึณ ปี บรีม. คูนดีคัม พาโรว ตู วี แตห เฆ ฮาว. 28 อัน วี ต็อห ดี อาโมวแซ, “ฮาว เลห โดง กอย โอว. แกวะ ฮู วี ตัห โดง กอย โอว ปอ อู เฌณ. อู ซีณ อาตึร ฮาว นา อาต, แกวะ ฮู แตห โอว ยึร แม ดอ เหมา. เซ โอว ยึร แม ปอ อู เฌณ, แม ดี ยัม.”

29 อาโมวแซ วี ต็อห ดี อัน, “อึณ ดี แบน ปี ต็อห แม ดอ ตี นี. โอว มืร ตู แตห แม ปึอน ดี วี ยึร โอว.”