1 นาง ราเอน ตึอน, ดอ นับ อัน, อัน ตู มึห ฆอน, อัน วี อูน น็อห ดี อีกัด อัน. อัน ต็อห ดี อาโกบ, “เซ แม ตู แตห โอว มึห ฆอน, โอว ดี ยัม.”

2 ปัน ตี อาโกบ ตึอน บอ รู กาเซา ต็อห, “โอว ตู มูห เฌาพรา. อึณ มูห อัน เฌา อี ตู แตห แม มึห ฆอน.” 3 ปัน ตี นาง ราเอน วี ต็อห ดี อัน, “นี, แตห แม ดึห หมาย โอว, อี จืร บีลา. แตห แม ลาย อัน, แตห อัน มึห ฆอน กาดาง โอว, แตห ฆอน อัน แบน ฆอน โอว.”

4 ปัน ตี อัน ดัว หมาย อัน อี จืร บีลา, แตห อัน แบน อีบึณ อาโกบ. อาโกบ บอ ลาย อัน. 5 ปัน ตี นาง บีลา บอ แด บาดีก ซันเท, กอ มึห ฆอน อีมาย. 6 นาง ราเอน ตึอน วี ต็อห, “อัน เฌา แฮะ ซูงพยาด ดารา, แตห อึณ หมึอม ดี โอว. อัน แฮะ โทม โฆรห โอว. อัน มืร แฮะ ดัว โอว มึห ฆอน.” โคว, อัน แตห ฆอน ตี จืร อาดาน.^a

7 ปัน ตี นาง บีลา อี มูห หมาย นาง ราเอน วี แด บาดีก ซันเท ปอ อู เฌณ, ดัว อาโกบ มึห ฆอน อีมาย วี ฮาอา. 8 ปัน ตี นาง ราเอน วี ต็อห, “อึณ ปี โอว แฮะ ลาย กาลูต ดี อีกัด โอว. เฌาพรา มืร แฮะ แตห โอว แป.” โคว, อัน แตห ฆอน ตี จืร อานาบทาลี.^b

9 วาย อัน ตี บอ นาง เลอา ตึอน แฮะ นับ, อัน ตู วี มึห ฆอน. อัน บอ ดึห นาง ซีพา อี มูห หมาย อัน, ดัว ดี อาโกบ, แตห อัน วี แบน อีบึณ อาโกบ. 10 นาง ซีพา ตึอน บอ มึห ฆอน อีมาย ดัว ดี อาโกบ. 11 ดอ อัน ตี นาง เลอา วี ต็อห, “ฆาม โอว แฮะ หมึอม.” โคว, อัน แตห ฆอน ตี จืร อาฆัด.^c

12 ปัน ตี หมาย นาง เลอา, อี จืร ซีพา, อัน วี มึห ฆอน อีมาย ปอ อู วี. 13 ดอ อัน ตี นาง เลอา วี ต็อห, “โอว แฮะ ดาคึย กาเซา. บอ เฆ อี เฮา ดี ต็อห ปาย ตี.” โคว, อัน แตห ฆอน ตี จืร อาเซน.^d 14 อึณ ฌัม อู ซีแง, ดอ โซะ เฆ เคาคยูง, อารูเบน ตึอน แฮะ เลห ฮาว แคง โดง นา. อัน บอ ยึร เบล อี แตห อี ลาย อึง. อัน บอ ดึห มัง โบ็ง, ดัว ดี มา อัน อี จืร นาง เลอา. ปัน ตี นาง ราเอน ตึอน วี ต็อห ดี นาง เลอา, “เบล อี แตห อี ลาย อึง ตึอน ปี ดึห ฆอน แม, แตห แม ดัว ดี โอว มัง โบ็ง.”

15 นาง เลอา วี ต็อห, “แม แฮะ ฮอต ดึห อีมาย โอว. ดอ ตี นี แม ซี วี ดึห บอ เบล อี แตห อี ลาย อึง ดี โอว.”

ปัน ตี นาง ราเอน วี ต็อห, “เซ แม ดัว เบล ตี ดี โอว, แคง หมึร นี โอว ดี แตห อีมาย โอว อีด รึม โดบ แม.” ปัน ตี แคง หมึร ตี อาโกบ วี กอย รึม โดบ นาง เลอา.

16 บา ดี อับ, ดอ ตัห อาโกบ แคง นา, เวณ แคง ทึบ บีก อัน, นาง เลอา แฮะ ฮาว รวห อัน. อัน ต็อห, “อาตึร แม โลว ลึบ อีด แคง ทึบ บีก โอว. โอว แฮะ ฮอต ดัว เบล อี แตห อี ลาย อึง ดี นาง ราเอน, แตห อึณ แบน รูห อัน.”

17 เฌาพรา ยี โทม ปี ซาคึร นาง เลอา ตึอน, แตห อัน แด บาดีก ซันเท. แฮะ ฮอต, อัน วี มึห ฆอน อีมาย ปอ อู วี, แตห อึณ แบน ฆอน อีมาย อัน วี อึณพัน. 18 อัน ต็อห, “โอว แฮะ แตห หมาย โอว แบน อีบึณ อีมาย โอว. ดอ ตี นี เฌาพรา แฮะ วี แตห อึณ แบน อาฆยึร ดี โอว.” โคว, อัน แตห ฆอน อัน ตี จืร อาอีซาคา.^e

19 ปัน ตี นาง เลอา วี แด บาดีก ซันเท ปอ อู เฌณ. อัน ดัว อาโกบ มึห ฆอน อีมาย วี อึณเดา. 20 นาง เลอา วี ต็อห, “เฌาพรา แฮะ ดัว คอซอง นา บอด ดี โอว. โอว แฮะ ดัว ฆอน อีมาย เดา วี ดี อีมาย โอว. ดอ ตี นี อัน ดี บอ อึง โอว.” โคว, อัน แตห ฆอน อัน ตี จืร อาเฌบูโลน.^f

21 ปัน ตี อัน วี มึห ฆอน อีบึณ อู วี. อัน แตห ฆอน ตี จืร ดีนา.

22 วาย อัน ตี เฌาพรา วี โหลห นาง ราเอน ตึอน. อัน โทม ปี หมาณ นาง ราเอน, แตห อัน มึห ฆอน. 23 อัน แด บาดีก ซันเท, มึห ฆอน อีมาย. อัน ต็อห, “เฌาพรา แฮะ โบง, แกวะ ฮู แตห โอว โลว ซาย อี.” 24 โคว, อัน แตห ฆอน ตี จืร อาโยว. อัน บอ ต็อห, “แตห เฌาพรา ดัว ฆอน อีมาย ปอ อู วี ดี โอว.”^g

25 นาง ราเอน แฮะ ฮอต มึห อาโยว, อาโกบ ตึอน วี กาลาง โฆรห ดี อาลับ. อัน ต็อห, “แตห แม ควาง โอว เวณ แคง มืง บรีม โอว. 26 โอว แฮะ ฮอต แบน หมาย แม, แตห โอว ปึอน อีบึณ เฆ ฆอน โอว. ดอ ตี นี, แตห แม แตห โอว เวณ. แม บอ นับ แคะ เหมา รูห ปี โลว ปึอน โอว.”

27 อาลับ ต็อห, “เซ แม บอ อึง, แตห แม กอย. โอว แฮะ ยึร, โกบ กอย รึม แม โดบ โอว, เฌาพรา แฮะ ม็องการา แตห บอ ดี โอว.” 28 อาลับ มืร ต็อห, “แตห แม กาลาง ดี โอว แคะ เหมา แม โลว, แตห อึณ แบน รูห แม. โอว ดี ดัว ดี แม แคะ ตี.”

29 อัน ยี ต็อห ดี อาลับ, “แม แฮะ นับ, แคะ กืน ปี โบง โอว ดอ แบน โอว หมาย แม. แม บอ นับ, โกรว แม แฮะ แกร ดี กืน แคะ เหมา ดอ กอย โอว โดบ แม. 30 อาต ตัห โอว, แม ตู โกบ มึห มาเซ. ดอ ตี นี, โกรว แม แฮะ มึห กาปัว กืน กาเซา. โอว บอ โบง มาเซ, เฌาพรา แฮะ ม็องการา ดัว บอ ดี แม. ดอ ตี นี, โอว ยี โลว โบง ฆาน โอว, แตห เฆ แคง อึณโฮม โอว บอ ปึอน ปี ดี โลว เฆ.”

31 ปัน ตี อาลับ วี ต็อห, “มาเซ ปี ซี ปึอน แม ดี โอว?” อัน วี ต็อห, “แม ตู โลว ดัว มาเซ ดี โอว, แตห แม โบง ปาย นี. โอว ดี วี เฮียง มาบู เฆ มาแป แม. 32 อาตึร, โอว ดี ฮาว ยอด โดว ซัดดาวา แม. แคะ มึห โดว มาบู อี ดีลาย ดีปาง, แคะ มึห ฆอน มาบู อี ว็อง, บอ เฆ มาแป อี ดีลาย ดีปาง, โอว ดี กาย็อห, แตห อึณ แบน กานาย โอว. 33 เซ แม ตัห แคหณา, แม ดี นับ, ปี ปาย โอว ดี กาย็อห. โอว ตู กาโลว แม. แม ดี ยึร แคะ เหมา อึณ มูห รูห ปี ปึอน โอว, แคะ เหมา แฮะ มูห กานาย โอว, เซ แม ยึร มาบู เฆ มาแป อี กอย บลาก โอว, เซ แม ยึร มาแป อี ตู ดีลาย ดีปาง, บอ ฆอน มาบู อี ตู ว็อง, แม ดี นับ, โดว เฆ ตี โอว แฮะ ปรา.”

34 ปัน ตี อาลับ ตึอน มืร แฮะ อึง. อัน ต็อห, “แตห อึณ แบน ปาย ตี.” 35 ซีแง อัน ตี อาลับ บอ ฮาว กาย็อห โดว ซัดดาวา อัน. แคะ มึห อาโล็ง มาแป ดีลาย ดีปาง, แคะ มึห มาแป อาหยาง อี ดีลาย ดีปาง, โดว อี มึห อี ลูย ดี ฮูน เฆ ดอน โดว, บอ เฆ มาบู ดีแตด, เฆ อี ว็อง, อัน ดึห โตต ดอน โมยว, ดัว ดี ฆอน อีมาย อัน. 36 อาลับ บอ แตห ฆอน อัน ดึห ฮาว พึง โดว ซัด ตี ปอ อู โปละ, แตห อึณ กาโต็ง อาดา โอย ซีแง. แตห เฆ โดว ซัดดาวา อาโกบ วี กอย กาย็อห, แกวะ แตห เฆ วี ลาย กาฟัร. แฮะ ฮอต อาโกบ ตึอน วี ฮาว บัร โดว ซัดดาวา อี ซี ฆีด มี ดี อาลับ.

37 ปัน ตี อาโกบ ตึอน ดึห อึณโลห เฮ ลีปานา, อัน บอ ดึห อึณโลห เฮ ลูฌา บอ เฮ อาราโมน. อัน บอ เลียะ แฆละ อัน, แตห อี ลูย เลห, แตห อึณ แบน อึณโลห เฮ แปะ ดีลาย. 38 ปัน ตี อัน เบลห อึณโลห เฆ ตี บาง โดง ตัห โดว ซัด ดี อึม, แตห อึณโลห กอย ดี อาต มาบู เฆ มาแป. เฆ โดว ตี บอ ตัห เดียง อึม บอ ลาย โดบ ดี อาต อึณโลห ตึอน. 39 วาย ตี ปัน ดี ฆอน เฆ, เฆ วี มึห ฆอน ดีลาย ดีเลน บอ ฆอน ดีปาง. 40 ปัน ตี อาโกบ วี กาย็อห ฆอน มาบู บอ ฆอน มาแป อี มูห มี โดว อี ดีลาย บอ โดว อี ว็อง. ปาย ตี อัน กาย็อห, แตห เฆ วี แบน โดว ซัด อัน. 41 อัน บอ บัร, แตห โดว อี มึห โปลม วี ลาย โดบ ดี อาต อึณโลห ตึอน. 42 เซ อัน วี ยอด โดว อี ตู มึห โปลม, เซ เฆ ตัห ลาย โดบ, อัน ตู เบลห อึณโลห ตึอน. ปาย ตี อัน นับ ดี โบง, แตห โดว ดีหลัห แบน โกรว อาลับ. โดว อี มึห โปลม ยี แบน โกรว อัน. 43 ปาย ตี อัน บอ แกร ดี ครัม กาเซา. อัน แฮะ ปึอน มาบู เฆ มาแป กืน. บอ เฆ หมาย อี มูห อีบึณ อีมาย เฆ กืน. บอ มังปร็อง กาฮาต บอ มาลา ดอน โมยว, อัน แฮะ ปึอน กืน กาเซา.