1 วาย อัน ตี อาโกบ วี ฮาว โดบ อึณเตณ บอ ฌัม แคง มืง นา เลห ซีแง. 2 อัน บอ ยึร อึม คึม แคง โดง นา. เฆ ดูอี อี กอย แคง มืง ตี, เฆ ต็อะ อึม ดี ตี, ดัว โดว เฆ เดียง. เฆ พึง มาบู โอย พึง แฮะ ฮอต ตัห กอย ดี โคบ อึม คึม ตี. อึณ ยี มึห มาว ตาง อี กาบีด อึม คึม ตี. 3 เฆ ดูอี กอย ดี ตี, เฆ แตห พึง มาบู เฆ ตัห กาฌูะ ดี อึม คึม ตี. เฆ บอกาเฆลียด ฮี ฮอต ตัห กาฌูะ, เฆ อี บัร โดว ซัดดาวา, เฆ ดี วี คาโพรม, ลาย จอย ฌูน กาโทะ มาว ตาง, แตห เฆ ดัว มาบู เดียง อึม. เฆ แฮะ ฮอต เดียง แพ อึม, เฆ วี เบลห มาว ตาง ตึอน, แตห อึณ วี กาบีด อึม คึม.

4 อาโกบ ยี กาลาง โฆรห ดี ดูอี อี บัร มาบู อี ตัห กอย โคบ อึม คึม ตึอน. อัน ต็อห, “อึย ฆึก โอว, เบ ตัห นา เหมา?”

เฆ วี ต็อห, “เย ตัห มืง ฮาราน.”

5 อัน วี ต็อห ดี เฆ, “เบ นับ อาลับ อี มูห ฆอน อานาโฮว?” เฆ วี ต็อห, “แฮะ นับ.” 6 อัน วี ดีหมอด, “อานาโฮว ตึอน แฮะ คัะ ฆยามซา?” “แฮะ คัะ,” เฆ ต็อห, “นู, ฆอน อีบึณ อัน, อี จืร นาง ราเอน, อัน แฮะ แวด ตัห โดว ซัดดาวา ฆูณ อัน.”

7 ปัน ตี อาโกบ ตึอน วี ต็อห ดี ดา อี เฮียง มาบู, “อึณ ซี ราม เจว, หณัม มูห อาคราว ดี โลว กาฌูะ โลว อีด โดว ซัดดาวา. แตห เบ ดัว เฆ เดียง อึม, แฮะ ฮอต, แตห เฆ วี โฮม เปต.”

8 เฆ วี ต็อห, “เย ตู ปึอน ต็อะ อึม. เย โลว หน็อะ แตห มาบู ดอน พึง กอ ฌัม. แฮะ ฮอต, เย กาโทะ มาว ตาง อี กอย นา แดง อึม คึม. แฮะ ฮอต กาโทะ, ปึอน ต็อะ อึม ดัว เฆ มาบู เดียง.”

9 ดอ ลาย กาลาง เฆ ปาย ตี นาง ราเอน บอ แวด ตัห มาบู ฆูณ อัน. บอ อัน มูห ดูอี อี เฮียง โดว ซัดดาวา. 10 อาโกบ ตึอน ยี ยึร นาง ราเอน อี มูห ฆอน อีกัด มา อัน, อัน บอ ยึร มาบู บึร อัน, อัน ฮาว ดี อึม คึม, ดึห กาโทะ มาว ตาง ตึอน, ต็อะ อึม ดัว มาบู นาง ราเอน เดียง แพ. 11 แฮะ ฮอต ปัน ตี อัน วี อูห นาง ราเอน, วี ยาม ตาง. 12 แฮะ ฮอต, อัน วี แค ดี นาง ราเอน ลอง มูห อัน วอแว ฆูณ นาง ราเอน บอ ฆอน นาง แบก. นาง ราเอน ปี วี ฮาว กาลาง โตต ลอง อัน ตี ดี ฆูณ อัน.

13 อาลับ ตึอน แฮะ ฮอต โทม ลอง อาโกบ อี มูห ฆอน วา อัน, อัน วี ฮาว รวห อาโกบ, เงียม อัน, อูห อัน, แดะ อัน ตัห แคง กาง อัน. อาโกบ ตึอน ยี กาลาง โตต ลอง อาซาก อัน, แตห อาลับ โทม. 14 อาลับ วี ต็อห ดี อัน, “แฮะ หมาน, แม มูห วอแว โอว.” ปัน ตี อัน กอย แคง กาง อาลับ อาดา อู มาเฆียน.

15 แฮะ ฮอต ปึอน อู มาเฆียน, อาลับ วี ต็อห ดี อาโกบ ตึอน, “แม มูห วอแว โอว. โคว อัน ตี, แม ยี ตู โลว โบง ฆาน โอว ปีเยณ. แตห แม กาลาง ดี โอว, มาเซ ปี ซี ปึอน แม?”

16 อาลับ ยี มึห ฆอน อีบึณ อา วี. วี ตาง อัน จืร นาง เลอา. วี เตียะ อัน จืร นาง ราเอน. 17 นาง เลอา ตึอน มึห นา อี หมึอม ร็อก. นาง ราเอน ตึอน ยี มึห โดว อี ชีด กาเซา บอ อารึบ อัน หมึอม ร็อก. 18 อาโกบ ตึอน บอ ร็อก นาง ราเอน. อัน บอ ต็อห ดี ฆูณ นาง ตี, “โอว ดี โบง ฆาน แม อาดา บู ซีนัม. แฮะ ฮอต, แตห แม ดัว นาง ราเอน ดี โอว, แตห อัน แบน อีบึณ โอว.”

19 อาลับ วี เวียะ โฆรห ตี ต็อห, “เซ โอว ดัว แม คัด ดึห ฆอน โอว, อึณ หมึอม หลึอม โอว ดัว อัน ดี อี เฮา. แตห แม กอย รึม โดบ โอว.” 20 ปาย ตี อาโกบ โบง ฆาน บึร อัน อาดา บู ซีนัม, แตห อัน ปึอน นาง ราเอน ตึอน. อาคราว อัน ตี ยี ปี อู กาจัน ดี น็อห อัน, โกบ ร็อก อัน นาง ราเอน.

21 แฮะ ฮอต ปัน ตี อาโกบ วี กาลาง ดี อาลับ ต็อห, “แฮะ ฮอต ฌัม อาคราว ลาย กาแซณ อาย. แตห แม ดัว นาง ราเอน ดี โอว. โอว ดี คัด ดึห อัน.”

22 ปัน ตี อาลับ บอ บาง เฆ ดูอี ดอน อี ตัห กาง อัน, เฆ โบง บลอย ตาง. 23 แคง หมึร อัน ยี ดึห นาง เลอา, ตึย อัน ฮาว โดง อีด อาโกบ ตึอน, แตห อัน ลาย นาง เลอา. 24 อาลับ บอ ดัว นาง ซีพา ดี นาง เลอา, แตห อัน แบน หมาย นาง เลอา.

25 ซีณวัห ปา แคหณา อาโกบ ตึอน บอ นับ, อีบึณ ปี ลาย อัน, อัน มูห นาง เลอา. อัน วี กาลาง โฆรห ดี อาลับ ต็อห, “มาเซ ปี โบง แม ดี โอว? โอว แฮะ โบง ฆาน แม, แตห แม ดัว นาง ราเอน ดี โอว. เหมา อึณปาย ปี กาโลว แม ดี โอว, วี ดัว นาง เลอา?”

26 อาลับ วี ต็อห, “ฮีด เย ตู แตห วา คัด ดี อาต อีกัด อัน. 27 แตห แม กอย รึม โดบ นาง เลอา อาดา บู ซีแง. แฮะ ฮอต, โอว ดี ดัว บอ นาง ราเอน ดี แม. แม ยี โลว โบง ฆาน โอว ปอ บู ซีนัม.”

28 อาโกบ บอ แฮะ อึง. อัน วี กอย รึม โดบ นาง เลอา อาดา บู ซีแง. แฮะ ฮอต อาลับ ตึอน วี ดัว อัน คัด ลาย บอ นาง ราเอน. 29 อัน วี ดัว หมาย อัน อี จืร นาง บีลา, แตห อัน แบน หมาย ฆอน อัน อี จืร นาง ราเอน. 30 ปัน ตี อาโกบ ตึอน บอ ลาย นาง ราเอน. อัน ร็อก นาง ราเอน หลึอม ร็อก อัน นาง เลอา. ปัน ตี อัน วี โบง ฆาน อาลับ อาดา ปอ บู ซีนัม.

31 เฌาพรา ยี ยึร, อาโกบ ตู ร็อก นาง เลอา ตึอน. อัน เฌา วี แตห นาง เลอา มึห ฆอน กืน. นาง ราเอน ยี ตู มึห ฆอน. 32 นาง เลอา ตึอน แด บาดีก ซันเท. อัน บอ ฆึอด ฆอน อีมาย. อัน แตห ฆอน อัน จืร อารูเบน. อัน แตห อัน จืร ปาย ตี โคว อัน ต็อห, “เฌาพรา แฮะ ยึร ดูก โอว. ดอ ตี นี, อีมาย โอว ดี ร็อก บอ โอว.”^a

33 ปัน ตี อัน วี แด บาดีก ซันเท, วี ปึอน ฆอน อีมาย. ดอ อัน ตี อัน ต็อห, “เฌาพรา แฮะ นับ, อีมาย ตู ร็อก โอว. โคว, อัน แฮะ วี ดัว ฆอน อีมาย ปอ อู วี ดี โอว.” โคว, อัน แตห ฆอน ตี จืร อาซีเมโอน.^b

34 แฮะ ฮอต, อัน วี แด บาดีก ซันเท ปอ อู เฌณ, บอ วี มึห ฆอน อีมาย. ปัน ตี อัน ต็อห, “ดอ ตี นี อีมาย โอว ดี กอย รึม โดบ โอว. โอว แฮะ ฮอต ดัว ฆอน อีมาย โอย วี ดี อัน.” โคว, อัน แตห ฆอน ตี จืร อาเลวี.^c

35 อัน วี แด บาดีก ซันเท ปอ อู เฌณ, มึห ฆอน อีมาย ปอ อู วี. อัน บอ ต็อห, “คา นี โอว ดี อืบ มยูก เฌาพรา.” โคว, อัน แตห ฆอน ตี จืร อายูดา.^d แฮะ ฮอต วาย ตี อัน ตู วี มึห ฆอน.