2 Juwão
Juwão okusiwa mijẽ maekwerà
Juwão ojikuwa ijupe kõ
1
[Ije, Juwão.] Jesu koty rewarà kõ rõvijãa rõmõ tè ije. Ije tè aã kareta akusiwa ajupa neupe, Sa'i. Nememyry kõ pè teve akusiwa ajupa. Kee a'e pejẽ. Aje ywete eremiau kõ tè pejẽ. Ije rõmõ'ĩte rõwã poroauvay ajamã'ẽ. Pirujẽ Janejare'e ayvu aje ywete e'i mã'ẽ okuwa mãe kõ teve penau ipi. 2 Aje ywete mã'ẽ Jesu rewarà janepy'a pewarà rewarà mõ tè poroauvay. A'e rupi jaiko karuarutà rewarà mõ poroauvay jaiko ipi.3 Janeruwasu tijanerereko katu okatuaya rupi ipi. Ãmõ, Ta'yry Jesu Kiristu ve tijanerereko katu ipi. Tijaneporijauesa teve ipi. Tijanepy'amopiryvypy katu ipi, Janejare'e ayvu aje ywete mã'ẽ sikuwa mãe kõ rõmõ. Jajiau jaiko mãe kõ rõmõ jaiko, a'e pejẽ.
“Jajiau remẽ tè Janejare'e ayvu rupi katu jaiko”, e'i mã'ẽ
4 Akuwapa nememyry kõ mõ Janejare'e ayvu aje ywete mã'ẽ rupi katu ekoi. Janejare'e, “Kee ikõ eiko nẽ”, e'i maekwerà rupi katu ekoi kupa. Eroryvay aepo jaa akuwapa remẽ. 5 Age'e kee a'e ene. Tijajiau katu ojee jaiko, a'e. Age'ewarà rõwã ve ajamã'ẽ eayvukwerà. Aepo ojenupa itõkõ janeupe, jajirovija ypy ee remeve. Aepo a'e jẽ ajamã'ẽ.b 6 Pejirovija ypy remeve itõkõ Janejare'e ayvukwerà, “Tijajiauvay ikõ ojeeve jaiko nẽ”, e'i maekwerà ojenupa peupe. Aekwerà rupi katutà jaiko ãmẽ. Jajiau remẽ tè pirujẽ Janejare'e ayvu rupi katu jaikotà.
7 Kee a'e teve pejẽ. Uve ijatyray poromoripe mãe kõ ojimosãi yvy rupi okwa, “Jesu Kiristu owyjy uu yva pe wyi ojimojane”, ne'i mãe kõ. “Ojimojane maevo sõ tite tè”, e'i tègà mãe kõ. Poromoripe mã'ẽ tè aepo e'i mãe kõ. Kiristu ãpã kõ tè ãwĩ rapijarà. 8 Oroposiko ywete itõkõ pepytery pè Janejare'e rekoa rupi tapeiko. Ipyri peiko karuarutà mã'ẽ rè itõkõ oroposiko. Ajawyi tapejimoripeoka tite e'ã ikõ ijupe kõ nẽ, a'e pejẽ. Tapeity ywe'e tite e'ã ikõ Janejare'e rekoa rupi peiko mã'ẽ nẽ.
9 Ava mõ Kiristu ayvu rè poromo'e maekwerà rupi katu ekoi remẽ, eevejẽ Janejare'e ekoità. Eevejẽ teve Ta'yry ekoità. Nãwĩvo'ãi ijayvu rupi rõwã ekoi mãe kõ. A'e kõ ojimoripeoka, “Kee e'i teve Janejare'e”, e'i wayvu pewarà mõ kõrijõ tè mãe kõ pè. Eeve kõ rõwã Janejare'e ekoità ãmẽ. Kiristu ayvu rupi katu jaiko remẽ tè katu, Janejare'e janerevejẽ ekoi ipi. 10 Ajawyi ava mõ sõ oo pekoty remẽ, ajamã'ẽ Jesu ayvu rè rõwã pemo'e ipe remẽ: “Eike epyta epyri”, tapejẽ e'ã ikenẽ. Tapejimory e'ã ikõ apijarà rè nẽ. 11 Aepo ja'e sõ remẽ, jane tè jajimojaiwetà, eeve kõ jẽ.
Kareta moawyjepaa
12 Uve teipe eayvu rã amome'utà peupe mã'ẽ mijã. Ajamã'ẽ napotai age'eve kareta jikusiwarerà rupi a'e pejẽ. Ajaire aa ywete penesa remẽ tè amome'utà pejẽ. Ãmẽ ywete ojipyri jajimogetatà.
13 Nekypy'yry [Janejare'e remipyteporokwerà] memyry kõ opota ojimory pene eremikusiwarerà rupi.
[Awyjepa eremikusiwarerà ky'y.]