3 Ãmẽ Pariseu kõ mõ uu ikoty. “Jesu siayvumoopa”, e'i tite kupa. Ajawyi kee e'i rã'ãga kupa:

– Oremotekokuwa kee jaa rè rejupa. Manyvo põ tãmõ Moisesi e'i terekwarà wyi moia rè? e'i rã'ãga kupa. Manyvo remeve põ japoi kuwa iwyi? Japota remẽ põ japoi kuwa janererekwarà wyi? e'i rã'ãga kupa.

4 Ãmẽ Jesu e'i:

– Pemogetapa itõkõ Janejare'e ayvukwerà, kee e'i aepo jaa rè maekwerà: “Karamoe remẽ Janejare'e oinõ kwaima'e, wãivĩ reve”, e'i maekwerà.^a 5 “Ajawyi ojireko kupa remeve, opoi oõvijãgwerà kõ wyi oo werekwaa mõ kupa ky'y. Awyje rõmõ oiko ojeeve iko kupa ky'y, pe'ĩypyte mã'ẽ rõmõ”, e'i maekwerà.^b 6 Ajawyi kee a'e pejẽ. Janejare'e pe'ĩypyte mã'ẽ rõmõ oinõ kõ remẽ, tijamowaite kõ e'ã ojiwyi, a'e pejẽ. Awyje rõmõ a'evo oikopa kupa, e'i Jesu ijupe kõ ky'y.

7 Ãmẽ Pariseu kõ e'i:

– Manyvore põkõ kee e'i Moisesi ajamã'ẽ: “Ava mõ opoità werekwarà wyi imoisyry remẽ, kareta tome'ẽ rã'ĩ ijupe, opoia mojikuwaparà rõmõ”, e'i maekwerà? e'i kupa.^c

8 Ãmẽ Jesu e'i ijupe kõ:

– Naperovija tari Janejare'e ayvukwerà. Ajawyi aepo e'i tãmõ Moisesi ky'y. Nãwĩvoi Janejare'e poroinõ ypy remẽ ajamã'ẽ mijã, e'i. 9 Ajawyi kee a'e pejẽ. Kwaima'e mõ sõ werekwarà wyi opoi teywete remẽ, nimanyvoi epe erekwarà ekoi remẽ. Ajaire wereko ipetà ãmõ wãivĩ. A'evo mã'ẽ pè Janejare'e “ojimomy'a mã'ẽ tè ãwĩ”, e'i kõrijõtà ãmẽ, omojaiwe tesõ werekwarà ity rewarà mõ, e'i Jesu.^d

10 Ãmẽ emimo'earà mõ ojimonyi aepo renu. Ajawyi e'i:

– Ãwĩvo remẽ ikatu kuwa nijanererekwai remẽ, e'i.

11 – Õ'õ, aje, e'i Jesu. Ikatu, aje, e'i. Ajamã'ẽ “pirujẽ taerekwa e'ã”, na'ei ajamã'ẽ. Pe'ĩpe'ĩgà tè naerekwa'ãi mãe kõ, e'i. A'evo teãmã mãe kõ tè, e'i. 12 Uve iteetejẽ naerekwa kuwa'ãi mãe kõ. Uve naerekwa tari mã'ẽ rõmõ teãmã isaky mãe kõ. Uve ãmõ kõ otekorãnà rupi naerekwa tari mã'ẽ rõmõ mã'ẽ, ipirà nikatui mãe kõ. Ãmõ, omaramaa rupi a'evo mãe kõ teve. Manyvo noiko'ãi kuwa weevewarà reve mãe kõ. Uve teve ãmõ kõ, opota Janejare'e ayvu e'eay mojenuarà rè ywesõ oposiko. Ajawyi naerekwa tari mã'ẽ rõmõ oo. Ãwĩvoa pekuwa remẽ, tapetekokuwa ãmẽ, e'i Jesu.

13 Ajaire jane kõ mõ wãkarãgwerà kõ weru Jesu kyty, toapytepyy kõ Janejare'e pè oporegeta ijupewarà kõ mõ. A'e kõ rè Jesu remimo'ekwerà kõ omã'ẽ remẽ, e'i epe kupa:

– Jesu pemo'eaioka peãkarã kõ pè ne! Peeru sõ peãkarãgwerà kõ ikoty! Perojivy kõ eraa! e'i kupa.

14 Ãmẽ Jesu wenu aepo jaa remẽ, kee e'i:

– Nemo'eai'ãi ja'yrerà kõ. Totuu nẽ ekoty kupa. Ãwĩ kõ tè omoẽoka Janejare'e o'arà kyty ipi, e'i.

15 Ãmẽ ajaire Jesu wapytepyy kõ.

– Ikatuay aã ja'yrerà ereko, Papa, e'i Janejare'e pè.

A'evo wereko paire ojisyry oo.

16 Ãmẽ ajaire mirà mõ uu javo Jesu pè.

– Poromo'earà, manyvo aiko kuwa põ ivo tekoua rupi aiko, taa Janejare'e pyri aiko karuaru rõmõ aiko? e'i Jesu pè.

17 – Manyvore põ neporanu ivo katua rè? Pe'ĩte ivo katuay mã'ẽ. Janejare'e rõmõ'ĩte a'evo ekoi. Nepota ipyri neiko karuaru remẽ, ijayvukwerà rupi katu ikõ tereiko ipi nẽ, e'i.

18 – Mã rupi põ? e'i kwaima'e Jesu pè.

Ãmẽ Jesu e'i:

– Nekuwapa Janejare'e ayvukwerà tãmõ Moisesi pè ome'ẽ maekwerà, upi tijaiko mã'ẽ. Kee e'i itõkõ: “Terejuka e'ã mirà ikenẽ”, e'i. Ãmõ, “Terejimomy'a e'ã. Nererekwapa remẽ, a'e reve kõrijõ tè tereiko ipi mãerã tè”, e'i. Ãmõ, “Tanemona e'ã ikõ koivo kõ ma'e rè ipi nẽ”, e'i. Ãmõ, “Nivoi mã'ẽ teremo'y e'ã newari rõmõ mirà kõ rè ikenẽ”, e'i. 19 Ãmõ, “Nerõvijãgwerà kõ teremomojy ipi. Neruu. Ãmõ, ney. Ijayvukwerà rupi katu tereiko ipi”, e'i. Ãmõ, “Tereauvay nepyriwarà kõ. Ãwitõ nejiauvay, ãwĩvo ve tereauvay nepyriwarà kõ, koivo kõ ve”, e'i maekwerà.^e A'e a'e kõ nekuwapa maevo, e'i Jesu ijupe.

20 Ãmẽ kõnomĩokyry e'i:

– Õ'õ, aepo rupi katu aiko teãmã, e'i. Uve jẽ põ ãmõ ijayvukwerà mõ, a'e rupi taiko ãmẽ? e'i jẽ Jesu pè.

21 Ãmẽ Jesu e'i ijupe:

– I'ete. Ivoe'e katu neikotà remẽ, kee jẽ tereiko. Ekwa nema'e kõ tereme'ẽma karakuri repy rõmõ. Ajaire emosãsãima epykwerà iporijau mãe kõ pè erokwa. Pirujẽ neremimota katu kõ oikotà neupe Janejare'e rena pè ãmẽ. Neme'ẽ maire, ejo erupi eremimo'earà rõmõ, e'i.

22 Aepo kõnomĩokyry wenu remẽ, soõ, ijãgyoay ky'y, imoma'e ywete rewarà mõ. [Noo'ãi Jesu rupi ky'y, nopotai omoma'e kõ ome'ẽma 'ejẽ, aja 'arà peve.]

23 Ojisyry paire Jesu e'i wemimo'earà kõ pè:

– Waypete imoma'e ywete mãe kõ pè Janejare'e omoẽoka o'arà kyty ipi. [Omoma'e kõ rè ywesõ oja'a Janejare'e wyi.] Aje ywete aepo a'e, e'i. 24 Tekoua amome'utà peupe tapekuwa sa'u, e'i. Ãwitõ teima rõvijã waypete wasa ikwa'igà mã'ẽ rupi. Noasa'ãi kuwa agui ropyta kwarà rupi, e'i.^f Ãwĩvo ve imoma'e ywete mãe kõ pè waypete Janejare'e omoẽoka o'arà kyty, e'i.

25 Ãmẽ aepo emimo'ekwerà kõ wenu remẽ, ojimonyi wete kupa.

– Ãwĩvo remẽ ava jẽ rõwã oo kuwa Janejare'e pyri oiko karuaru rõmõ ãmẽ! Ava nojireko katuoka'ãi kuwa ijupe? e'i tite kupa.

26 Ãmẽ Jesu omã'ẽ ee kõ erokwa.

– Aje, ava jẽ rõwã oo kuwa ipyri oiko karuaru rõmõ. Janejare'e rõmõ'ĩte poromoigo karuaruoka kuwa opyri. Nuvei 'ete iwasu mã'ẽ Janejare'e pè, e'i.

27 Ameve Peturu e'i Jesu pè:

– Emã'ẽ. Pirujẽ oroitypypyipa orojo nerupi, e'i. Manyvotà awi oreupe ajaire? e'i.

28 Ãmẽ Jesu e'i ijupe kõ:

– Õ'õ aje. Erauvay wyi pirujẽ peitypypyi pejo erupi, e'i. Ajawyi kãramõ ije, Janejare'e Remimuurerà ajimojane mã'ẽ, ajikuwa Jõvijã wasu rõmõ ajo remẽ, poromojõvijãtà ereve ky'y, e'i. 12 rõmõ jõvijã miti kõ rõmõ peikotà, e'i. Isaeu kõ atyry rõvijã kõ rõmõ peikotà, 12 ijeapyrerà mãe kõ atyry kõ rõvijã kõ rõmõ. Ekokwerà kõ pemosã'ãgatà esa, e'i.^g 29 Uvetà ãmõ kõ ve pevo mãe kõ. Pirujẽ oitypypyità uu eayvu rupi erauvay rewarà mõ kupa. Ma'e oitytà kupa. Wetã oitytà oo kupa. Ãmõ, wetãrãgwerà kõ ve. Oõvijãgwerà kõ. Wãkarãgwerà kõ. Ãmõ, okoo kõ. Wãisõ pirujẽ oitypypyipatà uu, erauvay kupa rewarà mõ, e'i. Ajawyi kee a'e pirujẽ wemireko kõ oitypypyipa erupi uu mãe kõ pè. Penemitykwerà kõ wyive tesõ Janejare'e ome'ẽtà pejẽ ky'y. Opyri tekou karuarua ome'ẽ teve pejẽ, e'i.

30 – Ajamã'ẽ ijaty jo'arà kyty ekoi epe mãe kõ jokunawyriwarà kõ rõmõ ekoità. Jokunawyriwarà kõ ãmẽ jo'arà kyty ekoità, e'i Jesu ijupe kõ.^h