3 Pone Kristen inomranimpi ka pinefe uporo kinini,

wolpuna kinini isi samo yemei yire fa ki ese keꞌre piprola ka kire alele pone ommo e God fa yangkeye fa yuꞌpu kore mone mingklari.

Ka mee,

ki ke kuru nanrona ki ese keꞌre mi wongke mee ka kerkale pone nanrona,

pone ese peri kero ka purupe bilip e God yina mew e mone uma wunini ese murume.

Ka pone ese purule mi e nu uma fa iimne miuporo namo.

God yangke rokoi wokera nro e bilip fane mana wongke ese fi yensona bilip e mone namo.

4 Uma plai isi peki noloni neri sios pu.

God isi namale pu nanrona fane wu yereryali nu uma neꞌre mi nanrona nu ese neri kot e God ka rokoi fa nu ese numaro kot sa onne.

Nu sa uma fa kuma nane God ka nisinori ka samo nemaire mi e wolyane e God ka nangke nemei yukaine ompla fa yinayane rokoi fa mone ese mangke nale fafaile wongkwongkeni nama e God.

Nu uma namo,

sa uma fa samo kuma nane mana e pai risi mone,

Manawamo e mone Jisas Krais.

5 Nu Israel isi painri naine pike plola e kantri Isip ka Manawamo yem nu nupone kore mokoi namo.

Ka ingke,

wu ke samo yisyori nu uma fopi e fei bilipim wu.^a

Pone namale ompla namo pu.

Ka ki kopro mi mee kore fai pone ese pupu kore.

6 Pone namale pu nanrona nu ensel fopi isi fi samo naine koii noneni^b ka nangke ommo e God yali nu ese nangke,

Manawamo yukaro nu sen fa yeye nanrona nanrona,

ka yingkirpanro nu panro naine kureli wamo.

Ka nu naine mokoi namo ka norine kaire e kot wamo e God ese yemei.

7 Sa yukaine isi,

nu pinuma e taun Sodom ka Gomora ka nu taun plai e naine ekrene taun plainrane namo,

nangke nale fafaile wamo.

Nu nangke nale pamok ka nale plai wongkwongkeni sam faifaile plau.

Ka God yawane niꞌpi yuꞌpo ka yisiyori nu pinuma ka taun mingklari singke pekimo.

Ka ompla fafaile wamo namo e nu pinuma e taun nangkene namo,

sa samo yukaine nale e isi nu ensel nangkene.

Nanrona fane ompla namo sa yuku resukru ompla ese God yangke nu uma e fi rikepone kot e God,

ingke nu ese naine kei niꞌpi wamo fa yeye nanrona nanrona.

8 Ka nu uma namo nire kapnuka ira poneni,

sa nu uma fa nupenene nale namo.

Nu sa uma fa nupenene ommo e nu fa nemne ruwila noneni,

ommo namo fa samo yereryali wolpuna nunini ka nu fa nangke nale fafaile namo yangke nu none samo naine kina nama e God.

Nu sa uma fa nangkrumo mi e God ka fi fa nupene Manawamo ka fa ouwnire nu ensel e naine risine heven.

9 Ka e ensel Maikel fina fa pai risi nu ensel plai namo,

yemei ka yane Satan nopu mi fa fina ese yem puꞌlo e Moses.

Ka Maikel fi yaku mi fafaile palo Satan.

Wu yireni Satan nanrona,

“Manawamo wone ese yenre yene ka yangke yene misaruru.”

10 Nu uma namo fa ouwnirene ommo e nu none fi samo namale nomu nunini.

Nu sa yukaile ommo kuru amun e mouleni ikakro onnele ka fa karnaraine nro.

Nale nunini namo,

fa samo yisiyori nu none.

11 God ese samo yisiyori nu uma nanrona.

Nale nu nangkene namo,

sa resukru yukaine nale e Kein isi yangke namo.^c

Ka nu fa wampane nupene nale fafaile yukaine Balam^d isi yangkeye fa wola nanrona ommo mingklari sa fa nuꞌpune romaula nro.

Ka nu fa wewelane ka fi fa nupu mi e God yukaine nale e isi Kora fa yangkeye fa wewelaye ka yurule mi e God.^e

Ka e rokoi namo nro,

nu uma namo ese napu rokoi rerile,

ka nu ese sam pekimo rilele.

12 E pone pempoku posipe ka pempoku pope ommo,

sa yuku nanrona pone pinuma e God fa wolpunwokerape pone kore ka samo wolpane pone kore.

Ka nu uma nanrona fa noloni ka nisinori ommo fa none yukaine rip e nene furu ruwe fa nekrirene bot ka sip e noloni ekrene wu.^f

Nu fi sem e nu none ommo iplele uma mingklari ka nu naine uma fa keingkene ommo mingklari yeye none nro.

Nu uma namo sa yukaine kupu e fi samo kina fa riple ese yilo,

ka rapu ke priri yawale poinpanre nro.

Nu re yukaile ilo fa karnerine ka fi fa nalelwa nale e taim noneni.

Ka wongke kore,

nu sa yukaile ilo e rouwlini pu ka nu uma ningkolneri kinrela nunini pu.

Ilo nanrona ka nu uma nanrona,

sa samo rili pu.

13 Nu uma namo sa uma fa nangke eni.

Nu sa yukaine furu wamfafai fa nemeine ka pikarine.

Ka nu fi fa sem e nu nangke nale fafaile.

Nu fa samo nemei alele yukaine furu rofo fa naine furu riri.

Ka re nu sa yukaine kikla fi fa nupene rokoi noneni nemi riri.

Nanrona fane God yina mokoi nunini waiye kureli wamo fa nu ese naine nanrona nanrona mokoi namo.

14 Adam wu sa flili pai risi mone ka Inok wu sa namba 7 flili moneni wairu Adam.

E wu waiye,

yopro mi profet nanrona,

“Ki kuru Manawamo yumale tausen tausen holi ensel woneni noloni.

15 Wu ee samo kotim mone uma mingklari.

Ka wu yire e samo yangke nu uma fi fa nupene wu namo,

ese samo nem eni e nale fafaile wamo e none isi nangkene namo.

Nu uma plai fa nangke nale fafaile namo,

fi samo wolane God ka kuma nane wu.

Nanrona fane,

wu yire yangke nu uma isi nopro mi fafaile wu namo ese namale fafaile noneni.^g”

16 Nu uma namo,

sa nu uma fa wampane nem wolpuna fafaile,

17 Ka pone Kristen inomranimpi ka pinefe uporo kinini,

pone sam wolrufu mi e nu aposel e Manawamo e mone Jisas Krais isi nopro mi e ommo ese ingke nemei.

18 Nu isi nireni pone nanrona,

“E pike yire pekimo,

nu uma e fa nangkrumo mi ka wewelane ka fongkrolene namo,

ese nemei.

Nu uma namo ese fi wola God ka nu ese nupene wolpuna noneni e none nire uporo none.”

19 Nu uma namo,

sa uma fa nupene wolpuna e pike nro ka nu sa resukru ese neingke ka nemaire wolpuna e nu uma ese nangke pone pinanpai.

E fika,

Holi Spirit fi waiye plau nu uma namo.

20 Ka pone Kristen inomranimpi ka pinefe uporo kinini sam pangke bilip poneni waiye kero laip uporo e God wone isi yape pone namo.

Ka e pone pesapupe,

pone pinayane Holi Spirit ese yape kero pone ka yuruye wolpuna poneni.

21 God wu sa mana fa samo wolyape pone.

Nanrona fane pone ese samo paipe ekrene wu,

fa wu ese yangke uporo pone ka pone ese pori Manawamo e mone Jisas Krais ese samo wolpalo pone ka yuꞌpu pone paipi paipe laip fa waiye nanrona nanrona.

22 Pone ese samo wolpalo nu uma e bilip nunini fa yemei ka firpaloye ka fi samo kero.

23 Plai,

sa naine niꞌpiyen pu.

Nanrona fane pone ese puꞌpu kore nu uma namo ka peingke nu nolo moile e niꞌpi.

Ka plai,

e pone pire pangke nale e fa wolpalope nu namo,

pone ese samo pum nale namo ka samo saimope pone kore ka paipe amon ommo mingklari e fi namkire nama e God.

E fika,

nu isi panro renro nupene nale e wolpuna oiya ka nangke ommo fei namkire resukru ommo papri nunini re fei namkire nama e God.

24 God resukru ese samo yopane pone ka pone ese fi firipanro.

Ka re wu resukru ese yuꞌpu pone papri koii namkire uporo wunini ka peri wu ungklamyen ka pone ese samo aipem ka eni wongke ese fi yangkana pone.

25 God wokera nro waiye ka wu mana isi yuꞌpu kore mone ommo e Manawamo e mone Jisas Krais yangkeye.

Mereri noula wunini ka wu ese waiye king moneni ka ommo mingklari ese naine ruwe kero e wu nro.

Oii isi wu waiye rona ka naminrele re wu nawaiye nanrona ka ingke re wu ese waiye nanrona nro.

Sa alwone.