Chi chognaanau jãga haju haai nʌ hamach patronnaan dʌ̈i
6
Har sĩi chikꞌamnaan chogkꞌa par pꞌidkꞌa nʌm kꞌʌʌn,
pãach patronnaan daupii habat,
mag hoowai bigaaum kꞌʌʌnau Hẽwandam higwiajã kꞌaigba hiekꞌaba ni maachdëu nem jaau nʌm hëugarjã kꞌaigba hiekꞌam hugua.
2 Pãach chi chogkꞌa nʌm kꞌʌʌnjã pãach patronnaan Jesucristo hi hʌ̈kꞌaajem kꞌʌʌn kꞌai,
hoob pãrau pãach hödegpai,
“Jãkꞌʌʌnan hĩchab Jesucristo hiek hʌ̈kꞌaajem kꞌʌʌn haawai jãkꞌʌʌnau chan marag bʌ̃ʌrjã magju kꞌabam” hawia,
“Marau ham högkꞌabam” ha hiekꞌamiet.
Mag kꞌãyau hante Jesucristo hiek hʌ̈kꞌa nʌm gaaimua pãach kꞌodnaan haawaita ham hatꞌee hajapcha pꞌidkꞌaju haai nʌm,
hamjã hĩchab Hẽwandamau daupii pꞌë wai sim kꞌʌʌn juagta pãrau hoo naawai.
Timoteo,
hamag cha mua pʌchig jaau chirʌmjöta tꞌumaam kꞌʌʌnag jaaunaa pʌch hipierraa hapibá.
Hẽwandam hi kꞌapꞌʌm hanʌmta parhoob nem jaaujem kꞌʌʌn
3 Hãbmua kꞌãijã pãar haar barwia Hẽwandam hi hawia jaaubaimam,
mamʌ mag hirua jaau nʌrrʌm jũrr maach Pör Jesucristo hiek chi hajapcharamjöo kꞌaba,
ni maachdëu jaau wënʌrraajem dʌ̈i harjöojã kꞌaba sim chan,
4 magan mag wounau chan hichdëu jaau nʌrrʌmjã bʌ̃ʌrjã kꞌaugba simta sĩi hich tꞌöwiata mag nʌrrʌm,
hichdëu kꞌapꞌʌ chirʌm hamkꞌĩir.
Mag wounan sĩi nem hieknemta sim.
Mag gaaimua hãba sĩi hõor dʌ̈i magʌm hiek higbaadëmjã pʌaba warag harpaita hijẽjẽbkꞌamua hichdëuta chikꞌam pödpʌ̈iju kꞌĩirjuajem,
magʌm gaaimua hamach hagjöm kꞌʌʌn hapꞌajã jũrr hichigta tꞌumaam kꞌʌʌnau hee hapim kꞌõchgau.
Ya magbaadëmua höbër nʌm:
chikꞌam dʌ̈i kꞌĩir kꞌʌʌukꞌa nʌm,
chikꞌam kꞌĩir hiekꞌa nʌm,
warmua dich dʌ̈i chadcha magba sim kꞌãijã dich garmuata chikꞌam hëugar kꞌaigba kꞌĩirju nʌm.
5 Magʌm kꞌʌʌn chan meeukꞌa chikꞌam hipeer hahau kꞌapꞌöbaadëmjã pʌam higba,
hich mag sĩerrjëem,
ya ham hamachdëu mag nem parhoob kꞌaugba jaau nʌmʌgta pör haragpa nʌm gaaimua Hẽwandam hiek chi hajapcharamta hiseg wai naawai.
Ham kꞌĩirjugan jãg Hẽwandam hi hawia,
hamachdëu jaau wënʌrrʌm gaaimuata sĩi pꞌatkꞌon pöm hau wënʌrraju kꞌĩirju tꞌʌnʌm.
Har sĩi magʌm kꞌĩirjug wai sĩsidʌm kꞌʌʌn dʌ̈i hoob kꞌapeerkꞌa chitam.
Sĩi pꞌatkꞌonagta hee haajem kꞌʌʌn
6 Hẽwandam hiek maachdëu jaau nʌm hõrau hũurwai jãg chi hũrm kꞌõsi hũr nʌm kꞌʌʌnagan chadcha hʌ̈uma;
hamagan mag hũrwia hʌ̈kꞌaawai pꞌatkꞌon pöm hau nʌmjöta sim,
majã har hamach nemdam wai nʌm dʌ̈ipai honee durrum kꞌʌʌnau mamʌ.
7 Warr maach tꞌaabaawaijã bʌ̃ʌrjã juagam nem chukꞌu maach hãdau maach tꞌaabatarr haawai,
juagam nem pöm wai naawiajã maach meem hed pöd maadëu bʌchkꞌunpaijã nem harrju kꞌaba nʌm.
8 Mamʌ dich tꞌach kꞌöjudam paraanaa kꞌajũa jũajudamjã wai nʌmʌn,
ya magdam dʌ̈ipai honee naaju haai nʌm.
9 Mamʌ magba hãaur kꞌʌʌnan sĩi pꞌatkꞌon pöm paarpajuuta kꞌĩirju tꞌʌnʌm.
Makꞌʌʌnaun pꞌatkꞌonau haawai parhooba nem wau nʌmuajã chadcha hamachdëu nem kꞌõsim paarpajuuta hẽkꞌaajerram.
Mag nʌm gaaimua wounagamjö hʌdʌraata nem parhoobamʌgjã hamach bãyeu harrpi nʌm,
mag pꞌatkꞌonagta hee tꞌʌnarr gaaimua naspawia hamachdëupai wir haig hamach kꞌaibag waupimjö Jöoirau hamach hisegjujã kꞌĩirjuba.
10 Har chadcha pꞌatkꞌonag wʌrpa nʌm kꞌʌʌnaun nem kꞌaigbamta kꞌĩirpierr waaujem,
pꞌatkꞌon paarpam kꞌõchgau.
Hõor magʌm kꞌʌʌn tꞌʌnʌm.
Hãaur kꞌʌʌnau mag pꞌatkꞌon paarpam kꞌõchgau,
nem parhooba wau nʌmuata warag maach Hẽwandam hiek hamachdëu hʌ̈kꞌa narrjã hisegjierram.
Hamaun hamach pꞌatkꞌon paarpa pꞌöbaadeewai hamach honee hajupii haajerram.
Mamʌ magʌmjã hichiita hich mag honee kꞌaba naajem.
Hajap chirá Timoteo
11 Mamʌ pʌ Hẽwandam hatꞌeeta pꞌidkꞌa sĩewai,
hoob warm kꞌʌʌnjö nem kꞌaigba wauju kꞌĩirju chitam.
Magju kꞌãai Hẽwandam dau na hagchanaa hirua kꞌõsimpai waubá.
Maadëu hʌ̈kꞌa nʌm hiekta bʌ̃ʌrjã hogdʌba hʌ̈kꞌa chirʌm dʌ̈i tꞌumaam kꞌʌʌn kꞌa kꞌõsinaa hitꞌũu ham wawibá.
Mʌg hiek gaaimua pʌch dau hapꞌʌʌ hawiajã hãwatnaa warag högkꞌaba pënaa.
12 Timoteo,
Cristo hiek chaar maachdëu hʌ̈kꞌa nʌm gaaita hubʌnaa warag maach Hẽwandam hiekta nem pʌa chʌuu jaaubá,
sĩi kꞌajap meeukꞌa jãau nʌmjö.
Tag maach meeba hich mag wënʌrraju haar barjuuta hẽkꞌabá,
pʌch mam sĩeimamkꞌĩirta warrjã Hẽwandamau pʌch jʌr hautarr haawai.
Kꞌĩir heyaa habá,
har pʌchdëu hõor kꞌapan tꞌʌnʌm dakꞌĩir mʌg pʌchdëu hʌ̈kꞌa chirʌm hiek chan hogdʌba hich jãg hʌ̈kꞌa chitaju ha hiekꞌatarr.
13 Hĩs mua mag chirʌm,
Hẽwandam hichdëuta nem tꞌʌnʌm tꞌum hiiupi wai sĩejem hag dau na,
maimua hĩchab har maach Pör Jesucristo Poncio Pilato na tꞌumaam kꞌʌʌn jʌ̃g daar hiita chadcha Hẽwandam Hiewaau ha jaautarr hag dakꞌĩirjã hagjö mag chirʌm.
14 Cha mua pʌchig jaau chirʌm tꞌum hipierraa habá hich Hẽwandamau kꞌõsi simjö,
bʌ̃ʌrjã nem chaauraapaijã jaauba.
Hich magta hajapꞌa chitá maach Pör Jesucristo bëe nʌm hora,
ni hiwiram hãbmuajã pʌchig pʌch kꞌĩir naau hiekꞌam hugua.
15 Mag Jesucristo Hẽwandamau bëepiju hed haadeewai tꞌumaam kꞌʌʌnag warre dau daau hoopiju,
hichdëuta hãba maach tꞌumaam kꞌʌʌn wai dʌnaajeewai.
Hichta hĩchab mʌg jẽb gaai reinaan tꞌum tꞌʌnʌm kꞌʌʌn Rey hanaa hĩchab hichta har hõor tꞌumaam kꞌʌʌn pörkꞌa tꞌʌnʌm kꞌʌʌn Pör charau.
16 Hichta hãba warrgarwe hich mag hiiu sĩerrʌm,
meejã meeba.
Hichta sĩi hatcha hich hararagau pöd hõrau hagʌg hooju kꞌaba sĩi bʌ̃ʌmjö sim heeta sĩejem.
Maach mʌg heegarm kꞌʌʌnau chan ni hãbmuajã dich daujãdamau pöd hi hoojã hooba,
ni hooju haaijã kꞌaba nʌm.
Maguata hãba hirigta maach tꞌumaam kꞌʌʌnau hich mag hee haju haai nʌm,
hichta chi jua tꞌierrkꞌa sĩerraawai.
Maata maach Hẽwandamau.
Jãga haju haai nʌ pꞌatkꞌon paraam kꞌʌʌnau
17 Har pꞌatkꞌon paraam kꞌʌʌnag,
hamachta warm kꞌʌʌn kꞌãaijã hʌ̃rpai nʌm hawia wir haig hamach pꞌatkꞌonta tꞌö hiekꞌapiba jaaubá.
Pꞌatkꞌon pöm paraam kꞌʌʌnjã bʌ̃ʌr habarm gaaimua deeu dau haug hee maju chan pöm kꞌabam.
Maguata hãba haata kꞌĩirjuju kꞌaba nʌm.
Mag kꞌãai hãba maach Hẽwandampaita hamag kꞌĩirjupi jaaubá,
maach hʌ̈u wënʌrramkꞌĩir hichdëuta maadëu nem hiigwaijã hö hãkꞌãrag chukꞌu deejeewai.
18 Hamag,
bʌ̃ʌrjã hamach pꞌatkꞌon hĩgkꞌaba warag haguata nem hajapꞌam waupi jaaubá,
hõor parhoobam kꞌʌʌn dʌ̈ijã hö wajapꞌa.
19 Hamau magta hõor hatꞌee nem hajapꞌam pöm wau nʌmua gaai machag chukꞌu pꞌatkꞌon dʌ̈rrcha kꞌãijã werbamʌn,
magan mag nʌm haiguin warre mʌg jẽb gaaiwe hʌ̃gtꞌarchata hamach pꞌatkꞌon hãkꞌa pꞌiemamjö nʌm,
hamachdëu hõor dʌ̈i mag nem wau nʌm jũrr Hẽwandamau par hokꞌoopibaju haawai.
Hajapcharan mag nʌm haiguin mag nem wau nʌmua tag maach tꞌõjã tꞌõba haajem haar wëtwi naaimajuuta kꞌĩirju nʌm.
Pabloou hãbmiecha Timoteo wawitarr
20 Timoteo,
hãbmiecha mua pʌrʌg jaaukꞌim:
Hẽwandamau pʌrʌg hich hiekta jaaupitarr haawai pʌ pꞌidagan hãba hi hiek jaau nʌmʌu.
Kꞌĩir kꞌapꞌʌ chitá.
Hoob sĩi jãg Hẽwandam hi hawia hamach heepai bʌ̃ʌr habarm gaaimua hiek pꞌitꞌurg haadëp haajem kꞌʌʌn dʌ̈i sĩi par pʌch hipꞌitꞌur hiyʌ̈ʌ chitam.
Jãgʌm kꞌʌʌnaun par kꞌaugbamta kꞌapꞌʌm kꞌapꞌʌm hawia jãg sĩerrjëem.
21 Hãaur har chi mag wënʌrrʌm kꞌʌʌn hamachdëu mag parhooba jaau wënʌrrʌmʌgta hee ham kꞌõchgau Hẽwandam hiek chaar hamachdëu hʌ̈kꞌa narrta hisegjierram.
Mʌkꞌʌʌndam hajim pʌrʌg pꞌã deepʌ̈im hig chirarr.
Pʌ kõit Hẽwandamagta jëeu chiraajem,
pʌ hʌ̈u tꞌʌa wai nʌrramkꞌĩir.
Hayoo kakë,
Pablo