Hẽwandam chaainkꞌa nʌm kꞌʌʌn jãga wënʌrraju haai nʌ
5
Hich Hẽwandamau hich garmuajã chadcha pãar hich chaain jãsene haajeewai hichdëu pãach dʌ̈i haajemjöta habat pãachdëujã pãach kꞌapeen dʌ̈i.
2 Hich jãg Cristoou maach kꞌõsi simjö pãraujã hagdaujö pãach kꞌapeen kꞌa kꞌõsi habat.
Cristoou mag maach kꞌõsi harr haawai maach daupigau pakuls gaai hʌdʌraa hich meerpꞌë tꞌõopijim.
Hẽwandamau hirua magbarm hoowai hʌ̈u sĩejim.
3 Ya pãar Hẽwandam hõorkꞌa nʌm kꞌʌʌn chan pöd pãach hõor kꞌabam dʌ̈ijã kꞌapes haju kꞌaba,
tagam nem maach hinaamjã wauba,
chikꞌam nemjã tꞌumaa dich dën hapim kꞌõsi haju kꞌaba,
ni sĩi magʌm hiek hig hiyʌ̈ʌ hajujã kꞌaba nʌm.
4 Sĩi hiparii dau lököo wa hihachag kꞌãijã hiekꞌaju kꞌãai,
Hẽwandamau pãach dʌ̈i hʌ̈u haajem paar hi hajaugta pꞌëbat.
Ya pãar Hẽwandam dën haawai,
hiek hãkꞌãraam chan pãrau tag hiekꞌaju kꞌaba nʌm.
5 ¿Jãgwi mua mag chirʌ́?
Mua mag chirʌmʌn mʌgau:
Hamach hõor kꞌabam dʌ̈i kꞌapes haajem kꞌʌʌn,
Hẽwandamau hoowai maach hinaam nem waaujem kꞌʌʌn,
wa chikꞌam dënjö paarpaag hawi hamachdëu nem hig nem hẽkꞌabaadëmjã pʌa chʌuu haajem kꞌʌʌnjã pöd Cristo Hẽwandam dʌ̈i hãba chi Pörkꞌa sim haar höbërbaju haawaita mag chirʌm.
Har jãg nʌm kꞌʌʌnaun jãg hamachdëu nem wau nʌmʌgta hʌ̃rcha hee tꞌʌnʌm,
Hẽwandamagta hee haju kꞌãai.
Hamach mag nʌm gaaimuata pöd hi haar höbërbam.
6 Jãgʌm kꞌʌʌn heem hãbmua kꞌãijã pãach haig bëewi pãachig mʌ hichaaur jũrr magʌm gaaimuapai chan Hẽwandamau pãar chig habam ha jaaumʌn,
magan hichta sëukꞌa nʌrrʌm.
Magʌm kꞌʌʌnag hʌdʌʌr pãach kꞌũgurpimiet.
Hamau kꞌaugba nʌm,
hante magʌm waum kꞌõchgau hich hipierraa kꞌaba nʌm kꞌʌʌn gaaita Hẽwandam kꞌĩir machag meeuju kꞌabahab.
7 Magua jãg hi hipierraa kꞌaba hi hichaaur nem wau nʌm kꞌʌʌn dʌ̈i chan hoob bʌ̈ dʌ̈ii hamiet.
8 Warr pãrau Hẽwandam hiek kꞌaugba haawain chadcha pãachjã sĩi kꞌĩchag heemjöta wënʌrraajeejim.
Pari hĩsin ya pãar maach Pör Cristo dʌ̈ita kꞌapeerkꞌanaa hi hiekjã kꞌapꞌʌ naawai hararag hee nʌmjöta nʌm.
Mag naawai chadcha hi hiek kꞌapꞌʌm kꞌʌʌnjöta hagpierraa nʌrrjëe habatꞌʌ̃.
9 Mag Cristo gaaimua chadcha hararag heeta wënʌrrʌmʌn,
hõor hajaugta haadeejem;
mag nʌm dʌ̈i hĩchab nem hagcha waunaa hiekꞌaawaijã chadam hiekta hiekꞌaajem.
10 Magua pãach nem waaupierr maach Pör Hẽwandamau hoowai hi dawagaa haju hayaam nemta wauju hẽkꞌabat.
11 Cristo kꞌaugbagau sĩi kꞌĩchag heemjö nʌm kꞌʌʌnau maadëu nem higbam nem wau nʌm hee hoob dʌ̈i dubmiet;
magju kꞌãai warag pãach hipaarmua hamau nem wau nʌm chadcha kꞌaigba sim ha kꞌap hamkꞌĩir warag meerba jaaubapʌ̈it.
12 Jãgʌm kꞌʌʌnau meraa nem wau nʌm chan maadëu higjã mapꞌa sim,
magʌm hiigwai warag maach chigaata sĩewai.
13 Pari magba kꞌaigbam kꞌʌʌn daar maadëu nem wau nʌmjã tꞌum hajapꞌata waauwain hõrau hamachdëu nem kꞌaigba wau nʌmjã hõtdau bʌ̈ʌgta hoo nʌmjö haajem.
Mag sim haig chi pekaujã pöd meraa haju kꞌaba sim,
hõtdaúa tꞌum harar wai sĩejemjö maach wajapꞌa nʌm gaaimua hamachdëu nem kꞌaigba wau nʌmjã merag chukꞌu sĩewai.
Mag maadëu hajapꞌa nem wau nʌm gaaimua hõrau hamach kꞌaigba nʌm kꞌaug hauwi Hẽwandamau kꞌõsimjö mag hararag hee wënʌrram kꞌõchgau hi jʌrmʌn,
chadcha hi dënkꞌa nʌisiejem.
14 Pari magaagan ham hiekꞌõoin,
“Jãg pʌch pekau heepai kꞌãi simjö sim daukꞌanpabá;
chi kꞌëchamjö tꞌʌnʌm kꞌʌʌn heemua pꞌiidʌbaad;
Cristoouta hich dënkꞌa haunaa hich dʌ̈ita pʌ wai nʌrraju.”
15 Maguata muan pãragan hagpierraata wënʌrratꞌʌ̃ ha chirʌm,
Hẽwandamau kꞌõsimjö.
Sĩi jãg nem jaau nʌmjã hũrba wënʌrraju kꞌãai kꞌĩirjugdam paraata haajeetꞌʌ̃.
16 Hʌ̈uta nem hajapꞌa wauju haai nʌm haiguin hagpierr hich Hẽwandamau kꞌõsi simjöta habat.
Pãrau hoo nʌm,
hĩs hewag paawai chan ya warag chi hajaugjã chukꞌuta paaukꞌamam.
17 Hoob jãg sĩi Hẽwandam kꞌaugbam kꞌʌʌnjö parhoob dau tꞌeeg chukꞌu nem waumiet.
Magju kꞌãai kꞌani maach Pör Cristoou waupim kꞌõsi sĩ ha kꞌĩirjunaa magʌmta wauju hẽkꞌabat.
18 Hoob nag döwia hokꞌoppꞌa hamiet.
Jãgʌmuan warag maachig nem parhoobata waupinaa maach hokꞌoopijuuta hẽkꞌaajem.
Magju kꞌãai Hẽwandam Hakꞌaarta pãach gaai pꞌẽsnaa hidëu hirigta pãachdëu nem waujujã jaaupibat.
19 Pãach hiyʌ̈ʌ haawaijã maach Pör Cristo hiekta honee hig hiyʌ̈ʌ habat;
meukꞌaar hau nʌmuajã tꞌãrauchata hi tꞌumeukꞌarbat.
20 Maach Pör Jesucristo gaaimuata Hẽwandam chi Hayau hʌ̈u maach hiek hũurjeewai nem tꞌumaam paar hirigta hʌ̈u hajim habat.
Jãga haju haai nʌ dich kꞌãai hʌ̃rpaim kꞌʌʌn dʌ̈i maimua dich kꞌãai heegpaim kꞌʌʌn dʌ̈ijã hagjö
21 Cristo hiek hʌ̈kꞌa naawai hirua jaau simjö ham kꞌõchgau jũrr dich kꞌapeen hagjö hʌ̈kꞌa nʌm kꞌʌʌnaujã dichig nem mag haawai,
hʌdʌraa hamagta dich kꞌãai hʌ̃rpai hapibat.
22 Hʌʌin chi jaainpan,
hich jãg maach Pör Hẽwandamagta hʌdʌraa pãach kꞌãai hʌ̃rpai hapi nʌmjö,
pãach jaainau pãachig nem mag haawaijã hoob pãachta ham kꞌãai hʌ̃rpai haju hẽkꞌamiet.
23 Pãrau kꞌapꞌʌ nʌm,
mʌg maach chi hʌ̈kꞌa nʌm kꞌʌʌnta Cristo morkꞌa nʌm.
Maagwai hichta maach Pör hanaa maach peerdʌ haaujemʌu.
Magua hũrbat:
hich jãg Cristota chi hʌ̈kꞌa durrum kꞌʌʌn Pörkꞌa simjö,
pãar jaainta pãar pöröu.
24 Magua,
hich jãg mʌg maach chi hʌ̈kꞌa nʌm kꞌʌʌn tꞌum Cristoou nem mag haawai hi hipierraa haag hi jua heegpai nʌmjö,
hʌʌin chi jaainpanjã hagjö nem tꞌumaam hatꞌee pãach jaain hipierraa haag ham jua heegpai hʌrrjëe habat.
25 Hich jãg Cristooujã hich hiek hʌ̈kꞌa pꞌöbaadeewai hich iglesiakꞌa nʌisiju kꞌʌʌn daupigau ham kõit hichta tꞌõopitarrjö,
pãach chi hemkꞌooinaujã pãach hʌʌin daupii habat.
26 Cristoou mag hich tꞌõopitarran,
maach peerdʌajem hiek hũr nʌm dʌ̈i dich pör choopibarmua hajaug paapʌ̈iwi hich hatꞌeepaita nem wau wënʌrramkꞌĩir hajim.
27 Mag hajaug paapʌ̈iwi hich hatꞌeepai nem waupi simʌn,
deeu hich bëem hedjã hʌʌi kꞌĩir hajaug kꞌaibagjã chukꞌu tꞌumaam kꞌʌʌnau kꞌõoigjemjö kꞌitʌmta hich hatꞌee hawaagau;
hajapcharan bʌ̃ʌrjã pekau chukꞌu,
ni deeum kꞌaigbam nem jaauju hayaamjã chukꞌu,
sĩi hajappꞌa kꞌitʌmta hich haarcha hawaagma.
28 Hich jãg Cristoou maach kꞌõsi haajemjö hich hagjöta haju haai nʌm chi jaainaujã pãach hʌʌin dʌ̈i.
Jãg chi jayaujã hich mor bʌ̃ʌrjã chig hapimapꞌa haajemjö,
hich hʌʌijã chig haba daupiita wai nʌrraju haai sim.
Chadcha hich hʌʌijã daupii wai sim wounaun hichchata chig hapimapꞌamjö sim,
hich hʌʌijã hich morkꞌa simta mag daupii wai sĩewai.
29 ¿Jãgwi mua mag chirʌ́?
Maach mʌg nʌm haig hãbmuajã wir haig dichdëupai dich hoomapꞌa kꞌaba haajeewaima.
Hante warag maadëu tꞌachjã hed hëepierr kꞌönaa dich chig hapimapꞌa haajem,
hich jãg Cristooujã hich mor haawai hich iglesia tꞌʌa wai sĩejemjö.
30 ¿Maagwai maachjã mag hirua tꞌʌa wai sĩejem heem kꞌʌʌn kꞌabá,
maachjã hi morkꞌa naawai?
Chadcha hi morma.
31 Pari mag chi jaai hich hʌʌi dʌ̈i hãbam morkꞌa nʌm ha nʌmʌn,
Hẽwandam hiek pꞌã sim gaai jaauwaijã,
“Maguata hemkꞌooirau hich dënnaan dʌ̈i sĩejerrjã ham pꞌëpʌawi hich hʌʌi dʌ̈ita hogdʌba sĩsiju” ha sim,
“warr sĩi hamach hap nʌrrjëe haajerrta ya magbaadëm haigmua sĩi hãbam morkꞌa hõor hãbpaimjö wënʌrraag.” (Gn 2:24)
32 Mua kꞌapꞌʌ chirʌm,
mʌg hiek kꞌap haag chadcha maach hatꞌee pꞌitꞌur sim.
Pari mua mag chi hʌʌijã hich jaai dʌ̈i hãbam morkꞌa nʌm ha chirʌmʌn,
maach chi iglesiakꞌa nʌm kꞌʌʌnta Cristo morkꞌa nʌm higwiata mag chirʌm.
33 Pari mag cha mʌchdëu jaau chirʌm pãachdëu tꞌum hajap kꞌaugba hawiajã,
hichiita hich jãg pãachdëupaijã bʌ̃ʌrjã pãach chig hapimapꞌa haajemjö,
tꞌumaam kꞌʌʌnau hagdaujö pãach hʌʌin daupii habat.
Maagwai chi hʌʌinaujã pãach jaain hipierraa nʌmua ham hökꞌönaa hagjö ham daupii habat.