4
Mua pãrag jaaum hig chirʌmʌn mʌgta sim:
Kꞌanim nemjö woun rikkꞌa simua chaai bʌ̃rʌʌ kꞌitʌm hãbpai wai sim;
mag sim meebaadee magdamauta hi juagam nem jʌ̃aju.
Mag hichdëuta tꞌum jʌ̃ajup mamʌ,
hagtꞌa bʌ̃rʌʌ kꞌitʌm haiguin,
hich hag degam chogjöpai chi jöoinau hichig nemdam jajaaukꞌampierrta wau kꞌitʌm.
2 Sĩi chi jöoinauta bãau harrmam dʌ̈i hirua jʌ̃aju nemjã tꞌumaa hamach dënjö hajapꞌa wai nʌm.
Maimua ya chi hayau hich meeju nawe hẽsap gaai jaau pʌatarr hag año wai sĩsiewaita ya hichig tꞌʌsĩebapäaiwai hichdëucha kꞌap sĩsiju;
hajapcharan hajap hich jöoipa sĩsiewaima.
3 Maach mʌg Cristo hiek hʌ̈kꞌa nʌm kꞌʌʌnjã hich hagjöta naajim.
Warrcha Cristo kꞌaugju naweran sĩi parhoobam nem maach jöoin hiita hʌ̃rcha kꞌĩir pogkꞌe hʌʌrkꞌaajeejim,
jöoinau chaainag nem jajaaukꞌampierr haajemjö,
mʌgʌmuata chadcha dich peerdʌ haujupii hawi.
Pari mag hʌʌrkꞌa nʌmuata hich hipierraa haawai warag hichta wounjö maach kꞌãai hʌ̃rpai sĩejim.
4 Mamʌ mag wënʌrrʌʌ hawi ya Hẽwandamau hich Hiewaa pʌ̈iju hed haadeewai pʌ̈iwi,
Hẽwandamkꞌa sĩerrta maach tꞌumaam kꞌʌʌn tꞌaabatarrjö chadcha maar meeun hʌʌirau hoowi,
bʌ̃rʌʌ bãaumamua tagam kꞌʌʌnjö mag Moiseeu ley deetarr hʌʌrkꞌa kꞌitʌmua jöoipajim.
5 Pari Hẽwandamau mag hi pʌ̈itarran,
mag leita wounjö jua tꞌeeg sĩerr heemua maach hich hiek hʌ̈kꞌa nʌm kꞌʌʌn peerdʌ haumkꞌĩir hajim;
mag hʌ̈u peerdʌ hatꞌaawai hich Hẽwandamaujã hʌ̈u maach hich chaainkꞌa wai sĩsimkꞌĩir.
6 Mamʌ mag hich chaainkꞌa nʌisimjã maachig kꞌap hamkꞌĩir,
hich Hẽwandamau jũrr hich Chaai Hakꞌaarta pʌ̈ijim maach tꞌãar hee sĩemkꞌĩir.
Mag hi Hakꞌaar maach tꞌãar hee simuata maachigjã Hẽwandamag Haai hichëpiewai chadcha maadëu Hẽwandam maach Haai haajem.
7 Magua hĩs pãar ya tag mag leita hʌʌrkꞌaag kꞌaba nʌm;
pãran hĩsin Hẽwandam chaainau.
Mag hi chaain haawai mʌg hatag pawiajã Hẽwandamau pãar hatꞌee nem wai sim jʌ̃apib kꞌaba jʌ̃apiju.
Judionaan ley hʌʌrkꞌapimaaugau Pabloou chi hʌ̈kꞌa nʌm kꞌʌʌn wawitarr
8 Chadcha warr pãrau Hẽwandam kꞌaugba haawain parhoobam nemta hẽwandam hawi hagʌmʌgta hee haajeejim.
9 Mamʌ hĩs ya pãrau Hẽwandam chaarta hajapꞌa kꞌapꞌʌnaa hich garmuajã pãar kꞌapꞌʌ simta,
¿jãgwi warr pãach narrjö deeu hũwaai magʌm nem maadëu higba sĩi jua tꞌeegjã chukꞌu sĩsidʌmʌgta hee haju hẽkꞌaajẽ?
10 Maimua ¿kꞌan jãgwi deeu hũwaai warrgarmjö pꞌiesta hedjã hʌʌrkꞌanaa,
hedau wahëe nʌm hedjã jãgnaa,
maimua tagam pꞌiesta año gaai waaujerrjã deeu wauju kꞌĩirju nʌ?
11 Jãg hoowaita chadcha pãar hee Hẽwandam hiek jaauwai jãg mʌch pꞌitꞌur chitarrjã sĩi par hajim haju hökꞌö chiraajem.
12 Hermanonaan,
mʌʌn chadcha Judioou;
mag chirab mamʌ ya mʌʌn pãar meeunjöta chirʌm,
tag mʌch jöoin leijã hʌʌrkꞌaba.
Magua muan pãragjã mʌchjöta habat ha chirʌm.
Hoob maar jöoin ley hʌʌrkꞌamiet.
Mua kꞌapꞌʌ chirʌm pãrau mʌ hiek hũrm kꞌõsi hũrju.
13 Pãrau pãachdëujã kꞌapꞌʌ nʌm,
pãar hee nacha mʌchdëu maach peerdʌajem hiek jaauwimaawai,
mor machpawi warag pãar hee chirsierr gaaimuata hʌ̈u pãragjã jaauwi pãrau hũrjierram.
14 Muan jãg mʌch mor machpawi hapꞌʌʌ chirʌmuata Hẽwandam hiek jaau chitʌm hoowi,
pãrau warag mʌch hisegwi pãach heemua mʌch jʌrpʌ̈iju kꞌãijã kꞌĩirju chirajim.
Pari magjã magba,
magju kꞌãai angelnaan hich Jöoiraucha pʌ̈itarrjö wa hich Jesucristota pãach hee barbaimamjö hajierram pãrau mʌ dʌ̈i.
15 ¿Chadcha maagwain pãar honee naabajĩ?
¿Magtarrta jãga nʌ hĩs?
Mua kꞌapꞌʌ chirʌm,
jãagwai maach peerdʌajem hiek mua jaauwi hʌ̈u pãachdëu hũrtarr paar,
honegau pãrau pãach dau jẽu deebaawai hʌ̈u mʌ kꞌĩirdam hinaapai kꞌãijã haju kꞌap hamuan,
magʌmjã haba pãrau chadcha pãach dau kꞌãijã mʌrʌg jẽu deekꞌam.
16 ¿Mag narrta hĩs jãga pãar jãg nʌ?
Pãachdëu jãg deeum kꞌʌʌn hiekta hʌ̈kꞌaag hẽkꞌa nʌmjã hidëu hʌ̈kꞌapiba mua pãach kꞌĩircha mʌg hẽsap gaai hikꞌʌaba mag hiekꞌa chirʌm hawi,
¿pãach hoomapꞌa haawaita mag chirʌm hanʌ́?
Magjã kꞌabam.
17 Jãg pãrag deeum hiekpa jaau wënʌrrʌm kꞌʌʌnan chadcha pãar hatꞌee wʌrpa tꞌʌnʌm,
mamʌ mag nʌmʌn ham hödiin jũrr kꞌĩetta kꞌĩirju sĩsidʌm.
Ham kꞌĩirjugan hamach hiekta pãrau hʌ̈kꞌa pꞌöbaadeewai tag mʌrʌgjã hooba jũrr hamachigta hee hapim kꞌõsi nʌm.
18 Mua mag chirʌm chan mag pãrag ham dʌ̈i kꞌapeerkꞌapimapꞌa haawaijã kꞌabam.
Chadcha pãar dʌ̈i hajapꞌa haagta jãg naakꞌiin hʌ̈uma;
pari mag pãar dʌ̈i hajapꞌa hakꞌiinjã mʌ chukag meerjã hich magta hajupma,
jãg sĩi mʌ pãar dʌ̈i chirʌm dakꞌĩirpai kꞌaba.
19 Chaaina,
chaain chukꞌu chitaawai mʌrʌgan pãarta mʌ chaainau.
Magua pãar hatꞌeyan mʌʌn hʌʌi chaai machkꞌa tꞌʌnʌmjö gaai machaaga chiraajem;
pãrauta Cristo hʌdʌraa pãach gaai tꞌierrpapibam haiguin,
mʌʌn hich mʌg pãar kꞌĩirjuau gaai machag chitaju.
20 Pãar dʌ̈ita hãba jooba chirʌm hakꞌiin hʌ̈ucha hakꞌam,
kꞌĩircha haawai hajapcha jaaupʌ̈pʌ̈ig maag;
mamʌ maach mʌg warp naawai kꞌĩirju chirʌm jãga haju kꞌai.
Mua pöd kꞌaugbam pãrau kꞌani kꞌĩirju nʌm kꞌai,
hich jãg warr pãach wënʌrrarrjö wënʌrraag.
Pabloou Agar Sara dʌ̈i hĩgkꞌamamua jaautarr
21 Pãar har Moiseeu ley werpʌarr gaai nem jaau sim wau nʌmuata pãach peerdʌju hawi hagpierr wau wënʌrram kꞌõsi nʌm kꞌʌʌn:
¿Pãrau chi ley gaai jaau sim hajapꞌa kꞌapꞌʌ nʌmʌ́ hagá mag leígta hee haag?
22 Mag leita hãba hʌʌrkꞌaju kꞌĩirjuju ham hugua pãrag jaaukꞌim:
Makꞌʌʌn libro gaai jaauwai,
jöoi Abrán chaain numí wai sĩejim haajem:
hãb daupeer Agar haajerr hich chogkꞌa wai sĩerr dʌ̈ím maimua hãb hich chog kꞌaba hich hʌʌi chaar Sara dʌ̈ím.
23 Mag hich chog dʌ̈i hootarr chaairan sĩi hich jãg bʌ̃ʌr habarm gaaimua hʌʌin bi hee paajemjö bi hee pawi hootarr hajim haajem.
Pari hich hʌʌi chaar dʌ̈i hootarr chan magba,
chi Sara hich daupeer gurjã pöd chaai hooba harrta hag nawe hich Hẽwandamaucha hamag chaai hoopiju jaautarr haawai hich hiekꞌatarr chadcha hamkꞌĩirta hoopijim hanaabá.
24 Mag hʌʌin numí chaain hootarran,
hich jãg hʌʌinau chaain numí hootarrjö,
Hẽwandamaujã biek numí hõor dʌ̈i hiek deetarrta jaau sim.
Magua mag chi hʌʌi nacha chaai hootarrau,
hajapcharan Agarrauma,
Sinaí durrsĩ gaai Hẽwandamau Moiseeg ley deetarrta jaau sim.
Chi Agarrjã sĩi jöoi Abrán chog harr haawai hag chaain hewagam kꞌʌʌnjã hich magta chikꞌam chogkꞌa nʌisijim.
Maguata hich hagjö hĩchab mag ley gar tꞌaaba nʌm kꞌʌʌnjã,
sĩi chikꞌam chogkꞌa nʌmjö,
mag ley hʌʌrkꞌaagpaita tꞌaaba nʌm.
25 Mag leíuta hõor sĩi hich chognaankꞌa wai sĩewai,
chi ley deetarr durrjã Sinaí hanaa Agar haju haai nʌm,
chi Agarrta mag ley hʌʌrkꞌa nʌmua hag chognaankꞌa nʌm kꞌʌʌn hãd haawai.
Mamʌ hĩs hewagjã judionaanta mag ley hʌʌrkꞌa nʌmua hi chognaankꞌa naawai mag Agar hanʌm chan Sinaí durrsĩpai jaauba,
Jerusalén pꞌöbörpata jaau sim,
jãata judionaan pꞌöbör haawai.
26 Pari Sara sĩi Abrán chog kꞌaba hi hʌʌi chaar harr haawai jãgua jũrr hʌ̃gtꞌarm Jerusalenta jaau sim;
hajapcharan maach tꞌum Cristo hiek hʌ̈kꞌa nʌm gaaimua hʌ̃gtꞌar wëtju kꞌʌʌn hãdkꞌata höbër sim.
Magua hich jãg Sarajã Abrán chog kꞌaba harrjö,
maachjã mag ley hʌʌrkꞌaba nʌm gaaimua hag chog kꞌaba nʌm.
27 Mag Sara maach mʌg hʌ̈kꞌa wëjöm kꞌʌʌn hãdkꞌaju higwi Hẽwandamau hich hiek gaai pꞌãpiewai,
“Pʌʌn chadcha chaai hooba hʌrraawai bʌ̃ʌrjã chaai kꞌierr machag kꞌaugba hʌrrab mamʌ,
hichiita honee habá” hajim.
“Chikꞌamnau jaai kꞌecheu hauwi pʌch happai hʌrrab mamʌ,
jãg pʌch chogkꞌa simta pʌch jaai dʌ̈i sim kꞌãaijã,
pʌʌta hʌ̃rcha chaain kꞌapaana hʌrraju” ha pꞌãpijim. (Is 54:1)
28 Hermanonaan,
magtarr haawaita Sara hiewaa chaar Isá hag nawe hich Hẽwandamau deeju jaautarrjö,
pãarjã hag nawe hich hiiu haawai hich chaainkꞌa hauju jaautarr kꞌʌʌn kꞌabahab.
29 Pãrau kꞌapꞌʌ nʌm,
mag jaar jöoi Abranau mag hich chog Agar hanarr dʌ̈i hamach kꞌĩrau chaai hootarr Ismael haajerrau Sara hiewaa Isá hich Hẽwandam Hakꞌarau hoopitarr dʌ̈i kꞌõinaa kꞌaba haajeejim.
Magua hĩs hewagjã hich hagjöta sim hĩchab:
judionaan ley hʌʌrkꞌaajem kꞌʌʌnau maach hich Cristo hiek chaar hʌ̈kꞌa nʌm kꞌʌʌnagjã hamach dënjö hʌʌrkꞌapiju hẽkꞌaajem.
30 Pari judionaan hawiajã chi mag nʌm kꞌʌʌn chan Hẽwandamau haubaju kꞌap hamkꞌĩir ¿kꞌan ha sĩ Hẽwandam hiek pꞌã sim gaai Saraau hiekꞌatarr higwi?
Mag sim:
“Abrán,
jãg chaai hich hãd dʌ̈i warre maach haigmua jʌrbapʌ̈i” hajim chi Saraau.
“Jã sĩi maach chogkꞌa sim dʌ̈ím chaai haawai jãgua pöd maach chaai dʌ̈i hãba pʌ juagam nem jʌ̃aju kꞌaba sim.
Mʌ pʌ hʌʌi chaarkꞌa hʌm dʌ̈ím chaairauta pʌ juagam nem jʌ̃aju haai simgui” hajim. (Gn 21:10)
31 Hermanonaan,
maguata maach Cristo hiekta hʌ̈kꞌa nʌm kꞌʌʌn chan sĩi mag ley hʌʌrkꞌa nʌmua hag chogkꞌa wënʌrramkꞌĩirta Hẽwandamau hauba harr haawai,
mag sĩi Agar Abrán chogkꞌa sĩerr chaainjö kꞌaba nʌm;
maachin hi chaain hich hʌʌi chaar dʌ̈ím kꞌʌʌnjöta nʌm.