Hẽwandam Hakꞌarau deeum meu hiekꞌapibaawai
14
Keena,
mua pʌaba deeu pãrag jaau chirʌm:
Hãba dich kꞌapeen kꞌa kꞌõsi hajuuta hʌ̃rcha hẽkꞌabat.
Magnaan chadau hĩchab hich Hẽwandam Hakꞌarau dee sim juapajã haum kꞌõsi haju haai nʌm.
Pari bʌ̃ʌrjã hõrau kꞌaugbam meúata hiekꞌaju kꞌãai,
hʌ̃rcha hi hiek deeum kꞌʌʌnag jaau kꞌapꞌʌ haagta pãach gaai wajapꞌa hich jua tꞌeegdam deepim kꞌõsi habat.
2 Deeum meu hiekꞌamamua kꞌãijã hirig jëeumʌn,
nem wajaug sim hĩchab;
pari mag deeum meu hiekꞌa simuan hõrag hũrmkꞌĩirjã kꞌaba,
sĩi Hẽwandamag hũrmkꞌĩirpaita hiekꞌa sim haawai,
chadcha hich Hẽwandam Hakꞌarau kꞌĩirjug wajapꞌam dee sim hawiajã bigaaum kꞌʌʌnau ni hãbmuajã kꞌaugbaju,
kꞌan hata hiekꞌa sĩ.
3 Mag kꞌãyau Hẽwandamau hich hiek jaaupi simta jaau nʌrrʌm wounaun chadau chadcha warag bigaaum kꞌʌʌnpata Hẽwandam Hiek gaai ham kꞌĩirjugdam bãaupiwia,
ham kꞌĩirjã honee hapinaa hĩchab ham wawijã wawí sim.
4 Pari magba deeum kꞌʌʌnau magʌm meu kꞌaugbag haigta hamag hũrpimaaugaujö deeum meúata hiekꞌa simuan sĩi hichigpaita wir haig jaau sim.
Mamʌ Hẽwandamau hich hiek jaaupitarrta jũrr hõrag hũrmkꞌĩir jaau nʌm kꞌʌʌnaun chadau chadcha tꞌumaa chi hʌ̈kꞌa durrum kꞌʌʌnta warag Hẽwandam hiek kꞌaugpi nʌm.
Mag hamau nem kꞌaug paaukꞌamam haig warag hag hiek gaaita ham kꞌĩirjugjã bãaukꞌa wëtum.
5 Mʌrʌgan pãach tꞌumaam kꞌʌʌnau deeum meu pãachdëu kꞌaugbam kꞌãijã hiekꞌakꞌiin hʌ̈u sim.
Pari mua hoowai Hẽwandamau hich hiek jaaupi sim jaau nʌmta wajapcha sim,
sĩi jãg dëgölp deeum meúa hiekꞌa nʌm kꞌãaijã.
Mag hiekꞌawiajã pari warm kꞌʌʌnag kꞌapꞌʌ hamkꞌĩir deeu ham meúa jaaumʌn hʌ̈u sim,
Hẽwandamau mag hiekꞌapitarr tꞌumaam kꞌʌʌnag kꞌakꞌapdö hamkꞌĩir.
6 Pãrau hoowai mʌch kꞌãijã pãar haar mawia sĩi deeum meu pãrau kꞌaugbamuata pãrag hiekꞌabaimakꞌiinjã,
“¿Kꞌani jaau simʌ mag sĩma?”
haju pãrau.
Mamʌ pãrag wajapꞌa kꞌap hamkꞌĩran,
pãar meúata jaauju haai chirʌm:
Hẽwandamau pãrag hich hiek jaaupitarr,
wa mʌg hatag hirua maach dʌ̈i haju,
wa Hẽwandam kꞌĩirjug kꞌãijã kꞌĩir pogkꞌe jaauju haai chirʌm.
Magan chadau pãrau kꞌapꞌʌ nʌisiju,
pãach meúa haawai.
7 Pãrag deeum ejemplo jaaukꞌim:
Karris kꞌãijã wa guitarra kꞌãijã siirwai,
siir meraa haawai sĩi hö hʌ̃ʌrbaajã chukꞌu sirkꞌiin,
jãga kꞌap habarju kꞌanta sir sĩ.
Pöd kꞌaugbaju.
8 Wa soldaaun kꞌãijã juurhi hee wërbʌan wëtum haig chi trompeta sir simua wajapꞌa hö hararaa sirba hakꞌiin,
jãga tꞌumaam kꞌʌʌnau kꞌapꞌʌ haju mag sirbarmuapai hamachig “Haudimat” ha jaaubarm.
9 Pãarjã hĩchab hich hagjöta tꞌʌnʌm.
Pãrau kꞌãijã deeum kꞌʌʌnag hiekꞌaawai hamau kꞌaugbam meúata hiekꞌamʌn,
jãga hamau kꞌapꞌʌ habarju hamachig hiekꞌa nʌm.
Par sĩi jãgan paagta hiekꞌa nʌmjö hokꞌoppꞌa nʌisiju.
10 Mʌg durr gayan meu kꞌapan kꞌĩir pogkꞌe tꞌʌnʌm.
Chi meu kꞌʌʌnagan meu wajapꞌamma,
hamach meu haawai,
maimuajã hamach hiekꞌamam tꞌum kꞌapꞌʌ nʌm.
11 Pari mag tꞌʌnʌm heemua hãb kꞌãijã bëewia mua hi meu kꞌaugba chitʌmta mʌrʌg hich meúa hiekꞌachëkꞌiin,
mua pöd kꞌaugbaju.
Mag chan pöd hiyʌ̈ʌ habam,
ni hãbmuajã chikꞌam meu kꞌaugba haawai.
12 Magua mua sĩi hiekkꞌõrjã kꞌaba mag chirʌm:
Pãrau jãg Hẽwandam Hakꞌarau hich jua tꞌeeg dee sim haum kꞌõchag tꞌʌnʌmʌn nem wajaug sim.
Mamʌ chi wajapcharamta paarpam kꞌõsi habat,
har pãachdëu hoowai hagua hʌ̃rcha chi hʌ̈kꞌa durrum kꞌʌʌn tꞌumaa kꞌĩir honee hapijöjöom.
13 Hãbmua kꞌãijã hich meu kꞌaba deeum meúata hiekꞌaajem hag jua tꞌeeg wai sim kꞌai,
magan hagjö hich Jöoirag jëeuju haai sim,
mag hichdëu hiekꞌabarm hiekpai haig hũr nʌm kꞌʌʌnag deeu ham meúa jaaujem hag jua tꞌeegjã hichig deemkꞌĩir.
14 Hẽwandamag jëeu chirʌm haig mua sĩi parhooba deeum meúata jëeukꞌiin,
mʌ hakꞌaraun chadcha Hẽwandamag jëeu jöchkꞌërama.
¿Pari mag sim mʌch chi hʌ̃rʌmua mʌchdëu hiekꞌatarrjã kꞌaugba habaawaijãh?
15 Magbaawai ¿jãgajuma?
Magbaawai mag deeum meúa jëeumam dʌ̈i jũrr haig dich hiek hũr nʌm kꞌʌʌnag jaau kꞌapꞌʌ jawaag hagjö Hẽwandamag dichig jaaupima,
jũrr ham meúa hamag kꞌap hamkꞌĩir jawaag.
Meukꞌaar kꞌãijã hagjö bʌ̃ʌrjã hõrau kꞌaugbam meúata mag hau dichtarr kꞌai,
hich hagjö ham meúata hamag jaauma,
kꞌap hamkꞌĩir.
16 Mag ham meúa kꞌaba sĩi deeum meúata Hẽwandam tꞌö hiekꞌamamua jëeukꞌiinjã,
jãga pua hiekꞌa simjã kꞌaugba haawai haig durrum kꞌʌʌndamau pʌ hipierr dʌ̈i hich magau habarju.
Hamau pöd magbaju,
pʌ hiekꞌamamjã kꞌaugba haawai.
17 Par pua nem wajaug hũrihmʌ jëeumaju;
pari mag sim haig chan bʌ̃ʌrjã bitꞌurgam kꞌʌʌndam Hẽwandam hiek gaai kꞌĩirjug bãauba,
hich magpai bʌ̃ʌrjã hũrba harrjö durrum.
18 Mua chadcha Hẽwandamag hʌ̈u hajim ha chirʌm,
mʌchdëu hirig jëeu chirʌm haig mʌchdëuta pãar kꞌãaijã hʌ̃rcha deeum meúa hiekꞌaajeewai.
19 Mag chitab mamʌ,
kꞌapanag hee chirʌm haiguin,
hiek pöm kꞌaba hawiajã,
tꞌumaam kꞌʌʌnag mʌch hiekꞌa chirʌmjã kꞌapꞌʌ hapim kꞌõsita chitʌm,
sĩi mʌch happai hiekꞌa chirʌʌ habarmjã ham meúa kꞌaba haawai hiwiram hãbmuajã kꞌaugba hich mag höbërpimaaugau.
20 Cristo gaaimua kꞌodamnaan,
mʌg mua jaau chirʌm kꞌap haag hoob sĩi chaaindamjö kꞌĩirjug meraa hamiet.
Magarrau nem kꞌaigbam wawaagan chadau warag wauju kꞌaugba haju haai nʌm,
chaain daumeraa haawai nem wauju kꞌaugba haajemjö.
Pari Hẽwandam Hakꞌaar jua tꞌeegau nem kꞌĩir pogkꞌe waupiejem heem chi wajapcharam kꞌap haagan,
chadcha jöoin kꞌĩirjugjöta habat,
wajapꞌa kꞌĩirjuag.
21 Kꞌĩir heyaa habat jãga Hẽwandamau warrjã maach jöoin israelnaan hichdëu hamach castigaa sim kꞌap hamkꞌĩir deeum kꞌʌʌnag hamach meúata hamag hiekꞌapijĩ.
Hag hiek higwia Hẽwandamau hich hiek pꞌã sim gaai,
“Jãkꞌʌʌn wounaanau mʌ hiek hʌ̈kꞌaba harr haawai jũrr deeum kꞌʌʌnagta mua ham durr kꞌechtꞌʌg haupiwi hamach meúata jũrr chi durr kꞌʌʌnagjã hiekꞌapiju” hajim,
“mag hoobaawai hamach kꞌaibag hisegamkꞌĩir.
Pari par mag deeum durram kꞌʌʌnau hamach dʌ̈i magbarmjã hʌ̈kꞌabaju” ha pꞌã sim. (Is 28:11-12)
22 Magua,
hĩs hewagjã mag hõrau meu kꞌaugbam hiekꞌa nʌmuata chi hũr nʌm kꞌʌʌnag Hẽwandam hiek hʌ̈kꞌapiju haju kꞌaba nʌm.
Magarrau Hẽwandam hichdëucha hich hiek jaaubarmta jũrr tꞌumaam kꞌʌʌnag hũrmkꞌĩir ham meúa jaau nʌmuan chadau hʌ̈kꞌaba nʌm kꞌʌʌnaupa hʌ̈kꞌam kꞌõsi hʌ̈kꞌaajem,
hajapꞌata hũr naawai.
23 Pãadë kꞌĩirjubat:
Hẽwandam hiek hʌ̈kꞌa durrum kꞌʌʌn tꞌumaa hãbam haig biirdʌnaa,
tꞌumaam kꞌʌʌnau deeum meúata hiekꞌa tꞌʌnʌmcha kꞌãijã hãb bʌ̃ʌrjã Hẽwandam hiek hʌ̈kꞌaba sim dubchëwia mag hoobaicheewaijãh,
kꞌan habarju hirua.
Par jãgan hirua,
“¡Hih!
parhooba dubwia sĩi hõor pöm lökie tꞌʌnʌmjã hoobarm” hawia warag hʌ̈kꞌab sĩsiju.
24 Pari magba sĩi pãach tꞌumaam kꞌʌʌnag Hẽwandamau jaau simta jũrr hõrag jaau nʌmcha kꞌãijã hãb Hẽwandam hiek hʌ̈kꞌaba kꞌitʌm dubchëwia mag hũrbaicheewai,
hirua tꞌumaa hãsie hich mor hewag kꞌĩirjuwia,
“Chadchata mʌʌn pekau pöoma chirʌm” haju,
hich jʌ̃gdaar mag pãrau jajawagmam hũrwia.
25 Mag hamachdëu hi hoojã hooba haajemta wajapꞌa hi hoojem kꞌʌʌn dënjö hichigcha jaaumam hũrbaawai kanieu tꞌʌkꞌöonaa,
“Chadcha Hẽwandam ham dʌ̈i sĩewaita mʌg tꞌʌnʌm” hawia,
dʌ̈i hamach paarmua Hẽwandamag jëeuju.
Pãach nem hiinwai wajapꞌa hoonaata hinbat
26 Ya hãbmiecha paawai mua pãrag magkꞌim:
Har hãba kꞌapanaa biirdʌnaa Hẽwandamag jëeuwai,
hãaur kꞌʌʌnau meukꞌaar hauju haai nʌm;
maagwai hãaur kꞌʌʌnau Hẽwandam hiek gaaimta jaau nʌmua hõor wawiju haai nʌm;
maagwai hãaur kꞌʌʌnau hich Hẽwandamaucha hamachig jaaubarm hiekta jũrr deeum kꞌʌʌnag kꞌap hapiju haai nʌm.
Tagam kꞌʌʌn deeum meúa kꞌãijã hiekꞌaju haai nʌm;
maagwai warm kꞌʌʌnau jũrr makꞌʌʌnau deeum meúa jaaubarmta tꞌumaam kꞌʌʌnag hũrmkꞌĩir jaauju haai nʌm.
Mamʌ mag nem hin nʌmjã,
dich happaita honee haag kꞌaba,
tꞌum haig nʌm kꞌʌʌn Hẽwandam dʌ̈i warag hubʌ hapiegta mag wauju haai nʌm.
27 Pãach meu kꞌabam hiekꞌaju hawiajã hiekꞌaju haai nʌm.
Pari numpai wa tꞌãrjuppai kꞌãijã hãhãbdö hiekꞌamamuata hiekꞌaju haai nʌm,
sĩi tꞌum sereuba.
Mag deeum meúa hiekꞌabarmjã hichiita jũrr hãbmua jaaub kꞌaba jaauju haai sim ham meúa,
tꞌumaam kꞌʌʌnag hũrmkꞌĩir.
28 Mag kꞌapan tꞌʌnʌm hee ni hãbmuajã mag warm kꞌʌʌnau deeum meúa hiekꞌa nʌm jaauju chukꞌum chan,
magan warag bʌ̃ʌrjã deeum meúa hiekꞌaba,
sĩi pãach hödegpaita hiekꞌabat,
pãachdëu Hẽwandam dʌ̈imuapaita mag pãach hiekꞌabarm kꞌap haag.
29 Wa magba sĩi Hẽwandamau pãachigcha jaaubarm hiekta jũrr hõrag jawaag wai nʌm kꞌai,
hagjö numpai kꞌabamʌn tꞌãrjuppaita hiekꞌaju haai nʌm.
Maagwai tagam kꞌʌʌnau sĩi kꞌĩuu hũrwia jaauju haai nʌm,
chadcha Hẽwandam Hakꞌarauta mag hiekꞌapi sĩ,
wa sĩi hich kꞌĩirjug heepaimuata mag hiekꞌa sĩ.
30 Pari mag hagtꞌa warm hiekꞌa sim hee,
deeum haig simʌg kꞌãijã hĩchab hich Hẽwandamau hich hiek jaaumkꞌĩir jaaumʌn,
magan chi nacha hiekꞌa sĩerr hiekꞌa höwia jũrr magʌg hiekꞌapiju haai sim.
31 Mag hãhãbdö hiekꞌamamuata tꞌum chi Hẽwandamau hich hiek jaaupi nʌm kꞌʌʌn hiekꞌa höju haai nʌm,
haig durrum kꞌʌʌndamag kꞌaugpiwia hĩchab kꞌĩirdam honee durramkꞌĩir.
32 Chi mag Hẽwandamau hich hiek jaaupibaawai jaau nʌm kꞌʌʌnaun wajapꞌa kꞌapꞌʌ haju haai nʌm,
hamach parhooba sereuba sĩi hãhãbdöpaita hiekꞌamaju haai nʌm.
33 ¿Jãgwia mag chirʌ́?
Sĩi jãg nem parhooba hamachdëu hampierr haawai Hẽwandamau kꞌõchkꞌaba haajeewaita mag chirʌm.
Hẽwandam chan hoob magʌm heem kꞌabam.
Hiruan hagpierraanaa kꞌõinaata wënʌrrapiejem.
Jãg tagam kꞌʌʌn chi hʌ̈kꞌa durrum kꞌʌʌn iglesia hee haajemjö,
34 hʌʌinan culto hee paawai sĩi kꞌĩuuta hũr hohoodö haju haai nʌm.
Ham,
hemkꞌooin hijẽjẽbkꞌam hee dʌ̈i hiekꞌaju kꞌaba nʌm,
hich Hẽwandam hiek pꞌã sim gaai jaau simjö,
ham sĩi hamach jaai jua heegarpai kꞌitꞌëem haawai.
35 Hemkꞌooinau culto hee nem jaau nʌm wajappai kꞌaugba haawai wajapcha kꞌap haag jëeum kꞌõsi nʌm kꞌai,
di haar pawia hamach jaainagta jëeuju haai nʌm.
Magba jãg culto hee hʌʌin hijẽjẽb haawai hʌ̈u kꞌaba sim.
36 Pãrau jãg deeum iglesia hee haajemjö kꞌaba,
sĩi pãachdëu ham haig nem waauwai,
¿pãachdëuta nacha Hẽwandam hiek hompaa haujimpii nʌ?
¿Wa pãachdëupaita mag Hẽwandam hiek kꞌapꞌʌ nʌwa?
37 Pãar hee hãb sĩi hich hiiupai kꞌãijã Hẽwandamau hichig jaaubarm hiek jũrr hõrag jaaujem hag jua tꞌeeg paraam ha sim kꞌai,
wa deeum jua tꞌeeg Hẽwandam Hakꞌarau deetarr kꞌãijã wai sim ha sim kꞌai,
magua tagam kꞌʌʌn kꞌãaijã kꞌapcha haju haai sim:
muajã hich hãbam Hẽwandam Hakꞌaraupai mʌchig jaaupitarrta jaau chirʌm.
38 Pari hĩchab hãbmua kꞌãijã mua nem jaau chirʌmjã chad hamapꞌa sim kꞌai,
magan hoob “Jã chan Hẽwandamauta hich hiek jaaupi simʌu” hamiet.
39 Cristo gaaimua kꞌodamnaan,
magua mua mag chirʌm:
Hẽwandamau hich hiek pãachigcha jaaubarm jũrr hõrag jaaujem hag jua tꞌeegta pãachig deepim kꞌõsi habat,
hi hiek hõor jʌ̃g heyaa jawaag.
Pari mag hawiajã hoob,
“Deeum meu chan hiekꞌaju kꞌaba sim” hamiet.
40 Deeu pʌaba pãrag jaau chirʌm:
Mag nem waauwaijã sĩi parhooba pãachdëu hampierr haba,
hagpierraata haajeetꞌʌ̃.