Pablo Malta morr gaai pꞌẽeubatarr
28
Mag dö hee hö jʌjʌr nʌʌ hawi durr paaukꞌaau,
hõrau marag jaauwai mag morr Malta ha tꞌʌ̃ʌrjem hanaajim.
2 Mag maar durr paaukꞌabaadeewai mag morr gayam kꞌʌʌn hö hajaug sĩi maar hamachig baarpi hauwi bʌ̃ʌrjã maar chig habajierram.
Hante noseg chë sĩerrau maar jĩchkꞌa narr haawai hamachdëu hõtdau hörwi hamach haig maar tꞌʌ̃r haujierram,
hẽt kꞌãaimkꞌĩir.
3 Magbaawai Pabloou warag ham juapierr hõtdau huu hapʌ̈yaag hawi,
papiu pochag bëewi,
hõt hee wërppʌ̈ichëjim.
Mamʌ mag hirua hõt hee chi papiu wërpbapäaiwai nemkꞌõrta hõt heemua pꞌipꞌichag höbërwi sĩi hi jua gaai jiir jopbaichëjim.
4 Chi durr kꞌʌʌnau hamach daúa mag nemkꞌõrta hi jua gaai jiir jopbaichëm hoobaawai hamach happai,
—Keena,
pãadë hoobat.
Jãgan jãg wounan hõor tꞌõomieuwai.
Maguata pꞌũas heemua peerdʌtarrjã,
hagtꞌa pʌaba,
Hẽwandamau hi dʌ̈i jãjãgkꞌam.
Hich hiiuta juau hi dʌ̈i jãg sĩebahaba hanaajim.
5 Mamʌ mag hich jua gaai jiir jopbaicheewai sĩi warag hõt hee jĩpꞌëpʌ̈iwi,
bʌ̃ʌrjã chig haba,
kꞌaaba harrjö hich mag sĩsijim.
6 Mag hi jua gaai jiir jopchëtarr haawai hamaun jua pöm hörrbaadëjupii naajim,
wa magbam kꞌai sĩi chi meem kꞌãijã dëgölp bäjä haimajupii naajim.
Mamʌ hamachdëu hoowai magtarr haigmua ya dʌ̈rrʌ̈ʌ haadëmjã bʌ̃ʌrjã chig haba habaawai jũrr hamachdëupai hũmaai,
—Keena,
jã chan hõor parhoobam kꞌabam.
Jãan jãgan Hẽwandamta jãg nʌrrʌmwai hapꞌöbaadëjim hi higwia.
7 Mag Pablo jua gaai nemkꞌõr jiir jopchëtarr haigmua dakꞌa mag morr gaai chi tꞌetꞌecharam jöoi Publio hanʌm dën jẽb pöm tꞌʌnaajim.
Mag jöoirau maar hich di haar pꞌë harrwi kꞌãai tꞌãrjup sĩi par maar jãhog wai sĩejim.
8 Maagwai hich Publio haai mor mas sĩejim.
Jöointa kꞌʌʌu tꞌʌnʌm dʌ̈i hĩchab bagpata jʌ̈ chë kꞌërajim,
jʌ̈kꞌaa nʌmua.
Magbaawai Pablo hi haar mawia hi kõit Hẽwandamag jëeumamua hi hʌ̃r hich jua hausĩubaawai warre monaau sĩsijim.
9 Pabloou mag jöoi monaaubapʌ̈im tagam kꞌʌʌnau hũrpꞌöbaadeewai,
tag deeum kꞌamor machag paraa harr kꞌʌʌnjã hich haig bëemarr kꞌʌʌnan tꞌum Pabloou monaaupʌ̈i maajeejim.
10 Mag mor mas sĩsid harr Pabloou monaautarr kꞌʌʌnauta marau nemdam hig nʌmjã tꞌumaa marag hau dedee haajeejim.
Maimua ya maar wëtaagpaawaijã barco hee marau nemdam higju tꞌumaa kꞌĩirjunaa pꞌëdeejierram.
Pablo Roma bartarr
11 Maar maig nʌm hee hich mag Malta pꞌʌram gaai hĩchab barco hãb sĩejim,
hedau kꞌõrg tꞌʌnʌm kꞌurau pöd maju kꞌaba haadeewai haig döchʌumie nʌ narr kꞌʌʌn dën.
Mag barco kꞌẽu gaai hamach hẽwandamnaan Cástor hanʌm dʌ̈i hãb hagjö Pólux hanʌm kꞌĩirkꞌa wau sĩejim,
pa dën.
Hich ma,
Alejandría pꞌöböröm hajim,
chi barco.
Ya maar mag pꞌʌram gaai hed tꞌãrjup nʌm hee,
mag barco mam haadeewai mag hee maar wëtjim.
12 Mag hërëubaadëwi,
pꞌöbör Siracusa hanʌm barwi,
kꞌãai tꞌãrjup naaimajim mag pꞌöbör hee.
13 Maigmua dö higaau pꞌʌʌrdʌ wëtumua jũrr pꞌöbör Regio hanʌm naaimajim.
Hag noram döjãrr paaukꞌabaadeeu,
hʌ̈u marmua badag pꞌũ wë tꞌʌnʌisierr haawai,
kꞌãai numiim hee deeum pꞌöbör Puteoli hanʌm barimajim.
14 Mag pꞌöbör hee hĩchab maach Pör Jesús hiek hʌ̈kꞌa nʌm gaaimua maach kꞌodkꞌa durrum kꞌʌʌnpa tꞌʌnarr haawai hamach haig maar tꞌʌajim,
hamach dʌ̈i seman hãb naamkꞌĩir.
Magbaawai chadcha ham haig maar seman hãb naawi ocho diam gaaita Romaag wëtjim,
jũrr bʌ̈ʌu,
maach barco pʌawi.
15 Mamʌ Jesús gaaimua maach kꞌodnaan Roma pꞌöbör heem kꞌʌʌnau ya maar hamach haar wëtum hũr wai narr haawai hãaur kꞌʌʌnau maar kꞌĩirpꞌee pꞌöbördam Apio hanʌm heem merrkau hee maar nʌ naajim.
Maagwai tagam kꞌʌʌnau jũrr dakꞌapai Las Tres Tabernas hanʌm haig naajim,
hagjö maar nʌawai.
Mag maach kꞌĩirpꞌee hoon wëttarr kꞌʌʌn dʌ̈i tꞌẽubaimaawai Pabloou Hẽwandamag hʌ̈u hajim hawi honee haadëjim.
16 Mag wëtumua ya Roma paaukꞌabaimaawai chi capitán ham pꞌë harrtarrau jũrr haiguim cuartel hee chi pörkꞌa simʌg warre presonaan tꞌum pꞌëdeeimajim.
Mamʌ Pabloog cárcel deg sĩepiba,
sĩi hich di kꞌĩetta soldaaun hãbpaimʌg hoo paraa hapijim.
Tꞌetꞌemnaanag Pabloou Hẽwandam hiek jaautarr
17 Pabloou hich Roma bartarr kꞌãai tꞌãrjupnaa,
judionaan chi tꞌetꞌem kꞌʌʌn tꞌum tꞌʌ̃rkꞌʌʌipʌ̈ijim.
Mag tꞌʌ̃rkꞌʌʌipʌ̈iwi hãba naaicheewai hamag magjim:
—Keena,
pãarjã judionaan haawai mua pãrag jaaukꞌimgui hajim:
Mʌ chan mʌg chitʌm haig bʌ̃ʌrjã maach meeun hiwiir hãbam dʌ̈ijã kꞌaigba kꞌaba,
ni maach jöoin hi higwiajã kꞌaigba hiekꞌaba chitʌm.
Mʌ mag chitʌmta sĩi mʌ hëugar sëukꞌa nem hĩgkꞌawi Jerusalén pꞌöbör hee soldaaun Romapienag mʌ pʌr deejierramgui hajim.
18 Mag ya mʌ hamach jua hee pabaadeewai makꞌʌʌnau wajapꞌa mʌrʌg jëeumajierram,
mag jëeumamua murua nem kꞌaigba wautarr kꞌãijã kꞌaug hatꞌaawai mʌ tꞌõopäaig.
Mamʌ par mag wajapꞌa jëeu buburrkꞌamjã,
mʌ mag chadcha nem kꞌaigbam wauba chirarr haawai,
hamach hap hamuan mʌ pʌapʌ̈im hig naajimgui hajim.
19 Mamʌ mag nʌm hee maach meeunaupaita hidëu mʌ pʌapʌ̈ipiba,
warag mʌ tꞌõopi jaaubaawai,
mua maigpai mʌch tꞌõopiba,
warag emperadorragta mʌch tꞌõopiju hawiajã mʌ dʌ̈i hichdëu kꞌap haju haai simgui hajim Pabloou hich jaaumamua.
Mag jaaumamua,
hamau hamach garmua mʌ dʌ̈i magjieb mamʌ,
mʌch garmua chan mua bʌ̃ʌrjã maach kꞌapeen judionaan hëugar nem kꞌaigba jaaujujã chukꞌu chirʌmgui hajim.
20 Mua chadcha pãar tꞌʌ̃rkꞌʌʌitarran,
pãar dʌ̈i kꞌĩircha hoonaa hiyʌ̈ʌmamua magʌm tꞌum jawaagta pãar tꞌʌ̃rkꞌʌʌipʌ̈ijimgui hajim.
Magnaa,
Hĩchab kꞌapꞌʌ habat hajim keena:
Pãrau mʌg mʌ caden jua paraa hoo tꞌẽu chirʌm hoo nʌmʌn,
jãan chadcha warrgarwe maach jöoinau nʌajerr woun chadcha bëewi hag hiek hʌ̈kꞌa chitʌm gaaimuata hamau mʌ mʌg wai nʌmgui hajim Pablooupai hichdëu Cristo hiek hʌ̈kꞌa sĩerr jaaumamua.
21 Magbaawai mag judionaan chi tꞌetꞌemnaan haig narr kꞌʌʌnau hirig magjierram:
—Ni hãbmuajã hẽsapdam pꞌãnaa magʌm haarmua maachig jaaupʌ̈iba haawai marau chan bʌ̃ʌrjã pʌ mag nʌrrʌm kꞌaugba nʌmgui hajierram.
Ni maach meeun haarmua bëe nʌm kꞌʌʌnaujã pʌ hëugar maach jʌ̃gaag kꞌaba jaauchë nʌmjã marau bʌ̃ʌrjã hũrba nʌmgui hajierram.
22 Maraun pʌchdëuchata maachig hũrpim kꞌõsi nʌm,
kꞌan hiekta pua jaau chitʌ́,
maachdëucha kꞌap hũraag.
Maumua marau hũurjemʌn,
mag jãg Nazaretpierr higar hʌ̈kꞌa nʌm kꞌʌʌnan mag durrpierram kꞌʌʌnau ham hëugar kꞌaigba hiekꞌaajem hanʌmta marau hũurjemgui hajierram hirig.
23 Maimua hamach garmua Pabloog deeu hũmaai hi haig bëeju ha jaautarr haawai,
mag hamach bëeju harr hed hãspa hëebaadee,
hõor kꞌapan hi jẽer sim di haig pos haichëjim.
Mag hich haig hõor pöm pierrwai hedaupꞌerr garwe jaaubaaderr kꞌĩeb kꞌeeurpamaa hajim,
jãga Hẽwandamagta maadëu hʌdʌraa dich Pörkꞌapiju haai nʌ ha jaau simua.
Mag jaau simua Hẽwandamau hich hiek Moiseeg pꞌãpitarr gaaim hiek jaaunaa hĩchab warrgar Hẽwandam hi jaaumienau pꞌã pʌarr gaaim hiekpa jaaumamua Jesús higar hʌ̈kꞌapi hauju hẽkꞌaajeejim.
24 Hãaur kꞌʌʌnaun mag hirua jaaumam hʌ̈kꞌajierram,
mamʌ tagam kꞌʌʌnau chan hʌ̈kꞌabajierram.
25 Mag hö hãba kꞌaba,
hãaur kꞌʌʌnau hʌ̈kꞌanaa tagam kꞌʌʌnau hʌ̈kꞌaba haadëpꞌʌm gaaimua,
warag kꞌĩeb hërëumaawai Pabloou hamag magjim:
—Jãg mʌgju kꞌapta chadcha Hẽwandam Hakꞌarau warrgarwe jöoi Isaías kꞌararrag jaaupibaawai pãar higwia maach jöoinag,
26 “Jãkꞌʌʌnag mʌ hiek jaaubamí” hajim hich Hẽwandamau.
Maimua hichdëupai jaaumamua,
“Muata hamag mag jaaupʌ̈i chirʌm habá” hajim:
“Par pãrau mʌ hiek hũr nʌmjã kꞌaugbaju;
mʌ jua tꞌeeg hoo nʌmjã hoobamjöta haju.
27 Pãran tꞌãar tꞌeegta sĩsidʌm,
sĩi kach hee tꞌërp pꞌʌʌikꞌanaa daujã pꞌãarjʌ̃ sĩsidʌmjö naawai.
Par pãrag nem jajaaukꞌamjã hũrmapꞌa,
ni hʌ̈kꞌajã hʌ̈kꞌamapꞌa nʌm.
Par pãrag mʌch jua tꞌeeg hoopi chirʌmjã bʌ̃ʌrjã kꞌaug haubamjöta nʌm.
Magua mʌrʌg pãach kꞌaibag chugpaamkꞌĩirjã mʌ higba nʌm” ha jaaupijim hich Hẽwandamau. (Is 6:9-10)
28 ’Magtarr haawai mʌg pãachdëu hʌ̈kꞌaba habarm gaaimua,
warre kꞌapꞌʌ habat hajim Pabloou:
Hĩsmua hatag Hẽwandamau judionaan kꞌabam kꞌʌʌnagta mʌg maach peerdʌajem hiek jaaupi sim,
hamjã peerdʌju haai hamkꞌĩir.
Mag hamachig jaaubaawai hamaun chadcha hʌ̈kꞌajugui hajim.
[
29 Mamʌ Pabloou mag hiekꞌabarm judionaanau hamach jʌ̃gʌucha hũrbaawai,
hamach wir haigpai sereu pꞌöbaadëwi warag hërëubaadëjim.]
30 Magtarr haigmua año numí hëntër Pablo hich mag pꞌöbör hee sĩejim,
hich di alquilaa hautarr hee.
Mag ya hich dikꞌa wai sĩewai hich haig hõor bëewaijã tꞌumaa warag hierrag dubpiwi
31 hamag jaaujeejim,
jãga hamaujã Hẽwandamagta hʌdʌraa hamach Pörkꞌapiju haai nʌ.
Mag jaaumam dʌ̈i hĩchab maach Pör Jesucristo hiekjã tꞌumaam kꞌʌʌnag wajapꞌa jaaujeejim.
Mag hirua nem jaau sim tag jaaupimaaugau hawijã ni hãbmuajã hirig magʌm haba haawai hichdëu jaaum haig jaaujeejim.
Magta maach peerdʌajem hiek warag haaidʌmajim,
durrpierr.