Miletomua Pablo Jerusalenag matarr
21
Mag Miletomua Efesopie jöoin chi pörnaan pꞌëpʌawia döjãrr paaukꞌabaadeeu sĩi marau kꞌajappꞌa döjãrr morrdam Cos hanʌmʌg hërëubaadëjim.
Maigmua hag noram sĩi hich maigpaimua tꞌʌadʌ deeum pꞌʌram Rodas ha tꞌʌ̃r sim gaai barwia,
mammua jũrr döhieg pꞌʌʌrpꞌeeu,
Pátara hanʌm barjim.
2 Mag pꞌöbör Pátara hanʌm jerag barco hãb wëjöm marau hooimajim,
Fenicia durr mam hanʌm.
Magbaawai marau hag hee waaidʌwia döjãrr paaukꞌabaadëjim.
3 Mag wëtumua kꞌodjörröo hawia döjãrr morr dʌ̈rrcha sim Chipre hanʌm döjãrrmua hoo dichjim.
Ma,
maar juawë gar tꞌʌbajim.
Mag wëtumua warag Siriaag wëtjim.
Mamʌ mag maar wëtum barco heem nem hãaur Tiro pꞌöbör hee pʌaju hatarr haawai mam dubimajim.
4 Mag pꞌöbör hee chi hʌ̈kꞌa durrum kꞌʌʌn haar wëtwi ham dʌ̈i maar siete días naaimajim.
Hich maig mag chi hʌ̈kꞌa durrum kꞌʌʌnag Hẽwandam Hakꞌarau jaaubaawai jũrr hamachdëu Pabloog Jerusalenag mapiba jaaujim.
5 Mamʌ par mag mapiba jaau nʌm hãba,
seman hãb dichdimam hee maar wëtaagpajim.
Mag maar wëtum haadeewai Hẽwandam gaaimua maach kꞌodkꞌa nʌm kꞌʌʌn tꞌum hamach hʌʌin dʌ̈i hamach chaainpa pꞌöbör higaau jër maar hoopäain bëejim.
Maig jër mosjã hee pachëwi,
maach tꞌum jĩepör pꞌõbkꞌanaa,
Hẽwandamag jëeujim.
6 Mag Hẽwandamag jëeuwia,
tꞌumaam kꞌʌʌn dʌ̈i hagdaujö hayoo hayoo naawi,
marau maach wëtju barco hee waaidʌtkꞌabaadeewai hamachjã hĩchab hamach diig durr paaukꞌabaadëjim.
7 Maimua ya hãbmiecha tag pꞌũas jẽmerbaju hatꞌee,
mag maach narr pꞌöbör Tiro hanʌm haigmua jap hee paaukꞌawia,
Tolemaidaag wëtwi,
barwi,
haig chi hʌ̈kꞌa durrum kꞌʌʌn dʌ̈i saludaawia,
warag ham haig kꞌãaim hãb hëntër kꞌëujim.
8 Noram haigmua hërëubaadeeu pꞌöbör Cesarea hanʌm barwia woun jöoi hãb maach peerdʌajem hiek jaaumie Felipe hanʌm di haar wëtjim.
Warr hich mag Felipe,
iglesia heem chi pörnaan juag hoojem kꞌʌʌn siete narr heem hajim.
9 Hich mag jöoirau chaain hʌʌin happai chi daupeen jayap wai sĩejim,
Hẽwandam hi jaaumien.
10 Mag Felipe di haig maar kꞌãaidam kꞌapancha kꞌaba nʌm hee,
Judea durrmua woun hãb hagjö Hẽwandam hi jaaumie Agabo hanʌm bëejim.
11 Mag bëewia,
maar dakꞌĩir Pablo hãi jʌ̃ajem hauwia hagua jũrr hich bʌ̈ dʌ̈i hich juapa jʌ̃pʌ̈inaa,
—Hẽwandam Hakꞌarau mʌrʌg jaauwai mʌgta jʌ̃ hauju haajemgui hajim chamʌg hãi jʌ̃ajem pap,
Jerusalén pꞌöbör hee judionaanau.
Mag jʌ̃naa jũrr judionaan kꞌaba,
durr chaauram kꞌʌʌnagta sĩi pʌr deeju haajemgui hajim Agaboou.
12 Maach jʌ̃gʌucha mag hũrbaawai Cesareapien dʌ̈imua marau Pabloog Jerusalenag mapiba jaau naajim.
13 Mamʌ mag mapimapꞌa nʌm hee,
jũrr hich Pabloou marag magjim:
—¿Kꞌantꞌeeta jãg pãar dauhi paar tꞌʌnarráma?
Hoob kꞌĩirjumiet hajim.
Pãar hich jãgta nʌmʌn magan mʌchpata hökꞌĩirjuu hapiju hẽkꞌa nʌmgui hajim.
Jerusalén pabaimaawai hamau mag mʌ hibʌʌrwiajã,
maach Pör Jesús gaaimua kꞌai,
hidëu mag sim.
Hi gaaimuan mʌʌn magʌmjã haba tꞌõju chirʌmgui hajim Pabloou.
14 Par mag jajaaukꞌamjã maach hiek hʌ̈kꞌaba habaawai warag hich magpai sĩuwia Hẽwandamagta marau,
—Hẽwandam,
pʌʌta maach Pör haawai pʌchdëu kꞌap hirig nem jaaubá hanaajim.
15 Magtarr kꞌur kꞌãaidam kꞌapan kꞌaba nʌm hee,
marau maach nemdam kꞌĩir kꞌaugwia Jerusalenag durr paauhkꞌabaad.
16 Maar dʌ̈i wëtjim hãaur kꞌʌʌn Cesareapien chi hʌ̈kꞌa durrarr kꞌʌʌn.
Makꞌʌʌnau woun hãb Chiprepierr Mnasón hanʌm hag di haarta maar pꞌëbaadëjim,
Jerusalén pꞌöbör hee barwia hichdëu marag hich haig jẽermkꞌĩir di deeju ha sĩerr haawai.
Mag woun hag nawe maach Hẽwandam hiek hʌ̈kꞌawi sĩejim.
Pablo Jerusalén barwia Santiago hoon matarr
17 Mag durr paaukꞌabaadëwi ya Jerusalén paaukꞌabaimaawai,
haig chi hʌ̈kꞌa durrarr kꞌʌʌnau sĩi maar hamach haig baarpi hauwia tꞌum honee nʌisijim.
18 Mag maach bartarr noram Pabloou maar hich dʌ̈i pꞌë harrjim Santiago hoon.
Mag Santiago di haig hĩchab iglesia heem chi pörnaanjã narr haawai
19 Pabloou hamag saludaawia hökꞌar hiyʌ̈ʌmamua hamag jaaubaadëjim,
jãga judionaan kꞌabam kꞌʌʌn heejã Hẽwandamau hirig hich hiek jaaupinaa hĩchab nem kꞌĩir pogkꞌe waupimaajeejĩ.
20 Pabloou hamachig mag hĩgkꞌamam hũrbaawai honee nʌm hiekꞌau warag Hẽwandamagta,
“Aay,
hʌ̈ucha magbarm Hẽwandam” hajierram.
Maimua jũrr hamach garmua Pabloog,
“Pʌdë maar hiek hũrbarí,
marau pʌrʌg jaaukꞌim” hawi,
—Pua pʌchdëujã kꞌapꞌʌ chirʌmgui hajierram,
judionaan hee hõor pöoma tꞌʌnʌm chi hʌ̈kꞌa nʌm kꞌʌʌn,
mamʌ tꞌum mag tꞌʌnʌm kꞌʌʌn hiek hichiita hamau hich mag Moiseeu pꞌã pʌatarr hiek pʌaba hʌʌrkꞌa wënʌrraju haai nʌm haajem.
21 Maimua hamag jaauwai,
mag judionaan tꞌum hamach durr chaaur jooba nʌm kꞌʌʌnag pua Moiseeu hiek pꞌã pʌarr gaai nem jaau sĩsidʌmjã hʌʌrkꞌapiba jaaujem haajemgui hajierram.
Mag nʌm dʌ̈i hĩchab hamag chaain mehëudamjã tꞌʌabichpiba jaaunaa warag maach jöoin hijã hisegpi jaaujem haajem.
22 Magnaa hirig,
¿Jãgajuma maadëu har chi mag kꞌĩirju nʌm kꞌʌʌnag,
magʌm hiek chad hapim hugua?
Hamachdëu pʌ barbaichëm ha hũrbaawai,
hichiita jerrba hãba biirdʌnaa hamau pʌrʌg mag hiek hëudʌb kꞌaba hëudʌjugui hajierram.
23 Chadcha pʌchta mag hiekꞌa chitʌm ham hugua,
jãg pua mʌgta habá,
marau pʌrʌg kꞌĩirjugdam deegpam:
Mʌig hõor jayap nʌmgui hajierram,
Hẽwandam na hãba hirigpai jëwaag hi hatꞌee sʌrkꞌaju ha hiekꞌa nʌm kꞌʌʌn.
24 Jãg pʌ ham dʌ̈i Haai hi jëeujem deg mawia ham dʌ̈i hãba pʌch kꞌooipibá,
Hẽwandam na wajapꞌa chirsieg.
Magnaa hĩchab pʌch pör kꞌõipibarm paarjã pꞌagpʌ̈inaa warm kꞌʌʌn dën paarjã pꞌagbapʌ̈i hajierram,
ham dënjã hagjö kꞌõipʌ̈imkꞌĩir.
Hõrau hamach daúa pua magbarm hoobaawai,
jãgan sëukꞌaawaita hõrau pʌ hëugar mag jaau naajim haju.
Magbaawai hĩchab puajã hamach dënjö Moiseeu jaau pʌatarr hʌʌrkꞌa sim hajugui hajierram chi Pabloog wawimamua.
25 Magnaa,
Har judionaan kꞌabam kꞌʌʌn hĩchab maach Hẽwandam hiek hʌ̈kꞌatarr kꞌʌʌnagjã ya marau hẽsap haaidʌpʌ̈ijimgui hajierram.
Hamag marau jaaupʌ̈itarr gaai,
hõrau hamach juau nem parhoobamta Hẽwandamkꞌa waunaa hagʌg jëwaag nemchaain tꞌõotarr modjã kꞌöpiba,
nem tꞌõowia hag bag dën reyen wau sĩsidʌmjã kꞌöpiba,
ni nem sĩi bëgöne bag hãrba tꞌõo sim modjã kꞌöpiba jaaupʌ̈ijim.
Mag nʌm dʌ̈i hĩchab dich hõor kꞌabam dʌ̈i chan hoob bʌ̃ʌrjã kꞌapes hapiba jaaupʌ̈ijimgui hajierram,
Pabloog hĩgkꞌamamua.
Pablo Haai hi jëeujem deg sim pʌr hautarr
26 Warm kꞌʌʌnau hichig mag jaaubaa chadcha Pabloou makꞌʌʌn jayapam kꞌʌʌn dʌ̈i mawia,
hag noram Hẽwandam na wajapꞌa nʌisieg hamach tꞌum hãba hamach kꞌooipinaa,
Haai hi jëeujem deg dubjim,
pꞌadnaanag kꞌan hedta mag sʌrkꞌa nʌm höbër hëebaadeewai hag paar nemchaaindam hamach pipied kꞌëchju haai nʌ ha jawaag.
27 Mamʌ siete días mag sʌrkꞌa naaju hatarr haawai,
ya sʌrkꞌa höju dakpamam hee,
judionaan Asia durrmua bëetarr kꞌʌʌnau Pablo Haai hi jëeujem deg sim hoopꞌöbaadëjim.
Mag hamachdëu hoo hatꞌaawai pʌrpꞌöbaadëwi warag hähäakꞌamua sĩita hõor pꞌogueupʌ̈ijierram.
28 Mag hõor pꞌogueupʌ̈iwia warag,
—¡Keena israelnaan,
maar juag hoobahutꞌʌ̃!
haajeejim.
Chamʌg wounauta durrpierr hõor tꞌumaam kꞌʌʌnag maach jöoin hi hisegpi jaaunaa,
Moiseeu pꞌã pʌatarr hiekjã hasekaspiba jaau nʌrranaa,
hĩchab mʌg Haai hi jëeujem di higwiajã kꞌaigba hiekꞌa nʌrraba haajeeb hajierram.
Mag nʌrrʌmua hĩs hag hee judionaan kꞌabam kꞌʌʌn dubju kꞌaba haajemta warag hierr pꞌë wai sĩewai mʌg diin ya kꞌaigba sĩsimgui hajierram.
Deeu wajaug paapʌ̈ibam haig chan pöd hag hee Hẽwandamag jëeuju kꞌaba simgui hajierram,
hähäakꞌamua.
29 Mag judionaan kꞌabam kꞌʌʌnpata Haai hi jëeujem deg hierr tꞌʌnʌnʌmkꞌarran,
hamachdëu hich Pablo magju na woun Efesopierr Trófimo haajerr dʌ̈i hãba nʌrrʌm hootarr haawaita mag hedjã Pabloou mam hierr Haai hi jëeujem deg hich dʌ̈i wai simpii narr gaaimuata mamag kꞌajierram.
30 Mag hähäakꞌam hũrbaawai sĩi hõor pöm kꞌapꞌig bëe tꞌʌnʌisijim.
Maimua kꞌapanaam kꞌʌʌnau Pablo pʌrpꞌöbaadëwi,
jũrram kꞌʌʌnau dawag hetꞌetꞌerrg wai höbërwi,
hag bʌ̈rre Haai hi jëeujem dën chi puertdi pꞌãarkꞌa sĩujim.
31 Mag dawag harrwi,
kꞌapanaam kꞌʌʌnau haawai,
ya Pablo tꞌõopäaig hẽkꞌa nʌm hee,
Roma durram soldaaun pöm tꞌʌnarr heem chi comandanteeu hũr hatꞌajim,
mag pꞌöbör heem hõor tꞌumta kaaijã hee tꞌʌnʌm hanʌm.
32 Magbaawai hag bʌ̈rre capitannaan soldaaun dʌ̈i tꞌʌ̃rkꞌa hauwi mag ham poposkꞌam haar kꞌapꞌig pꞌöbaadëjim.
Mag wëtwi warm kꞌʌʌnau mag comandante hich soldaaun dʌ̈i pochag hurum hoo hatꞌaawai jũrram kꞌʌʌnau Pablo pꞌotpʌ̈pʌ̈ikꞌarrjã tag dichbajierram.
33 Mag barimawia,
chi comandanteeu Pablo pʌr haupiwia,
warre caden numiimua jʌ̃ sĩupijim.
Maimua haig narr kꞌʌʌnag,
—¿Jã jamaam woun hagá,
maimua kꞌani hichdëu jãg sĩejĩ?
ha jëeujim hajapꞌa kꞌap haag.
34 Mamʌ mag sĩi hirua kꞌajapꞌa jëeutarrta,
deeu heeupemjö sereubaadëwi sĩi hähäakꞌamua jũrr chikꞌaman hichaaur jaaupʌ̈pʌ̈i kꞌaawai chi comandanteeu pöd hʌ̈kꞌajujã kꞌaugba haadëjim.
Mag,
sĩi warag hich soldaaunag chi Pablo cuartel hee harrpijim.
35 Mag soldaaunau Pablo harrumua ya chi cuartel haiguim döig bʌ̈kꞌʌrr pabaimaawai warag sĩi chaaijö jua hee jiir harrjierram,
hõrau hamachig bãyeu haujujö haadëp haawai.
36 Mag tꞌʌnʌmʌn ham hẽudee serereug wëtumua warreta Pablo tꞌõopi jajaau haajeejim.
Pabloou hich kõitpai hiekꞌatarr
37 Mag harrumua ya hich cuartel hee wai dubaagpam hoobaawai hich Pabloou mag soldaaun pör chi comandanteeg griegonaan meúa jëeujim,
jöpcha hi dʌ̈i hiyʌ̈ʌ haag.
Chi comandanteeu hũurwai Pabloou hichig griegonaan meúata hiekꞌabarm hũrbaawai hirig,
—Hãa,
puan magan maar meujã hiekꞌaajeebma hajim.
38 ¿Pʌ Egiptopierr kꞌabá,
pua kꞌabajĩ har na biek hãb gobierno dʌ̈i wërbʌag chumanaan pöm cuatro mil pʌch daumaai jʌr hauwi hõor barba haajem chʌʌi pꞌë harrtarr?
hajim hirig.
39 Magbaa Pabloou,
—Mʌ chan Egiptopierr kꞌabam.
Mʌʌn judioougui hajim,
Cilicia durr pꞌöbör Tarso haajem hee tꞌaabatarr.
Mʌ mag sĩi pꞌöbör parhoobam heemjã kꞌabam.
Mamʌ pua kꞌõs hakꞌiin,
hidëu mʌrʌg hiekꞌapikꞌam,
mua hõrag hiekꞌam kꞌõsi chirʌmgui hajim.
40 Mag chadcha chi comandanteeu Pabloog,
“Pʌ hiekꞌaju haai chirʌm” habaawai,
Pabloou hajapꞌa döig dag gaai dʌnʌʌunaa hõor kꞌĩupamkꞌĩir juau jaaubaawai,
kꞌĩu paaukꞌabaadee,
jũrr hebreonaan meúa hamag magjim: