Nacharam hẽsap pꞌã deepʌ̈itarr gaai mua pʌrʌg jaau chirajim,

Jesuu warrcha hich pꞌidkꞌabaadeewaiwe nem waunaa jaaujerr haigmua kꞌĩeb hi hʌ̃gtꞌar matarrpa.

2 Mua pʌrʌg jaau chirajim hĩchab,

mag hich Jesuu hʌ̃gtꞌar maju nawe,

Hẽwandam Hakꞌarau hichig jaaupibaawai,

jũrr hirua hich dʌ̈i hogdʌba wënʌrramkꞌĩir hichdëucha jʌr hautarr kꞌʌʌnag,

jãga hamau nem wau wënʌrraju ha jaau pʌatarr.

3 Na mʌchdëu pʌrʌg jaau chirarrjö,

makꞌʌʌn mag hichdëucha jʌr hautarr kꞌʌʌnagta hõrau hi juau tꞌõowi deeu hiiu pꞌiidʌtarr kꞌurjã dau daau höbërchëwi hich hoopiejeejim haajem,

chadcha hich hiiu chirʌm kꞌap hamkꞌĩir.

Cuarenta días nʌm hee hich mag hich hoopiejeejim haajem.

Mag hich hoopi simua,

jãga Hẽwandamau hõor hich dënkꞌa hauwia hichta ham Pörkꞌaajẽ ha jaaujeejim haajem hamag.

4 Mag hichdëu doce jʌr hautarr kꞌʌʌnag hich hoopipikꞌam jaarta hĩchab hamag Jerusalén pꞌöbör heemuajã chawag wëtpiba jaaumamua hamag,

—Mua pãrag jaaujeejimgui hajim hanʌm,

mʌ Hayau pãar hatꞌee hich Hakꞌaar pʌ̈iju.

Magtarr haawai mʌg pꞌöbör heemua chawag wëtba,

mʌigpai nʌbat hajim hanʌm,

hichdëu chadcha pãrag hich Hakꞌaar dee nʌm hora.

5 Juanaun chadcha dödamaupaita hõor pör choojeejim,

mamʌ mʌgtarr kꞌur pömcha kꞌaba nʌm hee,

jũrr Hẽwandamau hich Hakꞌaarta pãrag deejugui hajim hanʌm.

Mag hich Hakꞌaar deebarmuata,

chadcha pãar pör choo chaar pör choo nʌisijugui hajim haajem Jesuu hamag.

Teófilo,

maach Pör Jesuu mag hiekꞌatarr haawai,

chadcha hichdëu hiekꞌatarrjö,

jãga mag Hẽwandam Hakꞌaar bëejĩ ha kꞌap hamkꞌĩirta hĩs mua deeu pʌrʌg mʌg hẽsap pꞌã deepʌ̈i chirʌm.

Maimua mag bëewi,

jãga mag hich Jesuu hichdëucha jʌr hautarr kꞌʌʌn hee sĩeichëwi,

hamag nem waupimarrjã hagjö mua pʌrʌg jaaupäaigpam.

6 Maan mʌgta hajim haajem:

Mag hamau chi Jesús tꞌõowi deeu hiiu pꞌiidʌtarr kꞌur ya hãbmiecha hichdëu jʌr hautarr kꞌʌʌn dʌ̈i sĩejim haajem.

Mag hamach haig sĩerr haawai hamach garmuata hirig,

—Señor,

marau kꞌap ham hig nʌmgui hajierram hanʌm,

marag jaaubá.

¿Hĩsta pua chadcha chikꞌamnaan jua heemua maar peerdʌ hauwi pʌchta tꞌumaam kꞌʌʌn Pörkꞌaagpá,

maach gobierno chaarcha wai nʌisieg?

7 Magbaawai Jesuu hamag magjim haajem:

—Hẽwandam hichta tꞌumaam kꞌʌʌn kꞌãai nem jua tꞌeeg simua hichdëupaita magʌm nem tꞌum kꞌap haju harr haawai pãrau chan bʌ̃ʌrjã magʌm kꞌap haju haai kꞌaba nʌmgui hajim hanʌm,

jãagwaita magju,

wa kꞌan hedta magju kꞌai.

8 Mag kꞌãai Hẽwandam Hakꞌaar pãach gaai pꞌẽs sĩeichëjuun chad pãrau kꞌapꞌʌ haju haai nʌmgui hajim hanʌm.

Mag pãach gaai pꞌẽs sĩeichëm hed pãar jua tꞌeeg hapꞌöbaadëmua mua nem waaujerr pãach daúacha hoonaa mʌ hiek pãach jʌ̃gʌucha hũurjerrjã pãrau hõrag jaau nʌrrjëe haju.

Nacha mʌg Jerusalén pꞌöbör hee,

maigmua Judea durr,

Samaria durr,

hich mag kꞌĩeb durrpierr jaau wëtumua warp durr chaauram magwe pãrau jaau wënʌrrajugui hajim hanʌm hamag.

9 Ya hich Jesús mag hiekꞌa höbarm hee,

sĩi warag hʌ̃gtꞌaa papagmam dʌ̈i jʌʌntꞌumie baug bëewi sĩi hag hee hi meer hatꞌamjö habaawai hʌ̈u hamau hi hoo wai durrarrjã warag hoohba pamamua chukkꞌu haadëjim haajem.

10 Mag warag hi hʌ̃gtꞌaa papagmam heerpa dʌnʌnʌidʌ nʌm hee,

hemkꞌooin numí kꞌajũa bäppꞌä jũa sĩsidʌmta dëgölp ham haig dʌnʌʌutkꞌachëjim haajem.

11 Mag dʌnʌʌutkꞌachëwia hamag,

—Keena,

¿kꞌanta hʌ̃gtꞌaag jãg heerpa dʌnʌnʌidʌ nʌma?

haichëjierram hanʌm.

Jesús ya hʌ̃gtꞌar petabahab.

Mamʌ har jãg pãrau hi mam hoo naabá;

hich jãg pãachdëu hoo nʌmjö hũmaai deeu hi bëebajupa hajierram hanʌm hamag,

mag chi kꞌajũa bäppꞌä jũa sĩsid harr kꞌʌʌnau.

12 Mag hamach dʌ̈i hãba sĩewia petam hoobaawai,

durrdam Olivo Durrsĩ hanʌm gaai naawi hich haigpaimua Jerusalenag wëtjim haajem.

Mag durrsĩ Jerusalenmua warpcha kꞌaba,

peer kilómetro hãbpaím sim haajem.

13 Mag wëtwia pꞌöbör hee paaukꞌabaimaawai hʌ̃gtꞌaa hamach jẽerjem haar hãba biirdʌ nʌisijim haajem.

Maig naajim haajem:

Pedro,

Santiago,

Juan,

Andrés,

Felipe,

Tomás,

Bartolomé,

Mateo,

Santiago jöoi Alfeo hiewaa,

Simón hibʌʌr wauwia Celote ha tꞌʌ̃ʌrjem,

maimua Judas,

woun hãb deeum hagjö Santiago hanʌm dʌ̈i hãbam kꞌʌʌn.

14 Makꞌʌʌn hamach tꞌum hich mag biirdʌajeejim haajem Jesús heeugpeen dʌ̈i,

hich Jesús hãd María maimua dewam hʌʌinpa,

hãba mag biirdʌnaa Hẽwandamag jëwaag.

15 Hich mag Hẽwandamag jëwaag ham hãba biirdʌdʌkꞌam hed gaai,

biek hãb Pedroou tagam kꞌʌʌn hagjö Jesús hiek hʌ̈kꞌa nʌm kꞌʌʌn kꞌapan ciento veinte nʌm jãrr dʌnʌʌunaa,

16 —Keena hajim hanʌm,

Jesús gaaimua kꞌodamnaan.

Mua pãrag jaaukꞌimgui hajim hanʌm.

Jãg maach Pör Jesús himeraa përpʌ̈itarran hichiita hich jãgju haai sĩejim,

warrgarwe rey David kꞌararrau Hẽwandam Hakꞌarau hichig jaaubaawai hich mag pꞌã pʌarrjö.

Chadcha magtarr haawaita hõrau maach Pör Jesús pʌr hawaan bëewaijã maach kꞌapeer Judas kꞌararrta chi pörkꞌa nʌrrajimgui hajim hanʌm.

17 Hiin maach heem maach dʌ̈i hãba pꞌidkꞌaajeejimgui hajim hanʌm.

18 Magtarrta hich dau lököo mag Jesús përtarr paar hichig pꞌagtarr pꞌatkꞌonau jẽb për hauwia,

mam mawia,

hichdëupai hich hö jorrkaawi,

pöröu burrwi,

bi jurrpꞌë sĩi jʌ̈hãutarrjö hapʌ̈ijimgui hajim haajem.

19 Mag hichdëupai wir haig hich tꞌõowia magbarm Jerusalenpienau tꞌum hũrpꞌöbaadeewai mag durr hichdëu për hautarr haig “Acéldama” ha tꞌʌ̃rjierramgui hajim haajem.

Mag ham meúa Acéldama haawai maach meúan jũrr “hõor tꞌõotarr param jẽb” ha simʌu.

20 Judaau magju kꞌapꞌʌta warrgarwe rey David kꞌararrau Salmos hanʌm pꞌã sĩewai hi higwia magjim:

21 ’Magua mua mag chirʌmgui hajim hanʌm hich Pedrooupai.

David kꞌararrau jaautarrjö chadcha hamkꞌĩir,

mʌig maach hee hõor nʌm heem hãb maach daumaai jʌr haujugui hajim hanʌm,

hich daúa Jesús hiiu pꞌiidʌtarr hootarr haawai maach hipierr jaaumkꞌĩir.

22 Mag maadëu jʌr haujuun,

hĩchab maachjö Jesús dʌ̈i hogdʌba wënʌrranaa hĩchab warrcha Juan hõor pör choomieu Jesús pör chootarr haigmua hewag pawiajã kꞌĩeb hich Jesús hʌ̃gtꞌar ma nʌm hed gaai hich mag maach dʌ̈i hogdʌba wënʌrraajerr kꞌʌʌn heemta jʌr hauju haai nʌmgui hajim haajem.

23 Pedroou mag hiekꞌabaawai,

haig narr kꞌʌʌnau hõor numí tꞌʌ̃r haujierram haajem:

Hãb José hanʌm,

hich hag wounpai Barsabás ha tꞌʌ̃rnaa hĩchab hibʌʌr wauwia Justo ha tꞌʌ̃ʌrjem;

maagwai hãbakꞌai Matías hajim haajem.

24 Mag numí jʌr hauwia Hẽwandamag jëeumamua magjierram haajem:

“Hẽwandam,

pʌchdëuta chadcha hõor tꞌumaam kꞌʌʌn tꞌãar kꞌapꞌʌ chitaawai,

marau pʌrʌg jëeu nʌm,

marag jaaubá” hajierram hanʌm,

“mʌg numí nʌm haig chijãata pʌchdëu hig chirʌm hagá.

25 Ya Judajã hichdëu kꞌaigba harr gaaimua wir haig hich tꞌõobaawai hi jũrr pʌch hi jaau nʌm pꞌidag maar dʌ̈i hãba pꞌidkꞌamkꞌĩir marau deeum hig nʌmgui” hajim hanʌm,

“maach daumaai.”

26 Mag Hẽwandamag jëeu durrawia mokpör gaai ham tꞌʌ̃r numwe pꞌãkꞌanaa jẽkꞌʌt barbapäaiwai,

chi Matías tꞌʌ̃r pꞌã simta hʌ̃gtꞌaag jẽer kꞌërbaimajim haajem.

Magtarr haigmua hatag Matías warm kꞌʌʌn once narr dʌ̈i hãba pꞌidkꞌa sĩsijim haajem,

Hẽwandam hi jaau nʌm pꞌidag gaai.