Jesuu hʌʌi pʌapiba jaautarr
19
Mag marag nem jaau sĩi hawi,
Galileamua mawia jũrr Judea sĩeimajim,
Jordán higaau tꞌoogar dʌrba hedau höbeerjem bi gar.
2 Mag hi petamjã hõrau kꞌaugpʌ̈itarr haawai hõor pöoma hi hẽudee wëtjim.
Mag hõor pöm tꞌʌnʌm hee haaunaan kꞌapan tꞌʌnarr haawai magʌm kꞌʌʌnpa monaaupʌ̈i maajeejim.
3 Mag nʌm hee fariseonaan heem kꞌʌʌn hich Jesús haigcha bëewi juau hogtꞌom hirig,
—¿Pua hoowai sĩi nem bʌ̃ʌr habarm gaaimua maadëu dich hʌʌi pʌaju haai nʌ?
haichëjierram.
4 Magbaawai Jesuu hamag magjim:
—Hẽwandam hiek pꞌã sim gaai tꞌʌ̃ʌrwai,
¿pãrau hooba haajẽ,
warrcha chi hompaatarr Jöoiraujã hemkꞌooi hʌʌi dʌ̈ita hompaajim ha sim?
5 Magtarr haawaita hemkꞌooi hich hʌʌi dʌ̈i pabaadëmʌn hich dënnaan kꞌa hogdʌajem,
ya hich hʌʌi dʌ̈ita hãba nʌrraag.
Ya magbarm haigmua warran hagdaujö hamach happai naajerrta,
hõor hãbpaimjö hich mag nʌisiejemgui hajim.
6 Mag nʌisim chan ya tag hamach hãhãbdö nʌrrjëe haba,
hõor hãbpaimjö nʌisijugui hajim.
Mag warrgarwejã hich Hẽwandamauta mag papitarr haawai pöd hiwiir hãbmuajã hi hichaaur hawi dich hõor pʌaju kꞌaba nʌmgui hajim hamag.
7 Magbaawai jũrr hamach garmua hirig,
—Pari pua mag simta,
¿kꞌan jãgwi Moiseeu jaauwai dich hʌʌi pʌagpaawai hẽsap gaai “Mua ya pʌ pʌa chirʌm” ha pꞌãnaa hirig deeju haai sim ha simma?
hajierram hirig.
8 Magbaawaita Jesuu hamag,
—Pari jã,
nem jaauwaijã pãach jʌ̃g tꞌeeg sĩerrjëem gaaimua kꞌabahab hajim.
Moiseeun chadcha hʌdʌraa hʌʌin pʌapiejeejim,
pari warrcha hich Jöoirau hompaawai chan mag pʌamkꞌĩir kꞌabata hompaajimgui hajim.
9 Pãadë mʌ hiek hũrbat:
Hʌʌi bʌ̃ʌrjã deeum dʌ̈i pʌrpʌr kꞌaba simta sĩi pʌam kꞌõchgaupai pʌawia deeum hʌʌi hau simʌn maan pekauta wau simgui hajim.
[Mag hich hap sim hawi chikꞌamnau pʌatarr hʌʌita hau sim wounjã pekauta wau sim,
hagtꞌa chikꞌam hʌʌikꞌa simta hau sĩewai hajim jũrr hamag.]
10 Magbaawaita maach heem kꞌʌʌnaupai hãaur kꞌʌʌnau jũrr,
—Maach hemkꞌooin dich hʌʌi dʌ̈i magta haju haai nʌm kꞌai,
magan warag hʌʌi haubajuuta simgui hajierram.
11 Magbaa jũrr hich Jesuu marag,
—Tꞌumaam kꞌʌʌnau chan cha mua jaau chirʌm hiek pöd kꞌaugbam;
hãba hich Hẽwandamau kꞌaugpi sim kꞌʌʌnaupaita kꞌap hajugui hajim.
12 Maimua,
Pãrag jaaukꞌimgui hajim,
jãgwi mag tꞌumaam kꞌʌʌn pöd hʌʌi hauju kꞌaba nʌ.
Hãaur kꞌʌʌn bi heeweta mag hʌʌin hawaag kꞌaba tꞌaaba nʌmgui hajim.
Pogkꞌa ya chi jöoin pawiajã pꞌãrr japʌ̈i nʌm,
kꞌapes hapimaaugau.
Maagwai pogkꞌa mag pꞌãrr jaba nʌmta,
pari hamachdëupai Hẽwandamau nem jaau sim wajapcha wawaag hawi,
bʌ̃ʌrjã kꞌapes haba hich mag tꞌʌnʌmgui hajim,
hʌʌinjã kꞌĩirjuba.
Mag jaauwi hãbmiecha paawai hichdëupai magjim: ’
Dichdëu hoowai hʌʌijã chukꞌu chitaju hʌ̈u pödjöjöo sim kꞌai,
magan hich magta nʌrraju haai simgui hajim,
hʌʌi chukꞌu.
Jesuu chaain kõit Hẽwandamag jëeutarr
13 Mag nʌm hee,
jũrram kꞌʌʌnau Jesús haig chaain haibëe tꞌʌnaajim,
ham gaai pʌrnaa Hẽwandamag ham kõit jëeumkꞌĩir.
Pari mag jũrram kꞌʌʌnau chaain haibëbëekꞌam hoowi chi haibëe nʌm kꞌʌʌnagta maachdëuta meeukꞌa naajim,
tag haibëepimaaugau.
14 Mamʌ mag marau hiekꞌa nʌm hũrbaawai Jesuu jũrr maachigta,
—Hidëu mʌ haig chaain haibëepibat.
¿Kꞌantꞌee pãrau ham bëepimapꞌa nʌ?
hajim.
Chi jöoin hawiajã,
chamʌ kꞌʌʌn chaainjö mʌ hiek hʌ̈kꞌakꞌarrsö hʌ̈kꞌa nʌm kꞌʌʌnta mʌg jẽb gaaijã hʌ̈u wënʌrrawi hʌ̃gtꞌarjã honee wënʌrrabajup hajim.
15 Magnaa warag ham pör hʌ̃r jua hausĩunaa,
Hẽwandamag ham kõit jëeuwi,
warag haigmua chawag maar pꞌë harrjim.
Hẽwan pꞌatkꞌon paraam Jesús dʌ̈i hiyʌ̈ʌ hatꞌurtarr
16 Biek hãb woun hãb hẽwan sĩerrau Jesús haig bëewi hi dʌ̈i hiyʌ̈ʌmamua,
—Maestro,
¿kꞌan nem wajapꞌamta mua wauju haai chirʌ́ hʌ̃gtꞌar höbëraag?
Mʌrʌg jaaubá hajim.
17 Magbaawai Jesuu hirig,
—¿Kꞌantꞌee mag nem wajapꞌamta wawaag pua mʌrʌg jëeu chirʌ́?
Nem wajapꞌamʌn hãba hãbpaita sim;
ma Hẽwandamau.
Mamʌ pʌ chadcha hʌ̃gtꞌar höbërm kꞌõs chirʌm kꞌai,
Hẽwandamau hich hiek pꞌãnaa Moiseeg deetarr gaai jaau sim hipierraa habá hajim hirig.
18 Magbaa,
—Pari hag gaai jaau sim heem,
¿chijãg higwiata pua mag jaau sĩ?
hajim,
chi hẽwan mag hi dʌ̈i hiyʌ̈ʌ haan berrau.
Magbaa Jesuu hirig magjim:
—Hoob hõor tꞌõo chitam;
hoob pʌch hõor kꞌabam dʌ̈ijã kꞌapes ha chitam;
nem jĩgkꞌam;
sëukꞌajã chikꞌam hëugar nem jaau chitam;
19 pʌch haaijã daupiinaa pʌch hãdjã daupii habá,
maimua pʌch kꞌapeenjã wir haig pʌchdëu pʌch kꞌõsi simjö daupii habá hajim hich Jesús garmua.
20 Magbaawai chi hẽwanau,
—Mua magʌm tꞌum hʌʌrkꞌa chitabahab.
¿Kꞌani mua wauju hagtꞌa waaur chirʌ́?
hajim.
21 Magbaawai deeu hich Jesuupai hirig,
—Pʌ chadchata wajapcha ham kꞌõsi chirʌm kꞌai,
pʌch nem përkꞌʌʌipʌ̈inaa chi pꞌatkꞌon hapꞌʌʌm kꞌʌʌndamag jigbapʌ̈i hajim.
Mag kꞌaita hʌ̃gtꞌar pawiajã pʌ hich mag nem wajapꞌam paraa chitaju.
Mag përkꞌʌʌipʌ̈inaa jigpʌ̈iwi,
mʌ dʌ̈i marrau hajim.
22 Pari hich mag woundam chadcha pꞌatkꞌon paraam harr haawai Jesuu hichig magbarm hũrwia warre hökꞌĩirjuu petajim.
23 Mag woundam hökꞌĩirjuu petam hoobaawai jũrr maragta hich Jesuu,
—Pꞌatkꞌon paraam kꞌʌʌnta Hẽwandam chi Pörkꞌa sim haar höbëraagan chadchata tꞌetꞌe simgui hajim.
24 Pꞌatkꞌonpanta hʌ̃gtꞌar Hẽwandam chi Pörkꞌa sim haar höbërju kꞌãyau,
camello pöm jãg maach wounaan kꞌãaijã hʌ̃rpai sĩerrʌmta pꞌitꞌurg chukꞌu nobeeu kach hee tꞌoogar höbër dichjugui hajim.
25 Mag hi hiekꞌabapʌ̈im hũrwia chadcha jʌ̃gderraa nʌmua maach hi dʌ̈i wënʌrraajerr kꞌʌʌn heem hãaur kꞌʌʌnau,
—Mag kꞌai,
magan ¿kꞌaita peerdʌagáwa?
hanaajim.
26 Pari magbaa hich Jesuu marag hoonaa,
—Hõragan chadcha pꞌitꞌurgma mag hũurwai.
Mamʌ Hẽwandamag chan bʌ̃ʌrjã pꞌitꞌurg chukꞌu simgui hajim.
27 Jesuu magbaawai mag chi hẽwan pꞌatkꞌon paraam dʌ̈i hiyʌ̈ʌ narr kꞌĩirjuwia,
—Maraun chad pʌ dʌ̈i wënʌrram kꞌõchgau maach nemdam wai narrjã kꞌĩirjuba,
sĩi tꞌumaa pꞌëpʌawi pʌ dʌ̈i hogdʌba wënʌrrabma.
Mʌg pʌch dʌ̈i hogdʌba wënʌrrʌm jũrr ¿kꞌandamta marau hau durrajuma mʌg hatag paawaijã?
hajim Pedroou.
28 Magbaawai Jesuu magjim:
—Cha mʌ hiekꞌa chirʌm hiekꞌau mʌg durr jöoi hedaujã dʌ̈i tꞌum chi hiiurig pawia mʌch chi Hemkꞌooi Hiewaa hõor Pörkꞌaag kꞌu juupjem wajappꞌa kꞌitʌm gaai hoo chirsim hed,
pãar mʌg mʌ hogdʌba mʌ dʌ̈i wënʌrraajem kꞌʌʌnta mʌ jup chirʌm bigaau pörkꞌau doce nʌm gaai hohood hajugui hajim.
Pãachdëuta mʌ dʌ̈i pãach hipaarmua jöoi Jacob kꞌararr chaain doce narr kꞌʌʌn hag chaain hewagam kꞌʌʌnagjã kꞌap jajaau haju,
jãgaju Hẽwandamau ham dʌ̈i.
29 Maimua har tꞌum chi mʌ gaaimua wa mʌ hiek jaaum kꞌõchgau kꞌãijã hamach di,
hamach naamkꞌʌʌn,
hamach heeugpeen,
hamach haai,
hamach hãd,
hamach chaain wa sĩi hamach jẽb kꞌãijã kꞌaugba pʌa nʌm kꞌʌʌnagjã hamach nem hokꞌootarr kꞌãyaujã hʌ̃r hag hatcha deewi mʌch dʌ̈ita hich mag wënʌrramkꞌĩir mʌch haarcha pꞌë haujugui hajim.
30 Pari mag hed hãaur kꞌʌʌn har mʌig heegar haawai hamachta chikꞌam kꞌãaijã hʌ̃rʌʌcha nʌm haajerr kꞌʌʌnta hʌ̃gtꞌar Hẽwandam haar paaukꞌaimaawaijã jũrr serbiibacha haajerrjöo nʌisijugui hajim.
Maimua jũrr har mʌ gaaimua chikꞌamnau serbiibag pꞌeejerr kꞌʌʌnta jũrr warm kꞌʌʌn kꞌãaijã hʌ̃rcha nʌisijugui ha hiekꞌamajim hich Jesuu,
marag hũrmkꞌĩir.