Tꞌetꞌemnaanau hamach dakꞌĩir hamachdëu nem hooba haajem hompaa haupi narr
16
Mag Magadán durr paaukꞌabaimaawai fariseonaanau Saduceonaan dʌ̈imua Jesús hoon bëejierram.
Pari mag bëetarran sĩi hi himeraa pʌr haum kꞌõchgaupai harr haawai hirig hamachdëu bʌ̃ʌrjã hooba haajem nemta hamach dakꞌĩir hedjã hee waupi jaau naajim,
mag gaaimua chadcha Hẽwandamau pʌ̈iwiata mag nʌrrʌm ha hamachig kꞌap jaaumkꞌĩir.
2 Pari Jesuu ham hipierraajã kꞌaba,
warag sĩi hamag,
—¿Kꞌan jãgwi pãrau kꞌeeurag hedau dubmamua hedjã pꞌur waau tꞌʌnʌm hoowia,
“Nan hedau wärjäpꞌä haju” haajẽ;
3 maimua jũrr hedaupꞌerrejã hagjö hedau höbër hurum bʌ̈ʌu hedjã pꞌur tꞌʌnʌm hoowi,
“Nan hedau kꞌõrkꞌaju” ha jaaujẽ?
hajim.
Pãrau jãg hedjã hoobarm gaaimuapai hed wärjäug haju wa hed kꞌõrkꞌajujã nem kꞌaug nʌmta,
¿jãga jãg pãrau pãach daúa mua nem wau chitʌm hoo nʌmjã pöd kꞌaug hauba nʌ mʌ chadcha Hẽwandamau pʌ̈iju jaaujerr?
hajim hamag.
4 Pãran pãachdëu Hẽwandam hiseg nʌm gaaimua warag chi hajaugjã chukꞌu tꞌʌnaawaita warag pãachdëu nem hooba haajem nempata pãach dakꞌĩir waupi nʌm.
Mamʌ mua waubamgui hajim.
Mag kꞌãai warrgar jöoi Jonás haajerr nemmeeurrkꞌan buch hee kꞌãai tꞌãrjup sĩetꞌurtarr gaaimua Nínivepienau Hẽwandamau hi pʌ̈itarr kꞌaug hautarrjöta,
hĩchab mʌchjã Hẽwandamau pʌ̈itarr pãrag kꞌapꞌʌ hapijugui hajim,
mʌch hiiu pꞌiidʌbarm gaaimua.
Mamʌ magʌmjã pãrau hʌ̈kꞌabajugui hajim.
Mag hiekꞌapet hawi hichta warag chaaug higbaadëjim.
Jesuu hich kꞌapeenag fariseonaanjö hapiba jaautarr
5 Mag higbaadëwi ya tꞌoom higar paaukꞌabaimaawaita maar kꞌĩir hee dʌhnʌisijim,
panjã haibëeba sĩi hich jãgta wënʌrrʌm.
6 Magbarm dʌ̈ichata hich Jesuujã marag,
—Kꞌĩir kꞌapꞌʌ wënʌrratꞌʌ̃ hajim.
Fariseonaan bënta saduceonaan bën dʌ̈i jãg levadurajö sim pãach gaai dʌrbapimiet hajim marag.
7 Mag hũrwia,
chadcha levadurata jaau simpii hawi,
maach happaijã,
—Keena,
maach chan chadchata pan haibëebajimwai hanaajim.
8 Mamʌ maar mag hiyʌ̈ʌ nʌmjã hich Jesuu kꞌapꞌʌ sĩerr haawai,
—¿Kꞌantꞌeeta pãar mag pan haibëebajim hanʌ́ma?
Pãrau chan jãgan mua nem wau chitʌmjã hoobamjöta haajeeb hajim,
mʌg mʌ dʌ̈i hãba wënʌrrʌmjã hʌ̈kꞌaba haag.
9 ¿Pãrau kꞌĩir hee paba nʌ,
mua pandam cincopai narrau hʌʌinjã beerba,
chaainjã beerba,
hemkꞌooin happai cinco mil jãhogtarr?
Maimua ¿tꞌʌbʌt kꞌarr hipiirkꞌa haujĩ chi sobau?
10 ¿Kꞌĩir hee paba nʌ hagjö,
pan sietepai narrau hõor pöm cuatro mil narr jãhogtarr?
Maimua jãg hedjã,
¿tꞌʌbʌt kꞌarr hipiirkꞌa haujierrá chi sobau?
Pan chaarta hig nʌm hakꞌiinjã,
¿pãrau kꞌĩirjuawai hĩsjã mua pöd pãach jãhog haubajupii nʌ?
11 ¿Jãga jãg pãrau bʌ̃ʌrjã kꞌaug hauba nʌ hajim,
mua pãachig,
“Fariseonaan bën saduceonaan bën dʌ̈i levadurajö simta pãach gaai dʌrbapimiet” haawai?
Mua mag chirʌm haig chan pan chaar higwiata pãrag mag hiekꞌaba chirʌm;
wajapcharan muan maiguin,
hoob hamjö chikꞌam kꞌĩir haawaipaita chadam hiekjö hiekꞌamiet ha chirʌmʌu hajim marag.
12 Magbaawaita marau kꞌaugpꞌöbaadëjim,
Jesuu levadura chaar jaauba,
sĩi fariseonaanau saduceonaan dʌ̈imua nem jaaujemta jaau sim.
Pedroou jaauwai Jesuun warrgarwe hich Hẽwandamau pʌ̈iju haajerrau ha jaautarr
13 Mag wëtwia deeum durr Cesarea de Filipo hanʌm paaukꞌabaimaawai hich Jesuu marag,
—Hõrau mʌch chi Hemkꞌooi Hiewaa higwia hiyʌ̈ʌ nʌm hũurwai,
ham hiek ¿mʌ kꞌai haajẽ?
¿Pãrau hũrba haajẽ?
ha jëeujim.
14 Magbaawai marau hirig,
—Ham hiek pʌ Juan chi hõor pör choomie haajem;
deeum kꞌʌʌnau jaauwai pʌʌta Elías haajem,
warrgar Hẽwandam hi jaaujerr;
wa magba Jeremías kꞌabam kꞌai,
dewam kꞌãijã haajem,
hagjö Hẽwandam hi jaaujerr.
15 Marau hichig magbaawai jũrr maachigta,
—¿Ma pãachdëujãma?
Pãrau kꞌĩirjuawai,
¿mʌ kꞌai hagá?
hajim.
16 Magbaawai Simón Pedroou,
—Pʌ Cristo kꞌabahab hajim hirig,
hich Hẽwandam Hiewaa warrgarwe hichdëu jʌr hauwia hõor peerdʌ haumkꞌĩir pʌ̈iju ha jaaujerr.
17 Magbaawai Jesuu hirig,
—Simón Pedro,
Jonás hiewaa,
hõrau bʌ̃ʌrjã pʌrʌg jaautarr kꞌabamta chadcha pua hag heyaa jaaubapʌ̈imkë hajim.
Jãg pua kꞌapꞌʌ jaaubapʌ̈imʌn,
jãan hich mʌ Haai hʌ̃gtꞌar chiraajemuata pʌrʌg mag kꞌĩirjupiwi hajim.
Maguata pua hag heyaa jaaubapʌ̈ibahab hajim.
18 Pedro,
maagwai pʌʌn chadcha pʌch tꞌʌ̃riu jaau simjö mokdauu hajim hirig.
Pua mʌ hiek jaaubaadëm gaaimuata mua mʌch hiek hʌ̈kꞌa nʌm kꞌʌʌn kꞌapaana hapiju.
Mag kꞌapaana haadëm chan pãach chi hʌ̃rʌm kꞌʌʌnan kꞌëchwiajã,
pãar hakꞌaar chan hokꞌooba hich mag Hẽwandam dʌ̈ita nʌisiju hajim.
19 Pedro,
pʌrʌgta mua mʌch hiek jaaumkꞌĩir jaau chirʌmgui hajim.
Pua mʌ hiek jaaubaadëm hũrwi hʌ̈kꞌa nʌm kꞌʌʌn mʌ dënkꞌa nʌisiju.
Mamʌ hĩchab pua jaau kꞌitʌm hũr nʌmjã hasekasba warag hiseg nʌm kꞌʌʌnan hamach mag nʌm gaaimua warag hich mag hokꞌoo wënʌrrajugui hajim.
Mag nʌm haiguin pua chi mʌ haar höbërju haai nʌm kꞌʌʌnag puertdi weeu deenaa pöd dubbaju haai nʌm kꞌʌʌn hatꞌee sĩi warag pꞌãar sĩsiukꞌamjöta haju.
20 Mamʌ Jesuu mag hich chadcha hich Hẽwandamau jʌr hauwia pʌ̈itarrkꞌa simjã bʌ̃ʌrjã hõrag jaaupiba jaaujim marag.
Hõrau hich tꞌõoju jaautarr
21 Maimua jaaumamua hich Jerusalenag majujã jaaujim.
Mag Jerusalén pabaimaawai jöoin chi pörkꞌa nʌm kꞌʌʌnau pꞌadnaan chi pörkꞌa nʌm kꞌʌʌnaupa Moisés hiek jawaag chi machnaan dʌ̈imua hich dau hapꞌʌʌ wai naawi hich tꞌõojujã jaaujim.
Mamʌ mag hamau hi tꞌõowiajã deeu hũwaai kꞌãai tꞌãrjup nʌm hee deeu hich hiiu pꞌiidʌjujã jaaujim.
22 Mag jaaumam hũrwia,
Pedroou hich happai chaaur tꞌʌ̃rnaa,
—Señor,
¿kꞌanii Hẽwandamau pʌ dʌ̈i magpibarju?
Pʌ dʌ̈i chan hõrau magju kꞌaba nʌmgui hajim hirig.
23 Pari Pedroou hichig magbaawai,
jũrr chi Jesuu hirig,
—Jöpkꞌaa mʌ haigmua chaaug petá hajim.
Meperauta pʌrʌg mag hiekꞌapi sĩebahab.
Puan mag sim haig sĩi warag kꞌaibag hee mʌ burrpijuuta hẽkꞌa simgui hajim.
Pua chan Hẽwandamau nem waum hig simjã kꞌaugba,
sĩi parhoobam kꞌʌʌnjöta kꞌĩirju simgui hajim hirig.
24 Maimua hichdëupai jũrr maach tꞌumaam kꞌʌʌnagta,
—Chadcha pãrau mʌ hiek pãach tꞌãraucha hʌ̈kꞌa nʌm kꞌai,
magan mua nem waupi jaau chirʌm happaita waubat,
“Mʌchdëuta kꞌap chirʌm mʌchdëu nem wauju” ha hiekꞌaba.
Mʌ gaaimua chikꞌamnau pãach dau hapꞌʌʌ tꞌõoju kꞌĩirjuwia kꞌãijã magʌmjã higba waragta hʌ̈kꞌanaat hajim.
25 Har mʌig heegarjã mʌ gaaimua pꞌitꞌurg haumapꞌa nʌm kꞌʌʌn chan bʌ̃ʌrjã hʌ̃gtꞌar höbërbam.
Magarrau har chi mua nem jaau chirʌm waum kꞌõchgauta hamach nemjã kꞌĩirjuba,
sĩi warag mʌ gaaimuata dau hapꞌʌʌ hanʌm kꞌʌʌnan chadau hʌ̃gtꞌarcha höbërju jaaujim.
26 Pãrau hoowai,
¿kꞌan wajaug sĩ hajim,
hãbmua mʌg durr tꞌum hichdëupai jʌ̃a wai sĩsim,
mamʌ mag sim meebaadee kꞌĩmie durr petam?
¿Hirua hich durr tꞌum hich dʌ̈i harrju haai sĩ?
Pöd harrbam.
¿Pãrau kꞌĩirjuawai hãbmua kꞌãijã hʌ̃gtꞌar höbëraag pꞌatkꞌon pöm pꞌagju haai sĩ?
Mag pꞌagwiajã pöd dubbamgui hajim.
27 Mʌgnaa mʌ Hayau mʌg durr hi hagkꞌam hedjã mʌchta hichdëu jua tꞌeeg deetarr dʌ̈i hi chognaan angelnaanpa bëewi,
mʌig heegar hamach nem waaujerrpierr haju ham dʌ̈i:
chi nem wajapꞌa waaujerr kꞌʌʌn dʌ̈ijã hich hagjö maimua nem kꞌaigba waaujerr kꞌʌʌn dʌ̈ijã hich hagjö.
28 Cha mʌ hiekꞌa chirʌm hiekꞌau hãaur kꞌʌʌn cha mʌ hiek hũr nʌm kꞌʌʌn chan mʌch chi Hemkꞌooi Hiewaa tꞌumaam kꞌʌʌn Pörkꞌa bëeju hedamjö haadëm hoobam haigjã meebajugui ha jaaumajim.