Sĩi jua sũgba tꞌach kꞌö nʌmuapai chan maach hãrba haajem ha jaautarr
15
Hĩchab Moiseeu pꞌã pʌatarr hiek wajapcha hʌʌrkꞌaajem kꞌʌʌn dʌ̈i Hẽwandam hiek jawaag chi machnaan hi haig bëejierram.
Makꞌʌʌn Jerusalenmua bëetarr kꞌʌʌn hajim.
2 Mag bëewi hirig,
—¿Jãgwi pʌ kꞌapeenau maach jöoin hi pʌa nʌ?
¿Jãgwi tꞌach kꞌoowaijã jua hʌbata tꞌach kꞌoojẽ?
¿Pãrau kꞌaugba naab jãg hʌ̈u kꞌaba sim?
haichëjierram.
3 Magbaawai Jesuu hĩchab,
—¿Kꞌantꞌee pãraujã hagjö Hẽwandamau jaau sim tꞌum hipierraa habanaa sĩi pãach jöoin hiita hʌ̃rcha hʌʌrkꞌaju hẽkꞌaajerráma?
hajim hamag.
4 Magnaa hamag,
¿Pãrau kꞌaugba nʌ hajim,
Hẽwandam hiek pꞌã sim gaai jaauwai,
“Pʌch haaijã pʌch hãd dʌ̈i jãsenenaa hökꞌö habá” ha sim?
Maimua “Har hiwiir hãbmua kꞌãijã hich haai wa hich hãd kꞌãijã tꞌõpnaa hãaukꞌa hiekꞌa simʌn warreta tꞌõopʌ̈iju haai nʌm” ha sim,
¿majã pãrau kꞌaugba nʌ?
hajim hamag.
5 Magnaa hichdëupai,
Pari Hẽwandamau hich hiek gaai mag jaau simta,
jũrr pãar hiek mag hãbmua kꞌãijã dich hayag wa dich hãdag kꞌãijã,
“Pãrau hig nʌm mua wai chirab mamʌ,
pöd mua deeju kꞌabam,
ya tꞌum Hẽwandam hatꞌeem haawai” ha hiekꞌaju haai sim hanʌm,
dich dënnaan dau haug kꞌaugba.
6 Pari pãrau hõrag mag jaau nʌm haig,
Hẽwandamau nem jaau sim hisegnaa jũrr pãach jöoin hiita hʌ̃rcha hʌʌrkꞌa naabahab hajim Jesuu,
hamach kꞌĩircha.
7 Magnaa,
Chadcha jãg Hẽwandam hiek gayam pãachdëu nem jaaujemjö kꞌaba jũrr hag chaaur nem wau sĩerrjëem kꞌapta Hẽwandamau hich hi jaaumie jöoi Isaías kꞌararrag pãach higwia hich hiekꞌatarr hiek mʌg pꞌãpijimgui hajim.
Magnaa chadcha hag gayam jaaubaadëmua,
8 “Pãran,
sĩi par hiekꞌaupaita Hẽwandam hiek hʌ̈kꞌa nʌm hʌ̈kꞌa nʌm haajemgui” hajim Jesuu hamag.
“Pari mag nʌm chan par chadcha tꞌãraucha hʌ̈kꞌabamta mag sĩerrjëem.
Pãach mag nʌm gaaimua pãar tꞌãar chan hi dakꞌajã kꞌaba,
sĩi hi warpta tꞌʌnʌmgui” hajim.
9 “Jãg nʌm haiguin parii pãach hipꞌitꞌur pãrau hirig jëeuju.
Pãrau jaau nʌmjã sĩi wir haig pãach kꞌĩirjugpaiu;
jã hi hiek kꞌabamgui” hajim Jesuu hamag,
warrgarwe Hẽwandamau jaautarr higwia. (Is 29:13)
10 Magnaa hõragta heerpanaa, ’
Wajapꞌa mʌ hiek hũrbat hajim.
11 Maadëu nem parhooba kꞌö nʌmuapai chan Hẽwandam dau na maach hãrpiba haajemgui hajim.
Hẽwandam na hõor hãrpiejemʌn hiekꞌaju kꞌabam nempa kꞌĩirjunaa hiekꞌa nʌmuata hõor hãrpiejemgui hajim.
12 Hirua magbapäaiwai maach chi kꞌapeenauta hirig,
—Fariseonaan hiek,
mag pua magbarm haig,
ham kꞌĩirta hiekꞌabapʌ̈im haajem hanaajim.
13 Magbaawai jũrr hichdëu maachigta hiekꞌamamua,
—Hoob ham hiek hasekasmiet hajim.
Pãrau kꞌapꞌʌ nʌm,
nemjĩir hee pꞌũak kꞌaigbam höbeerwai tꞌʌrrëupäaijem.
Hich jãgta hajugui hajim mʌ Hayau ham dʌ̈i.
Ham hichdëu jʌr hau sim kꞌʌʌn kꞌaba haawai nemjĩir hajapꞌam heemua pꞌũak chi kꞌaarpa tꞌʌrrëunaa barbapʌ̈imjöta hajugui hajim.
14 Magua,
hidëu warag kꞌĩuu sĩubat hajim.
Jãkꞌʌʌnan hamachjã dau kꞌĩsu nʌmta hagjö dau kꞌĩsum kꞌʌʌn jua gaai pʌrnaa hëudʌ harrjem kꞌʌʌnjöta nʌmgui hajim.
Pãrau hoowai merag chukꞌu sĩebá,
dau kꞌaugba kꞌitʌmua hagjö dau kꞌĩsu kꞌitʌm jua gaai pʌrnaa harrkꞌiin,
hãb bʌ̈hëu subaadee hamach numwe burrjugui hajim.
15 Magbaawaita maar heem hãb Pedro haajemua hirig,
—Señor,
cha pʌchdëu jaaubapʌ̈im deeu marag wajapꞌa jaaubá;
marau pöd kꞌaugba habarmgui hajim hirig.
16 Magbaawai Jesuu marag jaaubaadëwia magjim:
—¿Wa pãrau hagtꞌa kꞌaugbata nʌwa?
hajim.
17 ¿Pãrau kꞌapꞌʌ naabá,
maadëu nem kꞌö nʌm tꞌum maach bi hee mawia chëbapäaiwai deeu chukꞌu haadeejem?
Magua dichdëu tꞌach kꞌö nʌmuapai chan maach hãrba haajemgui hajim.
18 Maach hãrpi nʌmʌn tꞌãar heemua kꞌĩirjug kꞌaigbam hiekꞌa nʌmuata Hẽwandam na maach hãrpiejemgui hajim,
ya kꞌĩirjunaata hiekꞌamaawai.
19 Nem tꞌum maach kꞌĩirjug heemuata höbër tꞌʌnʌm:
kꞌĩirjug kꞌaigbam,
hõor tꞌõoju,
dich hõor kꞌabam dʌ̈i kꞌapes haju,
dich kꞌaman hapꞌa kꞌãijã dich hõor dʌ̈ímjö haju,
nem jĩgkꞌaju,
sëukꞌaju maimua chikꞌam hëugar chad kꞌabam hiek hiekꞌaju.
20 Magʌm nemeuta chadcha Hẽwandam na hõor hãrpiejem.
Mamʌ chi machnaanau jaau nʌmjö sĩi jua sũgba tꞌach kꞌö nʌmuapai chan Hẽwandam dau na maach hãrba haajem ha jaaujim marag,
hich Jesuu.
Canaanpie hʌʌirau Jesuu hich chaai monaauju kꞌapꞌʌ sĩerr
21 Maigmua higbaadeeu jũrr pꞌöbör numí Tiro Sidón dʌ̈i nʌmʌg petaawai maarjã hi dʌ̈i wëtjim.
22 Maimua ya mam paaukꞌabaimamta,
hʌʌi hãb Israel durram kꞌaba Canaanpie hʌʌi mag perás sĩejerrta hähäag bëewia Jesuug,
—Señor,
mʌ hap hʌrrʌm mʌ dau haug kꞌaugbá hajim.
Mua kꞌapꞌʌ hʌmgui hajim,
pʌʌta chadcha Hẽwandamau pʌ̈iju haajerrau.
Maagwai mʌ chaai monawaagjã pʌ jua tꞌeeg sim.
Mʌ kꞌa dösãt bënëu baarjemta pʌrʌg monaaubapʌ̈i ha hʌmgui haichëjim,
hirig chaigpamamua.
23 Pari par hũanau mag chaigpa kꞌitʌmjã Jesuu bʌ̃ʌrjã hi hiek hʌ̈kꞌabajim.
Magbaawaita marau hirig,
—Senõr,
¿jãg pua hirig mapi jaaubamma?
Ya hatcha magaajã marau hũrmapꞌa nʌm.
Magbamʌn hich jãg maach hẽudee hähäag majuwai hanaajim.
24 Pari magbaawai jũrr Jesuu chi hʌʌiragta,
—Hẽwandamau mʌ pʌ̈itarran,
maach meeun israelnaan sĩi oveja hokꞌoo durrumjö durrum kꞌʌʌn peerdʌ haumkꞌĩirta mʌ pʌ̈ijim hajim.
25 Pari mag nʌm hee,
warag hi haigcha bëenaa kanieu pꞌõbkꞌanaata,
—Señor,
mʌ hap hʌrrʌm mʌ chaai monaaubapʌ̈i hajim.
26 Magbaa,
judionaan kꞌabam kꞌʌʌn chan monaauju kꞌabam hawi juau hogtꞌompai chi Jesuu warag,
—¿Pua mʌ hiekꞌa chirʌm hũrbata sĩ?
hajim.
Pʌ deeum durram haawai,
mua pʌ chaaita nacha monaaukꞌiin,
mua hoowai dich chaainag deeju harr panta kꞌecheunaa saakienag deebarmjö hajugui hajim hirig.
27 Pari magbaa hũanau dʌ̈i,
—Señor,
jãan chadaugui hajim.
Mamʌ pua hoowai,
¿saakienaujã hamach pap juasur mes heegar kꞌʌimam kꞌöba haajẽ?
hajim.
Maagjeewai mʌ Israelpie hʌʌi kꞌaba hʌab mamʌ,
¿pua mʌ chaaijã dau haug kꞌaugbaju kꞌai?
Mua kꞌapꞌʌ hʌm,
pua hi monaaupʌ̈iju haai simgui hajim hirig.
28 Magbaawaita,
—¡Jöo!
Jãgan chadchata mua pʌch chaai monaauju kꞌapꞌʌnaata pua hʌ̈kꞌa hʌmgui hajim.
Magan chadcha pʌchdëu jaau simjö pʌ chaai monaauju hajim hirig Jesuu.
Mag,
chadcha Jesuu mag hiekꞌabarm bʌ̈rre chi chaai monakkꞌa haadëjim haajem.
Jesuu hõor pöm monaautarr
29 Mag Sidonmua deeu maar bëewia hũwaai mag tꞌʌrrdö pöm sim Galilea haajem higaau naaichëjim,
hich Jesús dʌ̈i.
Maimua buchag gaai waaidʌwia hoo sĩsijim.
30 Mag hamach dakꞌĩir jupbaimaawai hõor pöm hi haar wëtwi hi bigaau pꞌʌʌrbaadëjim.
Mag hõor pöm tꞌʌnʌm hee hi haig haibëemajim:
bʌ̈ wëdʌ wëdʌ kꞌitꞌëem kꞌʌʌn,
dau kꞌĩsum kꞌʌʌn,
bʌ̈dam wa juadam kꞌãijã hãkꞌãraam kꞌʌʌn,
meu meraam kꞌʌʌn maimua tag haaunaan kꞌamor machag kꞌĩirpierr hi haig haibëenaa hi bʌ̈kꞌʌrr hausĩumaajeejim.
Maagwai magʌm tꞌum hichdëu monaaupʌ̈i maajeejim.
31 Hamach daúacha mag meu meraa kꞌitꞌëe harrjã hijẽb nʌrrjëe,
juadam wa bʌ̈dam kꞌãijã hãkꞌãraa kꞌitꞌëe harrjã monakꞌa,
maimua dau kꞌĩsu kꞌitꞌëe harr kꞌʌʌnpa dau wajapꞌa nʌrrjëem hoowia,
sĩi hõor dauderraa naajim.
Mag hamachdëu hoo nʌm gaaimua maach meeun kꞌabam kꞌʌʌnaupata maach meeun israelnaan Hẽwandamag jëeupꞌöo tꞌʌnaajim.
Hemkꞌooin happai cuatro mil Jesuu jãhogtarr
32 Maimua mag maach hich dʌ̈i hogdʌba wënʌrraajerr kꞌʌʌnagta,
—Hõor pöm mʌg tꞌʌnʌm mʌ dau hee dau hapꞌʌʌ durrumgui hajim.
Ya kꞌãai tꞌãrjup pam ham maach haigmua bʌ̃ʌrjã hogdʌba,
tꞌachdam kꞌöjujã chukꞌu nʌm.
Hich jãg tꞌach kꞌöba chan mua hamach diig pʌ̈imapꞌa chirʌmgui hajim.
Hich jãg pʌ̈ikꞌiin,
di haar barba kꞌãijã kꞌʌd hee jãdaúa pꞌʌrëubajupa hajim,
hich Jesuu.
33 Magbaawaita marau hirig,
—Mamʌ mʌg hõorjã chuk sim hee,
¿jam maadëu kꞌöju bawaagauma?
hanaajim,
hõor pöm mʌg tꞌʌnʌm kꞌöpieg.
34 Magbaawai hich Jesuu marag,
—¿Pãrau pan dau kꞌarr wai nʌma?
ha jëeujim.
Magbaa marau,
—Sietepai,
maimua hãwarrdamjã har dau kꞌapan kꞌaba durrumgui hanaajim.
35 Magbaawai hichdëu hõrag kꞌʌt jupkꞌapi jaauwia,
36 mag pandam siete narrjã chi hãwarrdam dʌ̈i hãba jua hee pꞌë hauwia,
Hẽwandamag hʌ̈u hajim hanaa tꞌorreubaadëjim.
Magnaa maachig hʌapʌ̈imaawai marau jũrr hõrag jigmajim.
37 Mag jig pꞌʌʌrdʌdʌgmamua tꞌumaam kꞌʌʌnau hamachdëu kꞌöm haig kꞌötarrjã,
pan pöm sob tꞌʌnʌisijim.
Mag chi sobtarr,
tꞌʌbʌt siete marau hipiirkꞌa haujim.
38 Mag hed mag chi tꞌach kꞌö narr kꞌʌʌn cuatro mil naajim,
hemkꞌooin happai,
hʌʌinjã beerba ni chaainjã beerba.
39 Maimuan chadau hõrag wëtpi jaaubaawai hagdaujö hamach majupierr haaidʌjierram.
Mag tꞌumaa hërëubaadeewain chadau,
hichjã jap hee waaidʌbaadee,
marau hi Magadanag harrjim.