Hedau höbeerjem bi garmua reinaanau chaai hootꞌurtarr
2
Mag Jesús tꞌaabaawai pꞌöbördam Belén hanʌm heeta tꞌaabajim haajem,
Judea durr.
Mag jaar Herodeeta mag Judea durr reikꞌa sĩejim haajem.
Hich mag jaar hĩchab kꞌĩirjug kꞌaug hatꞌee chi machnaan magonaan hanʌm kꞌʌʌn hedau höbeerjem bi garmua bëejierram haajem,
Jerusalén pꞌöbörög.
Makꞌʌʌn,
hedjã heem pꞌĩdagta estudiejem kꞌʌʌn hajim haajem.
Visita de los magos (Mateo 2.1-23)
2 Mag bëewi bardʌtkꞌachëwi,
judionaanag,
—Pãar rey tꞌaabatarr,
¿jamta wai nʌma?
Hi tꞌaababarm jaau sim pꞌĩdag maach daúacha hootarr haawai hiita marau jʌr wëdurumgui haajeejim hanʌm,
hiita judionaan reikꞌaju haawai hi hajaug tꞌö hiekꞌaan.
3 Mag judionaan rey tꞌaababarm hanʌm hũr hatꞌaawai chi rey Herodes warre kꞌakꞌaisamjö haadëjim hanaabá.
Mag nʌm dʌ̈i tagam kꞌʌʌn chi Jerusalenpienjã jʌ̃gderraata hapꞌöbaadëjim hanʌm.
4 Magbaawai chi rey Herodeeu pꞌadnaan chi pörnaan tꞌum Moiseeu Hẽwandam hiek pꞌã pʌarr jawaag chi machnaanpa tꞌʌ̃rkꞌʌʌipʌ̈iwia hamag,
—¿Jamta mag warrgarwe Hẽwandamau pʌ̈iju jaaujerr tꞌaabaju haajẽ?
hajim hanʌm.
5 Magbaawai hamachdëu hirig,
—Judea durr pꞌöbördam Belén hanʌm heeta tꞌaabaju haajem hanaabahab,
hich magta Hẽwandamau hich hi jaaumie Miqueas kꞌakꞌitarrag jaaupitarr haawai hajim hanʌm.
Mag hirua jaautarr hiek gaai,
6 “Pãar,
Judá durram pꞌöbördam Belenpien,
pãran chadcha kꞌapan kꞌaba durrum.
Mag durrab mamʌ,
pãar hee hãb tꞌaababarmuata israelnaan mʌ hõorkꞌa tꞌʌnʌm kꞌʌʌn gobernaaju haawai,
pãach durr hagjö pꞌöbör tꞌʌnʌm hee pãar pꞌöbör chan chi serbiibam kꞌabam” ha pꞌã simgui hajierram hanʌm,
chi Herodeeg. (Mi 5:2)
7 Pꞌadnaan chi pörnaanau maestronaan dʌ̈imua hichig mag jaaubaawai,
chi rey Herodeeu jũrr mag chi magonaan hed höbeerjem garmua bëetarr kꞌʌʌn hamach happai tꞌʌ̃rkꞌanaa wajapꞌa hichig jaaupijim hanaabá,
jãagwaichata mag pꞌĩdag hamau hoo naajĩ.
8 Mag wajapꞌa hichig jaaupinaan chadau hamag,
—Hĩsin chad hërëubaadët hajim hanʌm,
Belenag.
Hërëubaadëwi tꞌumaa jëeu hoopetat hajim hanʌm,
wajapꞌa mag chaai kꞌap haag.
Maimua ya pãachdëu wajapꞌa kꞌapꞌʌ nʌisiewai mau mʌ haar hiek pʌ̈ibapʌ̈it,
muajã mawia hĩchab pãar dënjö hi hajaug tꞌö hiekꞌaimaag hajim hanaabá,
juau hogtꞌom.
9 Mag chadcha chi rey Herodeeu hamachig jaautarrta jʌ̃g tꞌõba hërëubaadëjim haajem.
Mag wëtumua,
warrcha hamach tꞌʌgdʌawai hamachdëu pꞌĩdag hootarrta deeu hũwaai ham na pꞌuu jöisijim hanaabá.
Magbaawai hag hẽudee hoo warrmamua,
ya chi chaai sim haig pabaimaawai,
hag hʌ̃r hedjã hee bar jöisijim hanʌm.
10 Mag hamach chi magonaanau chi pꞌĩdag hoo hatꞌaawai honee hapꞌöbaadëjim hanʌm.
11 Mag barwia,
chi chaai kꞌërarr haar dubnaa hooimaawai,
chadcha chi chaaidam hich María dʌ̈i hooimajierram hanaabá.
Magbaawai hag kꞌĩirpꞌee jĩepör pꞌõbkꞌanaa hi hajaug tꞌö hiekꞌajierram haajem,
hich reikꞌaju higwi.
Magnaa hamach nem wai bëetarr heem pꞌĩr maimua incienso mirra dʌ̈i tꞌũpꞌa kꞌitꞌëem haunaa hirig deejierram haajem.
12 Mag hagtꞌa ham haig nʌm hee,
hich chi Hẽwandam chogau kꞌãai kꞌõrg hee tag hamag Herodes gar dichpiba jaautarr haawai,
hag garjã dichba,
deeum kꞌʌd garta pꞌʌʌrdʌ dichwi hamach durrag wëtjierram haajem.
Egiptoog chaai dʌr harrtarr
13 Mag chi magonaan hërëutarr kꞌur Hẽwandam chogau deeu José kꞌãai kꞌõrkꞌapi hauwia hirig jaaujim haajem,
Herodeeu chaai tꞌõopʌ̈yaag jʌrpiju.
“Mamʌ magju nawe pꞌiidʌtkꞌawi jöpkꞌaa chaai dʌ̈i Egiptoog hërëubaadët” hajim hanaabá.
“Mua jaaubam haig chan hoob mammua bëemiet” hajim hanʌm.
14 Magbaawai José daukꞌanpawi,
chadcha hag bʌ̈rre nem kꞌĩir kꞌaugwia,
hagtꞌa hãspaju wají nʌwe,
jöpkꞌarraa hamach chaai hatꞌaadëjierram haajem,
Egiptoog.
15 Mammua da bëeba,
ya chi Herodes meebaadëm ha hũrbaawaita deeu bëejierram haajem.
Pari mam mag chaai harrtarran,
maan maach Pör Hẽwandamau hich hi jaaumie Oseas kꞌararrag jaaupitarrjö hamkꞌĩir hajiebma.
Magju higwiata chi Oseas kꞌararrag Hẽwandamau,
“Egipto durrmuata mua mʌch Chaai tꞌʌ̃rpʌ̈iju” ha pꞌãpijim. (Os 11:1)
Herodeeu chaain kꞌëchpi jaautarr
16 Herodeeu chi kꞌĩirjug kꞌapꞌʌm kꞌʌʌn nʌ sim hee,
hĩchab kꞌaug hatꞌajim haajem,
ya jũrr deeum kꞌʌd garta pꞌʌʌrdʌ hërëubaadëm.
Mag hich kꞌũgurbapäaiwai,
kꞌĩir machgau warm kꞌʌʌnau hichig jaautarr kꞌĩirjunaa,
Belén pꞌöbör heem chaain maimua hag bigaau pꞌöbördam nʌnʌidʌm heem chaaindampa tꞌumaa año numiimua heegam kꞌʌʌndam kꞌëchpi jaaujim hanaabá.
17 Mag kꞌëchpi jaautarran,
maan mag chaain höbarm gaaimua Hẽwandamau hich hi jaaumie Jeremías kꞌararrag pꞌãpitarr gaai jaau simjöta hajim.
Hirua pꞌã pʌatarr mʌg hajim:
18 “Ramá pꞌöbör hee hʌʌi bĩep jẽhbʌ hökꞌĩirjug machgau hidawaa hʌ̃apëpër kꞌaju.
Ma Raquel hajim,
hich chaain hewagam kꞌʌʌn hatꞌee bĩewai.
Mag sim chan par kꞌĩir jãsenkꞌa nʌmjã kꞌĩupaba,
waragta bĩe tꞌʌnaaju hich chaaindam hötarr hatꞌee” ha pꞌã sim Hẽwandam hiek gaai. (Jr 31:15)
19 Pari chi Herodes meetarr kꞌur,
hagtꞌa chi José mam Egipto nʌm hee,
Hẽwandamau hich chog pʌ̈iwi kꞌãai kꞌõrkꞌa tꞌʌnʌm heeta hirig,
20 —José,
pꞌiidʌbá haichëjim hanʌm.
Chaai tꞌõoju hẽkꞌa narr kꞌʌʌnjã hamachta ya kꞌëchpꞌöbaadeewai ya deeu pãach durrag chaai harrju haai nʌmgui hajim hanʌm.
21 Magbaawai José pꞌiidʌwia Jesudam dʌ̈i chi hãdpa deeu hũwaai Israelag bëejierram haajem.
22 Pari mag chi rey meebaadeewai,
chi hiewaa Arquelao ha tꞌʌ̃r sĩerrta jũrr Judea durr hich haaijö reikꞌa sĩsim ha hũrbaawai,
hagʌg maju högkꞌajim haajem.
Mag nʌm hee hĩchab deeu Hẽwandamau kꞌãaipi hatꞌaawai,
Hẽwandam chogaujã magʌg mapiba jaautarr haawai jũrr Galileaagta hërëujim hanaabá.
23 Galilea durr barwi,
sĩi kꞌajapꞌa Nazaret pꞌöbördamagta wëtwi,
mamta naaimajim haajem.
Pari mag Nazaret pꞌöbör heeta naaimarran,
maan Hẽwandamau hich hi jaaumienag jaaujerrjö,
Jesús Nazaretpierr ha tꞌʌ̃rju harr haawai hajima.