Ibala ya padunia na ya kunani
9
Lilagano li'lu' lilongoi lyabile na amuli yake yo kilikitya, kai' paabile na papeleteu pake pa kidunia. 2 Paasengilwe ema, na pangu'lu' yake paakemilwe pandu papeleteu, na paabile na pandu po bi'ka kimulikyo na mesa ya makati gagaapiyilwe kwa Nnu'ngu'. 3 Na nsu'gu' ya panjia yenebi'li', kwakemilwe Papeleteu Muno. 4 Akwo kungati kwabile na kibi'ki'lyo so ukikiya ubani sakitengenesilwe na zaabu. Na kai' kwabile lisanduku lya lilagano, lyaliwambilwe na zaabu na nkati yake kwabile na kiteleko sa zaabu sakibile na likati lyalikemelwa mana, pimbo ya Aluni yayaabile yipwike, na yi'lu' ibao ibi'li' ya maliwe yaiandikilwe lilagano. 5 Na panani ya lisanduku lyo paabile na pisa ya yumbe yene mapapayo yailaya utukupu wa Nnu'ngu', na mapapayo go gaawi'ki'li kiti'gu' so samya masambi. Lakini nambi'yambi' kwenda nga nsimu wo awanikiya mpu'la makowe aga goti lili.6 Bai ili'be yoti payaabi'kilwe wiso, api'ndo aku'lu' ba dini baayingi kila lisu'ba pangu'lu' ya ema li'nga panga ibala. 7 Lakini mpi'ndo nku'lu' ywa dini bai ngaywaayi'ki'tilwe yingya kungati ya ema, naywembe apangage nyo mala yimo bai kwa mwaka, ku'no apu'twile myai ya kumpikiya Nnu'ngu' kwa kitumbu sa masambi gake mwene na kwa masambi ga bandu bi'ngi' gagapangilwe pangali tanga. 8 Bu'kana na makowe ga goti, nsimu woti wa pangu'lu' ya ema kapapanga kasi, Loo Mpeleteu aabile kalaya panga ndi'la yo yingya Pandu Papeleteu Muno paabile panayu'gu'li'lwali. 9 Gu'no nga mpwano kwitu nambi'yambi', panga salaka na mapiyo mbali'mbali' gagapiyilwa kwa Nnu'ngu' gakombwali kumpanga yu'lu' ywakilikitya abe mundu mwene mwoyo ntimilika. 10 Aga goti gagabu'kana na ilyo, inywo na kwipeleteya yi'ga nga makowe ga padunia bai, na makakala gake gaayomwike palu' Nnu'ngu' paabi'i wiso ndi'la yake yayambi'.
11 Kilisitu aaisi li'nga abe Mpi'ndo Nku'lu' ywa dini kwa makowe manogau gagaisile. Ywembe apanga kasi muema inannoga muno, kai' yaitimilike kulikoni ema yailongolile. Ema yo isengilweli na moko ga bandu, lombolya ya padunia yi'noli. 12 Ywembe aayingi Pandu Papeleteu Muno mala yimo bai, kwa nsimu woti. Ywembe apelikeli salaka ya myai ya mbwi na ya ng'ombe, ila myai yake mwene. Kwa ndi'la yi'lu', ngatukosopolya milele. 13 Bandu babaabalangilwe panga asapu bu'kana na mimu, baapeleteyilwe kwa ndi'la ya kwanyunyikiya myai ya mbwi na ya ng'ombe na maligu gagabu'kana na likinda lya ng'ombe lyalitiniyilwe. 14 Bai, myai ya Kilisitu ibile na makakala muno kulikoni myai ya inyama yo, ywembe aaipiyite kwa Nnu'ngu' kwa makakala ga Loo wa milele li'nga apange salaka yangali kipi'li' sosoti. Myai yake ngayaitupeleteya myoyo yitu bu'kana na iyendo yaileta kiwo, li'nga tuntumikiye Nnu'ngu' ywabile nkoti.
15 Kwa nyo, Kilisitu nga mwawaniyi wa bandu na Nnu'ngu' mulilagano lyayambi', li'nga bandu babasaulilwe na Nnu'ngu' bapate balaka yangayomoka yaalagile. Makowe go gawesa pangika kwa mwanjaa Kilisitu aawile li'nga kwakosopolya bandu bu'ka mumasambi gabaapangite mulilagano lya kwai'mbu'.
16 Mundu mana aandike usia wa ulisi wa ili'be yake, usia wo waalu'a panga kasi palu' bai paalu'a yomoka yu'lu' ywaandike, 17 Kwa mwanjaa usia wa ulisi upanga kasi palu' bai paipanga ywaandike ayomwike, na kwenda abile balo akalamali. 18 Si'no nga kitumbu sa lilagano lya kwai'mbu' panga lyaapangite kasi kwa ndi'la yo yitanika kwa myai. 19 Musa paanwayite salya yoti kwa bandu boti, aatweti myai ya likinda lya ng'ombe na ya mbwi no yangabana na masi'. Naywembe nganyunyikiya myai yo mukitabu sa salya na kwa bandu boti, kwo tumya manyoya makele ga ngondolo gagaatabilwe mulutambi' lwa nkongo waukemelwa hisopo. 20 Musa aatibaya, “Yi'no nga myai yaipanga lilagano lya Nnu'ngu' lyamwaamuliswe, muliyu'we.” 21 Kai' Musa aainyunyikiye myai yo muema na kwa kila kili'be sakitumika muibala. 22 Salya ibaya panga, kalibu kila kili'be kipeleteyelwa kwa myai, nayembe sambi nyinyonyo, ibu'yi'lwa kwo yitanika myai.
Salaka ya Kilisitu ibu'ya masambi ga bandu
23 Makowe go gaabile kiwili sa makowe ga kibelekwe kunani, gagaapalikwe peleteyelwa kwa salaka ya inyama. Lakini makowe ga kibelekwe ga kunani gapalikwa baa na salaka ya ngama munomuno. 24 Kwa mwanjaa Kilisitu aayingili Pandu Papeleteu Muno papaasengilwe na bandu, pandu po pai kiwili sa pandu pa kakape papabile kunani. Ila aayingi kunani kwene na akwo nambi'yambi' endakutulu'bya nnu'ngi' ya Nnu'ngu'. 25 Mpi'ndo nku'lu' ywa dini ayingya Papeleteu Muno abile na myai ya inyama mala yimo kila mwaka. Lakini Kilisitu aayingili kunani li'nga aipiye panga salaka mala yambone, ila mala yimo bai. 26 Ikapangage nyoli, Kilisitu alu'e palikwa ku'su'mbu'lwa mala yambone bu'ka umbilwa kwa dunia. Lakini mumasu'ba gano ga kuundi'la, aisi kwipia mwene salaka mala yimo bai kwa nsimu woti, li'nga kutusamya masambi gitu. 27 Bai amo ngamwaibile panga kila mundu apalikwa waa mala yimo bai, no bu'ka po ukumilwa na Nnu'ngu'. 28 Nyinyonyo Kilisitu apiyilwe panga salaka mala yimo bai, li'nga agapu'twe masambi ga bandu baingi. Kai' paalu'a isa pampanda pabi'li', aaisali bu'ya masambi, Ila kwapeya ukosopoli balu' bandu babanni'nda kwo binia muno.