Yesu mpi'ndo witu nku'lu' wa dini
8
Bai, likowe lya ngama mumakowe goti gatulongela nga ali', panga tubile nakwe mpi'ndo nku'lu' ywa dini wa sampuli yi' ywatama kummalyo ga kiti'gu' sa lenji sa Nnu'ngu' Nku'lu'. 2 Ywembe apanga lyengo lya upi'ndo nku'lu' wa dini pandu papeleteu muno nkati ya ema ya kweli yaisengilwe na Nnu'ngu', na kwenda bandu lili.3 Kila mpi'ndo nku'lu' ywa dini abi'kilwe li'nga piya salaka na mapiyo gi'ngi'. Bu'kana na go, yapalikwe ata Kilisitu abe naso kili'be sa kumpikia Nnu'ngu'. 4 Ikapangage Yesu akayendelya tama pano padunia alu'e pangali mpi'ndo nku'lu' ywa dini, kwa mwanjaa, babile api'ndo aku'lu' ba dini babapiya salaka bu'kana na salya ya Musa. 5 Lyengo lya api'ndo aku'lu' ba dini lyabalipanga palu' papeleteu, nga kati mpwano na kiwili sa galu' gagabile pandu papeleteu akwo kunani. Aso nga kitumbu sa Musa nsimu wa kwibi'ka wiso senga ema ya kunkilikitya Nnu'ngu', Nnu'ngu' aammakiye panga, “Utengenese kila kili'be kati mwanaakulayite ku'lu' kukitu'mbi' sa Sinai.” 6 Nnu'ngu' ampei Yesu lyengo lya upi'ndo nku'lu' wa dini waunogite muno kulikoni api'ndo aku'lu' ba dini babalongolile. Yesu nga ywaawana bandu na Nnu'ngu' mulilagano linannoga kulikoni li'lu' lilongoi, kai' lilagano lyo lisengilwe munsingi unannoga muno kulikoni li'lu' lya kwai'mbu'.
7 Ikapangage li'lu' lilagano lya kwai'mbu' lili'nganikiye kulu'e panga ntu'pu' kitumbu sa lilagano linebi'li'. 8 Nnu'ngu' aakwi'like bandu bake kabaya,
“Masu'ba gendaisa abaya Bwana,
panaalipanga lilagano lyayambi'
kwa bandu ba Isilaili na ba Yuda.
9 Lilagano lyangu' li'no, lipangali kati li'lu' lyanalipangite na au'ku' babe,
panaalongwiye wiso bu'ka ku Misili.
Bembe baau'bi'likeli mulilagano lyangu',
na nenga nganaaleka, abaya Bwana.
10 Li'no nga lilagano lyanilu'a panga munyumba ya Isilaili kwa masu'ba gagaisa, abaya Bwana.
Naalu'a kwibi'ka salya yangu' mulunda lwabe,
na kwiandika mumyoyo yabe,
Naapanga na Nnu'ngu' wabe
na bembe baapanga bandu bangu'.
11 Kwapanga ntu'pu' mundu ywaalu'a kunnyi'gana nnyine
wala kummakia nnongowe panga,
‘Untange Bwana Nnu'ngu',’
Boti tumbulya nnangu'ta mpaka mpi'ndo, baanitanga.
12 Naasamya ulau wabe,
na, naaku'mbu'kyali masambi gabe.”
13 Nnu'ngu' paalikemite lilagano li'no lyayambi', aalipangite li'lu' lilongoi lipange ligona. Kili'be kigona, aso kiegelya yomokya.