Imani na salya
3
Mwenga Mwaagalatia, mwaalalo! Mulogilwe na nyai? Abali bu'kana no bambilwa kwa Yesu Kilisitu munsalaba, yaawanilwe mpu'la nnu'ngi' ya minyo ginu. 2 Nipala nitange likowe limo bu'ka kwinu. Buli, mwaapoki Loo ywa Nnu'ngu' kwa kitumbu so kamwa salya au kwa kugau'bi'lya galu' gamwaagayu'wine? 3 Buli, kwani mwenga mwaalalo kati nya? Mwatumbwi maisa ginu kwa makakala ga Loo Mpeleteu! Buli, mupala yomolya kwa makakala ginu mwabene? 4 Buli, makowe goti gagampatike mwenga, gaai gabule bai? Lili, iwesekanali. 5 Buli, Nnu'ngu' ampei Loo wake no panga mangelongelo pakatikati yinu kwa kitumbu so kamwa salya lili ila kwa kitumbu sa kugau'bi'lya galu' gamwaagayu'wine?6 Maandiko Mapeleteu gabaya nyinya, “Bulaimu aamwu'bi'li Nnu'ngu', ngabalangilwa panga mundu mwene aki nnu'ngi' yake.” 7 Tumbwe lelo, mutange panga bandu babamwu'bi'lya Yesu, abo kakape nga bana ba Bulaimu. 8 Maandiko Mapeleteu gaalondolilwe bu'ka kwai'mbu' panga bandu bangali Ayahudi baalu'a balangilwa aki nnu'ngi' ya Nnu'ngu' kwa ndi'la ya imani yabe. Gaalongoli aalilwa kwa Bulaimu panga, “Pi'tya kasako bandu ba mataipwa goti baalu'a yaliwa.” 9 Bai, balu' bababile na imani, bayaliwa pamope na Bulaimu mundu ywa imani.
10 Lakini boti babau'bi'lya timisa gagabu'kana na Salya ya Musa bai bakosike lasi kwa Nnu'ngu', kwa mwanjaa Maandiko Mapeleteu gabaya, “Mundu ywoywoti ywakana kamwa no timisa goti gagaandikilwe mukitabu sa Salya, akosike lasi.” 11 Kwa nyo ilaya mpu'la panga, ntu'pu' mundu ywabalangilwa aki nnu'ngi' ya Nnu'ngu' kwa ndi'la ya kwikamwa salya, kwa mwanjaa Maandiko Mapeleteu gabaya, “Mwene aki aalama kwa ndi'la ya imani.” 12 Salya iu'bi'lyali imani, paali pake iu'bi'lya iyendo ya mundu yaipanga. Kati Maandiko Mapeleteu mwagabaya, “Mundu ywapanga goti gagapalikwa na salya, aalu'a lama kwo kamwa salya yo.”
13 Kilisitu aatukosopoli bu'ka mulasi ya salya, kwo tola lasi yo kwa kitumbu situ. Kwa mwanjaa iandikilwe panga, “Ywoywoti ywaabambilwa munsalaba, apatike lasi.” 14 Aatukosopoli li'nga panga balaka yaapeilwe Bulaimu ipate kwaikya bandu bangali Ayahudi kwa ndi'la ya Kilisitu Yesu, li'nga kwa imani tupate kumpokya yu'lu' Loo ywaatulagi Nnu'ngu'.
Salya na lilagano
15 Mwaalongo bangu', nilu'a kumpeya lukongo lwalubu'kana na maisa gitu ga kila lisu'ba. Tubaye bandu abi'li' baabi'i mayi'ki'tyano kwa malagano nsi'si'. Malagano go pabagapangite, ntu'pu' mundu kai' nkati yabe ywaawesa kugati'kwana au yongekeya kili'be si'ngi' panani yake. 16 Bai, Bulaimu apeyilwe malagano ywembe pamope na mmelekwo wake. Maandiko gabayali, “Na lubelekwo lwake,” yani baingi, ila gabaya, “Na mmelekwo wako,” yani Kilisitu. 17 Kili'be sanilu'a baya nga si'no, panga Nnu'ngu' ayomwike panga lilagano kwa ndi'la ya aki. Na ayo salya yaapitike myaka 430 nsu'gu' yake, kwa nyo iwesali ti'kwana malagano au galambwa galu' gaalagi Nnu'ngu'. 18 Kwa mwanjaa mana ulisi kaupatikana kwa salya, bai uu'bi'lyali kai' malagano. Lakini Nnu'ngu' kwa ngu'ngu' yake ampei Bulaimu ulisi kwa ndi'la ya malagano. 19 Tumbwe lelo kwa ki'li' kube na salya? Salya yaatiyongeyelwa kwa kitumbu so laya sambi ya bandu, mpaka paalu'a isa yu'lu' Mmelekwo wa Bulaimu, ywaatambulilwe mu li'lu' lilagano. Salya yi' yaaletilwe na malaika kwa luboko lwa mwawanikiyi, Musa. 20 Kwa nyo, mwawanikiyi apalikwa ba manaitei kubile na masikisano ga ku'no na ku'no, lakini Nnu'ngu' yumo bai, antumili mwawanikiyi paampei lilagano Bulaimu.
Kitumbu sa salya
21 Buli, salya yendataukana na malagano ga Nnu'ngu'? Ata pasene! Kwa mwanjaa mana salya yaipiyilwe iwesa kwapeya bandu ukoti, bai mundu alu'e wesa balangilwa aki nnu'ngi' ya Nnu'ngu' kwa ndi'la yo kamwa salya. 22 Lakini nyoli. Maandiko Mapeleteu gabaya panga bandu boti batabilwe muutawala wa sambi. Kwa kitumbu so, bandu boti babamwu'bi'lya Yesu Kilisitu balu'a pokya lilagano li'lu' lya Nnu'ngu'.
23 Kubile balo pitya nsimu wa imani, twaalongoyilwe na salya, kati twaatabilwa, katuli'nda mpaka imani yi'lu' iumukulilwe. 24 Salya yo yaabile kati nneli ywitu mpaka nsimu waaikite Kilisitu, li'nga kwa ndi'la ya imani tupate balangilwa aki nnu'ngi' ya Nnu'ngu'. 25 Lakini nambi'yambi', imani mu Kilisitu Yesu iikite, kwa nyo tubileli kai' pai' ya salya, yayaabile kaitulela.
26 Kwa mwanjaa mwenga mwaboti mwabana ba Nnu'ngu' mu Kilisitu Yesu kwa ndi'la ya imani. 27 Mwanjaa mwaboti mwamubatisilwe no lu'mbana na Kilisitu, mubile kati mung'weti Kilisitu. 28 Kwa nyo, nkati ya Kilisitu kubileli na ubauli panga, wenga wa Nnyahudi au Nyunani, mundu mmanda au nngwana, nnalu'me au nnwawa. Mwaboti mubile nsawani kwo lu'mbana na Kilisitu Yesu. 29 Mana itei mwenga nga mwabandu ba Kilisitu, bai mwenga nga mwalubelekwo lwa Bulaimu, na mwaalu'a pokya ulisi kati mu'lu' mwaalagi Nnu'ngu'.