Pauli na atumilwe bi'ngi'
2
Bu'ka po pi'ta myaka ku'mi na nne, nau'bwi'ke kai' yenda Yelusalemu pamope na Balanaba, nganintola na Tito kai'. 2 Naayi'i ku Yelusalemu kwa kitumbu sa maumukwo gaaniumukuli Nnu'ngu', li'nga nikaawanikiye kikolongosi pakisabe. Nganaawanikiya yi'lu' Abali Inannoga yaniiala kwa bandu bangali Ayahudi. Naapangite nyo li'nga kasi yangu' yanaayomwike panga, na yi'lu' yaniipanga nambi'yambi', yaakane panga yaabule bai. 3 Tito ywaabile pamope na nenga aai Nyunani, lakini aali'ndi'ndilweli inilwa. 4 Baabile aumini bi'ngi' ba ubu'su' babaayingi kwa kwiiya, ngabapalage kumwina. Bandu bo bapalage pekeseni uulu witu watupeyilwe na Kilisitu Yesu, li'nga bapate kutuyi'ya muubanda wa salya ya Musa. 5 Twaayi'ki'tyanieli nabo ata pasene li'nga ukakape wa Injili uigale na mwenga masu'ba goti.6 Lakini kikolongosi balu' ba kanisa babaisimu muno bandu, baabile ntu'pu' likowe lyolyoti lyayambi' lya kuniyongeya. Na kakape baatiisimu muno, lakini kwangu' nenga alyo likowe lya ngamali, mwanjaa kwa Nnu'ngu' ntu'pu' ubauli. 7 Lakini kikolongosi bo baatangite panga, Nnu'ngu' anitumike niale Abali Inannoga kwa bandu bangali Ayahudi, kati mu'lu' mwaatumilwe Petili ala Abali yo kwa Ayahudi. 8 Kwa mwanjaa yu'lu' ywaampangite Petili panga ntumilwe kwa Ayahudi nga ywoywoywo ywaanipangite nenga panga na ntumilwe wake kwa bandu bangali Ayahudi. 9 Bai, Yakobi, Petili na Yoani, babaabonekine panga kikolongosi aku'lu' ba kanisa, pabakwipwi panga Nnu'ngu' ngaywaaniyalile yi'lu' ngu'ngu' ngabatukamwa luboko nenga na Balanaba kwo laya panga tubile kiselele. Kwa nyo, ngatuyi'ki'tyana panga twenga tuyende kwa bandu bangali Ayahudi na bembe kwa Ayahudi. 10 Lakini bandu bo baatulu'bite kili'be simo panga, katwaaku'mbu'kya aki'ba. Na likowe lyo kwa kakape, nendebinia muno kulipanga.
Pauli ankalipya Petili
11 Lakini Petili paaikite Antiokia, lisu'ba limo naatikuntaukya mpu'la nnu'ngi' ya bandu kwa mwanjaa aatikosa. 12 Patumbu bi'ngi' ba bandu ba kipi'nga sa Yakobi pabaabile balo isa po, Petili aabile kalya pamope na bandu bangali Ayahudi. Lakini bu'ka po ika bo, aalekite mpamo lya pamope na bandu bangali Ayahudi, kwo yogopa kipi'nga sa bandu babakong'ondelya inilwa. 13 Na Ayahudi bi'ngi' ngabalu'mbana nakwe muunapiki waupangage Petili, ata Balanaba naywembe ngayingya muunapiki wo. 14 Bai paniibweni panga bakotali kwa ukakape mwaipalikwa Injili, nganimmakia Petili mpu'la nnu'ngi' ya bandu boti panga, “Pamope no panga wenga wa Nnyahudi, lakini ubi'ngi'yali mimu ya Kiyahudi! Tumbwe lelo walu'a wesa buli kwapangiya bandu bangali Ayahudi babi'ngi'ye mimu ya Kiyahudi?”
Ayahudi na bangali Ayahudi bakosopolelwa kwa ndi'la ya kumwu'bi'lya Yesu
15 Kakape twenga kwa kibelekwe situ, twa Ayahudi na kwenda twabandu bene sambi kati bandu bangali Ayahudi lili. 16 Lakini tutangite panga, mundu awesali balangilwa aki kwo koleya salya ya Musa, ila kwa ndi'la ya kumwu'bi'lya Kilisitu Yesu. Kwa nyo ata twenga twa Ayahudi tumwu'bi'lya Yesu Kilisitu li'nga kwa ndi'la yo, Nnu'ngu' atubalangili aki nnu'ngi' yake. 17 Bai, mana katupala balangilwa aki mu Kilisitu, bi'ngi' batubaya panga twabene sambi kwa mwanjaa twikamwali salya ya Musa. Buli, likowe li' lilaya panga Kilisitu nga ywatupangiya tupange sambi? Lili, ata pasene! 18 Lakini manaitei nenga kanisenga kai' si'lu' saniyomwike sengwana, bai apo nenga nikong'ondelya panga nikosite. 19 Kwo bu'kana na salya yo nenga niwile. Niwile musalya yo li'nga nipate lama kwa ndi'la ya Nnu'ngu'. 20 Nibambilwe pamope na Kilisitu, wala nengali kai' ywanilama, ila Kilisitu nga ywalama nkati yangu'. Bwu'mi wanibile nawo nambi'yambi' wa muyi'ga, nilama kwa ndi'la ya kumwu'bi'lya Mwana wa Nnu'ngu', ywanipendile kwo piya bwu'mi wake kwa kitumbu sangu'. 21 Niikanali ngu'ngu' ya Nnu'ngu', kwa mwanjaa ikapangage aki kaipatikana kwa ndi'la ya salya, bai waa kwa Kilisitu kulu'e panga kili'beli.