Cautera Mǝdǝmbe mala Yohana ka à gilǝì ace ɓakɓabum amǝɓalle ɓǝa do aɓa dotarǝu andǝa Ɓakuli andǝ Muni, Yesu Kǝrǝsti, sǝ ɓǝa nunkiria arǝ kpata kanigir mǝ'nyirì mǝnana nǝ̀ kiɗiki dotarǝu mǝnia ka. Aɓa kanigir mǝ'nyirì mǝnia ka, à bang ama je mala ɓwa andǝ agir ɓanza ka, nda kǝ yinǝi mǝɓike ka, ace mani ka, Yesu mǝnana Muna mala Ɓakuli na ka, duk ɓwapǝndǝa ɗang. Amǝnia yì amǝkanigir mǝ'nyirì ka à kǝ na pale ama ɓǝ̀ ɓwa nǝ̀ kum amsǝban ngga, she nǝ̀ kum panzǝban aɓa do ɓuanǝbum aɓa mǝnia yì ɓanza ka; sǝ yia ɗǝm ngga à kanigir ama kum amsǝban ngga kǝgir kpapi andǝ cau mala doɓaɓoarnsari ko lǝmndǝ earcearǝu aban aɓwana ɗang.

Aɓa ginǝce mǝno yì kanigir ka, mǝgilǝgir mǝnia ka bang bwāng ama Yesu Kǝrǝsti, nǝ mǝsǝcau ka ɓwapǝndǝa na. Bang ama aɓwana mǝnana à earnǝ Yesu sǝ à kǝ lǝmndǝ earcearǝu malea aban Ɓakuli ka, dumǝna pup à nǝ̀ lǝmndǝia rǝia earcearǝu. Amǝkwaɗi mǝ'mǝsǝcau nì ka à kǝ do aɓa mǝsǝcau mala tǎlaban mala Ɓakuli, andǝ paɓamuru aban Muna mala Ɓakuli, yì Yesu Kǝrǝsti; sǝ à kǝ eare ama Yesu yiu aɓa nggurǝ ɓwapǝndǝa, à kǝ oki Ɓakuli, sǝ à kǝ lǝmndǝ earcearǝu aban aɓwana, ulang earcearǝu mǝnana kǝ yiu nǝban Ɓakuli ka.