Kanigir mala aɓwana-mǝgule
15
Anzǝm mani ka aɓea amǝ Farisi andǝ amǝkani Nggurcau mala Musa pur a Urǝshalima,
à yiu aban Yesu sǝ à ɗi ama,
2 “Mana tsǝa sǝ alaggana mo kǝ yàl nzongcau mala aká sǝm?
À kǝ̀ lak buia sǝ à nǝ̀ lili ɗang!”
3 Yesu pǝlǝia wia ama:
Sǝ ace man ɗe sǝ wu kǝ yàl nzongcau mala Ɓakuli ace pakki akanigir ma'wun?
4 Ɓakuli ka bangŋa ama,
“Pè tárro andǝ nggo gulo,
sǝ ɓwa mǝnana sang tarrí ko nggè ka,
púp à nǝ̀ wali ɓǝ̀ wú.”a
5 Sǝ wun ngga wu bangŋa ama ɓǝ̀ ɓwa ne tarrí ko ngge ama,
“Gir mǝnana ɓǝ a wú nǝ́ kumo a buam ace po gbasha ka,
ǝn pani Ɓakuli ka,”b
6 ɓwe nǝ̀ gandǝ ginǝ pe tarrí ko nggè gulo nǝi.
Anggo ka wu nyesǝna cau mala Ɓakuli ɓà ace pakkiagir ma'wun.
7 Wun amǝ'kunɓarina!
Ɓangna mala Ishaya amur wun ngga nda a njari,
mǝnana bangŋa ama:
8 “Aɓwana mǝnia ka
à kǝ pam gulo
nǝ mburkunia,
sǝ ɓabumia ka
nda kuko nǝ mim.
9 Peri malea abanam ngga
mǝɓane na;
akanigir malea ka
anzongcau mala
ɓwapǝndǝa na
à kaniki ka.”c
Agir mana à kǝ tsǝk ɓwa sǝ kǝ pǝndǝki ka
10 Yesu tunǝ ɓwabunda sǝ banggia wia ama,
“Wu kwaki kir wun ɓǝ̀ cau kpaka wun.
11 Gir mana kǝ kutio a kun ɓwa ka nda kǝ pǝndǝkì ka ɗang,
cau mana purkiyi a kuni ka,
nda mana kǝ tsǝi sǝ kǝ pǝndǝki ka.”
12 Alaggana male pǝlǝa à yiu abani sǝ à ɗi ama,
“A sǝlǝ ama bum amǝ Farisi lullo arǝ cau mana a ne ka?”
13 Sǝ Yesu pǝlǝia wia ama,
“Ɓǝ̀ ya girpwala nani à pandǝi mǝnana Tárram mana a kuli ka nǝ̀ pandǝi raka,
à nǝ̀ ui.
14 Wu ɗekia;
yia ka à ndaka ante mana à kǝ bwali ante gara ka.
Ɓǝ̀ nte bwali nte gara ka,
yia kǝm ngga à nǝ̀ kpa tūli.”d
15 Bitǝrus ne wi ama,
“Bǝla sǝm ɓa kanicau mana ama girlina na kǝ tsǝk ɓwa sǝ kǝ pǝndǝki raka.”
16 Yesu nea wia ama:
Wun gbal ka cau kǝ kpaka wun re?
17 Wu sǝlǝ mbo ama gir mana kat kutio a kun ɓwa ka kǝ o a bumi,
sǝ nǝ̀ ngga pur a nza?
18 Sǝ agir mǝnana à kǝ pur a kun ɓwa ka à kǝ̀ yiu nǝ ɓabumi,
sǝ à ndaka mǝnana à nǝ̀ tsǝk ɓwa nǝ̀ do nǝ pǝndǝkya ka.
19 Àkǝ̀ ɓabum ɓwa sǝ aɗenyicau mǝɓane kǝ puro;
wal-lú,
nongnǝban a nza nǝ doɓala,
gyagung,
ǝn'i,
kumsǝkun,
sǝ zalǝban.
20 Amǝnia ka à ndaka gir mǝnana à nǝ̀ tsǝk ɓwa nǝ̀ pǝndǝki ka.
Lili nǝ abu mǝnana à lea raka pà nǝ̀ tsǝk ɓwa nǝ̀ pǝndǝki ɗang.
Paɓamuru mala mɓwama Kan'ana
21 Yesu nying ban mǝno sǝ o a nzali mala amǝ Taya andǝ amǝ Sidon.
22 Ɓe mɓwama Kan'anae mǝnana ndanǝ do a mǝno yì bu ban ngga,
yiu abani nǝ ɓua ama,
“Mǝtalabangŋo,
Muna mala Daudaf,
sǝn mǝsǝswatǝr mem!
Ɓoarnsarilem ngga nda aɓa tanni kǝrkǝr a ɓabu kukwar mǝnana kutia rǝì ka.”
23 Yesu pǝlǝi wi kǝ cau ɗang.
Alaggana male yiu abani sǝ à zǝmbǝi wi ama,
“Sǝnbi mɓwama mǝnia ka ɓacau male ɓǝ̀ o.
Ace mǝnana camarǝ gya ata sǝm nǝ ɓua.”
24 Yesu pǝlǝia wia ama,
“Kǝ anzur mala amǝ Isǝrayila mana à ɓwarki ka nda à turam abania ka.”
25 Mɓwame yiu yi kūndǝo a ɓadǝmbǝi,
sǝ na ama,
“Mǝtalabangŋo,
bwalam kam!”
26 Yesu pǝlǝi wi ama,
“Ɓoaro ɓǝa twal girlina mala amuna ɓǝa pe anvwa ɗang.”
27 Mɓwame eare ama,
“E,
Mǝtalabangŋo,
nggearǝ anvwa ka à kǝ tarki aɓwanggina girlina mǝnana à kǝ kpaki a nzali a ban-li mala amǝtalea ka.”
28 Yesu pǝlǝa ne wi ama,
“Mɓwama,
paɓamuru mo ka nggea mǝgule na!
Zǝmbǝa mo ka à ongŋǝni.”
Kara àkǝ̀ banì rǝ muni mala.
Yesu linǝ́ aɓwana á-ine
29 Yesu nying ban mǝno sǝ gya a kun Garang mala amǝ Galili.
Kya eauwe a bum ɓe nkono do akàm.
30 Ɓwabunda pas yiu abani.
À yiu nǝ aɓwana mana à su ka,
ante,
a gbakǝre,
amǝ'talasǝuɓunna andǝ acilia pas,
à yì nongsǝia a ɓadǝmbǝi;
sǝ twalia wia ban akwano malea.
31 Ɓwapǝndǝa ndali lang à sǝn amǝ'talasǝuɓunna aban na cau,
aɓwan à su ka à lo tak,
agbakǝre lo à kǝ gya,
sǝ ante kǝ sǝnban.
Pǝlǝa à ɓwangsǝki Ɓakuli mala amǝ Isǝrayila.
32 Yesu tunǝ alaggana male abani sǝ nea wia ama,
“Ən nggǝ sǝn mǝsǝswatǝr mala aɓwana mǝnia ka,
acemǝnana à ndakani atam nongŋo tārú a dyan,
andǝa nzala.
Ɓǝa kǝa o anggo ɗang,
ace mǝsǝpǝndǝa makkia a njar.”
33 Pǝlǝa alaggana male ne wi ama,
“Ake sǝ sǝm nǝ̀ kum girlina a bondo mǝnia ka,
mǝnana sǝm nǝ̀ linǝ aɓwana mǝnia pas ka?”
34 Yesu ɗia ama,
“Agbatali bǝredi shen a bu wun ɗe?”
À ear ama,
“À nda tongno-nong-ɓari andǝ amǝnji bǝti.”
35 Pǝlǝa Yesu ne ɓwabunda ɓǝa do a nzali.
36 Sǝ twal abǝredi tongno nong-ɓari andǝ anji,
lang pangŋǝni Ɓakuli yàwá ka,
pǝlǝa ɓwanggia sǝ pe alaggana male.
Sǝ yia gbal ka,
à gaki aɓwana.
37 Ɓwabunda man kat ka lili ɗǝmbǝo,
nying cili.
Alaggana male ramnggi cili mana ueo ka,
à pwano arǝ azace tongno-nong-ɓari.
38 Laki mala aɓwana mana à lili ka,
aburana á-ine na.
Amamǝna andǝ muna mana atea ka à ɓallia ɗang.
39 Yesu pǝlǝa ne aɓwabunda ɓǝa o a la,
sǝ kutio a waru o a bu-nzali Magadan.