Mǝnia yì Malǝmce ka Kurcau Mǝbǝshe mala Ɓakuli na à nyesǝi a kun Mbula ka. Yì cau ka à tita gilǝe nǝ kun mala amǝ Gǝrik arǝ anza ɓara-ɓara.

Ɓakuli ka kǝ lǝmndǝ ɓamuri andǝ kane male aban aɓwana aɓa cau male mana à gilǝì aɓa Malǝmce male mǝgule ka. Ɓakuli pak turo nǝ aɓwana andǝ amǝ'ɓangna male, nǝ bu Bangŋo male sǝ à gilǝ mǝnia yì Malǝmce ka. À gilǝì ace mǝnana ɓǝa ɓwe ɓalli, ɓǝa oe sǝ ɓǝa surǝ gir mǝnana Ɓakuli earkiyi ce nǝ ɓwapǝndǝa ka. Ɗenyi male na yì Ɓakuli ɓǝa aɓwana a ɓanza kat surǝ cau male.

Aɓa nyesǝ mǝnia yì Malǝmce a kun Mbula ka, à pak turo nǝ kun Mbula mana bangula aɓwana surǝì ka ace mǝnana ɓǝ̀ ɓoaria aɓwe ɓalla andǝ oe, sǝ ɓǝa earce. Aɓea agir aɓalǝi mana amǝ Mbula surǝia pepe raka, sǝ aceì dupia wia abǝshe ka, à bǝlki ɓalǝia aɓa muna Malǝmce Mǝnggi Ɓalǝ Acau a masǝlǝate.

Aban amǝ Mbula ka aguro mala Ɓakuli mana à tita yiu nǝ ce ka, à yì bangŋi ko à ɓalli ka, pà nǝ kun Mbula ɗang. Bangula amǝ Mbula mana à ɓal cau mala Ɓakuli ka à ɓalli nǝ kun Fufana ko kun Ɓamur, sǝ aɓwana kat sǝ à ok amǝnia yì akun, ko à bwaltea ka pepe ɗang. Sǝa ma, nǝ ɓwamuru mala Ɓakuli ka, cau mǝnia yina aban sǝm, ndya à gilǝì nǝ kun la'sǝm sǝ à nǝ̀ oe nǝ kun la'sǝm ngga.

Malǝmce mala Ɓakuli ka, nggea Cau Mǝgule na. À gìlǝì ace mǝnana ɓǝ̀ ɓwapǝndǝa ɓalli, ɓǝ̀ oe, ɓǝ̀ ci aɓa turo, ɓǝ̀ kum amsǝban.