Ka seini ne baseen, migpangguhud meyitenged te sabeka ne prupita ne egngaranan ki Hunas. Diye sikandin mig-ugpe te Israil te igkahibang ne balabahan dapit te igsile, me 250 ne leg-un ka miglihad te pegkeimpus ni Dabid te mighari. Ka seini ne baseen, kene ne iling te duma ne me guhuren meyitenged te pegpanagne, su migpanengneng seini meyitenged te neula-ula te sabeka ne prupita ne ware migtuman te insuhu te Manama kandin ne egpeendiyeen te siyudad te Ninibi. Ware sikandin migtuman te insuhu kandin su nakataha sikandin ne kene egbulusan te Manama te eglegpad ka seeye ne siyudad ke eg-inniyug ka me etew te me sale dan. Piru tenged te kein-inuwan ne natamanan din, napehes sikandin ne miggendiye te Ninibi wey migpangguhud te igpahuhud kandin te Manama. Nataman, neenenduenan sikandin wey nasakitan puun su ware iya natuman ka ingkahi rin diye te me etew ne eglegparan te Manama ka inged dan.

Nahuhud degma te seini ne baseen ne egpalintutuu te Manama ka langun ne innimu rin iling te weyig, ngalap, kalamag wey duma pad. Piru labew te langun, nahuhud kayi ne hiid-uwen ka Manama wey dakel ka geyinawa rin, su minsan ka kuntere te keet-etawan din, impasaylu rin wey inluwas din te mig-inniyug e sikandan te me sale dan.