Ne migsuhu si Hari Aswiru ne keilangan ne egbayad te buhis ka langun ne sakup din, minsan ka diye te pulu te dahat. 2 Ne nasulat diye te sulatanan te me guhuren te me Hari te Pirsiya wey Midiya ka langun ne innimu te Hari pinaahi te geem wey te karesen din. Nasulat man-e diye ka meyitenged te kabantug ne imbehey rin ki Murdikay. 3 Su egpakasinsinundul ka katungdanan ni Murdikay te katungdanan te Hari. Neyimu sikandin ne talahuren wey amana ne igkeupii te me karumaan din ne me Hudiyu, su migpakannekal sikandin para te keupianan te me karumaan din wey te meupiya ne peg-ugpe te langun ne keet-etawan din.