Ka talaanak ne si Hagar wey si Ismail
16
Ne kene egpakaanak ka asawa ni Abram ne si Saray. Due uripen din ne matig-Ihiptu ne egngaranan ki Hagar. 2 Ne migkahiyan ni Saray si Abram, “Tenged te ware e ma behayi te Magbebaye ne Manama te anak, hendiyei nu ka uripen ku wey huliri nu sikandin. Kema ke egligkat kandin duen ded anak ku.” Ne intuman ni Abram seeye se ingkahi te asawa rin. 3 Purisu, te igkasapulu ne leg-un te peg-ugpe ni Abram diye te Kanaan, imparuwey e ni Saray ki Abram si Hagar. 4 Ne migguliran e ni Abram si Hagar wey nataman, naberes e sikandin. Te pegkanengnengi ni Hagar te egkaberes e sikandin, inleig-leig din e si Saray.5 Ne migkahiyan ni Saray si Abram, “Sikeykew ka eleg ne egkasenditan te pegleig-leig ni Hagar keddi. Sikeddi ka migbehey kandin diye te keykew, piru te nakanengneng din e ne egkaberes e sikandin, inleig-leig ad nikandin. Eggukum perem ka Magbebaye ne Manama ke hentew ka nakasale kayi, ke sikeykew naa wey ke sikeddi.”
6 Ne migtabak si Abram, “Ke iling ma rue, iyan kad balahad kandin su uripen nu ma sikandin wey himuwa nu ke nekey ka igkeupii nu diye te kandin.” Nataman, in-ang-anggaan e ni Saray si Hagar, sikan naa ka migpallahuy e sikandin.
7 Ne nakita si Hagar te panalihan te Magbebaye ne Manama te nekeuma rin e diye te sebseb ne diye te napu te mammara ne inged ne kene egkeugpaan. Ka seeye ne sebseb diye te dalan peendiye te Sur. 8 Ne mig-inse ka panalihan diye te kandin, “Hagar, uripen ni Saray, hendei ka egpuun wey hendei ka egpabulus?”
Ne migtabak si Hagar, “Impalahuyan ku ka ahalen ku ne si Saray.”
9 Ne migkahi ka panalihan te Magbebaye ne Manama, “Libed ka diye te kandin wey paruma-ruma ka kandin.” 10 Ne migkahi pad man-e ka panalihan te Magbebaye ne Manama,
“Egpamasuluhen ku ne subla ka kabuhalan nu ne kenad egkaseel sikandan.
11 Kuntee, egkaberes ka wey te kene egkaluhey, eglesutan kad e te lukes. Ne iyan nu ingaran kandin si Ismaila,
su narineg te Magbebaye ne Manama ka pegpeyid-u-hid-u nu.
12 Piru ka anak nu, eg-ugpe sikandin ne egpekeiling te mahintalunan ne asnu,
eg-ehetan din ka langun, wey ka langun, eg-ehet degma kandin.
Egdiyu-diyu sikandin te me suled din.”
13 Ne nakakahi si Hagar diye te geyinawa rin, “Nakita ku ka Manama piru mania te wara a migpatey?” Seeye naa ingngaranan din ka Magbebaye ne Manama ne migpakiglalag kandin te, “Manama ne egpakakita.”b 14 Purisu ingngaranan te me etew ka belun te, “Biirlahayruy”.c Ka sika ne belun, diye te eletanan te Kadis wey Birid.