Ka saad te Manama diye te ki Abram
15
Te ware naluhey, hendue te impataheinep si Abram te Magbebaye ne Manama wey migkahiyan,“Kene ka kaaldek Abram.
Sikeddi ka kalasag nu
wey dakel ka ig-unag ku keykew.”
2 Piru mig-inse si Abram, “Magbebaye ne Manama, egmenuwen ku naa ka ig-unag nu keddi te ware pad anak ku? Iyan e egpakakamuney te karatuan ku ke egpatey a si Iliisir ne matig-Damasku. 3 Na, tenged te ware e ma behayi nikeykew te anak, seini se uripen ku ne miglesut kayi te baley ku ka egpakakamuney te karatuan ku.”
4 Ne migkahiyan e man-e sikandin te Magbebaye ne Manama, “Kene ne iyan egpakakamuney te karatuan nu ka uripen nu, ke kene, ka anak nu iya.” 5 a Ne in-uyan sikandin te Magbebaye ne Manama diye te lihawangan wey migkahiyan, “Leng-ag ka diye te langit wey seela nu ka me bituen ke egpakaseel ke naa. Iling naa degma due kasulug ka me kabuhalan nu.”
6 b Migpalintutuu si Abram te Magbebaye ne Manama, ne puun due, in-isip din ne matareng si Abram.
7 Ne migkahiyan sikandin te Magbebaye ne Manama, “Sikeddi ka Magbebaye ne mig-uyan keykew ligkat te inged ne Ur ne sakup te me Kaldiya, eyew igbehey ku keykew ka seini ne tane.”
8 Piru mig-inse si Abram, “Magbebaye ne Manama, egmenuwen ku naa te pegnengneng ne egkakeddiey e seini keureme?”
9 Ne migtabak ka Magbebaye ne Manama, “Uyani a te baka, wey kambing, wey karniru ne lukes, ne elin tigtatelu ne leg-un ka idad dan, wey uyan ka man-e te tukmu wey seleppati.” 10 Ne impanguyan seeye langun ni Abram diye te Manama, wey innimatayan din ka tagse sabeka ne ayam wey impanuley rin seeye gawas te tukmu wey seleppati. Ne immeg-andang din ka tagse suley. 11 Ne due me manuk-manuk ne miglene diye te impameri rin ne me ayam eyew egkeen perem dutu, piru in-alew seeye ni Abram.
12 d Te hapit e eglineb ka aldew, nakalipereng wey nalineknek si Abram, ne due makaaldek-haldek ne migginguma kandin.c 13 e Ne migkahiyan sikandin te Magbebaye ne Manama, “Eggalin ka me kabuhalan nu diye te inged ne kene ne kandan. Diye egkeuripen sikandan wey egde-deehen seled te hep-at ne gatus (400) ne leg-un. 14 f Piru eglegparan ku ka nasud ne mig-uripen te me kabuhalan nu. Nataman, egpakaawe sikandan te seeye ne inged wey egpekeuyan sikandan te dakel ne karatuan. 15 Ne meyitenged mule keykew, egkabuyag ke pad, wey egpatey ka keureme ne meupiya ka peglebeng keykew. 16 Ne ka me kabuhalan nu, wey e egpakalibed sikandan kayi ke egkatuman ka hep-at ne gatus (400) ne leg-un. Kene ku pad egdeldelen tenged te sale dan ka me Amurihanun ne mig-ugpe kayi su kene pad eleg ne timpu ne eglegparan sikandan.”
17 Te miglineb e ka aldew wey te migmarusilem e, sahuhune ne due miglepew ne kuren ne mig-eebel wey sulu ne nalegleg. Ne diye seeye migbaye te elat te impanuley rin ne me ayam. 18 g Te seeye ne timpu, migsaad ka Magbebaye ne Manama diye ki Abram ne migkahi, “Igbehey ku diye te me kabuhalan nu seini se tane ligkat te weyig ne diye te Ihiptu taman te dakel ne weyig ne Iyupratis. 19 Seini ka inged ne mig-ugpaan te me Kinihanun, me Kinisihanun, me Kadmunihanun, 20 me Hitihanun, me Pirisihanun, me Ripayhanun, 21 me Amurihanun, me Kanaanhun, me Girgasihanun, wey me Hibusihanun.”