2 Si-kam a ensemek ko, nainkararagan taha i mapteng i biyag mo na olay tan mahedsang i angel mo. Amtak i mahedsang i pamatim. 3 Tep epaladoy chadsak ko nonta mimothok ali ira ma echom a naemati et ingwanggwang cha i mowan petpetpetiy podnon toron edafod Afo Chiyos tan naiyay-anam na olay i panbiyag mod ma toro. 4 Nagwariy naengi-kan cha si-kak na mas banay a chadsak iy say sema pengi-ngel ko na chamag i seta iren anak kod pamati, chiyan ono-onori ma podno.

5 Si-kam a ensemek ko, naepiyal ken menintil na aahi tayod pamati, agdalo ira ma eg mo iningsaan. 6 Ingwanggwang ched ja gropon naematid jay i inpasing mon engibiybiy na semek mod si-kara. No gwariy echom a naematin inges iren jay a man-iyan chithan, pangaasim, itolo-toloy mon ontolong cha si-kara tan i-kan moy mesepol cha para cha panbiyahi ra. Sapay koma maykompas itha tolong mo para sema iren naiyansilbid Afo Chiyos. 7 Tep naiyan-aha-ahad iren mengikaskasaba maypangkep Jesu Cristo, et nat nainbaga riy mesepol cha ired ma eg naemati. 8 Isonga, metolongan ira komen ma kasepolan cha say mekiobda kiyen mengigwadsak niwa podno.

9 Iyansolathak chitha gropon naematid tan nontan, nem si Diotrephes a piyan ton mengibalnay chithan, inbiyang toy insolat ko. 10 Isonga, no onkowanak ded tan, konen kod si-kayo ira ma ngaaw a ima-imag to, pati sema ngaaw a kigwa-kigwan to maypangkep cha si-kawi. Et nat setan bengat iriy ima-imag to. Nat piyan to pay a menintil iren ma aahid pamati no onkowan ired tan a kad-an jo. Say palado pay, nat naintolok ton sintilen ira na echom. Sema iren naenintil, naingkal to ired ta gropon naemati.

11 Si-kam a ensemek ko, enog i iyonoran i ngaaw, no diket sema mapteng. Tep sema naengamag na mapteng, anak Afo Chiyos, nem sema naengamag na ngaaw, eg to amtes Afo Chiyos.

12 Si Demetrius, chakel i naengowan i maronong. Tan naesi-neng cha itsora na panbiyag to i towan ono-onori ma podnon toro. Si-kawi ngo, nakigwan mi ngo i maronong, tan amtam i podnoy nakigwan mi.

13 Chakel pay i piyan kon konen cha si-kam, nem ekak isolat chiyay 14 tep piyan ko komen bisitaen ka nem engkay et tetbalen tahen mismo.

15 Sapay koma gwared si-kam i talna. Sema iren kajem mod jay, chiyan komostai ka. Enti pango ngo komostaim a emiin i kajem tayod tan.