3 Sema kaasi tan talnen naedafod Afo Chiyos a Awa thayo tan si Jesu Criston Anak to, sapay koma may-i-kan cha si-kathayo. Et sejay ira, i-kan Afo Chiyos cha si-kathayo no patien tayoy podno tan mansisinemek kiya.

4 Epaladoy chadsak ko tep iyamtaan ko i seta iren echom a aanak mo, chiyan ono-onori ma podnon inges toy inbilin Afo Chiyos a Awa thayod si-kathayo. 5 Nem epateg a Bii, gwara nin i piyan kon konen cha si-kayon mesepol a mansisinemek kiya. Nat badon bilin iyay a kowan isolat cha si-kayo, no diket sigod den inki-ngelan tayo nonta kapoanan na inpamati tayo. 6 Tan sema banag niya podnon semek, onoran tayoy inbilin Afo Chiyos. Et say inbilin ton inki-ngelan jo manipod nonta kapoanan na inpamati yo, mesepol a mansisinemek kayo.

7 Kowan kona jay tep chakel i naenaol na toon iyanpara-parang chiya dobong. Sema iren tothoo, nat napiyati ra i iyanbalin si Jesu Criston na agpayson too nonta kimowan alid ja dobong. Sema kilasin too, naenao-saol na echom a naengontren Jesu Cristo. 8 Isonga, pantanchaan kayo say sema inpaha-pahat jo, nat onkawas, tan say may-i-kanan kayo na emiin a kongkona yo.

9 Sema nat mengonod na podnon toro-toron Jesu Cristo tan a-choman toy intoron Jesus, nagwared si-kathos Afo Chiyos. Nem sema mengonod na podnon toro-toron Jesu Cristo, gwared si-kathos Afo Chiyos a Awa tan si Jesu Criston Anak to. 10 Isonga, no gwara diy onkowan a nat mengitoron ja podnon toro, enog i inpaskep cha baliy jo tan enog i kiyomostaan. 11 Tep no komostaan jo, iyayka-chom kayod ma ngaaw a naimag to.

12 Chakel pay i piyan kon konen cha si-kayo, nem ekak isolat chiyay tep piyan kon bisitaen kayo. Et tetbalen tahejon mismo say mepnek a kostoy chadsak tayo.

13 Sema aanak na ahim a biin pinispis ngon Afo Chiyos, chiyan komostai kayo.