Sema Bilin Ired Ma Naengibalnay Tan Echom A Naemati
5
Niman si-kayon naengibalnay na naematid tan, gwariy piyan kon a-seden cha si-kayo tep naengibalnayak ngon inges jo. Sini-neng kon mismoy inpandiga-digat Cristo, et mekibingayak cha kinakayang ton mesi-neng no akow alin on-oli di. 2 Sejay i kowan ibilin cha si-kayo. Kajoi yoy naematid ta kad-an jo tep singen kalniro iren Afo Chiyos a inpiyal tod si-kayo. Manchadsak kayo komen onkajod si-karen nat mepidit tep setan i piyan Afo Chiyos. A-magen jo ngo komay obda yo, nat kagol na kinaagom jo na pilak, no diket kinasi-met jon mansilbid Afo Chiyos tan echom jo. 3 Enog i inpilit i piyan jo ired ma toon iyaypiyal cha si-kayo, no diket mapteng komiy pesi-pesing jo say seman i onoran cha. 4 Et no on-oli did jay si Criston kahejangan a naengajo na naemati, i-kanan to kayo na kongkonen onbayag na ingked ingken pekibingay jod kinakayang to.5 Si-kayo ngon oorichiyan, ipatoray joy angel jo ired ma papangodowan a naengibalnay cha si-kayo. Si-kayon emiin a naemati, ibaba yoy angel jo say mansisinilbi kayo. Tep iyaysolat chiwa esel Afo Chiyos i “Nakiyontren Afo Chiyos iwa pahi-tek, nem nakiyaasian to ma ekombaba.” a
6 Isonga, ikombaba yoy angel jod sangoanan Afo Chiyos a manakabalin say ikayang to kayo no akow alin pinispis to. 7 Ipiyal jo ngon emiin i chanag jod si-katho tep si-kathoy naengajod si-kayo.
8 Itifel joy piyan na angel jon a-magen, tan pantanchaan kayo na olay. Tep sema Diablon naengontred si-kayo, may-arig cha manngangarednged a lion a naiyan-aha-ahad a mengenap na kakanen to. 9 Kontra yoy Diablo tan petpeti yoy pamati yo. Tep amta yo i nat si-kayo bengat i naiyanda-da-kam iren ma ekilasin digat, nem emiin ngon aahi yon naematid ja dobong. 10 No da-kaman jo waliy digat jo na kemtang, panbalin to kayon Afo Chiyos na toon nagwariy kolang to. Pekedsang to kayo say onchale-chalek pay i pamati yo. Tep si Afo Chiyos i naedafoan na emiin a kaasi, tan tiya-gway to kayon mekibingay cha kinakayang ton nagwariy pengingkaan to tep ekisa-ki kayod Cristo. 11 Si Afo Chiyos i manakabalin a naiyantoray na ingked ingka. Amen.
Sema Kaonoran Na Solat
12 Sema timolong cha si-kak a iyansolat niya kedpeng a solat, si Silas a inbilang kon naepiyal a ahi thayo. Insolat ko jay say pekedsang koy nemnem jo, tan say ipaamtak i podnoy emiin a kigwan kod jay maypangkep na kaasin Afo Chiyos. Isonga, petpeti yo ma kaasi tho.