No Naematiy Too, Mesa-dathan I Panbiyag To
4
Si Cristo, edigathan nonta iyan-iya-iyan chiya dobong, isonga isagana yoy nemnem jo say man-anos kayon inges tod si-katho no medigathan kayo ngo. Tep sema toon esaganen man-anos no medigathan chiya dobong, towan ibiybiy i nat piyan to wen manbesol. 2 Et no inges niwan i nemnem jo manipod niman ingkathod ketiy jo, nat onoran jo wiy ngaaw a piyan na too, no diket sema piyan Afo Chiyos. 3 Tep iyayda-kad maliy timpo yon inkawas jo tep naima-imag joy ngaaw a piyan iren ma nat ematid Afo Chiyos. Tep nontan a nat emati kayo nin, ima-imag joy kompormin ngaaw a panchadsahan na angel jo. Imag joy ensekig a mengibai-baing, naiyanbotheng kayo, paladoy inpakika-chom jod ngalawngaw a kasa-sa-nofan, tan nachijaw joy sinan chiyos a oncharal na dinteg Afo Chiyos. 4 Isonga, sema iren sigod a echom jo, iyasdaaw ira tep eg kayo wa mekika-chom cha emiin a ngaaw a naimag cha, tan seman i kagol a naengowanan cha na ngaaw maypangkep cha si-kayo. 5 Nem sema iren sigod a echom jo, mesepol a songbathan ches Afo Chiyos niwa ngaaw a naima-imag cha. Tep esaganes Afo Chiyos a mengowis na emiin a too angken sibibiyag ono etiy da. 6 Setan i kagol a iyaykasabaan na mapteng a chamag cha tothoo, angken sema iren iyangketiy da. Tep angken diya-kaman chiy chosa na emiin a toon sema pathiy, iyaykasabiy mapteng a chamag cha si-kara say mebedin a manbiyag na ingked ingka i ispirito ren inges tos Afo Chiyos.Sema Mesepol A A-magen Tayo Tep Chanchani Diy Pantepos Niya Dobong
7 Chanchani diy pantepos na dobong. Isonga, mesepol a manemnemnem kayo tan itifel joy piyan na angel jon a-magen say mebedin kayon mankararag. 8 Say kainportantian, mesepol a mansisinemek kayon chili tep no mansisinemek kayo, magenon pekawanan joy basol na echom jo. 9 Kajoi yoy echom jon naemati no bisitaen cha kayo, tan enog i riri kagol cha si-kara. 10 Sa-ki tan sa-kid si-kayo, in-i-kanan to kayon Afo Chiyos na daing, isonga osal jo ta daing jon ontolong cha echom. Et singen inges joy naepiyal a bagaen a naengosal na koston ekila-kilasin daing a in-i-kan Afo Chiyos cha si-katho. 11 Sema naiyankaskasaba, mesepol a singpeten to tep sema nainkaskasaba tho, si-kathoy minsahin Afo Chiyos. Sema naiyansilbid echom to, mesepol a masdo tep si Afo Chiyos i naengi-kan na kedsang to. Emiin a naima-imag jo, singpet jo say maychejaw si Afo Chiyos babaen Jesu Cristo. Si Cristoy echayaw tan manakabalin a naiyantoray na ingked ingka. Amen.
Sema Mesepol A Nemnemen Na Naemati No Medigathan Ira
12 Si-kayon ensemek ko, enchek kayo masdaaw kagol na epaladon digat jon singen afil i emangkapasamak cha si-kayo. Namimothok ira ta digat say mepechas i pamati yo et maamtaan no podno. 13 Nat masdaaw kayo koma, no diket manchadsak kayo koma no medigathan kayon inges tos Cristo. Tep no seman, esolok i chadsak jo no akow alin on-oli dis Cristo, tan mesi-neng i manihal a kinachiyos to. 14 No damsisen cha kayo tep naemati kayod Cristo, magesat kayo tep setan i kaamtaan i naiyan-iyan cha si-kayoy Ispiriton Afo Chiyos a manakabalin. a 15 No edigathan kayo, nat kagol koma na ngaaw a imag jon inges toy bono, kibot, amag a echom a ngaaw, tan mekibiyang cha echom jo. 16 Nem no edigathan kayo kagol na pamati yod Cristo, eg kayo koma onbaing, no diket chejawen jo komes Afo Chiyos tep iyayka-chom kayod Cristo.
17 Tep inchogin Afo Chiyos a mengowis na too, tan sema iren aanak tho, towan dagwasa iren mekowis. Sema iren diga-digat a nadiya-kaman tayo, no si-kathoy kapoanan na pengowis Afo Chiyos, emanekot a pasiya nowan i da-kaman iren ma nat naemati na mapteng a chamag Afo Chiyos. 18 Tep iyaysolat chiwa esel Afo Chiyos i:
“No edigat a maysalakan i maronong a too,
sema toon nat naematid Afo Chiyos
tan sema toon naengamag na ngaaw,
maysalakan aya ira?” b
19 Isonga, no da-kaman joy diga-digat tep seman i piyan Afo Chiyos, pemasig kayon mengemag na mapteng, tan ipiyal joy angel jod Afo Chiyos tep si-kathoy emarsowed si-kayo tan sigoradon tongpalen toy inkari tho.