Sema Bancha Ired Ma Babaknang
5
Angken si-kayon babaknang, ki-ngeli yoy konen ko. Nangis kayo tan ngogngog kayo kagol na epaladon pandigat jo di. 2 Seta kinabaknang jo, nagwariy silbi tho tep mechechal i kokowa yo tan ketketen na sipet i baro yo. 3 Seta pilak jo, ontoling pay, tan sema toling to, si-kathoy kaamtaan na kinaagom jo. Omasen to kayo na kinaagom jon inges toy afoy a naemool na angel jo. Jowan si-si-nofiy kokowa yo angken niman miy kaonoran a akow asan onkowan aliy pengowis Afo Chiyos na too. 4 Sema iren dagbon eg jo in-i-kan ired ma naiyan-obded payow jo, si-kathoy kasi-nengan tod sangoanan Afo Chiyos i ngaaw i imag jo. Et si Afo Chiyos a manakabalin, nainki-ngelan toy adok iren ma naiyan-obda. 5 Seta biyag jod ja dobong, chadchadsak tan inam-ay a chili, nem inges jo ma bahen timagwa et eg to amta i gwa-tehen cha nem engkay. 6 Say sa-kin naimag jon ngaaw, naincharom joy too tan nainpabono yo ira ma toon maronong iy eg cha kayo nakiyontra.Sema Pan-anos Tan Sema Pankararag
7 Isonga, aahik, pan-anos kayo na diga-digat jo ingkathod ioli din Jesus a Afo thayo. Nemnem jo ma naiyan-obded payow. Nasingked to ma naintanem ton mandawes na ebanol. Nainosan ton mansesked niwa oran a naesafa tan sema naedaraw a oran a naenibog niwa tanem to. 8 Isonga, si-kayo ngo, pan-ano-anos kayo tan pekedsang joy pamati yo tep chanchani diy ikowan Jesus a Afo thayo.
9 Si-kayon aahik, mesepol a eg kayo man-iinesel na ngaaw say eg kayo mechosa tep chanchanin onmothok ali ma naengowis. 10 Nemnem jo ira ma profiten engowan na inpaamten Afo Chiyos cha si-kara et inges jo koma ira. Angken gwariy digat cha, iyanosan cha ngorechan. 11 Et sema iren enganos, nakigwan tayo i magesat ira tep iyono-onoran ches Afo Chiyos. Inki-ngelan jo ngoy maypangkep na anos Job nontan da. Angken epaladoy digat to, intolo-toloy ton emati. Et idi iyakcheng ma, etongpal i planon Afo Chiyos cha si-katho. Tep si Afo Chiyos, mahaasi tan mahaaw-awat.
12 Aahik, gwara pay i konen ko nin. Enog i insangbay dangit ono dobong ono kompormi. On-anay i konen jo i “Ahow” no piyan jo tan “Enchi” no nat piyan jo tep say eg to kayo chosaen Afo Chiyos.
13 No gwariy sa-kid si-kayon naiyandigat, mesepol a mankararag. No gwariy sa-ki ngon kaimdeng, mesepol a manchejaw na kansiyon cha Afo Chiyos. 14 Tan no gwariy sa-kid si-kayon mansekit, mesepol a ta-gwayen to ira ma naengibalnay na naemati say ikararagan cha et epjosan cha na danen mengchow na tolong Jesus a Afo thayo. 15 Et sema iren naiyankararag ired Afo Chiyos, no memati ira i pemapteng to ma mansekit, sigoradon onmapteng iwa mansekit. Tan no iyanbasol iwa mansekit, pekawanan ngon Afo Chiyos. 16 Isonga, no iyanbasol kayo, pangwinanggwang kayo tan pankinararag kayo say ma-kal i sahit jo. Tep say kararag na maronong a too, banay i panakabalin to tan chakel i mapteng a pantongpalan to. 17 Nemnem jos Elijah. Too ngon inges tayo, nem intolo-toloy ton iyankararag i nat on-oran, et eg imoran na tedon tawen tan kagachowa. 18 Et iyankararag mowan i on-oran, et imoran et simimit miy tanem. a