Sema Arig Na Panpartid Kasal
22
Engiarig si Jesus mowan a kigwan to i 2 “Sema pantorayan Afo Chiyos, may-arig cha arin iyanpartid kasal na anak ton dahi. 3 Idi iyaysaganen emiin, engito-no na echom a bagaen to say konen cha ired ma ainbitar i onkowan ma di iren mekikasal, nem eg cha piyan alin onkowan. 4 Isonga, engito-no mowan na echom a bagaen ton kigwan to i ‘Jo kowan ired ma ainbitar i iyaysaganiy mekan. Gwiya-tek koy mangkatheben bahak et iyaysagana wen emiin. Gomali jon mekikasal.’ 5 Nem sema iren ainbitar, eg cha inkaskaso. Eg ali cha kimowan iy intolo-toloy cha et i chiyan ama-amaga. Kimowan i sa-kid payow to. Kimowan ngoy sa-kin mandeko. 6 Ida ngo na echom i bagaen niwa ari, piyadigat cha ira, et biyono ra ira. 7 Paladon chiliy bonget niwa ari. Into-no thoy sosolcharo tho say bonoen cha ira ma emono na bagaen to, et inpapool toy siyodad cha. 8 Et kigwan to wed echom ton bagaen i ‘Iyaysaganiy emiin para cha kasal, nem sema iren ainbitar, nat maykari iren mayka-chom. 9 Isonga, tahejod kalkalsara, et inbitar jon emiin i sebien jod man.’ 10 Kimowan ma ired kalkalsara et ininbitar chen emiin i sibi ra, sema iren mangkaronong tan sema iren mangkahedsel. Et sema kwadton pankasalan, iyaskot na tothoo.11 “Idi engkay, simekep i arin mekitbal ired ma ainbitar, et gwariy mita thon toon nat iyanbaro na koston para cha kasal. 12 Kigwan to i ‘Kajem ko, niyana simekep ka did jay iy nat kostoy inpanbarom?’ Nem nagwariy insongsongbat niwa too. 13 Isonga, kigwan na ari ired bagaen to i ‘Balod joy diwa tho tan seki tho et iba-tok jod kawad-an na enbolinget say onngogngogngog tan kale-kaletketen to ngoy sangi thod man.’ ” 14 Et kigwan men Jesus i “Tep chakel i natiya-gway Afo Chiyos, nem otik i napinispis to.”
Sema Salodsod Maypangkep Na Bayad Na Binis
15 Imekal ma iriy Pharisees a tabtabalen cha no nengoy pesing chen menaol Jesus say osalen chiy konen ton pengicharoman ched si-katho. 16 Engito-no ira wed Jesus na disipolos cha, pati tothoon Herod. Idi mimothok ired kad-an to, kigwan cha i “Maistoro, amta wi i emiin a nakigwan mo, podno, tan podnon naintorom i maypangkep na piyan Afo Chiyos a a-magen na tothoo. Amta wi pay i nat naindasin moy kasasaad na angken siyen too. 17 Et ija pangoy ibaga wi. Iyaytolok emod ma dinteg tayo i panbejad na binis cha Caesar, ono enchi?”
18 Nem amten Jesus i ngaaw a nemnem cha, isonga kigwan to i “Si-kayon naengibili-biling a naengamag na mapteng, niyana jowan parasaak? 19 Ibiybiy jod si-kak i pilak a naaosal a maybayad na binis.” In-i-kanan ches Jesus na denarius, 20 et kigwan to i “Siyay mahadopa tan mahangaran niyay?”
21 Kigwan cha i “Si Caesar.”
Et kigwan men Jesus i “No setan ngarod, i-kan jod Caesar i may-i-kan komed si-katho, tan i-kan jo ngod Afo Chiyos i may-i-kan komed si-katho.”
22 Idi inki-ngelan cha man, iyasdaaw ira. Bintihan cha wa, et imekal ira.
Sema Salodsod Maypangkep Na Panpawil Na Iyangketiy
23 Nontan met laeng a akow, gwara ngo iriy echom a Sadducees a kimowan cha kad-an Jesus. Sema iren Sadducees, eg cha napiyati i manpawil i etiy. Kigwan ched Jesus i 24 “Maistoro, say dinteg tayon insolat Moses, kigwan tod man i ‘No gwariy sambaliy a nagwariy anak cha iy metiy i dahi, mesepol a sema ahi to, imbaliyen to ma ebalo say no man-enak ira, maybilang a anak niwa etiy.’ a 25 Niman ma, gwared si-kawiy pithon san-aahin daleki. Engimbaliy i kafangodowanan, nem etiy iy nagwariy anak cha. Et sema sigonchen ahi tho, inimbaliy to ma ebalo, 26 nem etiy ngo iy nagwariy anak cha. Inges to pay i maykatdon ahi tho, et iyansosobdat ira ingkathod maykapitho. 27 Et etiy ngo ma bii na kaonoran. 28 Isonga, no timpo di na panpawil na iyangketiy, siya ngarod iren ma pithoy koston imbaliy niwa bii? Tep emiin a pithon daleki, inimbaliy cha ma bii.”
29 Insongbat Jesus i “Iyankamali kayo tep eg jo egwathan i iyaysolat cha esel Afo Chiyos, tan eg jo egwathan i panakabalin to. 30 Tep no manpawil iriy etiy, nat mengimbaliy ira tep ingesen chiy anghilis cha dangit. 31 Nem sema maypangkep na panpawil na iyangketiy, eg jo aya bisiy kigwan Afo Chiyos cha si-kayo? 32 Kigwan to i ‘Si-kak i Chiyos Abraham, Chiyos Isaac, tan Chiyos Jacob.’ b Kigwan Afo Chiyos iwan angken etiy ires Abraham nonta bayag da. Sema piyan ton a-seden, manpawil i iyangketiy tan sibibiyag ired sangoanan Afo Chiyos. Si Afo Chiyos, nat Chiyos iren ma iyangketiy, no diket sema iren sibibiyag.”
33 Sema iren toon engiki-ngel niwan, iyasdaaw ira na intoron Jesus.
Sema Kainportantian A Bilin
34 Idi inki-ngelan na Pharisees i igwak Jesus ira ma Sadducees, esi-nop ira, et kimowan ired kad-an Jesus. 35 Sa-kid si-karen edaing a maistoro na dinteg, siyalodsod tos Jesus say pechasen ton 36 kigwan to i “Maistoro, ngoy kainportantian a bilin cha dinteg Afo Chiyos?”
37 Insongbat Jesus i “ ‘Mesepol a sesmeken mon pasiyes Afo Chiyos a Afom cha posom, cha ispiritom, tan cha nemnem mo.’ c 38 Sejay i kainportantian a bilin. 39 Sema maykadgwen ainportanti, inges niyay a ‘Semek moy echom mon inges toy penmek mo na angel mo.’ d 40 Emiin a dinteg Moses tan sema intoro iren ma profita, iyaybasar chiya chegwen bilin.”
Sema Salodsod Maypangkep Na Cristo
41 Idi esi-nop pay i Pharisees chiwan, siyalodsod ngo iren Jesus a kigwan to i 42 “Nengoy nemnem jo maypangkep niwa Cristo? Siyay edafoan to?”
Insongbat cha i “Si-kathoy polin David.”
43 Kigwan men Jesus i “No setan ngarod, niyana Afoy inngaran David cha Cristo nonta inpangowan Ispirito Santod si-katho i:
44 ‘Kigwan Afo Chiyos cha
Afok i
“Tokkong ked ja gwanan ko
ingkathod a-gwahen ko
ira ma naengontred
si-kam a
singen inkathin
mo ira.” ’ ” ef