Imi napidgin Juan Pab-Purpa-Nuedbal Apocalipsis-karta nermas. Tenal Juan Apocalipsis-karta pél nermasgu, Pab-Tummad-karta pato pel-kwapa nermaleszhun, karta-pid pal nikchul.

Imi Juan-Jesús-nuggin-palmilegalid Jesús-purkwijad-cholbal-untaradgin Juan Patmos-tupkin imia-akpurrujadgin Pab-Jesús-takcha. Tegin Pab-Jesucristo Juanga chogzhagus: “Pedin iglesia-kwakugledga pél-an-pega-chogzhadyob karta-palmio.”

Tegin Pab Tummad angelbal Juanga oyosbal neg kujal igi kuoed. Al Juan angel-ega-chogzhadbal pél nermasbal. Tenal iti-karta anmalga pakal-pud oyosdo Pab sapejul tule-e-abingaszhulmalad-oturdane, tegin tule-Pab-Jesús-abingasmalad Pabbak ilagwen-nadgu tullego. Tenal iti-karta anmalga chogdo: Jesucristo nia-Satanásga pul-kannaleged nikadbal Jesucristo keg-chulgu nia-Satanásgin nako, tegin Jesucristo cho-matagin nia-Satanás-meto tegin Jesucristo cho-matagin pel-kwapa nia-Satanás-e-chapingan-metmogo.

Imi Pab Tummad anmalga chognonido ede anmalga nikpa-neg-pin tegin iti-nap-pin nazhinoniko. Pitomalgu.