Pe melle chogbogwadyob akal-akal tule-tako
2
An-kwenamalad,
imi Pab-Jesucristo-nugu-takleged-nikadbal,
tegin pemal-Jesúsgin-penzhulidbal,
pe melle akal-akal tule-tako,
tenal pemal pel-kwapa yopígwadbi tule-takenabmal.
2 Imisgin an wilubbi pega chogdo:
imi pemal ibagwengin Pab-Jesús-otummogal ormabukwadgin,
tegidgin tule-mani-ibed-walgwen tognonikil,
mol-nued yowi,
tegin ko-yoed-olgad yowibal.
Tegin pe kin atagedgin mani-ibedga chogdago.
“Wegin pe kan-nuedgin chigo.”
3 Teginbal tule-wileged mol-nunnú yowi tognonimogal,
tegin pe we tule-wilegedga chogdamogo:
“Pedin webal wis kwisgugwelo.”
O chulil,
pe tule-wilegedga chogdago:
“Pe akalzhul an-nabal napkin chigo.”
4 Tenal pe weob iwenchulí tule-wileged-imakel,
pedin pato nos.
Tenal pedin pato istar-pinzheedbal chogbogwadyob pato we tule-taknoni.
5 Kwenamalad-an-pemal-pilalmalad,
an-imis-pega-chogneeddin pemal nuekwa an itomalo.
¿Imi Pab Tummad iti-napkin tule-wilemalad-amiszhulzhí egin nuekwa ibzhegal,
tegin tule-e-pilalmaladga kaka-ukchadyob,
ebak mes e-neg-takmaidgin meggal?
Teobdo.
6 Tede ¿ibiga pemalde tule-iskanayob,
tule-wilemalad-imas?
Imi pemal weob tule-wilemalad-imaked-wilubzhulin.
¿Tenal tule-mani-ibgande wilub-okpinal pemalgin mani-egwannanimalzhulzhí?
¿Tegin tule-mani-ibgan tule-tummaganzhe pe-chesdamalbalzhulzhí pemalga igal-itogal?
7 ¿Ampa we tulemalzhulzhí,
anmal-Tummad-Pab-Jesús-nuggin istar chunmamalad?
Teobdo.
Tede ¿ibiga pe pul nabir mani-ibgan-takmalzhun?
Imi Pabdin chogdo:
imi pemaldin pel-kwapa yopígwadbi tule-takenabmal.
8 Imi pemal igal-pul-chunchogedgin napírra naneel,
wedin ib-nued;
Pab-kartagin nermakal maidyob:
Imi pe aga chan pilaledyob,
pe tule-pimalad-pilalguenabmalmo.
Lv.
19:18
9 Tenal pemal chogbogiidyob tule-takchal,
pedin pato iskuedgin arkwas,
pe tule-pimalad-pilaled-igal-mamikidgin pato pe nos.
10 Imi tule-walgwen pel-kwapa igal-mamikidbal naneel,
tenal we tule iché wis walmajal,
pato pel-kwapa igal-mamikidgin walmas.
11 Imi Pab Tummad chogzhado:
Pe melle ome-pidgin yolego.
Ex.
20:14;
Dt.
5:18
Tegin Pab chogzhabaldo:
Pe melle tule-mejo.
Ex.
20:13;
Dt.
5:17
Tenal pemal ome-pidgin yolejulil,
tenal pe tule-mechal,
pedin Pab-igal-mamikidgin yabli walmas.
12 Tenal pe nued wismal-choggu Pab ibagwengin e-igal-tule-ololchajad-mamikidbal pél eje immal ekisnoniko,
al pemal tulemalga nuekwa chunmakenabmal,
tegin pe nuekwa immal imakenabmalbal.
13 Tenal tulemal-wilejakwa-tule-pid-takchulmalad Pabdin kujal wilejakwa tar-kwen-takojulmo,
ilgwen sapejul tar-oturdako.
Tenal tulemal-wilejakwa-tule-pid-takmaladdin Pab tulemalga igal-itogalil,
wilejakwa tar-taknonimogo.
Al tulemal wisgunonimalo,
Pab pul wilejakwa tule-tak,
pul sapejul tule-oturdakedga.
Pe-taedbal aga pe oyogenab, pedin aga ulubgin Pab-Jesús-penzhul
14 Jesúsgin-an-kwenamalad,
imi tule-walgwen chogel,
ede Pab-Jesúsgin penzhul,
tenal we tule immal-nuegan kwen imajulil,
¿tede Pabgin-penzhulidde ibiga nabirzhun?
¿Imi we tule nabir abonolego o chul?
Chulá.
15 Tenal an pemalga chogdo:
imi pe ibagwengin takalil,
Jesúsgin-kwenad-machered,
o ome-dewa mol-nikchul kudii,
o mas-kunned-nikchul-kudibal-dewa,
16 tenal pe we kwenadga chogdago-dewa:
“Imi pe akalzhul nao.
Tenal pedin tampe kwen itogojul,
tegin pe ukul kwen mesbalojulbal.”
¿Tenal pedin we kwenad-wilegedga immal kwen ukchajulil,
we igalde ibiga nabirzhun?
We igal ibga keg pel ku.
Tenal pedin kwenad-wilegedga immalmal ukchal,
we igal kep ib-nuedga kunoniko.
17 Imi tule-Pab-Jesúsgin-penzhulid-igal teobmodo.
Tenal Pab-Jesúsgin-penzhulidbi kwénna ibga keg pel ku,
tenal pe-immal-imakedgin aga pe oyogenab pe Pabgin-kwen-penzhul.
18 Tenal an wisdo,
tule-wal-walgwen chogdago:
“Igal weob kwen maichul.
Imi anmaldin Pab-Jesúsgin penzhulmal,
tenal pedin immal-nuegan-imakedginbi nane.
Tenal ankadin pog-pel igal-nueganbi.”
Tenal tule-weob-chogmalad ib-chunchunnadzhul.
Imisgin an pega chogdo:
pe-Pab-Jesúsgin-penzhulid pe anche oyodo,
tenal pe-taedgindin pe melle anka oyogo.
Tenal antin,
an-naneedbal pemalga oyone,
an ulubgin Pab-Jesúsgin kwen penzhul.
19 Imi pemal penzhulmaldo,
Pabdin walkwénna mai,
Pab-Tummad-ukin-pid pal kwen nikchul.
Wedin,
ib-nued.
Tenal niamaldin ampa penzhulmalmodo,
Pab Tummad walkwénna mai.
Al niamal peyedzhe Pab-tobedbal tutumakaldamal.
Tenal niamal yabli Pab-chogzhad-pallí immal kwen imajulmal.
Al niamal-Pab-penzhulidbal niamalga ibga keg pel ku.
Imi pemal ampa teobmodo.
Imi pe Pab-Jesúsgin penzhulil,
tenal pe Jesús-chogzhad-pallí yabli kwen nanejulil,
pe Pab-Jesúsgin-penzhulidbal ampa pega ibga keg pel kunonimogo.
20 ¿Imi an-pemalga-chogzhadgin pemal ampa penmaldé?
Pemal immal kwen wichulma.
Tenal pemal peigujiin an pemalga nuekwa oyo,
tule-Pabgin-penzhulidbal e-naneed kwen ogwajulil,
we igal tulega ibga keg pel ku.
21 Imi ¿pemal wichulzhí anmal-tad-Abraham,
igi kus?
Imi Pab Abrahamga-chogzhadbal Abraham Pabga e-machi-Isaac-ukneed-nadbal,
Pab yer Abraham-taknoni,
tule-immal-kwen-akaloszhulidyob.
22 Imi ¿pemal mag itononimalbalzhulzhí Abraham igi kusbal?
Imi Abraham aga ulubgin-Pabgin-penzhulidbal tegin Abraham aga nued-naneedgin mes oyononi,
Abraham chunchunnad Pabgin penzhul-kus.
23 Al Pab-kartagin nermakal maid-yopí kunoni:
Imi Abraham Pab-Tummad-kwen-penguszhul-kus.
Al Pabdin tule-immal-akaloszhulidyob
Abraham-taknonijun.
Gn.
15:6
Al Abraham Pabbak ai-kunaledga kunonijun.
24 ¿Imi pemal mag itononimalbalzhulzhí,
tule Pab-penzhulidginbi Pabbak igal-nudajul?
Tenal tule Pab-penzhulidgin tegin nued-naneedbal Pabbak kep igal-nudanoniko.
25 Imi ome-macherganbi-wijiid-Rahab ampa an-chogzhad-yopí kusmodo.
Imi Rahab aga e-neggin tule-neg-algemalad-odos,
tulemal melle tar-mesgal.
Tenal Rahab tule-neg-algemalad-pentasbal igal-pidbal negal.
Al Pabdin Rahab-nued-taedbal tule-immal-akaloszhulidyob Rahab-taknonijun.
26 Imi anmal-changin purpa maichulil,
anmal-chandin purkwaldo.
Imi anmal ampa an-chogzhadyob tule Pabgin-penzhulidbalbi keg immal-imakedyob kudimalmodo.
Imi anmal Pabgin-penzhulidginbi naneel,
tenal Pab-chogzhadyob kwen nanejulil,
anmal tule-purkwismaladyob,
ibga keg pel kunonimogo.