3
Imi pemal Cristobak mes kannan tullesmo-choggu,
al pe Cristo Pab-Tummad-nuedzhik-chiid nikpa-neggined-immalmalgin pe pinzhenonimalo.
2 Tenal pemal Pab-neggined-immalgin pinzhemalo,
melle iti-napkined-immalmalgin pinzhemalo.
3 Tenal pemal Cristobak mes purkwis-choggu,
al pe-purpa Cristobak Pab Tummadgin chabolemai.
4 Imi pemal Cristobal tuladimal-choggu,
al Cristo kannan tanikil,
pemal Cristobak mes naigunonimalmogo,
tenal pemal Cristobak mes yer taklenonimalmogo.
Pe igal-chered igeenab, tenal pe igal-pinbal naneenab
5 Al pe kalagwenzhul-kudigujad-igal pe igeenabmal:
machergan ome-pidgin yoleged,
omegan machered-pidgin yoleged,
machimal ampayo ome-nikueddu,
punagin yoleged,
punamal machigin yoleged,
ib-iskanagin pinzheed,
iskuedgin pinzheed,
ib-iskan peigued,
tegin aku-aku-immal-peiedbal Pab Tummadyob immal taked.
6 Tenal tule ampa we igal-iskanagin kudiil,
Pab Tummad peyedzhe tar-oturdako.
7 Imi pemal ampayo Cristo-abingegu,
tulemal iskuedgin kudigusmaladyob,
pemal iskuedgin kudigusmalmogan.
8 Tenal pemal pél igal-iskanamal igeenabmal:
urwed,
sae-itoged,
tulemalgin-istar-pinzheed,
tule-izhoged,
nisaal-chunmaked,
pel-kwapa.
9 Tenal pemal igal-akpenegwad pél igesmal-choggu,
al pemal melle aga emal-emal pal kakanzhemalbalo.
10 Tenal pemal-purpal-kwagzhadbal pe purpa pane-pane pingumaio;
Pab-Tummad-kepe-tule-opinnijadyobidzhe,
pemal pul-pule Pab-Tummad-wisgugal.
11 Imi pemal-Cristobal-naigujadbal,
keg pe akal-akal tulemal-takel,
keg pe chogmalal,
kwéntin Griego,
kwéntin Judio,
kwéntin tule-abgan-tuku-chikaled o chikaled-chul,
kwéntin Escita-tolgan,
kwéntin tule-immal-kwen-wichulmalad,
kwéntin tule-kalesbukmalad,
kwéntin tule-ololdimalad.
Tenal anmal akal-akal tule-takedgin kwen pinzhebukchulmal,
anmal yopígwadbi tule-takmal.
Tenal anmal unnila Cristoginbi pinzhebukmal,
tegin Cristo anmalgin pel-kwapa maibal.
12 Tenal Pab Tummad pe-pilaledbal pe-chus egadga kugal.
Al pe Pabga nuekwa naneenab,
pe tule-pentabi itogenab,
pe tulegin nugu pinzheenab,
pe tummarba-itojulidgin naneenab,
pe chapé immal imakenab,
pe melle pulzhul urwe-taenab.
13 Tegin pemal aga emal-emal akalzhul-itogenabmal,
tegin pe aga emal-emal walmasmalal,
ilgwen aga ulubgin walmajad igeenabmal.
Imi Cristo pega iskued elijadyob,
pe tule-pegin-walmajadga pe ilgwen iskued igeenabmalmo.
14 Imis an-pemalga-chogzhad pel-kwapa tule-pilaledgin tani.
Al pemal pela-pela pilaledgin pel-kwapa immalmal imakenabmal.
15 Imi Pab pemal-amis,
chan-walkwénnagwadyob aga akalzhul-itomalgal.
Al Cristo akalzhul-itoged meke pebak kudiguo.
Teginbal,
Cristo pe-pentajadbal,
pe Cristogin yer itogo.
16 Tenal Cristo-igal pegin-nued-maidbal pe pinzheed-nikadbal,
pe aga muchub-muchub oturdamalo,
tegin pe aga muchub-muchub uanaimalo,
tegin pe aga ulubgin Pabgin yer-itogedgin pe Pabga namamalo,
tegin pe salmo-namakedgin,
tegin Pabga-namakedgin tegin namaked-purpaledgin Pab-otummomalbalo.
17 Tenal pél pe immal imaked,
tegin pél pe chunmaked,
pe Pab-Jesús-nuggin imakenabmal.
Tenal pe Pab-Jesúsbal Pab Tummadga tog-nuedi chogenabmalbal.
Tule-Pab-Jesús-wismalad tule-pimaladgin nued naneed-wilubmal
18 Omegan,
pe Pab-Jesús-wismal-choggu,
al pe aga machered-ulpallí naneenabmal.
19 Machergan,
pe aga ome-pilalguenabmal,
tenal pe melle aga chabzhul ome-imako.
20 Nuskan,
meke pe ibigin aga pab-pallí tegin pe aga nan-pallí immal imakenabmal.
Tenal Pab Tummad yer nuskan-pabgan-pallí-nanemalad-tak.
21 Pabgan,
pe melle kantikidgin nuskan-cholpalmakedgin nuskan-ourmalo,
pe-nuskan melle immal-pal-kwen-imabijul-kunonigal.
22 Mosmal,
meke pe ibigin iti-napkined-tummad-choged-pallí pe naneenabmal.
Tenal pe-tummad maidginbijul,
tegin pe-tummad nugu pe-takegalbijulbal.
Tenal pedin Pab-Tummadgin-atagedgin,
tegin pe ilagwen-innikigwadgin pél pe immal imakenabmal.
23 Tenal pemal meke-ibigin arpanai-chogel,
pe pela-pela yer-itogedgin arpagenabmal.
Tenal pe melle pinzhao:
“An tulega arpanai.”
Tenal pe pinzhao:
“An Pab Tummadga arpanai.”
24 ¿Ibiga an teob pemalga chog?
Imi pedin nued wismaldo,
pe nued arpajadbal,
Pab e-neggin pega immalmal-nuegan ukmogo.
Tenal pe chunchunnad Cristoga arpanai,
pe tulega kwen arpanaichul.
25 Imi tule istar nanajadbal,
keg-chulgu we tulega poni-tummad nononimogo.
Tenal Pabdin tule-immal-akaloedbal pel-kwapa yopígwadbi tule-oturdako.