2 Tenal an alamanai pemal-niga wis okannomalgal,

tegin pemal aga pulakwa pilaledgin nanemalgal,

tegin tulemal-pel-kwapa-mag-itogedbal,

nuekwa Cristo-igal wisgugalbal pemal Pab-Tummad-kaka-otukal-maid wisgugal.

Wedin Cristo.

3 Tenal tule Cristoginbi nabir immal wisgu,

tegin Cristo pirkin-immal-wisgugal tule-imabal immal imagal.

4 Al an pemalga iktualeba chogdo:

imi tule-pimalad ib-chunnadyob,

yer-chunmakedgin pe melle yardalenonimalo.

5 Tenal an pemalbak mes tijul-chogen tenal antin pemal-abalgin yabli purpal kudimo.

Tenal an pemal-itos,

pemal ilagwen Cristogin-penzhulidgin innikí kudimal.

Al an weligwal itononido.

6 Al an pemalga chogzhundo,

pemal kepegin aga tummadyob Cristo-Jesús-abingajad-yopí,

pemal ampa Cristobak nanemalbalo.

7 Tenal pemal pela-pela Cristo-nued-wisgumai-choggu,

al pe Cristogin-turdamaidbal pe nued okannolejadbal tunkumaio.

Tenal pe Pabga pela-pela tog-nuedi-chogedgin nanemalbalo.

8 Tenal pemal nue aga takermal,

tule-ib-chunnadyob-pinzheed-nika-chogdimaladzhe melle pinzheed kalegal.

Tenal we pinzheed ib-chunchunnadzhul,

iti-napkinmalad-pinzheed-igal-akar tani.

Tenal we pinzheed,

Cristo-akar kwen tanijulbal.

9 Tenal Cristoginbi unnila pinzheed-chunchunnad tani.

Tenal Pab Tummad pel-kwapa taed,

tegin Pab Tummad pel-kwapa pinzheed nikad,

Cristo ampa sanal nikamo.

10 Tenal Cristo-pemalgin-maidbal,

pemal pato kuakwa kudii Pab-peiedyob nanegal,

tenal pemal immal kwen napijulmalbal.

Imi Jesucristo,

pel-kwapa tule-tummagan-neg-takmamikid-e-ibed,

tegin neg-pel-kwapa-kannaleged-e-ibedbal.

11 Imi pemal pato Cristobak akenai-choggu,

al pemal mag taklenonimal pemal Pabgad,

tenal tule-abgan-tuku-chikaledgin chul,

tenal Cristo-pegin-istar-tiid-idirijadgin.

12 Tenal Pab Tummad kannan Cristo-otulojad-kannalegedgin pe penzhul-choggu,

al pe Cristo-nuggin-tigin-oglejadgin,

pe Cristobak mes tiglesmo,

tegin pemal Cristobak mes kannan tullejadyobmo.

13 Tenal pemal akpene Pab Tummadbak aichulidbal,

pe abgan-tuku kwen chikchajulmal,

tegin pe iskuedbal,

pe purpal purkwal-timal.

Tenal imidin Pab Tummad Cristobak mes pe-otulosmal.

Tenal Pab Tummad Jesucristobal pel-kwapa anmal-iskued elinonibal.

14 Tegin Cristo-nakrusgin-naigujadgin anmal-Pabbak-pane-pane-noed-ilbal-nermalemaid elinoni.

15 Tenal Pab Tummad nakrusgin Jesucristo-opurkwijadbal immal-saglagan-kannaleged-nikmaladgin nakwisgu,

tulemal-wagin iwenchuli tummagan-iti-napkined-imas.

16 Al pe tulemalga melle igal-ukmalo pe-immal-kobedgin,

pe-mas-kunnedgin,

pegin melle choggal pe noal kudii.

Tenal pe tulemalga melle igal-ukmalbalo pirka-ilbal-itoged-ibe-itogedgin,

ni-toto-naigunonikid-itogedgin,

tegin pe ulukued-ibe-itogedgin,

pegin melle choggal,

pe noal kudii.

17 Imi akpene,

we igalmal unnila purpal oyolenai,

kujal igi kunoniko.

Tenal Cristo anmalga pato sanal kunoni-choggu,

al Pab-igal sanal kunonijun.

18 Tenal tule pega chognonikil,

pede eyob aga tukin pollé imakenabmal,

tegin pe Pab Tummadyob angelmalzhe kolenabmalbal,

pe melle we tule-pega-chognonikid-itogo,

Pab-neggin pemalga immalmal-pega-pinche-uklegoed owegal.

Tenal we tulemal aga tummarba nanemal,

tegin pinche aga e-itoleged kabdakedgin ib-chunchunnadyob immal onomal.

19 Imi anmal-chan-pel-kwapa chan-tubgan-akenanikidbal nonobal tulalejiil,

Pab-chogzhadbal pinna-pinna tunkumaio.

Tenal Cristo tule-nonoyob-choggu,

al tulemal-aga-tummarba-nanemalad pato tule-nono-idirilejadyob kunonimal.

Tenal we tulemal pato Pab-igesmal,

igal-pidzhe akpadmal.

20 Tenal pemal chogmalando:

“An Cristobak-purkwijadyob kunonimal,

tenal an iti-napkined-immalmal an pato pél iges.”

¿Tede pemalde ibiga ampa iti-napkined-igalgin pinzhemalzhun?

¿Tede pe ibiga ampa iti-napkined-igal-mamikidgin nanemalzhun?

Tenal pemal pato we igalgin naneed-wilubzhulmalan.

21 Tenal pe chogmalbal:

“Melle we immalmal ebugo,

melle we immalmal kunno,

melle we immalmal omobalo.”

Imi we igalmal pinche-tule-onojad.

22 Tenal tule we igal pinche onosmaladbal,

tule ebugedbal pél pelgunoniko.

23 Tenal we igalmal ib-chunnadyob tule-immal-wijiidyob tule-ima,

tule ib-chunnadyob aga tukin igal mesmalbal Pab-otummogal,

tegin tule ib-chunnadyob tule-poleyob megmalbal,

tegin chabzhul aga chan imamalbal.

Tenal we igalmal kwen unnijulmal,

aga tukin chan abingegal,

melle iskuedgin nanegal.