2 Imi pemal tumi-ilbal mani-kaedbal,

pemal-ilbal mani ukmalo.

Tenal pemal we mani chabogenabmal,

an pemal-omojal,

we mani pato kuakwa chio,

pe melle mani pal weimalgal.

3 Tenal pemal an-iktual tule-amimalbalo,

Jerusalénzhe mani chedgal.

Tegin an pemal-omojal,

tule-mani-chedmaloedga an karta uko,

Jerusalénzhe mani chedgal.

Tegin an Jerusalénzhe kep we tulemal-palmio.

4 Tenal an pemal-omojal an Jerusalénzhe-nabir-nao an takel,

tule-mani-chenemalad akalzhul anpak mes Jerusalénzhe nemogo.

5 Imi antin naga igal-mezhis Provincia-Macedoniabal negal.

Tegin an Macedoniaje arpil,

an pemalzhe natapo.

6 Tenal an chogdé,

an pemalbak untar mego-dewa,

o chulil,

ti-ni-pelguedzhe an pemalbak peio,

pemal an-pentagal,

an pia pul nabir nao.

7 Tenal antin pemalzhe pinche iché nebijul,

an untar pemalbak peibien,

tenal Pab-itolegedbal.

8 Tenal antin ampa Efesogin peinegwel,

Pentecostés-Itogedzhe.

9 Imi itigin anka igal-yer-ukles Pabga-arpaged nued imagal.

Tenal tulemal-an-abin-kwisgumalad ampa ichejul nikarmalbal.

10 Imi Timoteo pemal-omojal,

pe nuekwa tar-akwemalo melle tulemal tarzhe urwemalgal,

tenal Timoteo pemal-abalgin akalzhul Pab-Jesús-igalgin chunmagal.

Imi an-Pab-Jesúsga-arpanaidyob,

Timoteo ampa arpanaimo.

11 Al pemal keg-chulgu Timoteogin ataged-wilubmal.

Tegin Timoteo Pab-igalgin pemal-oturdajad-cholbal pemal Timoteo-pentamalo,

akalzhul ukin anche taggal.

Tenal an kwenamalad-e-pakamaladbak mes Timoteo-abintako.

12 Imisgin an kwenad-Apolosgin an chunmanejun.

Tenal Apolos imis yapa pemalzhe pal negus.

Tenal antin Apolosgin alamajan,

kwenamaladbak pemalzhe mes negal.

Tenal Apolos chogdo:

ega wilubgan nonikil,

ede kujal pemalzhe yabli natapo-ebinzhe.

13 Tegin an pemalga chogzhundo,

pemal nue aga takmalo,

melle iskuedgin nanegal.

Tegin pe Pab-penzhulidgin kantik kwisgumalo.

Tegin pe tobzhulidgin nanemalbalo.

Tenal pe Pab-Jesúsgin lolojul itomalo.

14 Tenal pe pél immal imanemalal,

pe pilaledgin pél immal imakenabmal.

15 Kwenadgan,

pemal nued wismaldo,

Estéfanas-negginmalad inzhel Provincia-Acayabal Pab-Jesús-abingasmal.

Tenal we tulemal Pabbal-nanimalad-pentagalpí kudimal.

16 Kwenadgan,

imisgin an pemalzhe wiledo,

pemal Estéfanasyobid tulemal-amio,

pemal we tule-ulpallí nanegal.

Tegin pemal wiejul-tulemal-pentamalad,

amimalbalo.

Tenal pemal we tule-ulpallí naneed-wilubmalmo.

17 Tenal Estéfanas,

Fortunato tegin Acaico,

anche nonimalgu,

an yer-itosdo.

Tenal pemal-anpak-kudijulidbal we kwenamalad yabli an-pentanoni,

an melle walgwen itogal.

18 ¿Ibiga an teob chog?

Imi we tule-walpágwad purpal ulubgin an-okannosmal,

tegin pemal-ampa-okannolemalmogo.

Tenal pemal wegiid-tulemal-otummoged-wilubmalmo.

19 Imi iglesia-Provincia-Asiaginmalad pemalga kaka wis palmijimo.

Tegin kwenad-Aquila aga ome-Priscilabak pemalga pul-pule kaka wis palmijimo.

Tegin kwenamalad-aga-neggin-pulakwa-Pab-Jesús-igal-itomalad,

ampa pemalga kaka wis palmijimo.

20 Tenal kwenamalad-itigin-pel-kwapa-pukmalad ampa pemalga kaka wis palmijimalmo.

Imi pemal ilagwen-pinzheedgin,

aga muchub-muchub kusgu igal-mamikidyob,

aga pe wagal umalo.

21 Imi antin-Pablo we kaka-palmijiid naga chunkalal nermas.

22 Imi meke-ibi-tule Pab-Jesucristo-kwen-pilalzhulil,

immal-iskan we tule-akaloelen,

nabirin.

Imi Pab-Jesúsye,

pul pe tagye.

23 Imi Pab-Jesús pemalga immal-nuegan imakelen,

nabirin.

24 Imi an Cristo-Jesús-nikadbal,

tegin an pemal-pilaledgin an pel-kwapa pemalga kaka wis palmijimo.

Pitogua.