2 Tenal Pablo kusgu Judio-ormaked-negzhe nane-choggu,

al Pablo ulukued-ilapá Judio-ormaked-neggin Pab-kartagin tulemal-oturdanaigus.

3 Imi teun Pablo tulemalga nuekwá palchognaigual:

—Imi Cristo-Pab-akpene-chogzhad-palmidagoed-tule purkweenab,

tegin purkwaled-akar kannan tullegenabbal.

Tule we tule an-kin-chunma-kwichid,

weje pato arpigus.

Wedin Jesús.

4 Tegin Pablo yer-ito wal-walgwen Judiomal-imas;

al Judiomal Pablo-Silaszhik naigusmal.

Tegin Griego-machergan-Pab-Tummadzhe-koledgin-Pab-otummomalad-íchejul Pablo-Silaszhik naigusmalmo.

Tegin omegan-tummagan-íchejul ampa Pablo-Silaszhik naigunonimalmo.

5 Tenal Judio-pimalad-Jesúsgin-ibzhejulmalad takchagu tulemal-ichejul Pablobal-naigusmal,

Pablogin tegin Silasgin nobgualmal.

Tegin Judiomal-Jesúsgin-ibzhejulmaladdin callebal tule-iskana-amismal Pabloga poni onogal.

Tegin tule-iskana ichejul tule-pimalad-amismalmo emalbak mes urwegalmo.

Tegin tule-iskana pulal Jasón-negzhe nadmal,

kantikidgin Pablo-tegin-Silas-onogal.

6 Imi teun Pablo Silasbak,

we neggin pukchulmal.

Al we tulemal Pablo-anal neg-ibed-Jasón tegin kwenamalad-pimalad-kasmalzhun.

Tegin tule-iskana tule-neg-kwebur-takpukmalad-tummaganzhe Jasónmal-chesmal.

Tegin tulemal tule-tummaganga pulal sapejul chogalmal:

—Imi Pablo tegin Silas,

pel-kwapa-nap-naid-ugakche,

neg-oimadimal.

Tenal Pablo tegin Silas itije nonimo.

7 Tenal Jasón aga e-neggin Pablomal-odosmal.

Imi Pablo Silasbak Romano-Tummad-César-igal-mamikidgin kwen atajulmalbal.

Tenal we tulemal chogmal:

‘Tule-pid erreyga mai.

Wedin nug Jesús.’

8 Tegin tule-itobukmalad,

tegin tule-tummagan-neg-kwebur-takpukmalad,

tulemal-chogzhad itosmalgu,

kwakialmalzhun.

9 Al tule-tummagan-neg-kwebur-takpukmaladdin Jasóngin tegin Jesúsgin-kwenamalad-pimaladgin mani egwasmal,

Jasónmal aga e-neggin melle Pablomal-pal-abingegal.

Tegin kep tule-tummagan Jasón-onosmalzhun.

10 Tegin kwenamalad mutikidbal Pablo tegin Silas-palmismal,

Berea-neg-kweburzhe.

Tegin Pablo Silasbak Bereaje nonigu,

Judio-ormaked-negzhe nadmal.

11 Imi Judiomal-Berea-neg-kweburgin-pukmalad Judiomal-Tesalónicagin-pukmaladga pul tule-nuegan.

Tenal Judio-Bereagin-pukmalad yer Pab-kaka-nuegan itosmal.

Tenal we tulemal pane-pane Pab-kartagin pal aminanimal,

Pablo tegin Silas-chunmajadde napírra chog-dewa,

o chul-dewa.

12 Al Judiomal-ichejul Jesúsgin ibzhenonimal,

tegin Griego-tulemal-ichejul Jesúsgin ibzhenonimalmo;

machergan tegin omegan-tummagan-ugakche.

13 Tegin Judiomal-Tesalónicaginmalad wisgusmalgu Pablo Bereagin Pab-kaka-nuegan chognai,

Bereaje nonimalmo.

Tegin Judiomal-nonimalad Berea-neg-kweburginmalad-ourusmal,

istar Pablo tegin Silas-takegal.

14 Tegin tulemal istar Pablo-taknonimalgu,

Jesúsgin-kwenamalad ilgwen termal-kakche Pablo-palmismal.

Tenal teun Silas ampa Timoteobak Bereagin pesmal.

15 Tegin Jesúsgin-kwenamalad Atenaszhe Pablo-pelapmal.

Tegin kwenamalad-Pablo-pelapmalad kannan almalgu,

Pablo we kwenamaladbal Silasga tegin Timoteoga kaka palmial:

“Pemal kueye-kueye Atenaszhe tagmalmogo.”

16 Tegin Pablo Atenasgin Silas tegin Timoteo-abintamaidgin,

chowal-mimmigan-takal.

Tegin tulemal-chowal-mimmigangin-peyedzhe-pinzhe-pukmaladbal,

Pablo peyedzhe pukib-itononi.

17 Al Pablo Judio-ormaked-neggin Judiomal tegin Judiojulmalad-Pab-Tummad-otummomaladbak Jesús-igalgin aga imakaldamal.

Tegin Pablo tulemal-magarbal-ampagumaladgin ampa tulemalbak imakaldamalbal.

18 Tegin tule-tummagan-pinzheed-nikmalad,

Epicúreomal,

tegin Estoicomal Pablobak imakalmal.

Tegin tule-tummagan-pinzheed-nikmalad-wal-walgwen Pablogin chogalmal:

—¿Imi we tule-iche-iche-turdajadde,

ibi chogbi-kunai-wede?

Tegin tule-tummagan-pinzheed-nikmalad kwen Pablogin chogalmalbal:

—Imi an itodo,

we tule Pab-Tummad-pimaladgin chunma.

Imi teun Pablo Jesúsgin tegin tule-purkwal-maid-akar-kannan-tullegoedgin chunmas.

Al tule-tummagan-pinzheed-nikmalad weob Pablogin chognonimal.

19 Tegin tule-tummagan-pinzheed-nikmalad,

igal-itoged-neg-Areópagoje Pablo-chesmal.

Tegin tule-tummagan Pabloga chogalmal:

—¿Imi pede ibi-igalgin tulemal-oturdanai-wede?

Imi an takto,

pedin akal-pakal tulemal-oturda.

20 Al an peido,

pedin anmalga chog,

pe-tulemal-oturdanaid ibi chogle-wede.

21 (Imi teun takalgu,

Atenasginmalad tegin tule-aknemalad kusgu e-igalbal ibe-perienzhenanimal,

igal-pingin chunmagal;

chulil,

igal-pin itogal.

Al tule-pinzheed-nikmalad Pablo-itobimalmo ibi chog.)

22 Tegin Pablo Areópagogin-ormabukmalad-abalgin,

tulemalga chogal:

“Atenasginmalad,

imi antin,

an pemal-takto,

pemalde chogmalmogan Pab-igal-wiis.

23 ¿Ibiga an teob pemalga chog?

Nabir.

Imi an pemal-neg-kweburgin pipirmadi-kusgu,

an takchado,

pemal aga pab-tummaganzhe-kolmalad-ichejul kwigwis.

Tegin an takchabaldo,

pab-tummadga-immal-kuged-walgwen kwichimo.

Tegin immal-kugedgin nermakal naibal:

“Tenal pemal Pab-Tummad-wichulmal-choggu,

al an pemalga we igalgin wis chunmanejun.

24 “Imi we Pab Tummad iti-nap opinnis,

tegin iti-napkin pél immalmal-nikad opinnisbal.

Tegin we Pab Tummad nikpa-neg-e-ibed,

tegin ampa iti-nap-e-ibedbal.

Al Pab Tummad tule-neg-chobedgin kwen maichul.

25 Tenal Pab Tummad tule-kwen-napijul e-pentagal.

Tenal Pab Tummad pel-kwapa tulemal-otulojii.

Tegin Pab Tummad pel-kwapa-immalmal-ugakche,

otulojibal.

Tegin Pab Tummad tulega tegin meke-ibimalaga pél immal ukpal.

26 “Tegin we Pab Tummad walkwénna-tule-opinnijad-akar,

akal-akal chog-ilbal tule-imas,

pel-kwapa-iti-nap-naid-ugakche ampagumalgal.

Tegin we Pab Tummad nap-wilub-chas,

tule-chog-ilbal ampagugal;

tegin we Pabdin ibe-nazhijadbal inkwa tule-chog-ilbal tognoniko,

inkwa aknine,

inkwa pelgubalo.

27 “Tenal Pab Tummad chog-ilbal tule-imas,

tulemal egin pinzhegal,

tegin tule nuekwá e-amidel,

Pab-Tummad-onogo-dewa.

Tenal Pab Tummad anmal-akar panna kwen kudijul.

28 Tenal anmal Pabbal tula-timal,

tegin anmal Pabbal kudimalbal.

Tegin anmal Pabbal purpa nikamalbal.

Tenal pemal-walgwen chogzhadyob,

anmal pato Pab-nuskanmaldo.

29 “¿Tede ibiga pemal aga tukin pinzheedgin,

aga immal-wijiidgin,

Pab Tummadyob immal chobmal:

immal-olgad,

immal-manigad,

tegin immal-akwagad?

Weobdin ib-nued-chul.

30 “Imi pemal akpene wichulidgin-immal-imajadbal Pab Tummad pemalga akal immal kwen chogzhajulmal.

Tenal imidin Pab Tummad pel-kwapa tulemalga chognai:

‘Pemal wejego,

iskuedgin nane.

Tenal pemal iskuedgin pe pukib-itogenabmal,

tegin pe iskued ebeenabmalbal.’

31 Imi Pab Tummad igal-mezhis,

tegin ibe-nazhisbal,

edega tule-walgwen-nugzhas,

pel-kwapa tulemalga innikí igal-nudagal.

Tenal Pab Tummad anmalga oyos,

ede purkwaled-akar kannan Jesús-otulojadbal,

e-chogzhaddin,

ib-chunchunnad.”

32 Tegin tulemal-itobukmalad itosmalgu tule-purkwaledde kannan tulle,

tule-wal-walgwen Pabloga chogalmal:

—¡Pinzhe pe koltima!

Tegin tule-pimalad kwen Pabloga chogalmo:

—Antin ibagwengin we igal itobibal.

33 Tegin Pablo tulemalga chunmasgu,

ilgwen ormaked-akar nod.

34 Tenal tulemal-wal-walgwen Pablobal-naigunonimalgu,

Jesúsgin ibzhenonimal.

Tenal tule-walgwen-Jesúsgin-ibzhenonikid nug Dionisio.

Tenal we tule Areópagogined-tummad-walgwen.

Tegin ome-walgwen Jesúsgin-ibzhenonikid nug Damaris.

Tegin tule-pimalad-Jesúsgin-ibzhenonimalad Pablobal naigusmalmo.