2 Tenal teun omegan-wal-walgwen akpene nia-nikujad tegin poni-nikujad-Jesús-tar-nudajad Jesúsbak tigusmalmo.

Tenal we omegan:

María-pimalbalid-Magdalena.

Tenal Jesús we María-akar walakugle nia-onijad.

3 Tegin Juana tigusmo.

Tenal Juanadin Chuza-ome.

Tenal Chuzadin Errey-Herode-e-neg-taked-pul-tummad.

Tegin Susanna tegin omegan-pimalad-ichejul Jesúsbak pipirmadi-kusmalmo.

Tenal we omegan e-immal-nikadbal Jesús-pentadi-kusmal.

4 Tegin tulemal-ichejul neg-kwebur-pid-pid-akar irmanonimal Jesús-itogal.

Tegidgin Jesús tulemalga purpal chunmakalzhun:

5 “Imi te ibagwengin tule-walgwen nad mie-mie immal-kwa imagal.

Tegin tule immal-kwa minaidgin,

immal-kwa kwen igal-nanemaladgin apatis.

Tenal we immal-kwa,

tulemal kin anas-ne,

tegin chikwimal we immal-kwa masmalbal.

6 “Tegin immal-kwa kwen akwapir-ulak-naidgin apatis.

Tenal we immal-kwa nisgu,

neg-walajulidbal pulzhul tinkus.

7 “Tegin immal-kwa kwen iko-kwa-naidgin apatis.

Tegin we immal-kwa nisgu,

iko-kwabak mes nismo.

Tegin immal-kwa tunkusgu,

ikodin immal-kwa-nued-nijad izhos,

al keg chanmagus.

8 “Tegin immal-kwa kwen napa-nuedgin apatis.

Tegin we immal-kwa tunkusgu,

yer chanmanoni,

kal-kwengin tulaataled-ilgwen chanmas.”

Tegin Jesús weob chunmasgu,

sapejul kote,

chogal:

—Imi an-pega-chogzhad pe nuekwa itomalo.

9 Tegin e-chapingan Jesúszhe ekichial:

—¿Tegil we igalde igi choglejun pe immal-kwa-tiglejadgin chunmajaddé?

10 Tegin Jesús aga e-chapinganga chogal:

—Imi Pab-neg-takmaid-igal otukal mai.

Tenal Pab pemalga igal-ukcha mag we igal itogal,

tenal Pab tule-pimaladgadin igal-kwen-ukchajul.

Tenal an we tulemalga purpal Pab-neg-takmaid-igalgin chunma.

Imi Pab-kartagin chogdo:

11 “Al an pemalga mial immal-kwa-tiged-igal chognejun,

ibi-chogle-wede.

Imi immal-kwa chogle,

Pab-kakapurwa-nued.

12 “Tegin immal-kwa-igalbal-apatismalad chogle:

tule-wal-walgwen Pab-kakapurwa itojal,

nia-sagla ulubgin kin chunmanoniko Pab-kakapurwa igegal,

melle Pabgin ibzhegal,

tegin we tule melle Pabgin abonolegalbal.

13 “Tegin immal-kwa-akwapir-ulak-naidgin-apatismalad chogle:

tule Pab-kakapurwa itojal,

weligwaledgin Pab-kakapurwa abingao,

tenal we tule nuekwa Pab-abingejulmal.

Al we tulemal ichejal Pabbak wis kudiguo.

Tenal apka te-cholbal wilub-taklenonikoedgin,

ilgwen Pab-igedo.

14 “Tegin immal-kwa-iko-naidzhik-apatismalad chogle:

tule Pab-kakapurwa itojal,

Pab-kakapurwa abingenoniko.

Tenal we tulemal Pabbak-kudiidgin iti-napkin-pinzheedbal pukib-itoged kin nakwidago.

Tegin we tule immalmal-ichejul-nikuedbal tegin weligwal aga chan-imakedbal,

e-pinzheed kalenoniko.

Tegin we tule Pab-igenonibalo.

15 “Tegin immal-kwa nap-nuedgin apatismalad chogle:

tule-nuegan tegin tule-nued-pinzhemalad.

Tenal we tule Pab-kakapurwa itojal,

Pab-kakapurwa-abingenoniko,

tegin Pab-kwen-igeojul-kuo.

Tenal we tulemal Pab-chogzhadyob pane-pane alamakedbal nued nanadamalo.

Imi immal-kwa-tiged-igaldin weob chogledo.”

16 Tegin Jesús chogalbal:

“Imi tule-kwen-nikchul kallen ogajal mete-yabal chigal,

o chulil,

ulu-ulpal chigal.

Tenal tule kallen ogajal,

keg-chulgu kallen-kalugin chienabmal,

tule-ukpomamimalad mag takegal kallen-neg-otalojii.

17 Al immal-otukal-maid keg-chulgu wisgulenoniko,

tegin immal-otukal-kujad keg-chulgu mag taklenoniko,

tegin immal otukal-kujad tulemal pél wisgunonimalbalo.

18 “Al pe nuekwa pinzheenab pe igi Pab-ito-dewa.

Tenal pe nuekwa Pab-itojal,

Pab ukin pega e-pinzheed-pid uknonibalo.

Tenal pe nuekwa Pab-itojulil,

Pab pegin e-pinzheed egwannoniko.”

19 Imi teun takalgu,

Jesús tulemal-oturdanaidgin,

Jesús-e-nan Jesús-e-urpamalbak Jesús-taknonimal.

Tenal tulemal-ichejul-wanagakkin-pukwadbal Jesús-e-kwenamalad keg Jesús-chiidzhe toggusmal.

20 Tegin tule-takchamalad Jesúsga chognonimal:

—Pe-nan pe-urpamalbak magarbal pukwamal.

Emalde pebak chunmabimal.

21 Tegin Jesús tulemalga chogal:

—Imi tule Pab-kakapurwa itojal tenal keg-chulgu Pab-chogzhadyob nanemalal,

wedin purpal an-nan tegin an-kwenamalad-chunchunnad.

22 Tegin te ibagwengin Jesús aga e-chapinganga chogal:

—Nemal mata-opakal.

Tegin Jesús aga e-chapinganbak ulgin nakwismalgu,

nadmalzhun.

23 Tegin Jesús ulgin-natapmaladgin ul-yagin kabid.

Tegidgin purwa pela-pela kolnonigu,

mata peyedzhe tunkualmo.

Tegin mata arwialgu ul-azhubal ti-milegalidbal ti ulgin engual.

Al ul togdani-pes.

Tenal Jesús-e-chapingan wichulmal emalde igi kunemal-dewa purkwenemal o tullenemal.

24 Tegidgin e-chapingan kueye-kueye Jesúszhe nonimal Jesús-otagal.

Tegin e-chapingan Jesús-otasgu,

Jesúsga chogalmal:

—Tummad,

pe tak anmalbi-ul-togdani.

Anmal ogangudanimalbal.

Tegin Jesús atasgu,

kep purwaga tegin mata-arwedga chogal:

—¡Pe wis pogiguma!

Tegidgin purwa ilgwen poki nad,

tegin mata ilgwen chiale-pesmo.

25 Tegin Jesús aga e-chapinganga chogal:

—¿Pe-ankin-penzhulidde igi pe kuddé?

Tegin Jesús-e-chapingan Jesús-kwen-abinchaszhul-kus.

Tenal Jesúsgin-kwakijadbal weob pakal pesmal.

Tegin Jesús-e-chapingan aga emal-emal chogalmal:

—¿Ibi-tule-wede?

Purwa tegin mata-aroed Jesús-ega-chogzhad-pallí ibzhe.

¿Tegil we Jesús purwa-ibeddé?

26 Tegin Jesús aga e-chapinganbak yabli Galilea-mata-opakal omosmalzhun,

Gerasaje.

27 Tegin Jesús Gerasa-omopen naigunonimalgu,

ul-akar aktesmal.

Tegidgin tule-neg-kweburgined-nia-nikad-walgwen Jesús-abingusmal.

Tenal teun we tule-nia-nikad pirkabalgus neggin kwen maichul.

Tenal we tule uanbal chwili mai,

mol pel nikchul.

28 Tegin tule-nia-nikad Jesús-takchagu,

sapejul kolmas,

tegin Jesús-abir chimtinoni.

Tegin tule-nia-nikad sapejul Jesúszhe kote chogal:

—Jesús Pab-Pul-Tummad-e-Machiye,

¿ibiga pe ankin yoledani-wedeye?

An peje wile,

pe melle sapejul an-imakoye.

29 (Imi teun Jesús pato niaga chogzhagusdo:

“Pedin keg-chulgu we tule-akar pe noenab.”

Tenal tulemal melugus ezha-tubgin chunkalgin tegin naggin tule-nia-nikad-etinmalan,

melle wakingal.

Tegin tulemal tule-nia-nikad-takkwisdamalbal.

Tenal nia tulegin tognonikil,

tule ilgwen ezha-tub-etilenaid idirda,

neg-nikchulidbal wakisda.)

30 Tegin Jesús tule-nia-nikadzhe ekichial:

—¿Igi pe nugdé?

Tegin tule-nia-nikad Jesúsga chogal:

—An nug Ichejulid.

¿Tenal ibiga Ichejulid nug pe ebinzhe?

Imi nia we tulegin íchejul-mamikidbal weob nugdo.

31 Tegin niamal kannan-kannan Jesúszhe wilenaigualmal melle Jesúsde nia-oturdaleged-negzhe e-palmidgal.

32 Imi teun takalgu,

chinmal-ichejul yal-abal mas mabukmal.

Al niamal Jesúszhe wilegalmal emalde nabir chinmalgin ukpoo-dewa.

Tegin Jesús niamalga igal-ukchajun chingin ukpogal.

33 Tegin niamal tule-akar nodmalgu,

ilgwen chingin ukpotapmalzhun.

Tegidgin chinmal arpak koelegalmalgu,

pulal turmadmal,

yal-urchikal-kwichidgin mataje pél apatismal.

Tegin chinmal pél tigin ogangusmalzhun.

34 Tegin tulemal-chin-takpukmalad takchagu chin-ogangusmal,

abarmadmal tulemal-igalbal-mamimaladga choge-nad tegin tule-neg-kweburginmaladga choge-nadmalmo.

35 Tegin tulemal wisgusmalgu tule-nia-nika-nad nugus tegin chinmal ogangusmal,

al tulemal taknadmalzhun igi immal kujad.

Tegin tulemal Jesúszhe nonimalgu,

tule-nia-nika-nad-taknonimal Jesús-nabal mol-yowi nued-chii,

pato koelegal-chul.

Al tulemal Jesús-tobgualmalzhun.

36 Tegin tule-takchamalad tule-nonimaladga palchogzhamal tule-nia-nika-nad igi nugus.

37 Tegin Gerasa-tulemal-pel-kwapa Jesúsgin-kwakijadbal Jesúszhe wilenaigualmal ilgwen kannan Gerasa-neg-akar negal.

Al Jesús kannan ulgin nakwisbal kannan negal.

38 Tegin tule-nia-nika-nad Jesúszhe wilenaigualmo,

Jesúsbak mes negalmo.

Tenal Jesús we tulega chogal:

39 —Tenal pedin keg anpak neel.

Tenal pedin kannan aga negzhe neenab tulemalga pél palchoggal Pabdin igi pe-nudas.

Tegin tule-nia-nika-nad nadzhun,

tule-neg-kweburgin-pukmaladga pel-kwapa palchogzha Jesús e-nudasgujad.

40 Tegin tulemal wisgusmalgu Jesús mata-opakal-akar tani,

al tulemal-ichejul Jesús-abintabukmal.

Tegin tulemal yer Jesús-abingasmalzhun.

41 Tegidgin tule-walgwen Jesús-abir chimtinoni.

Tenal we tuledin Judio-ormaked-neg-e-tummad-walgwen.

Tenal we tule nug Jairo.

Tegin Jairo Jesúszhe wilenoni e-negzhe negal.

42 Imi teun takalgu,

e-chiskwa-walkwénnagwad-pirkaambe-kakabo-nikad iche-napi-purkwedani-mai.

Tegin Jesús Jairoga chogal:

—Tegil nabirde,

an pebak negzhe naodo.

Tegin Jesús Jairo-negzhe nadedgin,

tulemal-ichejul Jesúsbak ali-ali natapmalmo.

43 Imi teun takalgu,

ome-walgwen Jesúsbak natapmo.

Tenal we ome pirkaambe-kakabogus aga e-purpa-takedbak a-imadii.

Tenal ome ina-tulganzhe ina chaabin,

tenal omega yabli ina kwen kuszhul-kus,

(tenal ome pinche-pakal pél aga mani misbal).

44 Tegin ome yankalbal-akar Jesús-mol-turpa-turpad ebusgu,

apka-pakal omega e-ponigan akunoni.

45 Tegidgin Jesús chogal:

—¿Toa an-ebusdé?

Tegin tulemal-wal-walgwen Jesúsga chogalmal:

—An wichíwa toa pe-ebus.

Tegin Pedro Jesúsga chogal:

—Tummad,

¿pe takchulzhí tulemal-ichejul pegin yolenanimal?

¿Igi pe wisguo:

‘We tule ankin walmas?’

46 Tegin Jesús kannan chogalbal:

—Tenal an wisdo,

tule-walgwen an-ebus.

Tenal an naga mag itos,

an tule-walgwen-nudas.

47 Tegin ome itosgu Jesús e-wisgus,

ome ampayo Jesús e-takeddu,

tu-tu-tu-tu Jesús-abir chimtinoni.

Tegidgin ome tulemal-wagin Jesúsga chogal,

ede yola-pirkaambe-kakabo-kus aga poniganbak a-imadii.

Tegin ome chogalbal ede Jesús-mol-tuku-ebujadgin apka-pakal ega e-ponigande akunoni.

48 Tegin Jesús omega chogal:

—Puna,

pe ulubgin ankin penzhul-kunonikidbal,

pe nugus.

Imisgin pe akalzhul nejunno.

49 Tegin Jesús ampa ome-nugujadbak chunma-kwichidgin,

tule-walgwen Jairo-neg-akar noni.

Tegin we tule Jairoga chogal:

—Jairo,

pe-chiskwa pato purkwis.

Pe melle Tule-oturdakedzhe pal wilego,

pebak negzhe negal.

50 Tenal Jesús tule-Jairoga-chognonikid itosgu,

Jairoga chogal:

—Pe melle akal-itogo,

ankinbi pe unnila ibzhao.

Tenal pe ankin ibzheel,

pe-chiskwa yabli tullego.

51 Tegin Jesús Jairo-negzhe omosgu,

tule-pimalad-odogal kwen imaszhul.

Tenal Jesús unnila odos;

Pedro,

Juan,

Jacobo tegin puna-purkwijad-e-pab tegin e-nan.

52 Tenal tulemal-neggin-pukmalad ponanimal,

tegin pukib-itogedbal puna-purkwijadga okormananimalbal.

Tenal Jesús tule-okormananimaladga chogal:

—¡Melle pe pomalma!

We puna purkwiszhuli,

pinche kabmai.

53 Tenal tulemal Jesúsga allealmal,

tenal tule-ponanimalad nued wismaldo,

punade purkwis.

54 Tenal Jesús chunkalbal puna-kasgu,

punaga chogal:

—¡Puna,

pe kwisguma!

55 Tegidgin puna-purpa kannan punagin tognonibalgu,

puna ilgwen kwisgudzhun.

Tegin Jesús puna-e-nanganga chogal:

—Masgin pe puna-okunno.

56 Tegin puna-kannan-tullejad-e-pabgan weob pakal pesmal.

Tenal Jesús puna-e-pabganga chogal:

—Pe melle tule-pimaladga pe palchogo,

puna igi kannan tullejad.

Imi teun Jesús weob Jairo-chiskwa-otulosdo.