Jesús chogzhagujad Jonásgin-immal-kujadbal tulemal wisgunonimalo, Jesús ibi-tule
16
Tegin Pariseomal tegin Saduceomal Jesúszhe nonimal Jesús-wilub-takegal.
Tegin we tulemal Jesúsga chogalmal:
—Imi pedin Pab Tummadzhe wis ekiso anmal-wagin immal-taktijulid imagal,
anmal wisgal,
Pab Tummad chunchunnad pe-palmialid o chul.
2 Tenal Jesús we tulemalga chogal:
—Chulá.
Imi itigin neg-kinnid naigunonikil,
pemal chogaldamal:
‘Imi neg chedo pél kinnidbi nail,
al anmal wismaldo,
pan neg-yola-pakal.’
3 Tegin pemal chogaldamalbal:
‘Imi neg wakur-wakur pél kinnidbi naibalil,
al anmal wismaldo,
imis ti-widani.’
Imi pemal nued wismal neg-taklegedbal,
neg igi kuo.
Tenal pemal immal-kunaidbal yabli wichulmal,
igi chogle-wede.
4 “Imi tule-iskana tegin tule-Pabgin-nosmalad peigujimaldo antin ega immal-taktijulid ima oyogal an Pab-akar tani.
Tenal we tulemalga immal-taktijulid kwen oyogojul-kuo.
Tenal we tulemal Jonásga-immal-kujadbal unnila wisguo,
antin ibi-tule.”
Tegin Jesús aka-pukwa we tulemal-ebesmal.
Tegin Jesús nadzhun.
Jesús chogzhagujad, Pariseomal-tegin-Saduceomal-tulemal-oturdaked igal-nuedzhul
5 Tegin Jesús aga e-chapinganbak mata opaknatapidgin,
teun Jesús-e-chapingan aga madu igesmal.
6 Tegin Jesús aga e-chapinganga chogalzhun:
—Aga pe nue takermal,
Pariseomal tegin Saduceomal e-madu-inaje.
7 Tenal Jesús-e-chapingan aga emal-emal Jesús-emalga-chogzhadgin chunmakalmal,
chogalmal:
—¿Imi anmal madu cheinonijulidbal,
al Jesús weob anmalga chogalyé?
8 Tenal Jesús itosgu e-chapingan madu-cheinonijulidgin chunmananimal,
Jesús aga e-chapinganga chogal:
—¿Ibiga pe madu-cheinonijulidgin,
pe chunmananimal-wede?
¿Pemal ampa ankin penmaldé?
9 ¿Pemal ampa aku-itomalbaldé,
an pega chunmajad?
¿Pe pato igesmaldé,
an madu-walatalgin miliatal tulemal-okuchad?
¿Pe pato igesmalbaldé,
teun karpa-kwabigwa mas-okpitcha-jogna?
10 ¿Tegin pe pato igesmalbaldé an madu-walakuglegin milibake tulemal-okuchad?
¿Pe pato igesmalbaldé,
teun karpa-kwabigwa mas-okpitcha-jogna?
11 ¿Tede pe igi aku-itone,
antin sanal madugin kwen chunmajul?
Tenal an pemalga chogdo:
pemal nue aga pe takermal Pariseomal tegin Saduceomal e-madu-inagin.
12 Tegin Jesús-e-chapingan kep mag itononimal Jesús ibi madu-inagin ega chunmanai.
Imi Jesús madu-inagin ega kwen chunmajul,
tenal Jesús e-chapinganga chogzhado emaldin nue aga takermal Pariseomal tegin Saduceomal tulemal-oturdaked-igalgin.
Pedro Jesúsga chogzhagujad: “Pedin Pab-Machi-chunnad”
13 Tegin Jesús neg-kwebur-Cesarea-de-Filipo-tikalzhe nonigu,
Jesús aga e-chapinganzhe ekichial:
—¿Tulemal igi ankin chogmal,
an-Te-Tule-Chunnade toa-tule?
14 Tegin e-chapingan Jesúsga chogalmal:
—Tulemal-kwénna-kwénna chogmaldo,
pede Juan-Bautista-purkwijad.
Kwéntin chogmo pedin Elías-patoun-purkwijad.
Kwéntin choge pede Jeremías-patoun-purkwijad.
Chulil,
pede Pab-kaka-palchoged-pimalad-walgwen.
15 Tegin Jesús aga e-chapinganzhe ekichialmo:
—¿Anná,
pemalde igi ankin chogmalmode ante toa-tule?
16 Tegin Simón-Pedro Jesúsga chogalzhun:
—Imi pedin Cristo-Pab-akpene-chogzhad-palmidagoed-tule.
Pe Pab-Tummad-Tulad-E-Machi.
17 Tegin Jesús Pedroga chogal:
—Jonás-machi-Simón,
Pab pega ib-nued imas.
Imi pe-ankin-chogzhad,
tule pega kwen chogzhajul,
an-Pab-nikpa-maid pega chogzha,
antin Pab-Machi.
18 Imi an pega chogdo:
imi pedin Pedro,
tenal an we akwa-askin iglesia chobnaidyob,
an pebal tulemal-urpo,
anpal naigugal.
Tenal purkwed-tule-mejed meke-igi we tulemalgin kwen nakwejul-kuo.
19 Tenal an pega Pab-neg-takmaid-e-llavemal uko.
Imi meke-ibi-igal pe-chogzhadbal iti-napkin kalenonikil,
we igal Pab-neggin kalenonimogo.
Tenal pe-chogzhadbal meke-ibi-igal pe iti-napkin ukel,
Pab-neggin we igal tulega uklemogo.
20 Tegin Jesús aga e-chapinganga chogal:
—Imi pe melle tule-pimaladga pe palchogo,
an Pab-akpene-chogzhad-palmidagoed-tule.
Jesús aga chogzhagujad ede purkweenab
21 Imi teun-akar Jesús aga e-chapinganga chogdi-kual,
ede Jerusalénzhe neenab,
tegin Judio-chelegan-tummagan tegin tule-irwal-Pabzhe-kolmalad-e-tummagan tegin Moisés-igalgin-tulemal-oturdamalad peyedzhe e-owiomalo.
Tegin Jesús chogalbal tulemal e-mesmalo,
tegin Pab Tummad ibapágin kannan e-otullenonibalo.
22 Tegin Pedro itosgu immal Jesúsga kune,
pidzhi Jesús-ches.
Tegin Pedro Jesúsga chogal:
—Tummad,
imi pe-chogzhadyob Pab pega melle immal imakelen,
nabirin.
Tenal pe-imi-chogzhadyob pe kwen wilegojul-kuo.
23 Tegin Jesús Pedrozhik akpiridgu,
Pedroga chogal:
—Nia-Satanás,
pe we-akar nema.
Pedin igal-puledgin an-egwanbi-kual.
Tenal pedin Pab-igalgin kwen pinzhejul,
pe tule-igalgin pinzhenai.
24 Tegin Jesús aga e-chapinganga chogalzhun:
—Imi meke-ibi-tule anpal naigubiel,
we tule aga tukingabi pal kwen pinzhejulinab.
Tenal tule kuakwa kudiinabbal anka purkwegal,
tule nakrusgin aga purkwe-natapidyob.
Tenal tule an-chogzhadyob naneel,
kep ankin-turdaked-tulega kunoniko.
25 “Imi meke-ibi-tule anpal-naidbal yapa purkwejogel we tule yabli pelgunoniko.
Tenal meke-ibi-tule anpal-naidbal akalzhul purkwejogel,
we tule chunchunnad tullenoniko.
26 Imi tule pel-kwapa iti-napkin immalmal nikunonikilen,
tenal purpa-abonoged kwen nikchulil,
¿ibi-nued we tulega kunoniko pe ebinzhe?
Chulá.
¿Tenal tule ibi-immalmal-ukedgin unnio aga purpa abonogal melle Pabzhe sapejul oturdalegal?
Chulá.
Keg kue.
Tenal immal kwen nikchul tule aga purpa abonogal.