Kunwej Jaxca Chi Yoche Ebꞌ Ket Creyenteal
15
Jaon tiꞌ,
tecꞌan jon xa yin yet Dios,
yutol chi xa naꞌcha el ku tol cꞌam sowalil wan tuꞌ.
Ta ey ebꞌ man to tecꞌan oj yei.
Chi xiw ebꞌ yu.
Yuxan cu cuenta kakꞌon techa ebꞌ cꞌamto stecꞌanil tuꞌ,
yet watxꞌ manche somcha el ebꞌ ku.
Cꞌam chi skeꞌ comon cꞌal chi kute tzet chi yoche cu naꞌbꞌal.
2 Junjun jon,
chi ojabꞌ kunwej tzet chi ẍaꞌ scꞌul ket creyenteal,
yet watxꞌ,
watxꞌ yet ebꞌ,
catuꞌ chi oc ebꞌ yin stecꞌanil.
3 Jaꞌ Naj Cristo,
cꞌam chi yun asan tzet chi yoche.
Jaꞌ tzet chi yoche Dios jix yunne.
Yuxan chi yal yul An Juun jaxca tiꞌ:
“Jaꞌ yet chi bꞌuchwa ebꞌ ja win,
jain chi wabꞌ pax syaꞌil,”
ẍi Jesús yul An Juun tuꞌ.a
4 Masanil tzet tzꞌibꞌebꞌilcan yul An Juun yet peyxa tuꞌ,
ey yopiso cu scuyoni.
Chi yakꞌ cu tecꞌanil,
chi yakꞌon pax smimanil cu cꞌul yet watxꞌ chi ka cꞌal oc Dios yipoj cu cꞌul.
5 Jaꞌ Dios chi akꞌon cu tecꞌanil,
catuꞌ chi yakꞌon pax smimanil cu cꞌul.
Chin kꞌan tet Dios tol chi colwa kin yu chi cu ecꞌ yin watxꞌcꞌulal cu masanil jaxca jix yun yecꞌ Cristo.
6 Ta jaxca tuꞌ junxane naꞌbꞌale oj je yunne.
Jun laan xacꞌal je yalon je watxꞌ kꞌane tet Dios,
smam Naj Kaawil Jesucristo.
Jun Skꞌaneal Yet Colbꞌanile Albꞌilcan El Snan Xol Ebꞌ Man Israel Oj
7 Yuxan,
sowalil chi cu chaꞌ masanil ebꞌ ket creyenteal cu nan cu xol,
yutol jaxca tuꞌ jix cu yute ẍaꞌon Cristo yu koc yetoj,
yu xeclo eloj tol miman swatxꞌil scꞌul Dios.
8 Chi wal wan tiꞌ ey jex an,
yutol jaꞌ Cristo tuꞌ jix jul yakꞌ sbꞌa yakꞌomaloj servil ebꞌ yet Israelal.
Jaꞌ jix jul akꞌon can yun tzet yalnaj can Dios tet ebꞌ kichmam,
yet jix yakꞌon can stiꞌ tet ebꞌ.
Yuxan jaxca tiꞌ jix yute xꞌoxon el Cristo tol chi cꞌal yun tzet chi yal Dios.
9 Yetoj pax oj,
yu pax ebꞌ man Israeloj,
yuxan jix julecꞌ Cristo,
yet watxꞌ chi yal ebꞌ watxꞌ kꞌane tet Dios,
yutol jix okꞌ scꞌul yin ebꞌ.
Tol chi yal yul An Juun jaxca tiꞌ:
Jaꞌ xol ebꞌ man Israeloj,
oj wal watxꞌ kꞌane ey jaach.
Oj jin bꞌitne pax wan bꞌit ey jaach.b
10 Chi yalon pax junxa tiꞌ yul An Juun:
Jaex man jex Israeloj,
tzalaanwej yetoj ebꞌ sconobꞌ Dios.*c
11 Ey bꞌey chi yal pax jaxca tiꞌ:
Jantaj jex man jex Israeloj,
alwej je watxꞌ kꞌane tet Naj Kaawil.
Je masanil,
jaex chex ecꞌ bꞌey junjun conobꞌ,
alwej eloj,
tol miman yeloc apnoj Naj Kaawil.d
12 Tzꞌibꞌebꞌil pax can yu naj Isaías yul An Juun tuꞌ jaxca tiꞌ:
Ey jun yicꞌaal naj rey David oj aloj.
Jaꞌ oj ale oc Yaawiloj ebꞌ man Israeloj.
Jaꞌ jun tuꞌ,
oj yaoc ebꞌ yipoj scꞌul,
ẍi yul An Juun.e
13 Jaꞌ yin Dios bꞌey chi tit yip cu cꞌul chi woche chi akꞌon pax je tzalacꞌulal,
yetoj watxꞌcꞌulal snan je xol,
yutol che yaoc Dios yin je cꞌul.
Ta jaxca tuꞌ oj yakꞌ cꞌal yip je naꞌbꞌal,
yutol jaꞌ Yespíritu Dios chi akꞌon yipalil ey jex.
14 Jex wuẍtaj,
jex wanabꞌ,
wotaj sicꞌlebꞌil an,
tol watxꞌ je naꞌbꞌal,
catuꞌ caw jelan jex yin yet Dios.
Wotaj an,
tol caw chi skeꞌ je yakꞌlen je naꞌbꞌal je xol tituꞌ.
15 Caxcꞌal queytuꞌ je bꞌeybꞌal,
cꞌam cꞌal chin xiw jin tzꞌibꞌentoj wan cuybꞌanile tiꞌ ey jex an,
yu jin jejon je naꞌ,
yet watxꞌ cꞌam chi too qꞌueycꞌulal je yu.
Chi wun jaxca tiꞌ an,
yutol jaꞌ Dios jix akꞌon jun wopiso tiꞌ an yu swatxꞌcꞌulal.
16 Jaꞌ jix akꞌon wopiso wakꞌon servil Jesucristo snan xol ebꞌ man Israeloj an.
Jaꞌ wopiso akꞌbꞌil yu an,
jaꞌton alo el skꞌaneal yet colbꞌanile jix yakꞌ Dios,
yet watxꞌ ey ojabꞌ ebꞌ man Israeloj,
oj waoc yul skꞌabꞌ an.
Jaxca junoj saꞌbꞌeal chi wakꞌ tet Dios.
Jun chi ẍaꞌ scꞌul Dios.
Jaxca tuꞌ ebꞌ yul sat,
yutol jaꞌ Naj Espíritu chi iꞌon oc ebꞌ yetoj.
17 Yutol chi mulna Cristo wetoj an,
yuxan chi skeꞌ walon an,
tol miman yeloc apnoj jun mulnail chi wun tet Dios tiꞌ an.
18 Cꞌam chi skeꞌ walon tzet jix el yunen wanxa ebꞌ chi akꞌwi servil Dios pax oj.
Cꞌam cꞌal chin xiw walon el tzet chi el yunen Cristo yin jin skꞌanbꞌalnen yet jix akꞌle sjije ebꞌ man Israeloj.
Jix ecꞌ wal can el skꞌaneal tet ebꞌ an.
Ey pax wan tzetyetal jix jin txꞌoxel xol ebꞌ an.
19 Ey wan milagro,
* wan tzetyetal chi qꞌueya scꞌul ebꞌ yu,
txꞌoxbꞌil wu snan xol ebꞌ an,
cꞌal wanxa tzet chi txꞌoxon el yipal Dios.
Yutol jix yakꞌ Naj Santo Espíritu yipalil ey jin an.
Jaxca cꞌal tuꞌ jix jin ecꞌ yu walon el watxꞌ skꞌaneal Cristo bꞌey junjun conobꞌ.
Jaꞌ bꞌey Jerusalén,
jaꞌ tituꞌ jix bꞌabꞌi walel an.
Jix jin ecꞌ walel bꞌey junjun conobꞌ,
masantaꞌcꞌal jix jin apni bꞌey yul jun lugar chi yij sbꞌi Iliria.
20 Jaxca cꞌal tiꞌ jix wute wakꞌon wip walon el skꞌaneal yet colbꞌanile bꞌey junjun lugar bꞌey cꞌamto chi abꞌle skꞌaneal Cristo.
Cꞌam chi woche tol jaꞌ bꞌey albꞌilxa el yu wanojxa chi ecꞌ walel an.
21 Jaxca yalon can yul An Juun bꞌey chi yal jaxca tiꞌ:
Jaꞌ bꞌey cꞌamto chi apni skꞌaneal,
oj apnoj ocoj.
Yetoj ebꞌ cꞌam tocꞌal chi abꞌen skꞌaneal,
oj naꞌcha el yu ebꞌ,
ẍi yul An Juun.f
Chi Yoche Naj Pablo Chi Too Bꞌey Roma
22-23 Ecꞌal el chi woche chex too wil an.
Tol yu wopiso tiꞌ,
yuxan cꞌam chi skeꞌ jex too wiloni.
Jal tinaniꞌ xin,
jix lawi jin mulnail bꞌey wan lugarlaj tiꞌ.
24 Yuxan chin naꞌ,
jaꞌ yet oj jin toj bꞌey España,
catuꞌ oj jex ecꞌ wilon an,
yu ecꞌ wakꞌon tzalabꞌoj jin cꞌul je yetoj an.
Oj xew wecꞌ jayebꞌoj cꞌu je yetoj xin,
catuꞌ chi woche chex colwa wetoj yet chin too bꞌey España tuꞌ.
25 Jal tinaniꞌ,
jaꞌ bꞌey Jerusalén oj jin bꞌabꞌoj ecꞌoj,
yu ecꞌ wakꞌon jun colwal tet ebꞌ yet xa Dios tituꞌ.
26 Yutol jix el yin scꞌul ebꞌ a Macedonia yetoj ebꞌ a Acaya yiꞌon a jun colwal,
catuꞌ chi too tet ebꞌ creyente mebꞌa bꞌey Jerusalén tuꞌ.
27 Jix el yin scꞌul ebꞌ yaontoj jun colwal tuꞌ.
Watxꞌ ton jaxca tuꞌ,
yutol jaxca tol ey sjec ebꞌ tet ebꞌ a Jerusalén tuꞌ.
Jaꞌ ebꞌ a Jerusalén tuꞌ,
Israel ebꞌ.
Jaꞌ ebꞌ jix colwa yin ebꞌ man Israeloj tuꞌ yet jix yalon skꞌaneal yet colbꞌanile tet ebꞌ.
Yuxan,
jaꞌ ebꞌ man Israeloj tuꞌ,
scuenta ton ebꞌ scolwa yin ebꞌ Israel tuꞌ yetoj niꞌoj tzetyetal ey tet ebꞌ yetoj scolwal tuꞌ.
28 Yuxan sowalil chi ecꞌ wakꞌ jun colwal tuꞌ tet ebꞌ a Jerusalén tuꞌ an.
Chi lawi tuꞌ xin,
catuꞌ chex ecꞌ wilon yet lalan jin to bꞌey España tuꞌ an.
29 Wotaj an,
tol jaꞌ yet oj jin apnoj ey jex tuꞌ an,
miman swatxꞌcꞌulal Cristo oj yakꞌ ey jon.
30 Jex wuẍtaj,
jex wanabꞌ,
jaꞌ Naj Yespíritu Dios chi akꞌon kunne,
tol chi cu camcꞌulne cu bꞌa.
Yu jun cu camcꞌulal tuꞌ chin kꞌan ey jex,
caw che yakꞌ je yip je yoc yin txa wetoj an.
Caw chex txali tet Dios wu an,
yutol jaxca tiꞌ chi yoche scꞌul Naj Kaawil Jesucristo.
31 Che kꞌan tet Dios tol oj jin scolel yul skꞌabꞌ ebꞌ man creyenteoj a Judea.
Chex txali pax yu jun colwal oj wiꞌtoj tet ebꞌ creyente a Jerusalén tuꞌ,
yet watxꞌ chi tzala ebꞌ yet chi ẍaꞌon ebꞌ.
32 Chex txali pax wu an,
yet watxꞌ yin tzalacꞌulal chi yun wapni oc ey jex tuꞌ an,
ta jaxca tuꞌ chi el yin scꞌul Dios.
Catuꞌ chin ecꞌ xew jayebꞌoj cꞌu je yetoj tituꞌ.
33 Jaꞌ Dios akꞌom watxꞌcꞌulal cu xol,
chi woche chi oc Dios je yetoj je masanil bꞌey tituꞌ.
Amén.