Manche Cu Naꞌoc Yin Ket Creyenteal
14
Ey ebꞌ creyente man to tecꞌan oj yei,
yutol cꞌamto chi naꞌcha el scuybꞌanil Cristo sicꞌlebꞌil yu ebꞌ.
Jaꞌ ebꞌ man to tecꞌan oj yeoc tuꞌ,
chaꞌwej oc ebꞌ je yetoj.
Manche je teele je bꞌa yetoj ebꞌ yin tzet cꞌamto chi naꞌcha el yu ebꞌ tuꞌ.
2 Yutol jaꞌ ebꞌ creyente tecꞌan xa yei,
yotaj ebꞌ tol yal cꞌal tzet chi skeꞌ sloꞌon ebꞌ ma ẍiꞌon ebꞌ.
Ey pax ebꞌ man to tecꞌan oj yeoc snaꞌbꞌal.
Yuxan chi xiw ebꞌ ẍiꞌon chiꞌbꞌe.
Asan ita chi ẍiꞌ ebꞌ.
3 Jal jaon mac jon chi cu chiꞌ masanil tzettaj yetal,
ma skeꞌ kalon skꞌumal ebꞌ cꞌam chi chiꞌon masanil tzet chi cu chiꞌ tuꞌ.
Yetoj pax oj,
jaꞌ ebꞌ cꞌam chi chiꞌon masanil tzetyetal tuꞌ,
ma skeꞌ yalon pax ebꞌ cu kꞌumal,
yutol chabꞌil jon cꞌal yu Dios yetoj ebꞌ.
4 Kꞌinaloj ta ey junoj mac chi mulna bꞌey spatrón.
¿Ey mi kalon ket cu naꞌon oc yin naj tuꞌ che naꞌ?
Cꞌamaj,
asan spatrón naj tuꞌ chi skeꞌ yaloni,
ta watxꞌ naj yul sat ma cꞌamaj.
Yuxan quey jon tuꞌ tet Naj Kaawil.
Watxꞌ oj cu eloc yul sat,
yutol ey yipalil Naj eyoc ketoj,
yet watxꞌ,
caw watxꞌ chi kute cu bꞌa.
5 Ey ebꞌ creyente chi aloni tol ey wan cꞌu tol miman yeloc apnoj sattaj wanojxa.
Ey ebꞌ chi alon xin,
tol laan cꞌal junjun cꞌu,
cꞌam junoj miman yeloc apnoj.
Yuxan cu naꞌwej yul cu jolom junjun jon bꞌeytet yel.
6 Jaꞌ mac chi yiꞌey sbꞌa yet wan cꞌu chi wal tiꞌ,
chi yiꞌey sbꞌa yutol miman yeloc apnoj Naj Kaawil yul sat.
Jacꞌalaꞌ pax mac cꞌam chi yiꞌey sbꞌa yet wan cꞌu tuꞌ xin,
cꞌam chi yiꞌey sbꞌa yutol miman yeloc apnoj Naj Kaawil yul sat.
Yetoj pax junxa tiꞌ,
jaꞌ mac chi ẍiꞌ yal cꞌal tzetyetal,
chi ẍiꞌ yutol ey yeloc apnoj Naj Kaawil yul sat,
yutol chi yal yu diosalil tet Dios yu,
catuꞌ chi sloꞌoni ma chi ẍiꞌoni.
Jal pax mac cꞌam chi ẍiꞌ ma cꞌam chi sloꞌ masanil xin,
cꞌam chi ẍiꞌ,
yutol ey yeloc apnoj Naj Kaawil yul sat.
Tol chi yal pax yu diosalil tet Dios.
7 Yajbꞌan iquis jon,
man ket oj cu bꞌa.
Jaꞌ yet chi cu cami,
man pax ket oj cu bꞌa.
8 Yajbꞌan iquis jon to,
chi cu bꞌeybꞌalnewej jaxca tzet chi yoche Naj Kaawil.
Jacꞌalaꞌ yet oj cu camoj,
oj cu cam jaxca chi yoche Naj Kaawil tuꞌ.
Yuxan,
caxcꞌal iquis jon ecꞌoj,
caxcꞌal chi cu cami,
yet jon cꞌaltaꞌ Naj Kaawil tuꞌ.
9 Yuxan jix cam Cristo,
catuꞌ jix pitzcꞌu pax a naj,
yet watxꞌ chi oc naj Yaawiloj ebꞌ camnaj cꞌal Kaawil oj mac jon iquis jon pax tiꞌ.
10 Yuxan,
cꞌam chi skeꞌ cu naꞌon oc yin junoj ket creyenteal.
Cꞌam pax chi skeꞌ kaloni,
tol cꞌam yeloc apnoj ebꞌ.
Yutol cu masanil sowalil oj cu apnoj sattaj Dios catuꞌ oj snaꞌon oc kin.
11 Yutol chi yal yul An Juun jaxca tiꞌ:
Jain Yaaw jin tiꞌ,
caw yel chi wal an.
Tol oj jul masanil ánima jin sattaj,
catuꞌ oj ey kaan ebꞌ ey jin an.
Sowalil oj yal masanil ebꞌ yetoj stiꞌ,
tol asan jin Dios jin an,
ẍi yul An Juun.a
12 Yuxan,
sowalil junjun jon,
oj kal tzettaj jix el kunen titiꞌ tet Dios.
Caw Qꞌuixwiltaj Ta Chi Kakꞌ Etex El Snaꞌbꞌal Ebꞌ Ket Creyenteal
13 Yuxan,
manche xa skeꞌ cu naꞌon oc kin junjun jon.
Yel watxꞌ jaꞌ ojabꞌ junxa tiꞌ chi kunne.
Tol watxꞌ ojabꞌ chi kute cu bꞌeybꞌal yil ebꞌ ket creyenteal,
yet watxꞌ cꞌam ojabꞌ junoj ebꞌ chi etex el ku,
catuꞌ cꞌam junoj ebꞌ chi somcha el snaꞌbꞌal.
14 Jain tiꞌ,
yutol eyoc jin cꞌul yin Naj Kaawil Jesús an,
caw wotaj sicꞌlebꞌil an,
cꞌam junoj tzetyetal cꞌam chi skeꞌ cu loꞌoni.
Ta ey mac chi naꞌoni,
tol ey junoj tzetyetal cꞌam chi skeꞌ sloꞌon yu Dios,
cꞌam chi skeꞌ yu ebꞌ,
yutol ey ton sleyal sloꞌon ebꞌ yu Dios.
15 Kꞌinaloj ey junoj tzetyetal cꞌam chi skeꞌ sloꞌle yu wanoj ebꞌ ket creyenteal.
Ta yu chi cu loꞌ ma yu chi cu chiꞌ,
catuꞌ chi cus scꞌul ebꞌ,
cꞌam cu camcꞌulal yin ebꞌ chi yal tuꞌ.
Jix cam pax Cristo yu ebꞌ cꞌal ku.
Yuxan,
caw qꞌuixwiltaj ta chi etex el snaꞌbꞌal junoj ánima yu junoj tzet chi cu loꞌ ma tzet chi cu chiꞌ.
16 Jaon tiꞌ,
kotaj tol watxꞌ masanil.
Ta ey pax ebꞌ chi aloni,
tol pena swatxꞌcꞌulal Dios yu chi kal jaxca tuꞌ,
yel watxꞌ ta cꞌam chi kal sattaj ebꞌ.
17 Jaꞌ tinaniꞌ,
ey jon oc yul skꞌabꞌ Dios.
Yuxan,
manxa smoo oj chi kaoc cu naꞌbꞌal yin tzet chi cu loꞌ ma tzet chi cu chiꞌ,
cꞌal yin tzet chi kuqꞌueꞌ.
Yuxan smoo chi kaoc cu naꞌbꞌal yin tzetyetal jichan,
cꞌal yin tzet utbꞌil chi yun koc yin watxꞌcꞌulal yetoj ánima.
Catuꞌ chi cu chaꞌon jun tzalacꞌulal chi yakꞌ Naj Santo Espíritu ey jon.
18 Ta jaxca tuꞌ chi kute kakꞌon servil Cristo,
oj tzala Dios ketoj,
catuꞌ chi yilon pax ebꞌ ket animail,
tol watxꞌ cu bꞌeybꞌal.
19 Yuxan chi ojabꞌ cu naꞌ yin tzet utbꞌil chi yun koc yin watxꞌcꞌulal cu masanil catuꞌ chi kiptzenle cu bꞌa junjun jon,
yet watxꞌ tecꞌan chi kute cu bꞌa yin scuybꞌanil Cristo.
20 Caw qꞌuixwiltaj ta chi etex el smulnabꞌal Dios yin spixan ebꞌ ket creyenteal yu cꞌal tzet chi cu loꞌ ma tzet chi cu chiꞌ.
Yuxan manche kute jaxca tuꞌ.
Yel toni,
cꞌam junoj tzetyetal cꞌam chi skeꞌ sloꞌlei,
ma cꞌam chi skeꞌ ẍiꞌle yu Dios,
ta ey pax ebꞌ chi somcha el snaꞌbꞌal yu tzet chi cu loꞌ tuꞌ,
ma tzet chi cu chiꞌ tuꞌ,
cu bꞌejcan cu loꞌoni,
ma cu chiꞌoni.
21 Yuxan,
ta ey ebꞌ chi somcha el snaꞌbꞌal yu chi cu chiꞌ chiꞌbꞌe,
ma yu chi kucꞌ vino,
ma yu junojxa tzet chi el kuneni,
yel watxꞌ chi cu bꞌejcan kunen wan tuꞌ.
22 Yutol eyoc cu cꞌul yin Dios,
yuxan kotaj,
tol cꞌam junoj tzetyetal cꞌam chi skeꞌ cu loꞌoni.
Chi ojabꞌ cu naꞌ wan tiꞌ yul sat Dios.
Ta kotaj tol chi skeꞌ cu loꞌon masanil tzetyetal,
watxꞌ ket.
23 Jaꞌ yet chi cu loꞌ ma chi cu chiꞌ junoj tzetyetal,
ta chi cu naꞌ tol ey sleyal cu loꞌon yu Dios,
catuꞌ chi to cu loꞌon pax oj,
chi oc cu penail tet Dios.
Yutol cꞌam chi kaoc yin cu cꞌul tol watxꞌ chi el kuneni.
Yal cꞌal tzet chi kunne,
ta man watxꞌoj yul sat Dios,
cu naꞌoni,
catuꞌ chi kunen pax oj,
chi oc cu penail tet Dios.