Ebꞌ 72 Scuywom Jesús Jix Ẍejtoj Yet Junel
10
Jix lawi wan tuꞌ xin,
jix sicꞌon el junxa 72 scuywom Naj Kaawil.
Jix ẍejon bꞌabꞌojtoj ebꞌ.
Catajwan jix yun stoo ebꞌ bꞌey junjun conobꞌ.
Bꞌey junjun lugar bꞌey oj ecꞌ pax Naj Kaawil tuꞌ.
2 Jaꞌ yet cꞌamto chi too ebꞌ,
jix yalon tet ebꞌ jaxca tiꞌ:
—Jaꞌ ebꞌ ánima laan ebꞌ jaxca ixim tiriw stiempoal xa scꞌuplei.
Caw yel,
ecꞌal ton ebꞌ,
jaywanne pax mac chi mulna xol ebꞌ.
Yuxan,
txalanwej tet Naj a mulnail tuꞌ,
yet watxꞌ chi ẍejontej smulnawom yu yiꞌon a ebꞌ.
3 Asiꞌwej xin,
jaxca noꞌ meꞌ chi too xol noꞌ ooj,
queytuꞌ chex wute waontoj an.
4 Manche je yiꞌ je pa,
je tumin,
yetoj je xanabꞌ.
Manche jex oc linan kꞌanabꞌ yetoj junoj mactxequel yul-laj bꞌe.
5 Jaꞌ yet chex apni bꞌey junjun na,
jaꞌ scawil scꞌul ebꞌ chi bꞌabꞌi je yakꞌa.
Che yalon tet ebꞌ jaxca tiꞌ:
“Ey ojabꞌ watxꞌcꞌulal snan xol ebꞌ yul jun na tiꞌ,”
je chi.
6 Ta ey ebꞌ chi ochen watxꞌcꞌulal tituꞌ,
oj akꞌle tet ebꞌ jaxca oj je yute je yalon tuꞌ.
Ta ey mac cꞌam chi ocheni,
man oj akꞌle tet ebꞌ jaxca che yute je yalon tuꞌ.
7 Asan bꞌey junoj na che yakꞌ je posada.
Jaꞌ tzet chi sloꞌ ebꞌ,
che loꞌ yetoj ebꞌ,
yutol jaꞌ mac chi mulnai,
smoo ẍaꞌon stool.
Manche jex ecꞌ txololoj xol-laj na.
8 Jaꞌ yet chex apni bꞌey junjun conobꞌ bꞌey chex chaꞌlei,
yal cꞌal tzet chi etxbꞌale eltej ey jex,
loꞌwej.
9 Che yakꞌ can waꞌxoj scꞌul ebꞌ yaꞌey bꞌey chex ecꞌ cꞌal tuꞌ,
catuꞌ che yalon tet ebꞌ:
“Tuxa oj oc Dios yin Yaawiloj,”
je chi tet ebꞌ.
10 Ta ey junoj conobꞌ bꞌey cꞌam chex chaꞌle xin,
che yal yul scalleal jun conobꞌ tuꞌ tet ebꞌ jaxca tiꞌ:
11 “Jaꞌ spojojal jun je conobꞌ chi oc can yin kajan tiꞌ jon,
chi cu tzic can el jon,
yu cu txꞌoxon el jon,
tol cꞌamxa kalon ket je yin jon.
Yuxan naꞌcha ojabꞌ el je yu,
tuxa oj oc Dios yin Yaawilal,”
je chi tet ebꞌ.
12 Chi wal ey jex,
tol jaꞌ yet oj jul jun cꞌual yet chi snaꞌoc Dios yin ánima,
yel xacꞌal miman syaꞌtajilal oj ẍaꞌ ebꞌ tuꞌ yintaj ebꞌ a conobꞌ Sodoma.
Wan Conobꞌlaj Man Jijemoj
13 Chi wal ey jex an,
jex a Corazín,
caw okꞌbꞌal jex cꞌule.
Cꞌal jex a Betsaida,
okꞌbꞌal jex pax cꞌule.
Kꞌinaloj ta jaꞌ bꞌey Tiro yetoj bꞌey Sidón jix yun wan milagro jix yun je xol tiꞌ,
xax yaoc ebꞌ wan eel coẍtal spichiloj.
Yetoj stikꞌakꞌil taan xax yaatoj ebꞌ yin sjolom,
yu xeclonen el ebꞌ tol caw chi cus scꞌul ebꞌ yu spenail.*
14 Jaꞌ yet oj jul jun cꞌual yet chi snaꞌoc Dios yin ánima,
yel xacꞌal miman syaꞌtajilal oj je chaꞌ yintaj ebꞌ a Tiro cꞌal ebꞌ a Sidón.
15 Yetoj pax jex a Capernaúm,
che naꞌ tol je moo je yaapnoj satcan,
tol oj jex toj pax can bꞌey syaꞌtajilal,
ẍi Jesús.
16 Jix yalon tet ebꞌ scuywom jaxca tiꞌ:
—Jaꞌ mac chi chaꞌon abꞌen ey jex,
chi yal yeloc apnoj tol jaꞌ ey jin chi ẍaꞌ yabꞌ ebꞌ an.
Jal pax ebꞌ chex intajnen eloj,
chi yal yeloc apnoj tol jain chin yintajne el ebꞌ an.
Jaꞌ ebꞌ chin intajnen can el tuꞌ,
chi yal yeloc apnoj tol jaꞌ jun mactxequel jix jin chejontej,
jaꞌ lalan pax yintajnen el ebꞌ,
ẍi Jesús tet ebꞌ.
Jaꞌ Ebꞌ 72 Chejabꞌwom Jix Paxtej Yet Jix Lawi Ẍejbꞌanil
17 Jix apni ebꞌ 72 chejabꞌwom scꞌatan Jesús yin tzalacꞌulal junelxa.
Jix yalon ebꞌ tet Jesús jaxca tiꞌ:
—Jaach Cuywam,
jaꞌ ebꞌ pena espíritu,
jix sjije ebꞌ tzet jix kalon yet jix kawten ja bꞌi,
ẍi ebꞌ.
18 Jix yalon Jesús tet ebꞌ tuꞌ:
—Jain tiꞌ,
jix wil tzet jix yun yeytej Satanás satcan,
jix ey can jul yul yibꞌankꞌinal tiꞌ jaxca chi yun ya letzꞌna yichcan.
19 Jain tiꞌ,
jix wakꞌ je yip,
catuꞌ chi skeꞌ chex oc linan yibꞌan noꞌ labꞌa,
cꞌal yibꞌan noꞌ sinam.
Wu an,
yuxan chi skeꞌ je yakꞌon eyqꞌuey yipalil naj acꞌul oc je yin,
catuꞌ cꞌam junoj tzet chex etneni.
20 Manche jex tzala yutol chi sjije ebꞌ pena espíritu ey jex.
Tzalaanwej pax oj,
yutol tzꞌibꞌebꞌil je bꞌi bꞌey satcan,
mac jex che yaoc je cꞌul yin,
ẍi Jesús tet ebꞌ.
Jaꞌ Stzalacꞌulal Jesús
21 Jaꞌ yet jun tiempo tuꞌ,
caw jix tzala a Jesús yu Santo Espíritu.
Jix yalon jaxca tiꞌ:
—Mamin,
yaaw jaach bꞌey satcan yetoj bꞌey yul yibꞌankꞌinal tiꞌ.
Chi wal watxꞌ kꞌane ey jaach an,
yutol jix ja wewbꞌa el wan tiꞌ tet ebꞌ jelan,
cꞌal tet ebꞌ caw jelan yul sat yet animail.
Jal ebꞌ cꞌam yeloc apnoj yul sat ánima xin,
jix ja wakꞌ yotajne eloj.
Queytuꞌ jix ja wute jaxca tuꞌ Mamin,
yutol queytuꞌ jix ẍaꞌ ja cꞌul,
ẍi Jesús tet Dios.
22 Jix yalon Jesús tet ebꞌ ánima eyecꞌ tituꞌ jaxca tiꞌ:
—Jaꞌ jin Mam an,
jix yakꞌ masanil tzettaj yetal yul jin kꞌabꞌ.
Cꞌam junoj mactxequel otajnen jin,
jain Cꞌaale jin tiꞌ.
Asan jin Mam tuꞌ otajnen jin an.
Yetoj pax oj,
cꞌam mac comon cꞌal chi otajnen el jin Mam an.
Asan jin Jain Scꞌaal jin tiꞌ,
wotaj an,
yetoj pax tet ebꞌ mac chi yal jin cꞌul chi wakꞌ otajnele eloj,
ẍi Jesús tet ebꞌ.
23 Jix lawi jun tuꞌ,
jix ecꞌ tꞌananoj xol-laj ebꞌ scuywom,
jix yalon tet ebꞌ xꞌojli jaxca tiꞌ:
—Caw watxꞌ je yet yutol che yil jun tzet lalan je yilon tiꞌ.
24 Yutol chi wal ey jex,
ecꞌal ebꞌ ẍejabꞌ Dios cꞌal ebꞌ yaaw yet peyxa,
jix ochen jix ilon wan tzet che yil tiꞌ,
ma pax yil ebꞌ.
Yetoj pax oj,
jix yoche ebꞌ jix yabꞌ wan lalan je yabꞌen tiꞌ,
ma cꞌal yabꞌoc ebꞌ,
ẍi Jesús tet ebꞌ.
Skꞌaneal Naj A Samaria
25 Jix lawi cꞌal jun tuꞌ,
ey jun naj cuywam yin sley Moisés jix a linanoj.
Jix yoche naj jix yakꞌ porobꞌal Naj Jesús.
Yuxan jix skꞌanle naj tet Jesús jaxca tiꞌ:
—Jaach Cuywam,
¿tzetyetal sowalil chi wun an catuꞌ oj jin chaꞌon jin kꞌinal tol ey cꞌal yin tobꞌalkꞌinal?
ẍi naj tet Jesús.
Parábola del buen samaritano (Lucas 10.25-37)
26 —¿Tzet tzꞌibꞌebꞌilcan yul sley Moisés?
¿Tzet ẍi?
ẍi Jesús tet naj.
27 —Chi yal jaxca tiꞌ:
“Cu camcꞌulnewej Kaawil cu Diosal yin masanil cu cꞌul,
yin masanil cu pixan,
yetoj masanil kip,
yin masanil cu naꞌbꞌal.
Catuꞌ chi cu camcꞌulnen pax ket animail jaxca chi kute cu camcꞌulnen cu bꞌa junjun jon,”
ẍi ley,
ẍi naj tet Jesús.a
28 —Watxꞌ ton jix ja wute ja waloni,
ta cha wun wan tiꞌ,
oj ja chaꞌ ja kꞌinal tol ey cꞌal yin tobꞌalkꞌinal,
ẍi Jesús tet naj.
29 Jaꞌ naj tuꞌ,
jix yoche naj jix xꞌoxoꞌ tol watxꞌ sbꞌeybꞌal naj,
yuxan jix yal pax naj tet Jesús jaxca tiꞌ:
—¿Mactxequel ebꞌ wet animail chi al-le tuꞌ?
ẍi naj tet Jesús.
30 Jix yalon Jesús tuꞌ jaxca tiꞌ:
—Jaꞌ yet junel,
ey jun winaj lalan stoo yul bꞌe chi tit bꞌey Jerusalén catuꞌ chi ey apnoj bꞌey Jericó.
Lalan sbꞌey naj catuꞌ jix eltej wan elkꞌom yin naj.
Pilan jix tokꞌle can ecꞌ tet naj masanil stzettaj yetal naj,
jaꞌ spichil naj jix yiꞌel ebꞌ.
Jix xew cꞌal smakꞌle naj yu ebꞌ,
catuꞌ jix too ebꞌ.
Niꞌanxane ma cam naj yu ebꞌ.
31 Catuꞌ ey jun naj yakꞌomal xaambꞌal tet Dios jix ecꞌ yul jun bꞌe tuꞌ,
tucꞌal jix oc tꞌanan naj yin naj,
catuꞌ jix too naj.
32 Jix lawi tuꞌ xin,
ey junxa naj yicꞌaal Leví jix ecꞌ pax yul jun bꞌe tuꞌ.
Tucꞌal jix oc pax tꞌanan junxa tuꞌ yin naj catuꞌ jix toi.b
33 Ey pax jun naj a Samaria lalan pax sbꞌey yul jun bꞌe tuꞌ.
Jix yilon naj tol telan ey naj yul bꞌe.
Jix okꞌ scꞌul naj yin naj tuꞌ.
34 Jix apni scꞌatan naj,
catuꞌ jix yaon oc aceite olivo yetoj vino yaniloj bꞌey jix yasitoj naj tuꞌ.c
Catuꞌ jix spichon naj yetoj kꞌap.
Jix lawi tuꞌ xin,
catuꞌ jix slacon atoj naj yibꞌan ẍe.
Jix yiꞌon cantoj bꞌey jun posada.
Caw jix camcꞌulnele naj sicꞌlebꞌil.
35 Jaꞌ yet junxa cꞌu,
yet jix too naj a Samaria tuꞌ,
jix yiꞌatej caabꞌ tumin naj,
catuꞌ jix yakꞌon can naj tet naj a posada tuꞌ.
Catuꞌ jix yalon can naj tet naj jaxca tiꞌ:
“Watxꞌ cha wute ja teynen naj yasinajtoj tiꞌ jin kꞌan an.
Ta cꞌam chi yabꞌ niꞌan tumin tiꞌ,
oj ja wal ey jin an jantaj to jix ja qꞌueyeloj,
catuꞌ oj wakꞌon sqꞌuexel ja tumin yet oj jin jul pax junelxa an,”
ẍi naj tet naj a posada tuꞌ,
ẍi Jesús yin jun skꞌaneal tiꞌ.
36 —Jaꞌ tinaniꞌ xin,
ey jun chin kꞌanle ey jaach.
Jaꞌ naj jix makꞌle yu ebꞌ elkꞌom tuꞌ,
¿mac junoj ebꞌ oxwan tuꞌ caw yel tol yet animail naj cha naꞌ?
ẍi Jesús tet naj cuywam yin sley Moisés tuꞌ.
37 —Jaꞌton naj jix okꞌ scꞌul yin naj tuꞌ,
ẍi naj tet Jesús.
—Jaꞌtoni,
yuxan,
asiꞌ catuꞌ cha wun jaxca jix yun jun naj tuꞌ,
ẍi Jesús tet naj.
Parábola del Buen Samaritano
Jaꞌ Yet Eyecꞌ Jesús Bꞌey Sna Ix Marta Yetoj Ix María
38 Jix tocꞌal Jesús yul bꞌe tuꞌ.
Jix apni bꞌey jun aldea tuꞌ.
Bꞌey ey jun ix ix,
Marta sbꞌi.
Jix chaꞌle apnoj Jesús yu ix bꞌey sna.
39 Ey jun ix sno ix Marta tuꞌ,
María sbꞌi.
Jix ey chotan ix yin scꞌul yajan Jesús,
yu yabꞌen ix tzet chi yalaꞌ.
40 Jal pax ix Marta tuꞌ xin,
caw cꞌam scolanil ix yu smulnail.
Yuxan jix apni ix bꞌey Jesús,
catuꞌ jix yalon ix tet Jesús jaxca tiꞌ:
—Mamin,
¿tumi cꞌam cha wil niꞌoj tol chi sbꞌejcan bꞌulan mulnail ix jin no tiꞌ ey jin,
jin txꞌojli an?
Al tet ix jin kꞌan an,
tol chi colwa ix wetoj an,
ẍi ix Marta tet Jesús.
41 Jix yalon Jesús tuꞌ: