Jix Waꞌxi Can Scꞌul Jun Naj Eyoc Yakꞌomaloj Servil Jun Naj Yaaw A Roma
7
Jaꞌ yet jix lawi skꞌanabꞌ Jesús tet ebꞌ ánima,
jix too bꞌey Capernaúm.
2 Jaꞌ tituꞌ ey jun naj scapitán ebꞌ soldado,
a Roma naj.
Ey jun smooso naj caw xaan yu naj sicꞌlebꞌil.
Caw yaꞌ pax ey naj,
tuxa chi cam naj.
3 Jaꞌ yet jix abꞌle skꞌumal Jesús,
jix ẍejontoj jaywan ebꞌ winaj ey yopiso xol ebꞌ Israel.
Jix bꞌet yal ebꞌ tet Jesús tol chi colwa yin naj,
yet chi too akꞌle waꞌxoj scꞌul naj smooso naj tuꞌ.
4 Jaꞌ yet jix apni ebꞌ scꞌatan Jesús,
jix oc tean ebꞌ yin Jesús,
jix yalon ebꞌ tet naj jaxca tiꞌ:
—Jaꞌ jun naj capitán tuꞌ,
smoo chach colwa tet naj,
5 yutol caw ey scamcꞌulal naj kin,
jaon Israel jon tiꞌ.
Jix yakꞌ waꞌxoj jun snail cu culto naj,
ẍi ebꞌ tet Jesús.
6 Jix too Jesús yetoj ebꞌ.
Txenxane wal yapni ebꞌ bꞌey na tuꞌ,
jix ẍejon jaywan ebꞌ yamigo naj capitán tuꞌ scꞌatan Jesús tuꞌ.
Jix yalon ebꞌ jaxca tiꞌ tet Jesús:
—Ẍi naj ey jaach jaxca tiꞌ:
“Mamin,
manche ja wetne ja bꞌa ja jul jin cꞌatan an,
yutol man jin moo oj chach octoj yul jin na.
7 Yuxan ma jin toj wal ey jaach yu naj jin mooso tiꞌ.
Asanne ojabꞌ tol cha waltej tol chi waꞌxi can naj,
catuꞌ chi waꞌxi naj.
8 Ilaꞌ jain tiꞌ,
ey ebꞌ waawil chin chejon an.
Jacꞌalaꞌ ey pax ebꞌ soldado chin chejaꞌ.
Ta ey junoj mac chin chejaꞌ,
chi cꞌal sjije stoi.
Ta ey mac chi wawte,
chi cꞌal sjije sjuli.
Yetoj pax oj,
ta ey tzet chin chej swaꞌne junoj jin mooso an,
chi cꞌal sjije swaꞌneni.
Yuxan,
wotaj an,
jaxca chi wute jin chejon ebꞌ tuꞌ,
quey pax tuꞌ chi skeꞌ ja walon masanil tzetyetal jaach tiꞌ,”
ẍi naj capitán tuꞌ,
ẍi ebꞌ tet Jesús.
9 Jaꞌ yet jix yabꞌen Jesús jaxca tuꞌ,
caw jix qꞌueya scꞌul yabꞌeni.
Catuꞌ jix oc tꞌanan yin ebꞌ ánima tzajan yintaj tuꞌ.
Jix yalon tet ebꞌ jaxca tiꞌ:
—Caw yel chi wal ey jex,
cꞌamto junoj a Israel chi wil yaon oc scꞌul yin Dios jaxca jun winaj tiꞌ,
ẍi Jesús.
10 Jaꞌ yet jix apni ebꞌ ẍejabꞌ bꞌey sna tuꞌ xin,
jix yilon ebꞌ tol xax waꞌxi scꞌul naj smooso naj tuꞌ yu Jesús.
Naj Achꞌe Jix Pitzcꞌu A Yu Jesús
11 Jix lawi tuꞌ xin,
jix too Jesús tuꞌ bꞌey jun conobꞌ Naín sbꞌi yetoj ebꞌ scuywom.
Ecꞌal ánima jix oc tzajan yintaj ebꞌ.
12 Jaꞌ yet lalan yapni ebꞌ scawilal jun conobꞌ tuꞌ,
jix yil ebꞌ tol ey jun camom lalan stoo mujlei.
Ecꞌal ebꞌ a conobꞌ tituꞌ tzajan oc yintaj.
Jaꞌ naj jix cam tuꞌ,
jun chꞌan naj yu xutx,
camnajxa yichamil ix txutxe tuꞌ.
13 Jaꞌ yet jix yilon oc Naj Kaawil yin ix txutxe tuꞌ,
jix okꞌ scꞌul Naj yin ix.
—Manche jaach okꞌi,
ẍi Jesús tet ix.
14 Catuꞌ jix sjitzontoj sbꞌa Jesús scꞌatan scaẍail naj camom tuꞌ.
Jix oc mitxꞌan yin sbꞌatxbꞌanil naj tuꞌ.
Jix oc linan ebꞌ bꞌatxnen oc tuꞌ.
Catuꞌ jix yalon Jesús tet naj camnajxa tuꞌ jaxca tiꞌ:
—Cha achꞌe,
chi wal ey jaach,
aan waanoj,
ẍi Jesús tet naj camnajxa tuꞌ.
15 Catuꞌ jix a chotan naj camnaj tuꞌ.
Jix cꞌoli skꞌanabꞌ a naj,
catuꞌ jix aletoj naj tet xutx yu Jesús.
16 Jaꞌ yet jix yilon ebꞌ ánima jun tiꞌ,
caw jix xiwa ebꞌ masanil.
Jix yalon watxꞌ kꞌane tet Dios:
—Jaꞌ jun ẍejabꞌ Dios jix ẍejtej cu xolwej tiꞌ,
caw miman yeloc apnoj,
ẍi ebꞌ.
Jix yalon pax ebꞌ jaxca tiꞌ:
—Caw jix jul Dios colwa kin,
jaon sconobꞌ Dios jon tiꞌ,
ẍi ebꞌ.
17 Jaꞌ jun tzet jix el yunen Jesús,
eyman jix abꞌcha yul-laj Judea,
yetoj bꞌey wanxa conobꞌlaj scawilal tuꞌ.
Juan el Bautista en Prisión
Cawan Ẍejabꞌ Naj Juan Bautista Jix Apni Skꞌanle Tet Jesús
18 Jaꞌ ebꞌ scuywom Juan Bautista jix bꞌet alon tet naj jantaj tzet jix el yunen Jesús.
19 Yuxan jix yawtetej cawan ebꞌ scuywom.
Catuꞌ jix ẍejontoj ebꞌ scꞌatan Jesús tuꞌ,
yu skꞌanlen ebꞌ ta jaꞌ Jesús tuꞌ,
jaꞌ jun lalan yechbꞌanen sjul ebꞌ,
ma ey junojxa chi yechbꞌane sjul ebꞌ xin,
20 yuxan,
jaꞌ yet jix apni ebꞌ scꞌatan Jesús jix yalon ebꞌ tet Naj:
—Jaꞌ naj Juan Bautista jix cu chejontej ey jaach tiꞌ jon,
yu cu kꞌanle ey jaach ta jaach Cristo* jaach,
ta jaach lalan jaach kechbꞌanen ja jul jon,
ma ey junojxa chi kechbꞌane sjul jon xin,
ẍi ebꞌ tet Jesús.
21 Jaꞌ yet jix skꞌanlen ebꞌ tuꞌ,
caw ey ebꞌ yaꞌey yu yal cꞌal tzet syaꞌilal,
cꞌal ebꞌ eyoc pena espíritu yin jix waꞌxi can scꞌul ebꞌ yu Jesús.
Ecꞌal pax ebꞌ cꞌam chi skeꞌ yilwani jix waꞌxi can sat ebꞌ yu.
22 Yuxan jix yal Naj Jesús tet ebꞌ ẍejabꞌ naj Juan tuꞌ jaxca tiꞌ:
—Paxanwejtoj bꞌey naj Juan tuꞌ.
Che yal tet naj tzet jix je yabꞌe,
cꞌal tzet jix je yil titiꞌ.
Che yal tet naj tol ey ebꞌ cꞌam taꞌ chi ilwi,
jal tinaniꞌ jix ilwi can a ebꞌ.
Yetoj pax ebꞌ coxoꞌ jix bꞌeya ebꞌ.a
Jaꞌ ebꞌ eyoc lepra yin,
jix waꞌxi can ebꞌ,
cꞌal ebꞌ cꞌam chi yabꞌe,
jix yabꞌ can a ebꞌ.
Ey ebꞌ camnajxa jix pitzcꞌu can aoj.
Lalan yabꞌen watxꞌ kꞌane yet colbꞌanile ebꞌ mebꞌa.b
23 Caw watxꞌ yet ebꞌ cꞌam chi somcha can el scꞌul win an.
Queytuꞌ che yute je yalon tet naj Juan tuꞌ yet oj jex apnoj,
ẍi Jesús tet ebꞌ.
24 Jaꞌ yet jix lawi spaxcantoj ebꞌ chejabꞌwom tuꞌ,
jix yalontej Jesús yu naj Juan tuꞌ tet ánima jaxca tiꞌ:
—Naꞌwejtej,
tzet jix bꞌet je yil bꞌey cusiltaj txꞌotxꞌ tuꞌ.
¿Jam junoj teꞌ aa chi bꞌilwi yu kaꞌeꞌ jix bꞌet je yilaꞌ?
25 ¿Tzet jix bꞌet je yil xin?
¿Ma jaꞌ junoj winaj watxꞌ spichil jix bꞌet je yilaꞌ?
Je yotaj tol jaꞌ ebꞌ watxꞌ spichil tuꞌ,
cꞌal ebꞌ miman tzetyetal ey tet,
jaꞌ bꞌey sna ebꞌ yaaw eecꞌ ebꞌ.
26 Ta manaj wan tuꞌ xin,
¿Tzet jix bꞌet je yilaꞌ?
¿Ma jaꞌ junoj yalomal el skꞌane Dios jix bꞌet je yilaꞌ?
Yalomal ton el skꞌane Dios jun jix bꞌet je yil tuꞌ.
Yutol jaꞌ naj Juan tuꞌ,
yel miman yeloc apnoj naj,
27 yutol jaꞌton skꞌaneal naj Juan tiꞌ,
yalnaj can Dios yul An Juun Tzꞌibꞌebꞌilcanoj,
bꞌey chi yal jaxca tiꞌ:
Oj jin chejtej jun jin chejabꞌ,
oj bꞌabꞌojtoj ja sattaj jaxca chi yun swaꞌnen junoj bꞌe,
jaxca tuꞌ,
oj yute swaꞌnen sbꞌeybꞌal ebꞌ ánima yu,
yet cꞌamto chach juli,
ẍi yul An Juun.c
28 Chi wal ey jex tol jaꞌ xol ánima yul yibꞌankꞌinal tiꞌ,
cꞌam junoj mactxequel ecꞌbꞌan yeloc apnoj yintaj Juan Bautista tuꞌ.
Jal pax ebꞌ eyoc Dios Yaawiloj,
yel ecꞌbꞌan swatxꞌil yet ebꞌ yintaj naj Juan tuꞌ,
caxcꞌal cꞌam yeloc apnoj ebꞌ,
ẍi Jesús tet ebꞌ.
29 Jaꞌ yet jix yabꞌen ebꞌ ánima yetoj ebꞌ tejom el tumin tzet jix yalaꞌ,
jix yalon ebꞌ tol caw watxꞌ Dios,
yutol jix yakꞌ akꞌle bautizar sbꞌa ebꞌ yu naj Juan tuꞌ.
30 Jal pax ebꞌ Fariseo yetoj ebꞌ cuywam yin sley Moisés,
ma akꞌle bautizar ebꞌ yu naj Juan tuꞌ.
Jaxca tiꞌ jix yute xꞌoxon eloj tol jaꞌ tzet chi yoche Dios yin ebꞌ,
cꞌam niꞌoj yeloc apnoj yul sat ebꞌ.
31 Jix yalon Naj Jesús tet ebꞌ ánima eyecꞌ tituꞌ jaxca tiꞌ:
—Jaꞌ ebꞌ ánima yet jun tiempoal tiꞌ,
oj waltej ey jex tzet utbꞌil yeoc snaꞌbꞌal ebꞌ.
32 Laan ebꞌ jaxca unin tucꞌal chi ecꞌabꞌ txombꞌal.
Ey la ebꞌ chi yal tet wanojxa yet uninal jaxca tiꞌ:
“Naꞌbꞌacꞌal jix ketne cu bꞌa cu sonli je yu,
ma pax cꞌal jex canalwoj.
Yetoj pax oj naꞌbꞌacꞌal jix cu bꞌitne wan bꞌit caw cusiltaj xacꞌal yoqui,
ma pax cꞌal jex okꞌ pax ketoj,”
ẍi ebꞌ.
Jaxca ebꞌ unin cꞌam chi sajchi tuꞌ,
queytuꞌ ebꞌ ánima chi wal tiꞌ an.
33 Yutol bꞌeybꞌalnebꞌil yu naj Juan tol cꞌam chi lowi,
cꞌam chi yucꞌ vino,
yuxan jaex che yalaꞌ,
tol ey jun pena espíritu chi etnen naj.
34 Jaꞌ yet jix jin jul xin,
jain Akꞌbꞌil Wopiso yu Dios xol ebꞌ ket animail tiꞌ.
Jain tiꞌ chin lowi,
chi wuqꞌue.
Jaex che yal pax jaxca tiꞌ win an:
“Jaꞌ Naj Jesús tuꞌ,
loꞌo cꞌal chi yoche chi yunne,
chi ucꞌwi pax vino.
Yamigo sbꞌa naj yetoj ebꞌ tejom el toolabꞌal,
cꞌal yetoj wanxa ebꞌ pena sbꞌeybꞌal,”
je chi win an.
35 Jal ebꞌ eyoc sjelanil Dios yin,
chi txeclo el yin ebꞌ yu tzet chi el yuneni,
ẍi Jesús tet ebꞌ.
Jix Bꞌetecꞌ Jesús Bꞌey Sna Jun Fariseo Simón Sbꞌi
36 Ey jun naj Fariseo jix awten Jesús lowoj,
jaꞌ yet jix apni ocoj catuꞌ jix ey chotan yin meẍa.
37 Asan xin,
jaꞌ bꞌey jun conobꞌ tuꞌ kaan jun ix ix caw otajbꞌil tol pena sbꞌeybꞌal.
Jaꞌ yet jix yabꞌen oc ix tol eyecꞌ Jesús low bꞌey sna naj Fariseo tuꞌ,
jix apni oc ix yetoj jun neet limeta nonaj yetoj jun ambꞌal caw sukꞌukꞌi yoc sabꞌ.d
38 Caw chi okꞌi yet jix apni oc kaan ix scawilal yajantaj Jesús.
Catuꞌ jix xꞌaon el yajan Jesús tuꞌ yetoj yal sat ix.e
Jix lawi cꞌal tuꞌ xin,
jix joꞌole taj yajan Naj yetoj xil yaꞌ ix,
catuꞌ jix tzꞌubꞌle el yajan Jesús yu ix.
Jix stobꞌon oc jun ambꞌal sukꞌukꞌi sabꞌ tuꞌ ix yin yajan Naj.
39 Jaꞌ yet jix yilon naj Fariseo jix awten Jesús tuꞌ,
jix snaꞌon naj jaxca tiꞌ:
“Ta yel ẍejabꞌ Dios jun winaj tiꞌ,
chim naꞌcha el yu tzet ixal jun chi mitxꞌon yajan tiꞌ.
Chim naꞌcha pax el yu Naj tzet utbꞌil yeoc ix,
tol pena sbꞌeybꞌal jun ix tiꞌ,”
ẍi naj yin snaꞌbꞌal.
40 Yu tuꞌ xin,
jix yakꞌon spajtzebꞌal Jesús tuꞌ tet naj jaxca tiꞌ:
—Cha Simón,
ey niꞌoj tzet chi woche chi wal ey jaach an,
ẍi Jesús tet naj.
—Al ey jin jaach Cuywam tzet chi yoche ja cꞌul cha walaꞌ,
ẍi naj tet Jesús.
41 —Kꞌinaloj ta ey cawanoj winaj ey sjec tet junoj naj caw ey stumin tinaniꞌ.
Ta 500 denario sjec junoj,
jal junojxa xin 50 denarione sjec.f
42 Catuꞌ ta cꞌam bꞌey chi yiꞌ chꞌen tumin tuꞌ ebꞌ.
Catuꞌ tucꞌal chi joꞌole qꞌuey sjec ebꞌ scawanil.
¿Mac junoj yel chi camel scꞌul yin naj ey stumin tuꞌ cha naꞌ?
ẍi Jesús tet naj.
43 —Jaꞌ chin naꞌ jain tiꞌ an,
jaꞌ naj yel miman sjec chi joꞌole qꞌuey yibꞌan yu naj tuꞌ,
jaꞌ naj tuꞌ yel miman chi camcꞌulnele naj,
ẍi naj Simón tuꞌ tet Jesús.
—Yel ton cha walaꞌ,
jaꞌton naj,
ẍi Jesús tuꞌ.
44 Jix lawi tuꞌ xin,
jix oc tꞌanan Jesús yin ix ix tuꞌ,
catuꞌ jix yalon Naj tet Simón tuꞌ jaxca tiꞌ:
—Jaꞌ yet jix jin jul yul ja na tiꞌ,
ma ja wakꞌ niꞌoj jaꞌ yet chin txꞌaon el wajan,
Jal jun ix ix tiꞌ,
jix xꞌaꞌel wajan yetoj yal sat.
Catuꞌ jix sjoꞌontaj wajan ix yetoj xil yaꞌ.
45 Ma ja tzꞌubꞌel jin tiꞌ yu ja txꞌoxon el ja camcꞌulal.
Jal pax jun ix tiꞌ xin,
yet tax cꞌal jix jin jul titiꞌ,
cꞌam cꞌal chi sbꞌej tzꞌubꞌon el wajan an.
46 Cꞌam niꞌoj yanil jin jolom jix ja wa atoj.
Jal pax jun ix ix tiꞌ xin,
jix stobꞌoc jun ambꞌal sukꞌukꞌi xacꞌal sabꞌ yin wajan tiꞌ an.g
47 Yuxan chi wal ey jaach,
caw miman scamcꞌulal jun ix ix tiꞌ,
yutol caw miman spenail jix joꞌole qꞌuey yibꞌan ix.
Jal pax mac niꞌan chꞌan spenail chi joꞌole qꞌuey yibꞌan xin,
niꞌan chꞌan scamcꞌulal chi xꞌoxoꞌ,
ẍi Jesús tet naj Simón tuꞌ.
48 Jix lawi tuꞌ xin,
jix yalon Jesús tet ix jaxca tiꞌ:
—Tol chi oc can mimancꞌulal yibꞌan ja penail wu an,
ẍi Jesús tet ix.
49 Catuꞌ jix kꞌoli yalon jaywanxa ebꞌ chotan ey yetoj Jesús tuꞌ jaxca tiꞌ:
—¿Bꞌey jix titoc yip jun winaj tiꞌ?
Ilaꞌla,
chi skeꞌ sjoꞌon can qꞌuey cu penail,
ẍi ebꞌ.
50 Catuꞌ jix yalon tet ix ix tuꞌ jaxca tiꞌ:
—Jix jaach colchai,
yutol jix ja waoc ja cꞌul win an.
Yuxan,
paxan yin tzalacꞌulal,
ẍi Jesús tet ix.
Mujer Pecaminosa Perdonada